9-03-2026, 17:13
Husilər də İran müharibəsinə qoşulurlar
Husilər müharibəyə qoşulduqlarını bildirirlər.
Bu barədə İranın "Fars" agentliyi Yəməndə fəaliyyət göstərən husilərin yüksək rütbəli nümayəndəsinə istinadən məlumat yayıb.
Bildirilib ki, “Ənsar Allah” qruplaşması İranın apardığı hərbi əməliyyatlara qoşulur.
Nümayəndə bildirib: “Biz düşmən üçün sürprizlər hazırlayırıq”.
Qeyd edək ki, husilər hərbi əməliyyatlara qoşulduqlarını ilk dəfə müharibənin başladığı gün – fevralın 28-də bəyan etmişdilər. Lakin indiyədək bu bəyanatın ardınca konkret addımlar atıldığı barədə məlumat verilməyib.
Martın 8-də isə “Ənsar Allah” hərəkatı bəyanat yayaraq Müctəba Xameneyinin İranın ali lideri seçilməsini alqışlayıb. Bəyanatda Ekspertlər Şurasının qərarı “İslam inqilabının yeni qələbəsi və İranın düşmənlərinə vurulan sarsıdıcı zərbə” kimi qiymətləndirilib.
9-03-2026, 17:11
ABŞ ilə İsrail hərbi məqsədlərinə çatmağa yaxındır - KİV
Rejim devrilənə qədər mübarizə aparmağın maraqlarımıza uyğun olduğundan əmin deyiləm.
Bu barədə adı açıqlanmayan İsrail rəsmisi “Washington Post” qəzetinə bildirib:
"Heç kim bunun əbədi davam etməsini istəmir. İran təslim olacaq, lakin ABŞ-ın şərtləri ilə atəşkəsi qəbul etməyə hazır olduğunu göstərə bilər”.
İsrailli rəsmi qeyd edib ki, İsrail-ABŞ bombardman kampaniyası İranın nüvə proqramının qalıqlarını, raket ehtiyatlarını, silah istehsalı müəssisələrini və hərbi-kəşfiyyat rəhbərliyinin böyük hissəsini məhv etmək kimi hərbi məqsədlərə çatmağa yaxındır.
Rəsmi şəxs əməliyyatın nə qədər davam edəcəyi ilə bağlı konkret müddət açıqlamayıb.
9-03-2026, 16:55
Avropa Komissiyasının sədrinə ağır ittiham
Avropa hökumətləri Avropa Komissiyasının sədri Ursula von der Layeni ABŞ və İsrailin İrana qarşı hərbi əməliyyatlarının ilk günlərində öz səlahiyyətlərini aşmaqda ittiham edib.
Bu barədə "Politico" nəşri doqquz diplomat, Aİ rəsmisi və deputata istinadən yazır.
Bir neçə hökumət von der Layenin adətən Avropa diplomatiyasının rəhbəri Kaya Kallasın yerinə yetirməli olduğu rolu öz üzərinə götürməsindən narazıdır. Nəşrin yazdığına görə, hərbi əməliyyatların ilk günlərində Avropa Komissiyasının sədri Tehranda rejim dəyişikliyinə dəstək ifadə edib və Avropa İttifaqı ölkələrinin, eləcə də Körfəz dövlətlərinin liderləri ilə ən azı on telefon danışığı aparıb.
Mənbələrin sözlərinə görə, o, dəfələrlə Aİ üzv ölkələri arasında mövcud konsensusdan xeyli kənara çıxan ictimai açıqlamalar verib.
Diplomatlar bildiriblər ki, Avropa İttifaqının xarici siyasətinin koordinasiyası məhz Kaya Kallasın üzərinə düşür. Onun əsas vəzifəsi paytaxtlarla əlaqə saxlamaq və blok daxilində ümumi mövqenin formalaşdırılmasına nail olmaqdır, hətta bu proses çox vaxt yavaş və çətin olsa belə. Onların fikrincə, von der Layenin bu addımları Aİ-nin digər ölkələrlə münasibətlərində qarışıqlıq yarada bilər.
9-03-2026, 16:52
İlham Əliyev Müctəba Xameneyini təbrik etdi
Azərbaycan Respublikasının Prezidenti İlham Əliyev İran İslam Respublikasının Ali Rəhbəri Ayətullah Seyid Müctəba Hüseyni Xameneyini təbrik edib.
Təbrik mətnində deyilir:
- Möhtərəm Ayətullah Xameneyi həzrətləri.
İran İslam Respublikasının Ali Rəhbəri vəzifəsinə seçilməyiniz münasibətilə Sizi təbrik edirəm.
Atanız - İran İslam Respublikasının Ali Rəhbəri Ayətullah Seyid Əli Xameneyi həzrətlərinin faciəvi vəfatı ilə əlaqədar Sizə bir daha başsağlığımı ifadə edirəm.
Azərbaycan Respublikası ilə İran İslam Respublikası arasında münasibətlər tarixən mehriban qonşuluq və dostluq şəraitində yaşamış xalqlarımızın iradəsindən qaynaqlanır. Dövlətlərarası əlaqələrimizin xalqlarımızın mənafelərinə uyğun olaraq qarşılıqlı hörmət və etimad məcrasında inkişafı naminə birgə səylər göstərəcəyimizə ümidvar olduğumu bildirirəm.
Bu yüksək təyinatla bağlı Sizə bir daha təbriklərimi çatdırır, dost və qardaş İran xalqına sülh və əmin-amanlıq diləyirəm.
9-03-2026, 16:51
Rumıniya Azərbaycanı dəstəklədi
Rumıniyanın xarici işlər naziri Oana-Silvia Toiu Azərbaycan Respublikasının xarici işlər naziri Ceyhun Bayramova zəng vurub.
Bu barədə Xarici İşlər Nazirliyi məlumat yayıb.
Tərəflər bölgədə mövcud təhlükəsizlik vəziyyəti, xüsusilə Yaxın Şərqdə gərginliyin artması fonunda yaranmış risklər barədə danışıblar. Bu çərçivədə, İran ərazisindən Azərbaycanın Naxçıvan Muxtar Respublikasına qarşı həyata keçirilmiş dron hücumu barədə qarşı tərəf məlumatlandırılıb. Qeyd olunub ki, hücumlar nəticəsində mülki infrastruktura ziyan dəyib və mülki şəxslər xəsarət alıb.
Rumıniya naziri bu hücumu pisləyib və narahatlığını diqqətə çatdırıb. Bu cür hücumların regionda sabitlik və təhlükəsizlik üçün ciddi təhdid yaratdığını vurğulayıb.
Telefon danışığı zamanı həmçinin Azərbaycan və Rumıniya arasında mövcud strateji tərəfdaşlıq münasibətlərinin gündəliyində duran məsələlər, enerji təhlükəsizliyi, nəqliyyat və bağlantı layihələri, habelə qarşılıqlı maraq doğuran digər ikitərəfli və çoxtərəfli əməkdaşlıq istiqamətləri müzakirə olunub.
9-03-2026, 16:50
Qətər əmiri: İran bizə xəyanət etdi
İran hücumları Körfəz ölkələrinin etimadına xəyanət edib.
Bunu Qətər Əmiri Şeyx Məhəmməd bin Əbdülrəhman Əl-Tani deyib.
O, qeyd edib ki, Qətər İran ona və digər Körfəz dövlətlərinə hücum edərkən münaqişənin diplomatik həlli üçün vasitəçilik etməyə çalışıb:
"Bu, hücumlar İranla münasibətlərdə etimada böyük zərbədir, lakin danışıqları davam etdirəcəyik, çünki "onlar bizim qonşularımızdır, bu, bizim taleyimizdir".
9-03-2026, 16:40
Raket hücumu ilə bağlı İrana XƏBƏRDARLIQ
Türkiyə Prezident Administrasiyasının Kommunikasiya İdarəsinin rəhbəri Burhanəddin Duran İranının Türkiyəyə yönələn növbəti raket hücumu ilə bağlı sosial şəbəkə hesabı üzərindən paylaşım edib.
O, Türkiyənin hava məkanını və sərhəd təhlükəsizliyini qorumaq iradəsi və qabiliyyətinin ən yüksək səviyyədə olduğunu vurğulayıb.
Hadisənin əvvəldən bütün qurumlar tərəfindən yaxından izlənildiyini və lazımi müdafiə və təhlükəsizlik tədbirlərinin dərhal həyata keçirildiyini bildirən Duran, bütün müvafiq bölmələrin, xüsusən də Milli Müdafiə Nazirliyinin bu çərçivədə tam koordinasiyalı şəkildə hərəkət etdiyini çatdırıb:
"Dövlətimizin Türkiyənin hava məkanını və sərhəd təhlükəsizliyini qorumaq iradəsi və qabiliyyəti ən yüksək səviyyədədir. Bölgədəki gərginliyin daha da artmasının və münaqişələrin daha geniş əraziyə yayılmasının qarşısını almaq son dərəcə vacibdir. Bütün tərəflərə, xüsusən də İrana regional təhlükəsizliyi təhdid edən və mülki şəxsləri təhlükəyə atan hərəkətlərdən çəkinmək barədə xəbərdarlıq edirik. Bu proses zamanı vətəndaşlarımızı və media qurumlarımızı panikaya və dezinformasiyaya səbəb ola biləcək təsdiqlənməmiş məzmuna qarşı həssas olmağa və yalnız rəsmi orqanlarımızın verdiyi açıqlamalara etibar etməyə çağırırıq".
9-03-2026, 16:30
Azərbaycan Türkiyəyə raket hücumuna ETİRAZ ETDİ
Azərbaycan Müdafiə Nazirliyi Türkiyə ərazisinə qarşı həyata keçirilən və Qaziantep üzərində zərərsizləşdirilmiş raket hücumunu qətiyyətlə pislədiyi bəyan edib.
Bu barədə Azərbaycan Müdafiə Nazirliyinin bəyatında bildirilib.
Qeyd edilib ki, bu cür əməllər regional sülh və təhlükəsizlik üçün ciddi təhdid yaradır və qəbuledilməzdir:
"Biz qardaş Türkiyə Respublikası ilə tam həmrəyliyimizi ifadə edirik. Türkiyə hökumətinin əhalisinin və ərazisinin təhlükəsizliyinin təmin edilməsi istiqamətində səylərinə dəstək veririk.
Azərbaycan Türkiyənin yanında qətiyyətlə dayanır"- deyə Müdafiə Nazirliyi bəyan edib.
9-03-2026, 16:09
Paşinyan İranın yeni Ali Liderinə məktub yazdı
Ermənistanın Baş naziri Nikol Paşinyan Müctəba Xameneini İran İslam Respublikasının Ali Rəhbəri seçilməsi münasibətilə təbrik edib.
Bu barədə Ermənistan KİV-i məlumat yayıb.
Təbrik məktubunda deyilir:
“Sizi İslam İnqilabının Ali Rəhbəri seçilməyiniz münasibətilə təbrik edirəm.
Əminəm ki, Ermənistan və İran arasındakı möhkəm əlaqələr inkişaf etməyə davam edəcək və yeni uğurlar qazanacaq.
Bu fürsətdən istifadə edərək, dost İran xalqına firavanlıq və davamlı sülh arzulayıram”.
9-03-2026, 16:04
İran yenə Türkiyəyə raket atdı
İran növbəti dəfə Türkiyəyə ballistik raket atıb.
Bu barədə Türkiyə Milli Müdafiə Nazirliyi məlumat yayıb.
Bildirilib ki, İrandan atılan ballistik raket Şərqi Aralıq dənizində yerləşdirilən NATO hava və raketdən müdafiə sistemi tərəfindən zərərsizləşdirilib.
Qeyd edilib ki, təhlükə havada zərərsizləşdirildikdən sonra Qaziantepdə boş ərazilərə raket qəlpələri düşüb. Xoşbəxtlikdən hadisə nəticəsində ölən və yaralanan olmayıb.
"Türkiyə mehriban qonşuluq münasibətlərinə və regional sabitliyə böyük əhəmiyyət verir. Bununla belə, bir daha vurğulayırıq ki, ölkəmizin ərazisinə və hava məkanına yönəlmiş hər hansı bir təhdidə qarşı bütün lazımi addımlar qətiyyətlə və tərəddüd etmədən atılacaq. Türkiyənin bu mövzuda xəbərdarlıqlarına əməl edilməsi vacibdir",-Türkiyə Milli Müdafiə Nazirliyi tərəfindən bildirilib.
Qeyd edək ki, İran bundan əvvəl - martın 4-də də Türkiyəyə ballistik raket atmışdı. Türkiyə hava məkanına yönələn həmin raket də NATO qüvvələri tərəfindən vurulmuşdu.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!