Salam, qardaşım, dostum, sirdaşım!
Bir il öncə arzularımızı, ürəklərimizi… bir də ad günlərimizi birləşdirib Zabratdakı “Şəki filialında” yaxşı məclis keçirtdik – Sənin və Qiymət Məhərrəmlinin mənəvi-etik diplomatiyası sayəsində. O günün diqqət çəkən bir özəlliyi də var idi: Sənin 61, mənim isə 54 yaşım tamam olurdu – mən 1961-ci il, sən isə 1954-cü ildə dünyaya gəlmişik… Yazımın birində vurğulamışdım ki, Qax-Şəki və 27-29 yanvar arası məsafədən də yaxındır qəlblərimiz. Bu sıradan, gəlişigözəl kəlam deyil əsla. Axı illərlə saxladığımız məhrəm, səmimi münasibət… bir də Allah şahiddi buna.
Sən Qiymət xanımla əl-ələ verib Vətən üçün 3 nər – Nizami, Vüqar, Ceyhun kimi oğullar böyütmüsünüz. Üçü də ağıllı, dərrakəli, səmimi… Sənin kimi, Qiymət kimi. Sən püxtələşmiş, yüksək səviyyəli inşaatçı-mühəndis kimi halal zəhmətinlə, alın tərinlə qazandığın pulları yelə vermədin. Hər 3 oğlunu ev-eşik sahibi etdin. Atalıq borcunu artıqlaması ilə yerinə yetirdin.
Sənə tikdiyim neçə-neçə bina sakinləri, fərdi ev sifarişçiləri alqış eləyir – bu, çox illik əməyin görünən və duyulan mükafatıdır məncə.
Sən Azərbaycan elminə, Azərbaycan ədəbiyyatı və mənəviyyatına qiyməti hələ də dəyər tapmamış Qiymət Məhərrəmlini bəxş etdin, bununla da savab və əbədiyyət qazandın.
Monolit binaları inşa edən sən, kövrək, incə ürək, duyğusal söz sahibisən – bunu mən yox, yazdığın hekayələrin deyir. Şöhrət azarından çox-çox kənar gəzən sən Gülməmməd kitab buraxmağa belə cəhd etmədin, bununla da Azərbaycan nəsrini gözəl töhfədən məhrum etdin – bunu dostun Giya demir, Azərbaycan ədəbiyyatının tərcüməçisi Giya Paçxataşvili deyir.

Sən Vətəncanlı, ailəcanlı, qohumcanlı, xeyirdən-şərdən qalmayan bir Oğulsan. Neçə-neçə tanıdığım və tanımadığım insanlara – o cümlədən, mənə əl tutmusan. Etdiklərini car çəkib reklama çevirməmisən. Sənin xislətin və genlərin buna yol verməzdi də…
62 ildə 62 igidin ömrünü yaşamaqdasan, ey qanı savabdan yoğrulmuş, işsizlikdən yorulmuş gözəl İnsan! İşsiz olsan da, işsiz dayanmadın – Zabratdakı “Şəki filialı”nı cənnətə çevirdin, əllərin var olsun, ey nəvələrin “Çiyələk babası”.
…Bu il ad gününə yenə də əliboş gəlir Ağ qardaın – yetim gürcü. Fəqət, sən ünvanlı arzuları doludur onun: qoy həyat eqşin nəvələrin sayı kimi artsın, səhhətin, qəlbinin nuru arxadan gələnlərin yoluna işıq saçsın! Axı “Bu yolda işıq görünür”. Və biz bu işığı görürük – Gülməmməd İsrafiloğlunun işığını!

Ülvi məhəbbətlə,
Giya Paçxataşvili