15 sentyabr Bilik günündə hamıdan çox sevinən bu il ilk dəfə məktəbə qədəm qoyan birincilər və onların valideynləridir. Dərs ilinin başlanmasını səbirsizliklə gözləyən 150 mindən çox birinci sinif şagirdi bu gün ilk dəfə parta arxasında müəllimlərini salamlayırlar. Abşeron rayonunun Mehdiabad qəsəbəsində də bayram ovqatı yaşanır. Rayon İcra Hakimiyyətinin, təhsil şöbəsinin məsul işçiləri məktəblərə gələrək müəllimlərin, şagirdlərin yeni dərs ilini təbrik edir, valideynlərə gözaydınlığı verirlər.
2 saylı məktəbdə keçirilən tədbir Azərbaycan Dövlət himninin səsləndirilməsilə başlandı. Direktorun təlim-tərbiyə məsələləri üzrə müavini Samirə Məmmədzadə qonaqları tədbir iştirakçıları ilə tanış etdikdən sonra sözü məktəbin direktoru Vüsal Süleymanova verdi. Vüsal Süleymanov kollektivi təbrik edərək qarşıda duran məsələlərdən söhbət açdı. Məktəbliləri yeni dərs ilində başlayacaq bilik yarışlarında həmişəkindən fəal olmağa çağırdı.
Abşeron Rayon Təhsil Şöbəsi müdirinin müavini Pərviz Əhmədov Abşeron rayonunun Respublikamızın ictimai-siyasi həyatındakı rolundan danışaraq müəllim və valideynləri qarşıdan gələn parlament seçkilərində fəal iştiraka səslədi. Digər çıxışlardan sonra məktəbin şagirdləri Vətənpərlik mövzusunda şeirlər oxudular. Tədbir rəngarəng musiqi nömrələrilə davam etdirildi.

Butov.az