7-03-2026, 20:03
Azərbaycan qadını cəmiyyətin
inkişafının aparıcı qüvvəsidir
Tarixin bütün dövrlərində Azərbaycan qadını cəmiyyətimizin inkişafında, milli dəyərlərimizin qorunmasında və dövlətçiliyimizin möhkəmlənməsində mühüm rol oynamışdır. Qədim dövrlərdən bu günə qədər qadınlarımız yalnız ailənin deyil, bütövlükdə cəmiyyətin mənəvi dayağı olmuş, öz müdrikliyi, fədakarlığı və iradəsi ilə tariximizin şərəfli səhifələrini yazmışlar. Azərbaycan xalqının ən qədim yazılı abidələrindən biri olan “Kitabi-Dədə Qorqud” dastanında qadınların göstərdiyi şücaət, eləcə də Tomris, Sara Xatun, Möminə Xatun kimi tarixi şəxsiyyətlərin fəaliyyəti Azərbaycan qadınının gücünün, iradəsinin və liderlik keyfiyyətlərinin parlaq nümunəsidir. Bu nümunələr sübut edir ki, Azərbaycan qadını tarix boyu həm ailənin dayağı, həm də cəmiyyətin inkişafına yön verən mühüm bir qüvvə olmuşdur.
Azərbaycan qadınları yalnız mənəvi dəyərlərin qorunmasında deyil, həm də dövlət quruculuğu və ictimai-siyasi proseslərdə fəal iştirak etmişlər. Şərqdə ilk dəfə olaraq qadınlara seçib-seçilmək hüququnun məhz Azərbaycanda – Azərbaycan Xalq Cümhuriyyəti dövründə verilməsi xalqımızın qadına verdiyi yüksək dəyərin bariz göstəricisidir. Bu mühüm addım Azərbaycan qadınının ictimai həyatda rolunun genişlənməsinə, onların elm, təhsil, mədəniyyət, səhiyyə və digər sahələrdə fəal iştirakına geniş imkanlar yaratmışdır. Qadınlarımız yüzillər boyu milli dəyərlərə sadiq qalaraq ana dilimizin, mədəniyyətimizin və mənəviyyatımızın qorunub saxlanılmasında da mühüm rol oynamışlar.
Müstəqil Azərbaycan dövlətində qadın siyasətinin formalaşması və inkişafı Ümummilli Lider Heydər Əliyevin adı ilə bağlıdır. Ulu Öndər ölkə həyatının bütün sahələrində qadınlara xüsusi diqqət yetirmiş, onların potensialından səmərəli istifadə olunması üçün geniş imkanlar yaratmışdır. Onun təşəbbüsü ilə qəbul edilən qərarlar və həyata keçirilən tədbirlər qadınların dövlət idarəçiliyində, ictimai-siyasi proseslərdə və müxtəlif sahələrdə fəal iştirakına yol açmışdır. Bu siyasət bu gün də Prezident İlham Əliyev tərəfindən uğurla davam etdirilir. Dövlət başçısının rəhbərliyi ilə qadın hüquqlarının qorunması, gender bərabərliyinin təmin olunması və qadınların sosial-iqtisadi imkanlarının genişləndirilməsi istiqamətində ardıcıl addımlar atılır.
Son illərdə qəbul olunan qanunlar, dövlət proqramları və milli fəaliyyət planları qadınların hüquqlarının müdafiəsi və onların ictimai fəallığının artırılması istiqamətində mühüm nəticələrə səbəb olmuşdur. Bu gün Azərbaycan qadınları dövlət idarəçiliyində, parlamentdə, elmdə, təhsildə, səhiyyədə, mədəniyyətdə, sahibkarlıq sahəsində və digər istiqamətlərdə uğurla fəaliyyət göstərir, ölkəmizin inkişafına öz dəyərli töhfələrini verirlər. Statistik göstəricilər də qadınların cəmiyyət həyatındakı fəallığının artdığını göstərir. Qadınların məşğulluq səviyyəsinin yüksəlməsi, sahibkarlıq fəaliyyətində iştirakının genişlənməsi və müxtəlif sahələrdə təmsilçiliyinin artması ölkədə həyata keçirilən gender siyasətinin müsbət nəticələrindən biridir.
Azərbaycan Respublikasının Birinci vitse-prezidenti Mehriban xanım Əliyevanın çoxşaxəli fəaliyyəti də Azərbaycan qadınının nüfuzunun həm ölkə daxilində, həm də beynəlxalq aləmdə daha da yüksəlməsinə mühüm töhfə verir. Onun rəhbərlik etdiyi humanitar və sosial layihələr, xeyriyyəçilik təşəbbüsləri, mədəniyyətimizin və milli dəyərlərimizin dünyada tanıdılması istiqamətində görülən işlər Azərbaycan qadınının mərhəmətini, humanizmini və yüksək mənəvi keyfiyyətlərini bütün dünyaya nümayiş etdirir.
Bu gün Azərbaycan qadını ölkənin ictimai-siyasi həyatında fəal iştirak edir, dövlət idarəçiliyində, elmi və mədəni mühitdə, həmçinin səhiyyə və sosial sahələrdə mühüm uğurlar qazanır. Xüsusilə səhiyyə sistemində çalışan qadınların əməyi cəmiyyət üçün böyük əhəmiyyət daşıyır. İnsanların sağlamlığının qorunması və həyat keyfiyyətinin yaxşılaşdırılması naminə çalışan qadın tibb işçiləri yüksək peşəkarlıq, məsuliyyət və fədakarlıq nümayiş etdirərək cəmiyyətə dəyərli xidmət göstərirlər.
8 Mart – Beynəlxalq Qadınlar Günü münasibətilə bütün xanımları səmimi-qəlbdən təbrik edir, onlara möhkəm can sağlığı, ailə səadəti və həyatlarının bütün sahələrində yeni uğurlar arzulayıram. Əminəm ki, Azərbaycan qadını bundan sonra da öz zəhməti, müdrikliyi və fədakarlığı ilə ölkəmizin inkişafına töhfə verməyə davam edəcək, cəmiyyətimizin tərəqqisində mühüm rol oynayacaqdır.
Səkinə Sadıxova
Abşeron Rayon Mərkəzi Xəstəxanasının direktoru
7-03-2026, 19:51
Erməni mediasında
yalanlar və gerçəklər
Martın 7-də Beynəlxalq Avrasiya Mətbuat Fondunda (BAMF) ADPU-nun Qərbi Azərbaycan Araşdırmalar Mərkəzi, "Cosmoline" Tərcümə və Araşdırma Mərkəzi və Müvəkkil Hüquq Mərkəzinin təşkilatçılığı ilə “Qərbi Azərbaycan həqiqətləri erməni mediasında: yalanlar və gerçəklər” mövzusunda tədbir keçirilib.
Tədbiri giriş sözü ilə açan Müvəkkil Hüquq Mərkəzinin sədri, hüquqşünas Səməd Vəkilov Qərbi Azərbaycan mövzusunun araşdırılmasının və bu istiqamətdə obyektiv məlumatların ictimaiyyətə çatdırılmasının əhəmiyyətindən danışıb:
"Müxtəlif dövrlərdə Qərbi Azərbaycanla bağlı məlumatlar təhrif edilərək təqdim olunub və bu səbəbdən məsələyə hüquqi, eləcə də tarixi baxımdan yanaşmaq xüsusi əhəmiyyət kəsb edir. O vurğulayıb ki, mövzu ilə bağlı arxiv materiallarının, beynəlxalq sənədlərin və tarixi mənbələrin araşdırılması həqiqətlərin ortaya çıxarılmasına kömək edir".
Tədbirdə çıxış edən Qərbi Azərbaycan Araşdırmalar Mərkəzinin rəhbəri Leyla Cəlalova mövzunun elmi əsaslarla araşdırılmasının vacibliyini vurğulayıb:
"Ermənilər təkcə tarixi torpaqlarımıza deyil, həm də xalqımızın milli-mənəvi dəyərlərinə sahib çıxmağa cəhd göstəriblər. Onlar Azərbaycan xalqının zəngin mədəni irsinin tərkib hissəsi olan bir çox incəsənət nümunələrini, musiqi əsərlərini, xüsusilə də məşhur “Sarı gəlin” kimi xalq mahnılarını öz adlarına çıxarmağa çalışıblar. Eyni zamanda, Qərbi Azərbaycan mövzusu ilə bağlı erməni mənbələrində yayılan məlumatların böyük bir hissəsi saxtalaşdırılmış və təhrif olunmuş şəkildə təqdim edilir. Bu kimi iddiaların həqiqi mahiyyətini ortaya qoymaq üçün geniş, bir o qədər də dərin elmi araşdırmalar aparılmalı, müxtəlif tarixi və elmi mənbələr arasında müqayisəli təhlillər həyata keçirilməlidir. Belə yanaşma həm tarixi həqiqətlərin üzə çıxarılmasına, həm də Azərbaycanın mədəni və tarixi irsinin qorunmasına xidmət edir".
"Cosmoline" Tərcümə və Araşdırma Mərkəzinin icraçı direktoru Tünzalə Əsədova çıxış edərək, erməni mənbələrində Qərbi Azərbaycanla bağlı yer alan məlumatların araşdırıldığını bildirib. Onun sözlərinə görə, layihə çərçivəsində erməni dilində yayımlanan materiallar tərcümə edilərək müqayisəli təhlil aparılıb:
"Saxtalaşdırılmış və təhrif olunmuş məlumatların üzə çıxarılması üçün dərin araşdırmalar aparmaq, faktları müqayisəli şəkildə təhlil etmək vacibdir. Əsədova əlavə edib ki, bu layihə gələcəkdə həyata keçiriləcək digər perspektivli təşəbbüslərin başlanğıcı hesab oluna bilər".
Tədbirə ev sahibliyi edən, BAMF prezidenti Umud Mirzəyev çıxışında bildirib ki, Bakı tarixən beynəlmiləl şəhər kimi tanınıb. Onun sözlərinə görə, Ermənistan cəmiyyətində uzun illər anti-türk və anti-Azərbaycan ideologiyası təbliğ olunub:
"Azərbaycan ziyalıları tarix boyu bu ideoloji təzyiqlərlə üzləşib və Qərbi Azərbaycanın tanınmış şəxsiyyətlərinin həyat və fəaliyyətini əks etdirən layihələrin hazırlanması vacibdir. Habelə BAMF olaraq daima bu mövzuları prioritet hesab edib, işıqlandırmışıq".
Qərbi Azərbaycan İcmasının aparat rəhbəri Qalib Qasımov isə nitqində vurğulayıb ki, Ermənistan mediasında Qərbi Azərbaycan mövzusunda yayılan məlumatların diqqətlə izlənilməsinin vacibdir. O bildirib ki, müxtəlif dövrlərdə bu ərazilərdən on minlərlə azərbaycanlı zorla köçürülüb və bu faktlar tarixi sənədlərlə təsdiqlənir. Qasımov əlavə edib ki, Qərbi azərbaycanlıların doğma torpaqlarına qayıdışı məsələsi beynəlxalq hüquq normaları çərçivəsində müzakirə olunur.
Qərbi Azərbaycan İcmasının gənclərlə iş üzrə məsul şəxsi Anar İrzaquliyev çıxış edərək tarixi yaddaşın qorunmasının vacibliyini vurğulayıb və gənclərin ata-baba yurdlarının tarixini öyrənməsinin əhəmiyyətini qeyd edib.
"Cosmoline" Tərcümə və Araşdırma Mərkəzinin Qafqaz regionu üzrə eksperti, layihə rəhbəri, baş tərcüməçi Həsən Əhmədov isə erməni mediasında Qərbi Azərbaycanla bağlı yayılan bəzi materialların təhrif olunduğunu diqqətə çatdırıb. O bildirib ki, hazırlanan təqdimatda həm Ermənistan iqtidarının, həm də müxalifətinin mövzuya yanaşması araşdırılıb.
Tədbirdə Azərbaycan Dillər Universitetinin tələbləri, tarixçi-alim Məmməd Vəliyev, "Salam" Kənd İcmasının rəhbəri Anar Osmanov və "Bütöv Azərbaycan" qəzetinin təsisçisi, baş redaktoru Tamxil Ziyəddinoğlu çıxış edərək Qərbi Azərbaycan mövzusu ilə bağlı xatirələrini bölüşüb, belə bir məsələnin araşdırılmasının vacibliyini vurğulayıblar.
Tədbir zamanı Həsən Əhmədovun müəllifi olduğu, saxtalaşdırılmış materiallara dair videoçarx nümayiş olunub.
Sonda xatirə fotosu çəkilib.
7-03-2026, 18:32
Metroda cibgirlik edən şəxs saxlanıldı
Martın 4-də metro stansiyalarının birində oğurluq hadisəsi qeydə alınıb.
Bu barədə Daxili İşlər Nazirliyi məlumat yayıb.
Bildirilib ki, bir qadın polisə müraciət edərək qatarda olarkən çantasından sənəd, kartlar olan pul kisəsi və mobil telefonunun oğurlandığını bildirib.
Metropolitendə Polis İdarəsinin əməkdaşlarının keçirdikləri tədbirlərlə əməli törətməkdə şübhəli bilinən 39 yaşlı E.Qasımov müəyyən olunaraq saxlanılıb. Araşdırma aparılır.
7-03-2026, 17:58
İsrail SEPAH-a məxsus 16 təyyarəni məhv edib
Tehranın Mehrabad hava limanında SEPAH-a məxsus 16 təyyarə məhv edilib.
Bu barədə İsrail Hərbi Hava Qüvvələri bildirib
Təyyarələrdən Livandakı "Hizbullah"a silah təchizatı üçün istifadə olunub.
7-03-2026, 17:50
Beşmərtəbəli bina dağıldı - 10 nəfər öldü
Rusiya raket zərbəsi nəticəsində Xarkovda beşmərtəbəli bina dağılıb.
Ölənlərin sayı 10-a çatıb.
Ukrayna Dövlət Fövqəladə Hallar Xidmətinin məlumatına görə, onlar arasında iki uşaq - 13 yaşlı qız və 9 yaşlı oğlan da var. 16 nəfər isə yaralanıb.
Ölən və yaralananların axtarışı davam edir.
7-03-2026, 17:43
Ölənlərin sayı 41-ə çatdı
İsrail ordusunun Livanın şərqindəki Nəbi Çit kəndi və ətraf ərazilərində keçirdiyi əməliyyat nəticəsində ölənlərin sayı 41-ə çatıb.
Bu barədə ölkənin Səhiyyə Nazirliyi məlumat verib.
Bəyanata görə, daha 40 nəfər yaralanıb. Əvvəlki məlumatlarda 29 ölüm hadisəsi qeydə alınıb.
Qeyd edək ki,Əl-Hadath telekanalı əvvəllər İsrail komandoslarının 1986-cı ildə əsir götürülmüş şturman Ron Aradı tapmaq və geri qaytarmaq məqsədi ilə dörd helikopterdən Nəbi Çit yaxınlığındakı dağlıq əraziyə eniş etdiyini bildirmişdi. Əsgərlər İsrail pilotunun qalıqlarının dəfn olunduğu Əl-Şokr ailə qəbiristanlığına doğru yola düşüblər, lakin "Hizbullah" döyüşçüləri və yerli sakinlər tərəfindən pusquya salınıblar. Qrupun döyüş zonasından geri çəkilməsini təmin etmək üçün təyyarələr və helikopterlər Nəbi Çitə onlarla zərbə endiriblər.
7-03-2026, 17:40
İran daha bir tankeri vurdu
İran Körfəzdə tankerə hücum edib.
Bu barədə Hərbi Dəniz Qüvvələri məlumat yayıb.
Bildirilib ki, şənbə günü Marşal adaları bayrağı altında üzən tanker körfəzdə hücum dronunun zərbəsinə məruz qalıb.
Bundan sonra, Böyük Britaniya Dəniz Ticarət Ofisi (UKMTO) Səudiyyə Ərəbistanının Cubeyl şəhərindən 10 dəniz mili şimalda yerləşən körfəzdə baş verə biləcək mümkün hadisələrlə bağlı xəbərdarlıq edib.
7-03-2026, 17:35
İranda iki Ayətullah yeni Ali Rəhbər üçün ÇAĞIRIŞ ETDİ
İranının iki nüfuzlu Ayətullahı İslam Respublikasının yeni Ali Liderinin seçkilərinin sürətləndirilməsini tələb edib.
Ayətullah Məkarim Şirazinin sözlərinə görə, bu vacib məsələnin vaxtında həlli milli hakimiyyəti gücləndirəcək və işlərin ümumi təşkilini yaxşılaşdıracaq.
Məkarim Şirazi Ekspertlər Şurasının üzvlərinə ünvanladığı mesajda sistem Ali Rəhbərin seçilməsini sürətləndirməyə çağırıb..
Öz növbəsində, Ayətullah Nuri Həmədani İranın yeni Ali Liderinin andiçmə mərasiminin sürətləndirilməsini gözlədiyini vurğulayıb.
Ayətullah Həmədani hesab edir ki, bu, "eyni zamanda düşməni məğlub etməyə və hazırda ölkə daxilində mövcud olan milli birlik və həmrəyliyi qorumağa, eləcə də İranı təcavüzkarlardan müdafiə edən güclü silahlı qüvvələri dəstəkləməyə" imkan verəcək.
O bununla bağlı Ekspertlər Şurasına müraciət edərək, təcili qərar verməyə çağırıb: “İnşallah, hamı bu qərara tabe olacaq”.
Martın 4-də İran Ekspertlər Şurası ölkəninyeni liderinin seçilməsi prosesinə başlayıb. Varislə bağlı yekun qərar Şura Katibliyi vasitəsilə elan ediləcək.
Ekspertlər Şurası dövlətin Ali Liderinin təyin edilməsindən məsul olan məsləhətçi orqandır. O, səkkiz illik müddətə seçilən 88 ruhanidən ibarətdir.
Ölkə Konstitusiyasının 111-ci maddəsinə əsasən, Ekspertlər Şurası mövcud liderin ölümü, istefası və ya vəzifədən kənarlaşdırılması halında mümkün qədər tez yeni lider təyin etməyə borcludur.
Xarici media mərhum Ayətullah Əli Xameneinin oğlu Müctəba Xameneini Ali Lider vəzifəsi uğrunda mübarizədə aparıcı namizədlərdən biri kimi təqdim edir.
7-03-2026, 17:31
Hindistan Rusiyaya qoyulan sanksiyalardan imtina edəcək
Hindistan Rusiyadan təbii qaz alacaq.
Hindistan Yaxın Şərq böhranı fonunda Rusiyadan mayeləşdirilmiş təbii qaz almağa başlaya bilər.
Hindistan hakimiyyəti neft ehtiyatlarının artmağa davam etməsi səbəbindən hazırda benzin və dizel yanacağının qiymətlərini qaldırmağı planlaşdırmadıqlarını bildirib.
Lakin Hindistan Rusiyadan mayeləşdirilmiş təbii qaz almağı düşünür və artıq Səudiyyə Ərəbistanının Yanbu limanından bir neçə partiya neft sifariş edib.
7-03-2026, 17:28
Azərbaycan Özbəkistanla strateji müttəfiqliyi genişləndirəcək
Türk Dövlətləri Təşkilatının Xarici İşlər Nazirləri Şurasının qeyri-rəsmi iclası çərçivəsində Azərbaycan xarici işlər naziri Ceyhun Bayramov və Özbəkistan xarici işlər naziri Bəxtiyor Saidovarasında görüş keçirilib.
Bu barədə XİN-in X hesabında paylaşım edilib.
Bildirilib ki, nazirlər Azərbaycan-Özbəkistan strateji müttəfiqliyi, siyasi, iqtisadi və regional əlaqələr sahələrində əməkdaşlığın genişləndirilməsi perspektivləri, eləcə də Türk Dövlətləri Təşkilatı çərçivəsində koordinasiya ilə bağlı mövzuları müzakirə ediblər.
Yaxın Şərqdə davam edən hərbi eskalasiya ilə bağlı da fikir mübadiləsi aparılıb.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!