Böyük Qayıdışın başlanğıcı olan Cəbrayıl rayonunun Cocuq Mərcanlı kəndinin bərpası artıq başa çatıb. İyunun 14-də Azərbaycan Prezidenti İlham Əliyev yenidən qurulan Cocuq Mərcanlı kəndində görülən işlərlə tanış olub, sakinlərlə görüşüb. Dünən mediada yayılan məlumatlara görə, ilkin mərhələdə köçəcək ailələrə orderlər payalnıb.

Məsələ ilə bağlı Qaçqınların və Məcburi Köçkünlərin İşləri üzrə Dövlət Komitəsinin mətbuat xidmətinin rəhbəri Elçin Qədimov Modern.az-a məlumatların doğru olmadığını açıqlayıb.
Butov.az xəbər verir ki, Cocuq Mərcanlı kənd inzibati ərazi dairəsi üzrə icra nümayəndəsi Xanlar Zeynalovun Modern.az-a verdiyi məlumata görə, orderlər verilməzdən əvvəl püşk atılacaq:

“Püşkə əsasən, evin sahibləri müəyyən olunacaq. Məsələn vətəndaş 42 nömrəni çəkibsə, elə 42 nömrəli ev ona veriləcək. Yerindəcə orderi yazılacaq. Daha sonra “Dövlətqaçqınkom”un hesabına kəndə köçürüləcəklər. Dünən mən də oxudum ki, guya, orderlər paylanıb. Bunu kim,nəyə istinadən açıqlayıb, bilmirəm”.

X.Zeynalov bildirib ki, hələlik ailələrlə yalnız müqavilə bağlanıb:
“Bakı ərazisində məskunlaşan vətəndaşlarla görüş keçirildi. Bildirim ki, Cocuq Mərcanlıya köçəcək vətəndaşlarla müqavilə bağlanıb. Müqavilədə kəndə köçdükdən sonra vətəndaşların qarşısına qoyulan şərtlər göstərilib. Əsas şərt odur ki, vətəndaş ona verilən evdə daimi yaşamalı, evi heç bir halda tərk etməməlidir. Bu isə order deyil. Yəqin ki, yaxın iki gün ərzində “Dövlətqaçqınkom”dan qərar açıqlanacaq”.
Qeyd edək ki, birinci mərhələdə kənddə 10 hektar ərazidə 50 fərdi evin və müvafiq infrastrukturun tikintisi aparılıb. Tikilmiş evlərə Cəbrayıl rayonunun Cocuq Mərcanlı kəndindən olan və əsasən Bakı şəhərində müvəqqəti məskunlaşmış məcburi köçkünlər köçürüləcək. Ümumi sahəsi 3850 kvadratmetr olan mənzillərin 20-si ikiotaqlı, 25-i üçotaqlı, 5-i isə dördotaqlıdır. Həmin evlərdə 50 ailə yaşayacaq.