Milli Məclisdə 1 İyun - Uşaqların Beynəlxalq Müdafiəsi Günü münasibəti ilə “Mənim səsim-mənim hüquqlarım: parlamentdə müzakirə” adlı dəyirmi masa keçirilib.

Butov.az-ın APA-ya istinadən məlumatına görə, tədbirdən əvvəl MM-in foyesində uşaqların əl işlərindən ibarət sərgi ilə tanışlıq olub.

Dəyirmi masada MM-in vitse-spikeri, İnsan hüquqları komitəsinin sədri Bahar Muradova, Ailə, Qadın və Uşaq Problemləri üzrə Dövlət Komitəsinin sədri Hicran Hüseynova, UNİCEF-in Azərbaycandakı nümayəndəsi Edvard Karvardin, deputatlar və uşaqlar iştirak edib.

B. Muradova bildirib ki, Azərbaycan dövləti uşaq hüquqlarının qorunması ilə bağlı beynəlxalq konvensiyalardan irəli gələn öhdəlikləri yerinə yetirməkdədir: “Bu gün bütün dünyada, o cümlədən Azərbaycanda Uşaqların Beynəlxalq Müdafiəsi Günü qeyd edilir. Azərbaycan bütün insan hüquqlarına, onun tərkib hissəsi olan uşaq hüquqlarına çox hörmətlə, diqqətlə yanaşır. Dövlətimizin əsas siyasəti uşaqların təhsilinin, sağlamlığının təmin edilməsi, uşaqlar üçün bərabər imkanların yaradılmasıdır və bunun üçün bütün addımlar atılır”.

B.Muradova əlavə edib ki, uşaqların daha firavan yaşaması üçün atılan addımlardan biri də 2009-cu ildə ölkədə “Uşaq ili”nin elan edilməsi olub. Bu il həm də Uşaq Forumunun keçiriləcəyini deyən MM sədrinin müavini bildirib ki, həmin forumda səslənən təklifləri, qaldırılan məsələləri parlamentin sonrakı fəaliyyəti dövründə nəzərə alacaqlar.

Hicran Hüseynova isə uşaqlara qarşı dövlət qayğısından danışaraq hər il uşaq hüquqlarının müdafiəsi ilə bağlı müxtəlif tədbirlər keçirildiyini deyib. Komitə sədri uşaqların hüquqlarının müdafiəsi sahəsində valideyn məsuliyyəti ilə bağlı problemlərin həllindən də danışıb.

Tədbir iştirakçıların çıxışları ilə davam edib.