“Qarabağ”ın oyununa 25 minə yaxın bilet satılıb

Çempionlar Liqasının pley-off mərhələsində keçiriləcək “Qarabağ” – “Dinamo” (Zaqreb) cavab oyununa bilet satışı davam edir.
Matça 24700 bilet satılıb.
Tofiq Bəhramov adına Respublika stadionunda keçiriləcək matçın biletlərinin qiyməti müvafiq olaraq 5, 20, 30, 40, 75 və 150 manat təşkil edir.
Azarkeşlər qarşılaşma üçün biletləri iTicket.az-ın satış məntəqələri (iTicket.az-da onlayn satış), Park Bulvardakı “Qarabağ” FK-nın Fan-Şopu və Tofiq Bəhramov adına Respublika stadionunun kassalarından əldə edə bilərlər.
Qeyd edək ki, avqustun 28-i keçiriləcək “Qarabağ” – “Dinamo” görüşü saat 20:45-də başlayacaq. Xatırladaq ki, ilk oyun Xorvatiya təmsilçisinin 3:0 hesablı qələbəsi ilə yekunlaşıb.

UEFA-dan Azərbaycan klublarına ödəniş

UEFA 2024/2025 mövsümündə avrokuboklarda (Avropa Liqası, Konfrans Liqası) mübarizə aparan Azərbaycanın 3 klubuna ödəniş edib.
Ödənişlər “Zirə”yə Avropa Liqasındakı, “Sumqayıt”a (tam ödəniş) və “Sabah”a isə Konfrans Liqasındakı çıxışa görə edilib.
"Zirə" 349600, "Sabah" 174600 avro qazanıb. "Sumqayıt"a isə 524600 avro ayrılıb.
Qeyd edək ki, ödənişlər AFFA-nın vasitəçiliyi ilə müvafiq klubların hesabına köçürülüb.

DÜNYA BOKS KƏMƏRİNƏ ÖGEY MÜNASİBƏT
və yaxud
GƏNCLƏR VƏ İDMAN NAZİRLİYİ BEYNƏLXALQ İDMAN YARIŞLARINDA “HEYDƏR ƏLİYEV ADINA DÜNYA BOKS KƏMƏRİ” TƏŞKİLATINA DİQQƏT VƏ QAYĞINI ARTIRMALIDIR.

Zərdüştlüyün vətəni sayılan Azərbaycan ən qədim dövrlərdən bəri həm də milli oyun rəqsləri ilə də dünyaya öz sözünü demişdir.”Avesta”ya görə cəngavərlik, igidlik, pəhləvanlıq, at çapma, güləş, ox atma və qılınc oynatma yarışlarının tarixi çox qədim dövrlərə gedib çıxır. Eramızdan əvvəl IV-II minillikləri əhatə edən tunc dövrü Azərbaycan idmanının başlanğıc mərhələsi sayılır.
İdman oyunları müqəddəs sayılan “Avesta”da pəhləvanların düşmən üzərində qələbə çalmaq dözümlülüyü, iradəliliyi və qorxmazlığı xüsusi yer tutur.
Zəngin və şərəfli idman tarixi yaşayan xalqımız bu gün də sağlam həyat, gümrah bədən, fiziki kamillik prinsiplərini və milli dəyərləri qürurla qoruyub saxlaya bilmişdir.
Bu gün dünya olimpiadalarında ən yüksək yerlərin qalibi olan idmançılarımız Azərbaycanın milli atributları olan üçrəngli Bayrağımızı başları üzərinə qaldırması və dövlət himnimizi mötəbər arenalarda səsləndirməsi kimi müqəddəs bir işə öz imzalarını atırlar. Əsası Ulu öndər Heydər Əliyevdən başlanan və ölkə prezidenti İlham Əliyevin Azərbaycan idmanına göstərdiy yüksək qayğı bu gün xalqımızın güvənc yeri və qürur mənbəyidir.
Azərbaycanın ev sahibliyi etdiyi beynəlxalq futbol turnirləri‎, Dünya Taekvondo Çempionatı‎, İdman növlərinə görə keçirilən beynəlxalq yarışlar‎, şahmat üzrə beynəlxalq yarışlar‎, 2002 Güləş üzrə Avropa Çempionatı, 2015 Avropa Oyunları, 2017 İslam Həmrəyliyi Oyunları, 2017 Voleybol üzrə qadınlararası Avropa Çempionatı dediklərimizə parlaq sübutdur.
Bu cür uğurlar hər bir Azərbaycanlının qəlbində fərəh hissi oyatmaya bilməz. Axı, İdman təkcə sağlamlıq yox, həm də sağlam düşüncə, sağlam ruh, saf niyyət deməkdir. Bunu ölkəmizdə keçirilən beynəlxalq idman yarışlarında iştirak edən əcnəbi idmançıların və qonaqların gözlərindən və davranışlarından da oxumaq mümkündür.Onlar ölkəmiz haqqında özləri ilə mehribanlıq, səmimiyyət, dostluq, qonaqpərvərlik, mərdlik kimi millətimizə xas olan keyfiyyətləri və keçirdikləri xoş anların xatirələrini də aparırlar.
Bəs, həmişə dövlət rəhbərinin himayəsində olan idmanımıza başçılıq edən bəzi məmurlar, səlahiyyət sahibləri necə, görəsən, müqəddəs sayılan peşə borclarını vicdanla yerinə yetirə bilirlərmi?! Məsul olduqları sahənin cavabdehliyini dərk edirlərmi?! Dövlətə, Prezidentə, milli atributlarımıza sadiq qalırlarmı?!
Təəssüflər olsun ki, bu sahədə də müəyyən boşluqlar və öz həllini tapmayan nöqsanlar hələ də mövcuddur.
Dünyanın bir çox inkişaf etmiş Avropa ölkələrində Azərbaycan Evlərinin nəzdində idman və “Ana dili” məktəblərinin, Koordinasiya Şuralarının açılması xaricdə yaşayan həmvətənlərimizin öz milli dəyərlərini qoruyub saxlanılması və onların təbliğ olunması istiqamətində aparılan məqsədyönlü işlərin ən qısa sübutudur.
1997-ci ildə Ukraynaya rəsmi səfər edən Prezident Heydər Əliyev orada yaşayan azərbaycanlılarla görüşdə demişdi:
“Harada yaşamasından asılı olmayaraq, heç bir azərbaycanlı öz Vətənini, ulu babalarını, dilini unutmamalıdır. Harada yaşayırsansa yaşa, yaxşı da, pis də yaşasan, gərək ürəyin öz Vətəninlə, torpağınla döyünsün. Gərək nəbzin Vətənin nəbzi ilə vursun. Bu vətənpərvərlik hissi bizim hər birimizdə olmalıdır. O cümlədən, respublikamızdan kənarda, Ukraynada yaşayan azərbaycanlılarda da olmalıdır”.
Ölkədaxili İdman yarışlarına ev sahibliyi eləmək nə qədər çətin və məsuliyyətlidirsə, xaricdə yaşayan həmvətənlərimizin bu sahədə apardıqları korporotiv işlər ondan da ikiqat artıqdır.Yaşadıqları ölkənin konstitutsiya qanunları çərçivəsində fərdi və ictimai fəaliyyət vərdişlərinə yiyələnmək, məşğu olduqları sahənin məsuliyyətini dərk etmək, maddi-mənəvi dəyərlərimizi saxlamaq şərti ilə qeyri millətlərlə qaynayib qarışmaq, qarşılıqlı hörmət və ən əsası ümum Avropa dəyərləri kontekstində ortaq və beynəlmiləl mədəniyyətə yiyələnmək kimi funksional həyat tərzi ilə barışıb öz mili-mənəvi dəyərləri çərçivəsində hərəkət etmək, duruş gətirmək, əlbəttə ki, asan iş deyil. Bu baxımdam soydaşlarımızın vətənçilik və Azərbaycançılıq kimi müqəddəs hisslərini qoruyub saxlamaq və dövlətçilik istiqamətində vahid ideya ətrafında birləşib irəlləyişlər qazanməq hər birimizdən böyük məsuliyyət tələb edir.
2023-cü ildə Almaniyanın Maqdeburq şəhərində Diasporla İş üzrə Dövlət Komitəsinin sədri Fuad Muradov, Bazar İqtsadiyyati İnstitunun rəhbəri Rolf Kunş və Maqdeburq şəhərinin deputatı Bernd Heyneman və başqa tanınmış şəxslərin iştirakı ilə Azərbaycan Evinin möhtəşəm açilişı yuxarıda dediklərimizin əyani sübutu kimi dəyərləndirilməlidir.Bu cür mötəbər insanların xeyir-duası ilə açılıb fəaliyyətə başlayan Azərbaycan Evinin və onun nəzdində “Ana dili” məktəbinin Heydər Əliyev adına və Diaspora Boks Liqasının fəaliyyətinin genişlənməsi ümumu məqsədlərimiz naminə daha böyük imkanlar yaradır.
2007-ci ildə LBN Boks adlı təsis etdilən klub Azərbaycanın tanıdılmasında böyük rol oynadı. Almaniya idman ictimaiyyətinin böyük marağına səbəb olan bu kilub öz nüfuzunu artıraraq 2012-ci ilin may ayında Heydər Əliyev adına olan böyük bir Dünya Boks Təşkilatına çevrilmiş oldu. Yarandığı gündən fəaliyyətə başlayan təşkilat təkcə Almaniyada deyil, dünyanın bütün ölkələrində fəaliyyət göstərməyə başladı.Təskilatın nəzdində təsis edilən Azərbaycan idmançıları ilə yanaşı müxtəlif ölkələrin idmançıları da bu Ali mükafat uğrunda peşəkar rinqdə mübarizə aparırlar. Təşkilatın əsas məqsədi Azərbaycan boksçları ilə yanaşı əcnəbi boksçları da bu təşkilata cəlb etməklə beynəlxalq arenalarda üçrəngli bqayrağımızı dalğalandırmaq , himnimizi səsləndirmək, Ulu Öndərin idmana olan tövsiyyələrinə sadiq qalmaq və təsis olunan “Heydər Əliyev adına Dünya Boks Kəməri” ali mükafatını əsrlər boyu əbədiləşdirmək misiyasını həyata keçirməkdən ibarətdir. Çünki bu böyük layihənin və böyük uğurun ölkəmiz üçün hansı şan-şöhrət və xeyir gətirəcəyini elə indidən də təsəvvür eləmək çətin deyil.
Boks dili ilə desək, rəqibi nokauta salana bu Kəmərin təqdim olunmasının çox böyük siyasi mənası var. Şahmat oyununa bərbər sayılan bu uzaqgörənlik və uzun gedişli dünyəvi mükafat Azərbaycana və onun idmanına həmişə başucalığı gətirəcəkdir. Rinqdə çoxlu xallar qazanan oyunçunun bu mükafata layiq görülməsi təkcə fiziki deyil, həmçinin mənəvi və coğrafi anlamda qalib olmasını da lazımınca şərtləndirəcək.Necə deyərlər, onun siyasi dünyagörüşünə və mənəvi zənginliyinə də müsbət təsir göstərəcək, eyni zamanda, bütöv bir məmləkətin-Azərbaycanın mənəvi gücünə söykənəcəyini öz üzərində daima hiss edəcək. Ümid edirik ki, Gənclər və İdman Nazirliyi bu möhtəşəm Ali mükafatın dünyanın idman arenasında əbədiləşdirilməsində öz diqqət və qayğısını əsirgəməyəcəkdir.
Əlbəttə, bu taleyüklü və böyük miqyaslı möhtəşəm layihənin başa çatdırılmasının çətinliyi və ağırlığı dərk ediləndir.Bu böyük zəhmət, gərgin fəaliyyət və böyük iradəli işçi qrupunun zəhmətləri hesabına reallaşa bilər. Əsas məsələ odur ki, bu böyük iş çoxdan başlayıb və bir çox uğurlara imza atmaqda davam etməkdədir. Yalnız və yalnız irəli getmək lazımdır.
Almaniyada lobbiçilik fəaliyyətini artırmaq, eləcə də digər Avropa ölkələrində yaşayan gənclərimizin sistemli həyat və peşə fəaliyyətlərini müəyyənləşdirməkdə, Azərbaycan Evinin və onun nəzdində Koordinasiya Şuralarının, idman və “Ana dili”məktəblərinin fəaliyyətlərini gücləndirməkdə Diasporla İş üzrə Dövlət Komitəsinin göstərdiyi qayğını görəsən, cavabdeh dövlət qurumları niyə göstərmir?!
Heydər Əliyev adına Dünya Boks Komitəsinin rəhbəri, Almaniya Azərbaycanlıları Alyansı İdarə Heyətinin üzvü Yaşar Niftəliyev Gənclər və İdman Nazirliyinə etdiyi müraciətləri nə üçün cavabsız qalmalıdır?!
Diasporla İş üzrə Dövlət Komitəsi hər ilin may ayında -- Ulu Öndərin doğum günündə bu kəmərlərin geniş miqyasda təbliğatına geniş yer ayırır.Gənclər və İdman Nazırlıyinin dəstəyi də hiss edilsə və birlikdə hərəkət istiqamətləri müəyyənləşsə, təbii ki, ali məqsədlərə doğru böyük addımlar atılmış olardı.Komitə 12 illik gərgin iş fəaliyyətinin göstəricisi kimi 2023-cü ilin sentyabr ayında dünyanın “BoxRec” sıralarına daxil olmağına baxmayaraq Gənclər və İdman nazirliyindən quruca təbrik məktubu da almayıb.
Boks iki adamın müəyyən qaydalar içində, hücum və müdafiə məqsədiylə yumruqlarını istifadə edərək döyüşdüyü bir idmandır.
Boks demək olar ki, cəmiyyətin yarandığı ilk dövrlərdən dünya xalqları arasında yayılmağa başlayıb. Beş min il bundan əvvəl Misir və Babilistanda mövcüd olan yumruq döyüşü bu idman növünün əsasını qoyub. Boks eramızdan əvvəl 688-ci ildə antik Olimpiya oyunlarının proqramına daxil edilmişdi.
Bunları xatırlatmaqla heç də yazı ilə boks “manej”ində yox, yazı “maneyi”ndə söz zərbələrinin gücünü əsla nümayiş etdirmək fikrində deyiləm. Məqsəd hədəfə atılan söz “zərbə”lərindən Boks idmanımızın gələcəyi namınə real nəticələr və uğurlar əldə etməkdir. İnanıram ki, kim olur-olsun - hər bir vətəndaş, məmur və o cümlədən, hər bir idmançı Vətənimiz, Dövlətimiz və İdmanımız namınə daha böyük qələbələrə imza atmalıdır.
Əmir Pəhləvan
Yazıçı-dramaturq,
“İlham” qəzetinin redaktoru

"Qarabağ" öz meydanında məğlub oldu

Futbol üzrə Azərbaycan Premyer Liqasında IV turun növbəti oyunu keçirilib.
Günün ilk görüşündə “Qarabağ” doğma meydanında “Turan Tovuz”u qəbul edib. “Azersun Arena”da baş tutan matç qonaqların 1:0 hesablı qələbəsi ilə yekunlaşıb. Tovuz təmsilçisinin heyətində 18-ci dəqiqədə Otto Con penaltini dəqiq yerinə yetirib.
Günün ikinci qarşılaşmasında “Neftçi” “Araz-Naxçıvan”ın qonağı olub. “Live Bona Dea Arena”da təşkil olunan oyunda hesab açılmayıb.
Qeyd edək ki, turun açılış matçında “Səbail” “Kəpəz”ə 4:0 hesabı ilə qalib gəlib.

"Qarabağ"ın 1 milyon avroluq yeni transferi

"Qarabağ” yeni transferini açıqlayıb.
Ağdam klubu Emmanuel Addaini heyətə cəlb edib.
İspaniyanın “Alkorkon” klubu ilə aparılan danışıqlar müsbət nəticələnib və 23 yaşlı futbolçu ilə 2 illik müqavilə imzalanıb. Emanuel Addai üçün klubuna 1 milyon avro ödənilib. Hücumameylli yarımmüdafiəçinin son klubu “Alkorkon” olub.
O, bunadək Fransada “Bobiqni” klubunda (2021-2022) çıxış edib.

3 qadın güləşçimiz bürünc medal qazandı

İordaniyanın Amman şəhərində keçirilən 17 yaşadək yeniyetmələr arasında dünya çempionatında qadın güləşi üzrə yarışa yekun vurulub.
Mundialda iştirak edən Azərbaycanın 6 qız güləşçisindən 3-ü fəxri kürsüdə yer alıb.
Nəzrin Əhmədli (40 kiloqram) kanadalı İraabir Suç (12:1) və türkiyəli Liva Çelikə (tuş) tam üstünlüklə qalib gələrək yarımfinala yüksəlib. Finalın bir addımlığında ukraynalı Kamila Kuçmaya (0:5) məğlub olan Əhmədli bürünc medal uğrunda qarşılaşmada macarıstanlı Vivyen Şentpaladan güclü olub – 11:6.
Günay Qurbanova (61 kiloqram) rusiyalı Zalina Totrovaya (AİN) 9:4 hesabıyla, daha sonra isə iordaniyalı Maya İşakata vaxtından əvvəl (10:0) qalib gələrək yarımfinala yüksəlib. O, yarımfinalda yaponiyalı Sae Noquçiyə məğlub olub – 0:5. Qurbanova bürünc medal uğrunda qarşılaşmada hindistanlı Racnita Racnitanı “tuş”la üstələyib.
Zəhra Kərimzadə (69 kq) 1/8 finalda ukraynalı Oleksandra Rıbaka müqavimət göstərə bilməyib – 0:10. O, təsəlliverici görüşdə Kıjjıbek Jarkinbayevanı mübarizədən kənarlaşdırıb – 3:1. Zəhra üçüncü yer uğrunda görüşdə türkiyəli İlayda Cinlə üz-üzə gəlib. Qarşılaşmanın son saniyələrində işlətdiyi 4 xallıq fənd idmançımıza 6:4 hesablı qələbə qazandırıb.
Beləliklə, Azərbaycan millisi 3 bürünc medalla dünya çempionatını başa vurub. Bu isə medalların sayına görə son 9 ilin ən yaxşı nəticəsidir. Böyük məşqçi Rövşən Umudov və məşqçi Həsrət Məmmədyarovun rəhbərliyi altında komanda hesabında 6-cı yeri tutan yığmamız 55 xal toplayıb ki, bu da U-17 dünya çempionatları tarixində komandamızın topladığı ən yüksək xaldır.

"Neftçi"nin növbəti transferi

“Neftçi” daha bir transferini həyata keçirib.
“Ağ-qaralar” seneqaləsilli ispaniyalı müdafiəçi Mustafa Seki heyətinə cəlb edib. 24 nömrəli formanı geyinəcək 28 yaşlı futbolçu ilə 3 illik müqavilə bağlanılıb.
Həm müdafiənin, həm də yarımmüdafiənin sol cinahında oynamağı bacaran M.Sek İspaniya “Barselona”sının müxtəlif yaş qrupu komandalarında, İtaliyanın “Latsio”, “Roma” və digər klublarında çıxış edib, Niderland və Portuqaliya komandalarında oynayıb. Sonuncu klubu “Portimonense” (Portuqaliya) olub.

"Azərbaycan futboluna canımı və ürəyimi vermişəm"

“Neftçi”nin oyunuçusu Qara Qarayev əvəzedicilər komandasına göndərilməsi barədə qərara reaksiya verib.
Bu barədə o, özünün sosial media hesabında paylaşım edib.
“Dəstəyinizə və xoş sözlərinizə görə hər kəsə təşəkkür edirəm. Futboldakı karyeram həmişə sevdiyim idmana olan hörmət və fədakarlıq ilə bağlı olub. Mən Azərbaycan futboluna canımı və ürəyimi vermişəm və mənim illərdir verdiyim töhfəmin sual altına alınmasını görmək məni ruhdan salmır. Əksinə mən öz yoluma və sizlərə sadiq qalıram və komandamı dəstəkləməyə və bacardığım qədər töhfə verməyə davam edəcəyəm.
Ümid edirəm ki, qərar qəbul edənlər təcrübənin dəyərini və uzun müddət xidmət edən oyunçuların layiq olduqları hörməti dərk edəcəklər. Mənim diqqətim idmanımızın müsbət tərəflərinə və Azərbaycan futbolunun gələcəyinə yönəlib.
Futbola olan bağlılığım dəyişməzdir və üzərimə düşən hər rolda ən yaxşı şəkildə çalışacağam. Hər bir çətinliyin yeni bir böyümə və müsbət təsir imkanı gətirdiyinə inanıram”.
Qeyd edək ki, “Neftçi” Azərbaycan yığmasının üzvü Qara Qarayevi əvəzedici komandaya göndərib. Buna səbəb kimi klubunun yeni baş məşqçisi Roman Qriqorçukun 31 yaşlı oyunçunu əsas heyətdə görmək istəməməsi göstərilib.

İki güləşçimiz dünya çempionu oldu

Azərbaycanın iki güləşçisi İordaniyanın Amman şəhərində davam edən U-17 dünya çempionatında qızıl medal qazanıb.
Turan Daşdəmirov (51 kq) və Ayxan Cavadov (60 kq) mundialın qalibi olublar.
Final görüşlərində Daşdəmirov qırğızıstanlı Kutman Kalbayevə, Cavadov isə gürcüstanlı Vaxtanq Loluaya qalib gəlib.
Qeyd edək ki, daha əvvəl Əmrah Əmrahov (48 kq) yarışın bürünc mükafatına sahib çıxıb.

Azərbaycan yığmalarının heyəti bəlli oldu

Basketbolun 3x3 növü üzrə Avropa kubokunda mübarizə aparacaq Azərbaycan millilərinin heyəti bəlli olub.
Kişilərdən ibarət yığmamızın formasını Amil Həmzəyev, Cəbrayıl Əkbərov, Ender Poladxanlı və Cordan Devis geyinəcək.
Qadınlardan ibarət komandada isə Tatyana Deniskina, Aleksandra Mollenhauer, Dina Ulyanova və Mersedes Uolker yer alacaq. Avqustun 22-də start götürəcək Avropa kuboku ayın 25-dək davam edəcək.
Qeyd edək ki, turnirin oyunları Avstriyada keçiriləcək.