29-05-2025, 15:57
Bağçada azyaşlıya qarşı zorakılıq - Digər müəllimlə bağlı da tədbir görüləcək
"Lənkəran Kaspi Kids" bağçasında müəllimin uşağa şiddət göstərməsi ilə bağlı görüntülər yayılıb.
Sosial şəbəkələrdə yayılan görüntüdən məlum olur ki, müəllim uşağı qəfil yerindən qaldırır, digər azyaşlını su qabını əlində tutmağa məcbur edir. Ardından məhz onun əli vasitəsilə uşağın başına zərbə endirir.
Hadisə nəticəsində uşaq baş nahiyəsindən xəsarət alıb. Məsələ ilə əlaqədar DİN-in Mətbuat Xidmətinin Lənkəran regional qrupundan verilən məlumata görə, həmin məsələ ilə bağlı hazırda Lənkəran Şəhər Rayon Polis Şöbəsində təhqiqat araşdırması aparılır.
Şirkətdən bildirilib ki, hadisəni törədən müəllim işdən çıxarılıb. Həmçinin, bağçanı işlədən şirkətlə bağlanan françayzinq müqaviləsi ləğv edilib.
Məsələ ilə əlaqədədar Ailə, Qadın və Uşaq Problemləri üzrə Dövlət Komitəsinin uşaq məsələləri üzrə şöbəsinin əməkdaşı Şəbnəm Cəfərova bildirib ki, Komitə yerli icra hakimiyyəti orqanı ilə əlaqə saxlayıb:
"Lənkəran şəhərində baş verən bu hadisə ilə bağlı biz dərhal yerli icra orqanı ilə - Lənkəran şəhər İcra Hakimiyyətinin uşaq hüquqlarını müdafiəsi üzrə komissiya ilə əlaqə saxlamışıq. Artıq bizə bildirildi ki, yerli icra hakimiyyəti orqanı tərəfindən uşağın ailəsinə dəstək göstərilib. Hazırda müəllim işdən azad olunub. Amma məsələ bununla yekunlaşmır. Cinayət işi açılıb. Hazırda hüquq-mühafizə orqanlarında cinayət işi açılıb".
Ş.Cəfərova videoda görünən digər müəllimlə də bağlı tədbir görüləcəyini deyib:
"Eyni zamanda videodanda göründüyü kimi həmin zorakılıq törədən müəllimin yanındakı digər müəllim də hadisəyə etinasızlıq göstərir. Bu özü də zorakılığın bir növüdür. Uşaq ağlayır, çətin vəziyyətdədir, amma digər müəllim heç reaksiya vermir. O, müəllimlə də bağlı iş həyata keçiriləcək. Ümumiyyətlə, bağçanın fəaliyyəti ilə bağlı məsələ ön plandadır. Hazırda iş davam etdirilir. İşin yekununa uyğun olaraq digər məlumatlar da veriləcək".
29-05-2025, 15:24
Niaqara şəlaləsi Azərbaycan bayrağının rəngləri ilə işıqlandırıldı
Kanadanın Niaqara şəlaləsi 28 May – Müstəqillik Günü münasibətilə Azərbaycanın Dövlət Bayrağının rəngləri ilə işıqlandırılıb.
İşıqlandırma mərasimi Kanadada fəaliyyət göstərən “Vətən” Azərbaycan İncəsənət və Mədəniyyət Mərkəzinin, Kanada Azərbaycan Evinin və Amerika Orta Qərb ştatları üzrə Azərbaycan Mərkəzinin (ACMA) birgə təşkilatçılığı ilə baş tutub.
Kanadada yaşayan Azərbaycan icması, eləcə də Azərbaycana dost münasibət bəsləyən xalqların nümayəndələri mərasimi böyük sevinc və coşğu ilə izləyiblər. Onlar “Azərbaycan”, “Xudayar təsnifi” və digər bir sıra musiqilərin sədaları altında rəqs ediblər.
Bundan əlavə, “Vətən” Azərbaycan İncəsənət və Mədəniyyət Mərkəzinin və Kanada Azərbaycan Evinin təşkilatçılığı ilə Torontodan Niaqara Fols şəhərinə avtoyürüş də keçirilib.
Hadisə ərazidə olan yerli sakinlərin və turistlərin diqqətini cəlb edib. Aksiya ilə maraqlananlara Azərbaycanın Müstəqillik Günü haqqında ətraflı məlumat verilib.
28-05-2025, 22:22
Araz Musayev niyə bıçaqlanıb?
Azərbaycan Muay Tay Federasiyasının prezidenti, 9 qat dünya çempionu Araz Musayevin Türkiyədə bıçaqlanmasının təfərrüatı məlum olub.
Türkiyənin Antalya şəhərində keçirilən İFMA dünya çempionatına Azərbaycandan 14 nəfərlik heyət qatılıb.
Muay Tay Federasiyasının prezidenti Araz Musayev isə heyətə başçılıq edib.
Dünən keçirilən görüşdə Azərbaycan yığma komandasının üzvü yarımfinala yüksəlib. Bu gün günorta saatlarında keçirilən yarışda Araz Musayevlə türkiyəli idmançı arasında mübahisə yaranıb. Arenada yaranmış mübahisə çempionatın təşkilatçıları tərəfindən yatırılıb və turnir davam edib. Nahar fasiləsində türkiyəli nümayəndə heyətinin rəhbəri ilə Araz Musayev mübahisə edib və onlar arenanın binasından kənara çıxıb küçədə yenidən dalaşmağa başlayıblar.
Hadisə nəticəsində Araz Musayev kürək nahiyəsindən bıçaqlanıb. O, təcili xəstəxanaya çatdırılaraq əməliyyat olunub.
Hazırda Araz Musayevin səhhəti sabit-ağır qiymətləndirilir.
28-05-2025, 20:16
Qarabağda səslənən hər not Azərbaycan xalqının dirçəlişinin səsidir
Azərbaycanın nailiyyətləri ümumi qürur mənbəyidir. Qardaşım İlham Əliyevin töhfəsi sayəsində Türkiyə-Azərbaycan əməkdaşlığı gündən-günə güclənir və təkcə region deyil, bütün dünya üçün əməkdaşlıq nümunəsinə çevrilir.
Bunu Türkiyə Prezidenti Rəcəb Tayyib Ərdoğan Laçın şəhərində 28 May - Müstəqillik Gününə həsr olunmuş konsertdən əvvəl çıxışında deyib.
Ərdoğan keçmişdən dərs almağa və regionda davamlı sülh, etimad və mehriban qonşuluq istiqamətində addımlar atmağa çağırıb. "İnanırıq ki, Müzəffər Ali Baş Komandan İlham Əliyev regionda sülhün memarı kimi öz adını tarixə yazacaq", - Türkiyə lideri bildirib.
Onun sözlərinə görə, Türkiyə qardaş Azərbaycanla əlaqələri daha da gücləndirməkdə qərarlıdır. “Biz həm kədərdə, həm də sevincdə Azərbaycan xalqının yanında olacağıq”, - deyən Türkiyə lideri Azərbaycan və Türkiyənin qardaşlığının əbədi olaraq davam edəcəyinə ümidvar olduğunu bildirib. O, qeyd edib ki, 1918-ci ildə Azərbaycanda yaradılmış Cümhuriyyət azadlıq və müstəqillik arzusunun təzahürü olduğu kimi, Qarabağdakı Qələbə də müasir Azərbaycanın güclənməsinə və çiçəklənməsinə töhfə verir.
Prezident Rəcəb Tayyib Ərdoğan deyib: "1918-ci ildə alovlanan azadlıq məşəli bu gün Azərbaycanın yolunu daha da işıqlandırır. Azad edilmiş Qarabağda səslənən hər not Azərbaycan xalqının dirçəlişinin səsidir".
28-05-2025, 19:25
Gəncə sakini Rusiya-Ukrayna müharibəsində həlak oldu
Rusiya-Ukrayna müharibəsində Rusiya tərəfindən döyüşlərdə iştirak edən Gəncə sakini həlak olub.
Gəncə şəhərində anadan olmuş, Rusiya vətəndaşı 1977-ci il təvəllüdlü Orxan Rüstəmov martın 22-də gedən döyüşlər zamanı həlak olub.
O, fevral ayında Rusiya-Ukrayna arasında gedən döyüşlərə qatılıb. Mərhumun qardaşı Sərxan Rüstəmov bildirilib ki, Orxan Rüstəmovun həlak olması ilə bağlı onlara 4 gün əvvəl məlumat verilib.
Orxan Rüstəmovun nəşi sabah Gəncə şəhərinə gətiriləcək. Mərhumun sabah Gəncədə dəfn olunması nəzərdə tutulub.
Qeyd edək ki, Rusiya-Ukrayna döyüşlərində həlak olan Orxan Rüstəmov ailəli olub, onun iki övladı var.
28-05-2025, 18:45
Zakir Həsənov Yaşar Gülərlə Laçında görüşdü
Müdafiə naziri general-polkovnik Zakir Həsənov mayın 28-də Azərbaycanda işgüzar səfərdə olan Türkiyənin milli müdafiə naziri Yaşar Güler ilə görüşüb.
Bu barədə Müdafiə Nazirliyindən məlumat verilib.
Bildirilib ki, görüş zamanı Azərbaycan və Türkiyə respublikaları arasında qarşılıqlı inam, etimad və dəstəyə əsaslanan əməkdaşlığın bundan sonra da uğurla inkişaf etdiriləcəyinə əminlik ifadə olunub. Ölkələr arasında strateji müttəfiqliyin dostluq və qardaşlıq münasibətləri üzərində qurulduğu qeyd edilib.
Görüşdə hərbi, hərbi-texniki, hərbi-təhsil və digər sahələrdə əməkdaşlığın inkişaf perspektivləri müzakirə edilib, həmçinin bu istiqamətdə görülən işlərin daha da genişləndirilməsinin vacibliyi bildirilib.
28-05-2025, 18:35
Azərbaycan və Türkiyə Kəşmir məsələsində qətiyyətli mövqe nümayiş etdirir
Azərbaycan və Türkiyə Kəşmir məsələsində qətiyyətli mövqe nümayiş etdirir.
Bunu Pakistan Baş naziri Şahbaz Şərif Laçın şəhərində 28 May – Müstəqillik Gününə həsr edilmiş konsertdən əvvəl çıxışı zamanı deyib: “Laçında Azərbaycan-Türkiyə-Pakistan Üçtərəfli Zirvəsinin II iclası çox səmərəli oldu. Bir çox məsələləri müzakirə etdik. Qərara gəldik ki, bu 3 dövlət arasında əlaqələndirmə, koordinasiya olsun. Bu füsunkar məkanda – Laçında qardaş dövlətin bayrağı dalğalanır. Bu onu sübut edir ki, bayraqlarımız hər zaman bir yerdə ucalıqlarda dalğalanacaq, gələcəyə, firəvanlığa doğru birgə irəliləyəcək. Hər iki qardaşıma təşəkkür edirəm ki, Pakistana ədalətli məsələsində - Cammu və Kəşmir məsələsində dəstək verirlər. Təəssüf ki, elə füsunkar bölgədə qan tökülüb. O insanlar onilliklərdir ki, zülmə qarşı mübarizə aparırlar. Lakin hər zamankı kimi qətiyyətlidirlər və heç zaman təslim olmayacaqlar. BMT Nizamnaməsinə uyğun olaraq hüquqları bərpa olunanadək, Təhlükəsizlik Şurasının qətnamələri yerinə yetirilənədək mübarizə aparacaqlar. Pakistan hər zaman kəşmirlilərin yanında olub. Azərbaycan və Türkiyə də Kəşmir məsələsində eyni qətiyyəti nümayiş etdirib. İnşallah, gün gələcək, Kəşmir xalqı da öz hüquqlarını təmin edəcək, quldarlıqdan canlarını qurtaracaqlar”, - deyə Pakistan Baş naziri vurğulayıb.
28-05-2025, 18:21
3 ölkənin lideri seyrangahda
Azərbaycan Respublikasının Prezidenti İlham Əliyev, Türkiyə Respublikasının Prezidenti Rəcəb Tayyib Ərdoğan və Pakistan İslam Respublikasının Baş naziri Məhəmməd Şahbaz Şərif mayın 28-də Laçın şəhərində seyrəngahda olublar.
Prezident İlham Əliyevin iki il əvvəl mayın 28-də bu seyrəngahda ilk dəfə Laçına köçən keçmiş məcburi köçkünlərə evlərinin açarlarını təqdim etdiyi barədə qonaqlara məlumat verildi.
Bildirildi ki, indi burada Laçında istifadəyə verilmiş müəssisələrin məhsulları nümayiş olunur. Sərgidə “Laçın” Aqro-Sənaye Parkında, “PIRSHAGHI” ayaqqabı fabrikinin, “Gilabi Ceramics” Yaradıcılıq Mərkəzinin Laçın filiallarında, “LATIFA” Laçın tikiş fabrikində istehsal olunan məhsullar təqdim edilir. Həmçinin sərgidə “Bakı Abadlıq Xidməti”, efir yağları zavodu, “Naxışlı” tikiş evi, Laçındakı Heyvandarlıq Seleksiya Mərkəzi, “Həkəri” balıqçılıq təsərrüfatı da təmsil olunur.
Qeyd edək ki, sərgi 28 May - Müstəqillik Gününə həsr olunub.
28-05-2025, 17:20
Ərdoğan Laçında Səməd Vurğunun şeirini oxudu
Türkiyə Prezidenti Rəcəb Tayyib Ərdoğan Laçında 28 May - Müstəqillik Gününə həsr olunan konsertdən əvvəl çıxışı zamanı Xalq şairi Səməd Vurğunun “Azərbaycan” şeirindən bir neçə bənd səsləndirib.
28-05-2025, 17:10
Laçından üç ölkənin dünyaya verdiyi mesajlar lazımi ünvana çatacaq
Əziz qardaşlarımın - Türkiyə Prezidenti və Pakistan Baş nazirinin bizimlə bərabər bu bayram tədbirlərində iştirakı, bizə göstərilən dəstək və həmrəylik dünya miqyasında artıq tamamilə yeni reallıqlar yaratdı. Bizim gücümüz birliyimizdədir.
Bu fikirləri Prezident İlham Əliyev Laçın şəhərində 28 May – Müstəqillik Gününə həsr edilmiş konsertdən əvvəl çıxışı zamanı səsləndirib.
“Bu gün üçtərəfli formatda birliyimizi bir daha təsdiqlədik. Bu gün bayram konsertində səslənəcək mahnılar bizim birliyimizi bir daha göstərəcək, nə qədər zəngin mədəniyyətə malik olmağımızı göstərəcək. Əminəm ki, azad edilmiş Laçından bu gün üç ölkənin dünyaya verdiyi mesajlar lazımi ünvana çatacaq”, - deyə dövlətimizin başçısı qeyd edib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!