Lənkəranda narkotik vasitələrin qanunsuz dövriyyəsi ilə məşğul olan şəxs saxlanılıb. ANS PRESS-in bölgə müxbirinin verdiyi məlumata görə, Lənkəran şəhər polis şöbəsi əməkdaşlarının keçirdiyi əməliyyat tədbirləri nəticəsində narkotik vasitələrin qanunsuz dövriyyəsi ilə məşğul olan 54 yaşlı Faiq Məmmədtağı oğlu Məmmədov saxlanılıb. O, icarəyə götürdüyü Xəzər dənizi sahilində mövsümü fəaliyyət göstərən “Çimərlik” adlı çayxana və kafedə müştərilərə çay dəstgahının tərkibində müxtəlif növ narkotik vasitələr təklif edirmiş. Obyektdə aparılan axtarşlar zamanı satış üçün hazırlanan narkotik vasitələr aşkar olunaraq götürülüb.

Faiq Məmmədov narkotik vasitələrin çayxana və kafenin müştərisi olan tanımadığı İran İslam Respublikasının vətəndaşı tərəfindən göstərdiyi xidmət müqabilində ona verildiyini desə də, istintaq onun əlaqəli işlədiyi şəxsləri axtarır. Dindirilmə zamanı Faiq Məmmədov tutuduğu əməlindən peşiman olduğunu bildirib.

Qeyd edək ki, bu, sayca onun eyni əmələ görə keçirdiyi ikinci peşimançılıq hissidir. Bundan öncə də, saxlanılan şəxs narkotik vasitələrin satışında təqsirli bilinərək məhkumluq həyatı yaşayıb. Artıq Lənkəran şəhər polis şöbəsində cinayət işi başlanıb. Bu dəfə Faiq Məmmədovu 3 ildən 7 ilədək həbs cəzası gözləyir.