Butov.az GünAz TV - yə istinadən xəbər verir ki, tanınmış azərbaycanlı aktyor və rejissor Babək Nəhreyn Təbriz və Azərbaycan kinoteatrının geri qalmasına səbəb kimi İranda türklərə qarşı edilən ayrı-seçkiliyi göstərib.

O bu barədə bir neçə gün əvvəl Telegram sosial şəbəkəsinin bir qrupunda iştirak edərək ona ünvanlanan bəzi sualları cavablandırarkən danışıb.

Məşhur aktyor, - “Nə üçün Təbrizdə film və serial istehsalı olduqca azdır?”, - sualının cavabında deyib:

“Gəlin bu məsələyə diqqət edək. Biz nə etsək də, yenə də İranda ikinci dərəcəli vətəndaşıq. Ona görə ki, bizim dilimiz türk dilidir və bu məsələ bir çox məhdudiyyətlər yaradır. Əgər farsdilli olsaydıq, o zaman bizim incəsənət xadimlərinin istehsal etdiyi çox sayda film kinoteatrlarda nümayiş etdirilərdi. Bizim nə yetəri qədər pulumuz var, nə də ki, məsullar film istehsalı və bu zəmində fəaliyyət göstərən şəxslərin qayğısını çəkir.”

O, Təbriz şəhərinin mədəniyyət sahəsi üçün ayrılan büdcə vəsaiti ilə bağlı öz təəssüfünü bildirib. “Bizim əsas problemimiz puldur, filmin istehsalı üçün heç bir imkanımız yoxdur. Təəssüflə ölkənin bütün şəhərlərində “mədəniyyət büdcəsi” deyilən bir reallıq yoxdur, bu imkan sadəcə paytaxtə verilir və onunla da məhdudlaşır”, - deyə o, qeyd edib.

Azərbaycana qarşı ayrı-sekçiliklərdən şikayətlənən tanınmış incəsənət xadimi sözlərinin yekununda, - “Biz Azərbaycanın incəsənət xadimlərinin qədir-qiymətini bilməliyik”, - deyə vurğulayıb.

B. Nəhreyn 1979-cu ildə (hicri-şəmsi təqvimi ilə 1358-ci il) Güney Azərbaycanın Təbriz şəhərində dünyaya göz açıb. Tehranda Əlirza Xəmsə, Əhməd Damut və Pərvanə Müjdə kimi ustadların elmindən bəhrələnən incəsənət xadimi peşə fəaliyyəti müddətində bir çox uğurlara imza atıb. Bir çox komediya əsəri ilə gündəmə gələn B. Nəhreyn ötən aylarda tanınmış güneyli teatr rejissoru Yaqub Seddiq Cəmali ilə birlikdə Azərbaycan Dövlət Musiqili Teatrında “Bəxtəvər” tamaşasını səhnəyə çıxarıb. Azərbaycan Dövlət Musiqili Teatrı ilə müştərək hazırlanan "Bəxtəvər" tamaşasının müəllifi və baş rolun ifaçısı Babək Nəhreyn, quruluşçu rejissoru isə Yaqub Seddiq Cəmali olub.