Bu gün Abşeron rayonunun Mehdiabad qəsəbəsində seçicilərin Yeni Azərbaycan Partiyasının namizədləri ilə görüşü keçirildi. Görüş törənini YAP Abşeron rayon təşkilatının sədri Bilman Vəliyev açdı. Qeyd etdi ki,dekabrın 23-də respublikamızda keçiriləcək bələdiyyə seçkilərilə bağlı bütün regionlarda Yeni Azərbaycan Partiyasının yaratdığı seçki qərargahı üzvləri təbliğat və təşviqat məqsədilə yerlərə gedir, seçicilərlə görüşür və onların seçki ilə bağlı əhval -ruhiyyələrini öyrənir. Artıq 18 -ci gündür ki, rayonumuzun kənd və qəsəbələrində belə görüşlərimiz keçirilir. Həmin görüşlərdə Yeni Azərbaycan Partiyasının namizədlərinin dəstəklənməsinin bilavasitə şahidi olmuşuq. Bu gün də sizin qəsəbəyə -Mehdiabada gəlmişik.
Məlumat üçün bildiririk ki, Mehdiabad qəsəbəsi üzrə 13 bələdiyyə üzvü yeri var. YAP tərəfindən həmin yerlərə namizədlər irəli sürülüb. Namizədlər irəli sürərkən biz namizəd olan partiya üzvlərinin siyasi fəallığını, təşkilatçılıq qabiliyyətlərini, ötən dövrlərdəki fəaliyyətlərini nəzərə almışıq. Bilirsiniz ki, Bələdiyyələr yerli özünüidarə orqanlarıdır. Əminik ki, doğru seçim edəcəksiniz.
Sonra söz Mehdiabad Bələdiyyəsinin sədri, YAP tərəfindən namizədliyi irəli sürülmüş Əbülfət Nuriyevə verildi. O, ötən seçkidə ona etimad göstərənlərə minnətdarlığını bildirərək bu müddət ərzində Mehdiabad Bələdiyyəsinn gördüyü işlər barədə yığcam hesabat verdi, görüləcək işlərdən ,qəsəbədə həllini gözləyən problemlərdən danışdı . Əbülfət Nuriyevdən əvvəl Mehdiabadda bələdiyyə sədri olmuş Natiq Dünyamalıyev özündən sonra seçilən bələdiyyə üzvlərinin fəaliyyətindən xüsusi məmnunluqla danışaraq qəsəbə sakinlərini yenə də YAP namizədlərinə səs verməyə səslədi. Yeganə Qəmbərova və digər çıxış edənlər də YAP namizədlərinin bir qisminin köhnə bələdiyyə üzvləri olduğunu, onların qəsəbə sakinlərinin problemlərinə həmişə həssaslıqla, qayğı ilə yanaşdıqlarını diqqətə çatdıraraq seçiciləri Yeni Azərbaycan Partiyasının namizədlərinə səs verməyə çağırdılar.
Milli məclisin deputatı İmamverdi İsmayılov mehdiabadlıların Respublikamızın ictimai-siyasi həyatındakı fəallığını xüsusilə diqqətə çatdıraraq onları həmişə olduğu kimi, yenə də Azərbaycan Prezidentinin yanında olmağa, dövlətçiliyimizin keşiyində durmağa, bu siyasi aksiyada- bələdiyyə seçkilərində fəallığa təşviq etdi.
Butov.az