Yaradıcı adamlardan söz düşəndə onun istedadı, zəhmətsevərlik səviyyəsini önə çəkirlər. Yüz faizlik ölçüyə istinadən onu da deyirlər ki, istedad 10 faizsə, əsas məqsədə çatmaq üçün çəkilən zəhmətin qədəri 90 faizdir. Bu sözlərdə böyük hikmət, məna tutumu var. Yaradıcı ziyalılarımızın ön sırasında addımlayan əziz dostum, həmkarım Hidayət Ağakişi oğlu Musabəylinin anadan olmasının 60 illiyi münasibətilə ürək sözlərimi kağıza köçürəndə bu hikmətin mənasını bir daha yəqin etdim, iftixar hissi keçirdim.

Axı əziz yubilyarımız Hidayət müəllimin 60 illik mənalı ömrünün nə az, nə çox düz 23 ilini bir yerdə keçirmişik. 1993-cü ilin yanvar ayında təhsil sistemimizin böyük memarı, keçən əsrin dörddə birini Azərbaycan marifinin nəzəri və təcrübi əsaslarının müəyyənləşdirilməsinə həsr edən akademik nazir- Mehdi Mehdizadənin anadan olmasının 90 illiyi münasibətilə Beyləqan şəhərində Füzuli, Cəbrayıl, Qubadlı, Zəngilan rayonlarının təhsil işçilərinin iştirak etdiyi elmi-praktik konfransı xatırladım. Hidayət müəllim həmin tədbirə o zaman yenicə nəşr etdirdiyi "Akademik Mehdi Mehdizadə" biblioqrafik məlumat kitabcasını gətirmişdi. Problem dairəsində mühüm əhəmiyyətə malik olan bu mötəbər mənbə elə o andaca əl-əl gəzdi. Tədbir iştirakçılarında xoş ovqat yaratdı.
Bəli, Hidayət müəllim ilk qələm təcrübəsi, yaradıcılıq nümunələri ilə tanınmağa başladığı vaxtdan dadlı-duzlu yazıları ilə oxucuların diqqətini cəlb edir.
1 avqust 1956-cı ildə Qərbi Azərbaycanda - Allahverdi rayonunun Böyük Ayrım kəndində Ağakişi atanın ailəsində dünyaya gələn və indi 60 yaşına çatan dostum Hidayətin ömür yolunun heyrətamiz cəhətləri çoxdur. Orta məktəb illərində, Bakı Dövlət Universitetinin Kitabxanaçılıq fakültəsində oxuduğu illərdə də fəallığı, müstəqil fikir, söz demək bacarığı ilə sayılıb-seçildi. 1974-cü ildən respublika mətbuatında öz şeiləri, elmi-publisistik məqalələri ilə yaxından iştirak etdi. Universitetin "Lenin tərbiyəsi uğrunda" qəzetində əməkdaşlıq etdi, ictimai həyatında fəallığı ilə seçildi. 1979-cu ildə ali ixtisas təhsilini başa vurandan sonra müstəqil əmək fəaliyyəti dövründə də tanındı, tay-tuşlarının, həmkarlarının rəğbətini qazandı. Əmək kitabcasının ilk səhifələri Sabirabad rayonunda yazıldı. Rayon Mədəniyyət Sarayında metodist, direktor əzəvi, habelə 1980-1981-ci illərdə Abşeron rayon Mərkəzləşmiş kitabxana sisteminin direktor müavini vəzifələrində çalışarkən səmimiliyi, təşəbbüskarlığı ilə hörmət, nüfuz sahibi oldu. "Abşeron" qəzetində bədii və elmi-publisistik yazıları ilə rayonun əbədi və ictimai həyatında fəal iştirak etdi. Heç şübhəsiz, bütün bunlar onun respublika əhəmiyyətli elm-təhsil ocaqlarının birində çalışmasına, səmərəli fəaliyyət göstərməsinə zəmin yaratdı. Yaradıcı ömrün gələcək inkişaf yolunu göstərən cığır Respublika Elmi-Pedaqoji Kitabxanasına istiqamətləndirdi. Elmi-metodika şöbəsinin müdiri vəzifəsinə irəli çəkilməsi də ürəyincə idi. Vəzifə borcu, vəzifə məhsuliyyəti də Hidayət müəllimi daha böyük əzmkarlıqla işləməyə ruhlandırdı. "Kitab çox dəyərli sərvətdir, kitab mənəvi zənginlik vasitəsidir. Kitabsız insanın mənəvi həyatını təsəvvür etmək olmur"-deyən gənc mütəxəssisin səsi ayrı-ayrı şəhər və rayonların təhsil şöbələrindən, mərkəzi kitabxanalarından, regionlar üzrə keçirilən elmi-praktik konfranslardan gəlirdi. Nəzəri-təcrübü əsaslara söykənən tövsiyələri ilə uşaq və məktəb kitabxanalarında çalışan mütəxəssislərin yoluna işıq tuturdu. Elm-bilik fəzilətini müxtəlif nəsillərə çatdırmaqda çox təsirli vəsitə olan kitaba-mütaliəyə maraq hissi oyatmaq işinə ibtidai siniflərdən başlamağı, habelə bir sıra prinsipial məsələləri diqqət mərkəzinə gətirməyi zəruri sayırdı.

Azərbaycan Respublikası Xalq Təhsili Nazirliyi və Respublika Elmi-Pedaqoji Kitabxanasının tövsiyəsi ilə "Kiçik yaşlı məktəblilərdə mütəaliə mədəniyyətinin formalaşdırılması: işin məzmunu və prinsipləri" adlı vəsaitin çap olunub yerlərə göndərilməsi, eyni zamanda əməli fəaliyyət üçün əsas götürülməsi də həmin ideyanın nəticəsi kimi dəyərləndirilməlidir. Elə buradaca qeyd edim ki, Hidayət müəllimi - yüksək intellektə malik olan mütəxəssisi digər həmkarlarımdan fərqləndirən əsas cəhətlərindən biri də sözünün sahibi olması, sözü başına buraxmaması ilə bağlıdır. Onu yaxından tanıyanlar yaxşı bilirlər ki, Hidayət müəllim dediyi, irəli sürdüyü fikirlərin mənasını ağlabatan sözlərlə, misallarla, inandırıcı faktlarla dinləyicilərə, həmsöhbətlərinə, oxuculara çatdırmağı bacarır.
1994-cü ildə "Nərgiz" nəşriyyatının təməlini qoyanda da bu keyfiyyətlər onun karına gəldi. Faydalı təşəbbüs fəal həyat vəsiqəsi aldı. Elm-sənət prinsiplərini, mövcud vəziyyəti, cəmiyyətdə yaranan ehtiyacı əsas götürən naşir elə ilk illərdən marifçilik işlərinin geniş vüsət alması naminə əməli fəaliyyətə başladı. Respublikada tanınan, sayılıb-seçilən söz-sənət sahibləri, habelə pedaqoq alimlər, bacarıqlı məktəb rəhbərləri, müəllimlər, metodistlərlə yaranan müntəzəm, sistemli iş birliyi səmərələliyə zəmin yaratdı. Nəşriyyatın ilk uğurlarından bəhs edən yazılar müxtəlif qəzet, jurnal səhifələrində dərc olundu. Səmərəli fəaliyyət iki mühüm istiqaməti əhatə edirdi.
Birinci istiqamətə müxtəlif yaş qruplarına malik olan məktəblilərin özləri üçün yazılan şeirlər, nağıllar daxildir.
İkinci istiqamətə aid olanlar isə müxtəlif məzmunlu kitablardan, metodik tövsiyə xaraketli vəsaitlərdən ibarət idi. Onların adlarını nəzərə çatdırası olsaq bir neçə səhifədən ibarət böyük bir siyahı alınar. Buna görə də əsas mətləbdən uzaq düşməyi lazım bilmədim.
Bacarıqlı tədqiqatçı, metodist, biblioqraf H.Musabəyli yaxşı bilirdi ki, məktəbi, bütövlükdə təhsil sistemini canlandırmaq üçün elmi-metodik əsərlər şəbəkəsinin genişləndirilməsinə xüsusi diqqət yetirilməlidir. Təsadüfi deyildir ki, müxtəlif illərdə qələmə aldığı "Kiçik yaşlı məktəblilərdə mütəaliə mədəniyyətinin formalaşdırılması: işin məzmunu və prinsipləri", "Bayatı estetikası" adlı elmi metodik kitabları", "Professor Əhməd Seyidov", "Akademik Mehdi Mehdizadə" biblioqrafik məlumat kitabları pedaqoji aləmdə çalışan mütəxəssislər üçün etibarlı mənbəyə çevrilmişdir. Heç şübhəsiz, keçən əsrin 90-cı illərində "Qabaqcıl maarif xadimi", "Respublikanın təhsil əlaçısı" fəxri nişanları ilə təltif olunması, habelə Akademik Mehdi Mehdizadə mükafatı laureatı adına laiq görülməsi mənalı yaşamaq-yaratmaq idealarının parlaq nəticəsi kimi nəzərə çarpır.
H.Musabəylinin yaradıcılıq bioqrafiyasında ədəbiyyatla bağlı nəzəri tədqiqatlar, oxucuları razı salan şeir kitabları da xüsusi yer tutur. "Elxan Xəzərin özü və sözü", "Laylalı bulaq", "Göy var göydən yuxarı" və s. kitablar bədii təfəkkürün-bədii yaradıcılığın heyrətamiz cəhətlərini əks etdirir. Bu əsərlərə görə müəllifin "Qızıl Qələm" mükafatına laiq görülməsi də çox mətləblərdən xəbər verir. Həmin kitabların, orada nəzərə çatdırılan sənət nümunələrinin mahiyyəti haqqında geniş söhbət açmaq niyətində deyiləm. Müxtəlif vaxtlarda "Zəngəzurun səsi", "Zəminxarə", "Zaman", "İcmal" və s. qəzet və jurnal səhifələrində həmin nəşrlərin bədii-estetik mahiyyəti haqqında bir-birindən dəyərli yazılar verilmişdir. Ancaq ehtiraf edim ki, "Laylalı bulaq"dakı "Bulaq üstə bitən çinar" şeirindən yan keçə bilmədim:
Göy üzünə qalxan çinar,
Endir məni bulaq üstə.
Diləyimə çata bilsəm,
Nə istəsən məndən istə!..
Bəh-bəh nə gözəl arzu, nə gözəl istək! Bax budur mənalı yaşamaq-yaratmaq eşqi. Bax budur könül dünyasının insanı heyrətləndirən notları, könül təranələri...
İllər quş-qanadlıdır deyənlər haqlıdırlar, illər necə də sürətlə bir-birini əvəz edir İlahi! Hidayət müəllimin anadan olmasının 50 illiyinin şəninə yığışdığımız gün elə bil dünən olub. O zaman dostum-həmkarım haqqında ürək sözlərimi "Kitabı sevən, sevdirən naşir" adlı məqaləmdə əks etdirmişdim. Doğmalarına, yaxınlarına gözaydınlığı vermişdim. Ömür-gün yoldaşı Səfurə xanımı, ciyərparəsi Nərgizi səmimi qəlbdən təbrik etmişdim. İndi də o niyyətdəyəm. Ancaq çox mühüm bir cəhəti xatırlatmasam olmaz. Bu ötən illərdə Hidayət müəllim baba, Səfurə xanım nənə, əziz Nərgizimiz isə müqəddəs ana tituluna yiyələniblər. 6 yaşlı Mehrab və 4 yaşlı Xuraman bu ailənin əzizləridir, gül-çiçəyidir. Nə xoş, nə gözəl!..


Hidayət Ağakişi oğlu sözün həqiqi mənasında daima düşünən, yaradıcılıq axtarışlarında olan, təşəbbüslərə meydan verən ziyalıdır. Onun yaxın dostlarımızından birinin yubiley tədbirlərində çıxış edərkən dediyi sözləri xatırlayıram:
"İnsan ömründə yubileylər əslində yaradıcı adamların cəmiyyət qarşısında hesabatıdır..."
Çox yerinə düşən mənalı deyimdir. Düz sözə nə deyəsən? Bizə nə qalır? Bizə o qalır ki, deyək: Tədqiqatçı, naşir, şair dostumuz Hidayət Ağakişi oğlu! 60 illik yubileyin və 40 ilə yaxın elmi-pedaqoji fəaliyyətinlə bağlı hesabatın səni yaxından tanıyanlar, habelə ictimaiyyət tərəfindən yüksək qiymətləndirilir. 60 yaşın mübarək!-deyirik. Sənə mənalı uzun ömür, möhkəm can sağlığı arzulayırıq! Qarşıdakı möhtəşəm yubileylərini görmək arzusuyla!..
Vidadi Xəlilov
Pedaqolika üzrə elmlər doktoru, professor, Rusiya pedaqoji və Sosial Elmlər Akademiyasının həqiqi üzvü, Azərbaycan Respublikasının əməkdar müəllimi, Akademik Mehdi Mehdizadə mükafatı laureatı.

Əziz oxucular, sizə təqdim etdiyimiz şeirlərin misraları Hidayətin mənəvi dünyasından söhbət açır. Müxtəlif illərdə, müxtəlif regionlardan olan qələm dostları onun özündə cəmləşdirdiyi Azərbaycan kişisinin müsbət xüsusiyyətlərini vəsf ediblər. Həmin şeirləri çap etməklə "Bütöv Azərbaycan" qəzetinin kollektivi də Hidayət Musabəylinin 60 yaşını təbrik edir.

Ay Hidayət

Haqq-ədalət alın yazın, qismətindir, ay Hidayət,
İncə qəlbin, saf ürəyin sərvətindir, ay Hidayət.

Duyğun kimi ləpələnən Debet çayı laylan olub,
Allahverdi, Böyük Ayrım möhnətindir, ay Hidayət.

Yalan dünya, yaman dünya Göyçəmizi Sevan etdi,
Əsrarəngiz Zəngəzurun xilqətindir, ay Hidayət.

Tarixləri araşdırıb güc alırsan keçmişindən,
Mənəviyyat aləmimiz hikmətindir, ay Hidayət.

Ulusunu, elatını sevə-sevə vəsf edirsən,
Sübh qoxulu misraların xilqətindir, ay Hidayət.

Azərbaycan - doğma diyar, Odlar yurdu, Turan eli,
Baş kəndimiz Bakımız da qüdrətindir, ay Hidayət.

Əsrlərin o tayından bu tayına körpü olan
Yurd yerlərin yad əldədir, qürbətindir, ay Hidayət.

Ləlvər dağı sədaqətin, əzəmətin timsalıdır,
İlqar deyər həm də sənin qamətindir, ay Hidayət.

Yaxşı insan, səmimi dost, mahir naşir, gözəl şair,
Altmış yaşm altmış illik heyrətindir, ay Hidayət.


Qəşəm İlqar
Səni

Həmdərdlim-yurd həsrətli qələm dostum Hidayet Musabəylinin "Laylalı bulaq" kitabını oxudum.

Ay Hidayət, Ləlvər dağı,
Tona çayı gözlər səni.
Doğma yurdla görüşməyə,
Yola salar bizlər səni.

Uşaqlığın keçən dağlar
Gül-çiçəkdən dəstə bağlar.
Coşar-daşar gur bulaqlar,
Salamlayar düzlər səni.

Başlayandan qəm biçimi,
Gizli yedi dərd içimi...
Xalqımızın var seçimi,
Demə, duyar yüzlər səni...

Ədalət var xislətində,
Həsrət, hicran qismətində.
Halal-haram nisbətində
Dəstəkləyər düzlər səni.

Ayın-günün çox nigaran,
Nədir səni qəlbən yoran?
İncidəndi hər gün, hər an
Suyu getmiş üzlər səni.

Arxa bilib Yusif mərdi
Düşməninə sinə gərdi.


O bilir ki, həsrət dərdi
Ölənəcən izlər səni...

Yusif Millətoğlu
Elin gərəyi

("Nəgiz" nəşriyyatının direktoru, Akademik Mehdi Mehdizadə mükfatçısı Qərbi azərbaycanlı Hidayət Musabəylidir ...)

Naşir qardaş, "Kövrək qəlbin harayı" -
Didərginə Hidayətdən qəlb payı?!
Bir manat borc vermir qardaş-qardaşa,
Təmənnasız nəşrin ilə min yaşa!

Yadımdan çıxmışdı - mənlə görüşün ...
Didərgini kim soraqlar, bil, düşün?!
Nər kişisən, örnək addım atmısan ...
Mən itgini dar günümdə tapmısan?!

Saysız olub süfrəm, evimdə qonaq.
Gələn qonaq-Haqdan gətirər soraq!
Qonağa xidmətdə qulam, ipəyəm ...
Mən kiməm ki, Haqqı qəbul etməyəm?

Evimdə bircə gün qonaq olmusan,
Yadda saxlamısan, unutmamısan.
Hər kim unutmursa duzu, çörəyi...
Tək mənim yox, olur elin gərəyi!

Miriş, nadan üçün vurursan simə,
Duz-çörəyi saymayandan incimə?!
Valeh, Qafar, Hidayətin, Əlin var,
Nəşrinə əvəzsiz əl tutub onlar,
Unutqanı, bağışlayar qananlar.


Əbədi hörmətlə - Hacı Seyid
Miriş Bərgüşadlı
(Hüseyn ~ Əməkdar müəllim, Yazıçılar və Jurnalistlər Birliklərinin üzvü
“Qızıl Qələm" ... mükafatı laureatı
Bakı -12.11.2008 Zəngilanlı didərgin.



Hidayət

Yaxşılar həmişə yaxşıdan olur,
Yaşa dağlar oğlu, yaşa, Hidayət!
Qartallar qonanda zirvəyə qonur,
Onunçün deyirəm yaşa, Hidayət!

Nənən Çətindağdı, baban Ləlvərdi,
Dediyin sözlərin dürdü-gövhərdi,
Eşitdim "yubiley"in nə xoş xəbərdi,
Arzu-diləyinlə yaşa, Hidayət!

Süfrəndə bol olsun duzun, çörəyin,
Bilirəm təmizdi sənin ürəyin.
Həmişə var olsun arxan, köməyin,
Hər yerdə gəlirsən xoşa, Hidayət!

Qaçqın Əli can sağlığı diləsin,
Dost yolunda meydan eylər sinəsin,


Kim deyər ki, sevinməsin, gülməsin,
Yaşa əziz dostum, yaşa Hidayət!

Qaçqın Əli El şairi
2006-ci il


Hidayət

Xalqı üçün, eli üçün,
Ağlayan gözdü Hidayət.
Dost-qohuma yanan çıraq,
Alov-közdü Hidayət.

Gülərüzdü, mehribandı,
O canlara dəyən candı,
Ər kişi, gözəl insandı,
Əsməyən dizdi Hidayət.

O şairdi, publisistdi,
Yazıçıdı, jurnalistdi,
Tikib-quran mühəndisdi,
Sözündə düzdü Hidayət.

Nur bələnib, nurdu üzü,
Qoy Allah qorusun özü,
Sevindirir hər an bizi,
Söhbətdi, sözdü Hidayət.


Var hörməti, adı-sanı,
Vətən deyir canda qanı,
Əlamdar var olsun deyir onu,
Hər dərdə dözdü Hidayət.

Ələmdar Keşdəhli
Can Hidayət

Dədələrin hörmətini
Səndə gördüm, can Hidayət.
Vətəndaşlıq qeyrətini,
Səndə gördüm, can Hidayət!..

Bar-bərəkət bostanını,
Yaxşılığın dastanını,
Ağ qayanın aslanını,
Səndə gördüm, can Hidayət!..


Sinəmdə söz payın durur,
Dost-dostu bayındırır,
Xanlar, xanı Bayandırı,
Səndə gördüm, can Hidayət!..

Məmməd Elli Təhməzli
Kişilərin qeyrətlisi

Qardaşım Hidayət Ağakişi
oğluna ithaf edirəm

Zirvələrin zirvəsidir ağ qarlı,
Murov kimi, əzəmətlidi, vüqarlı.
Şir ürəkli, etibarlı, ilqarlı,
Kişilərin qeyrətlisidi Hidayət.

Bir üzündə Savalanın küləyi,
Bir üzündə Allahın xoş mələyi,
Söhbətiylə sevindirər fələyi,
İnsanların hörmətlisidi Hidayət.

Dəyanətli, mətanətli həm ağır,
Baxışınnan sevgi yağır, nur yağır,
Dara düşsən bu insanı sən çağır,
İgidlərin cürətlisi Hidayət.

Haqdan gələn sədadı o, səsdi o,
Dostdan ötrü "Sarıtel" tək əsdi o,
Namərdlərin kələyini kəsdi o,
Yaxşıların şöhrətlisi Hidayət,

Xoş məramı hamıya əl tutmaqdı,
Getdiyi o yolları da düm ağdı,
Şairlərçin ziyarətgah bir dağdı,
Aqillərin ülfətlisi Hidayət.

Qardaş dedim ona əzəl gündən mən,
Qoymadı ki, gözlərimə düşə çən,
Can qardaşım, ürəyincə yaşa sən,
Dostlarımın istəklisi Hidayət.

Hacı Adıgözəl Vəlbinəli
Gözəldi

Əziz dostum, qardaşım Hidayət
Musabəylinin adına bağışlayıram.

Dağdan ağır bir kişidi Hidayət,
Qohum-qardaş, qol-qanadı gözəldi!
Qalın Oğuz ellərindən başlayan,
Soy kökünün yeddi qatı gözəldi.

Ardıcıldı xoş məramlı işində,
Kitabları Qız qalası içində!
Qazandığı mükafatlar içində,
Mehdizadə mükafatı gözəldi.

Elli deyir: bu göylərin altında,
Öz yeri var doğmanın da, yadın da!
Əziz dostum yaxşı saxla yadında:
Bir Allahın min bir adı gözəldi!

"Bütöv Azərbaycan" qəzeti
28 iyul 2016-cı il