6-03-2026, 19:19
Vaqif Rüstəmov –75
Sadə və mənalı
ziyalı ömrü...
1980-cı illərin ortaları idi, “Bakinskiy raboçiy” qəzetinin Mil-Muğan zonası üzrə xüsusi müxbiri vəzifəsinə təyin edilmişdim. Hardasa 27-28 yaşım vardı. Yadımdadır, güllü-çiçəkli bir bahar günü İmişliyə gəlmişdim. Birinci katib paytaxtdan gələn qonaqlarla harasa tədbirə getmişdi. Dedilər ki, ən tezi 1 saata qayıdar. Yəni boş, asudə vaxtım yaranmışdı. Hörmətli İmişli camaatının dili ilə desək, “eycahanllıq” idi.
İmişli Rayon Tarix Diyarşünaslıq muzeyinə baş çəkməyi qərara aldım. Muzey raykomdan cəmi 70-80 metr aralıda, milli memarlıq üslubunda yeni inşa edilmiş binada yerləşirdi. Qarşısında səliqə ilə rəngarəng güllər əkilmişdi. Xüsusilə təzə açmış ağ, qırmızı, çəhrayı qızılgüllərə baxanda ürəyim açıldı. İçəri daxil oldum. Düşündüm ki, nə yaxşı ki, muzeylərdə bəzi idarələrdə olduğu kimi, “Bura niyə gəlmisiniz, sizə kim lazımdır?” - deyə soruşmurlar.
O vaxtlar zona müxbirləri bölgələrdə fəaliyyət göstərən muzeylərdən az-az hallarda yazılar hazırlayırdılar. Bəlkə də elə buna görə muzeyin gənc, mehriban, gülərüz direktoru mənim qəfil gəlişimə həm təəccüb etdi, həm də çox sevindi. “Xoş gəlibsiniz. Mən özüm də ara-sıra respublikanın aparıcı qəzetləri ilə əməkdaşlıq edirəm” -dedi.
“Bilirəm, imzanızı tanıyıram. Vaqif Rüstəmovsunuz!” Mənim bu sözlərimə cavab olaraq onun mənalı gözlərində dərin minnətdarlıq ifadəsi oxudum. Əllərini qızılı qıvrım saçlarına çəkdi. Simasında xoş ovqat yaranmışdı. Böyük həvəslə muzeyin fəaliyyəti, buradakı eksponatlar barədə xeyli söz açdı. Dedi ki, rayon ziyalıları, məktəblərin yuxarı sinif şagirdləri bura tez-tez gəlirlər. Hətta muzeyə nadir məişət əşyaları hədiyyə edənlər də olur.
Vaqif müəllimlə sonra xalqımızın tarixii, mədəniyyəti, ayrı-ayrı görkəmli şəxsiyyətləri barədə xeyli söhbət etdik. Səlis və məntiqli danışığı, hərtərəfli biliyi, geniş erudisiyası, xüsusilə pozitiv aurası məndə ona qarşı dərin rəğbət hissi yaratdı. O gündən başlanan dostluq əlaqələrimiz bu gün də davam edir. Heç vaxt bir-birimizdən zərrə qədər inciməmişik. Əksinə, hər dəfə görüşəndə şad olmuşuq, hal-əhval tutmuşuq, uğurlarımıza sevinmişik.
Vaqif Rüstəmov Allahın lütfü ilə ömrünün 75 illik zirvəsinə çatır. Onun həyatını, demək olar ki, əzbər bildiyim üçün, bəzi avtobioqrafik məlumatları oxucuların nəzərinə çatdırmağı özümə borc bilirəm. Vaqif 1951-ci il martın 14-də İmişli şəhərində doğulub, burada da boya-başa çatıb. Atası Misir kişi İmişliyə ailəsi ilə birlikdə 1939-cu ildə Cəbrayıl rayonunun Daşkəsən kəndindən köçüb.
Rüstəmovlar ailəsi tez-tez Daşkəsən kəndinə gedərək oradakı doğmalarına baş çəkiblər. Xüsusilə yay aylarında Mildən Muğana getməyin bir ayrı səfası var. Axar-baxarlı bu kənd öz gözəl təbiəti, saf suyu, sərin bulaqları ilə Vaqifi hələ uşaq yaşlarından özünə cəlb edib. Sonradan ali təhsilli tarixçi kimi Qarabağla, eləcə də Daşkəsənlə bağlı xeyli araşdırmalar aparıb, bu barədə məqalələr yazaraq dərc etdirib.
Xatırladaq ki, Daşkəsən kəndinin akademik Mehdi Mehdizadə kimi görkəmli yetirməsi olub. Bu böyük pedaqoq 30 ilə yaxın Azərbaycanın maarif naziri vəzifəsində çalışıb, respublikamızda təhsilin inkişafı üçün danılmaz xidmətlər göstərib. Vaqif Rüstəmov ömrü boyu akademikin uzaq qohumu olması ilə fəxr edib, amma heç vaxt bu böyük alimin mənzilinin qapısını döyməyib. Ümumiyyətlə, o, nə özü, nə də övladları üçün heç bir xahiş və təmənnada bulunmağı sevmir.
Vaqif Rüstəmov orta məktəbdə əla qiymətlərlə oxuyub. 1978-ci ildə Azərbaycan Dövlət Pedaqoji Universitetinin tarix fakültəsini bitirib və təyinatla İmişli rayonundakı Xubyarlı kənd orta məktəbində işləməyə başlayıb. Enerjili, təşəbbüskar pedaqoq ilk gündən şagirdlərin qəlbində tarix fənninə dərin maraq oyatmağa çalışıb və buna nail olduqca çox sevinib.
Xubyarlıda çox savadlı və bacarıqlı bir tarix müəlliminin çalışdığı, həm həmkarları, həm də kənd əhalisi arasında dərin hörmət qazandığı barədə müsbət xəbərlər tezliklə hər yerə yayılıb. Bu, İmişli rayon partiya komitəsinin birinci katibi Qadir İsmayılzadənin diqqətindən yayınmayıb. Qeyd etmək lazımdır ki, Qadir müəllim partiya işinə məhz təhsil sahəsindən gəlmişdi və öz peşəsinə dərin sevgi və məsuliyyətlə yanaşan gənc pedaqoqlara böyük qayğı ilə yanaşırdı. Qadir İsmayılzadə hər dəfə Xubyarlıya yolu düşəndə kənd orta məktəbinə də baş çəkib və “qızılı saçlı” gənc tarix müəllimi ilə ayrıca söhbət edərək onun qayğı və problemləri ilə maraqlanıb. Vaqif müəllimin savadı, etikası, davranışı birinci katibin xoşuna gəlib. Məhz Qadir İsmayılzadənən təşəbbüsü ilə Vaqif Rüstəmov 1983-cü ildə rayon mərkəzində yeni açılan İmişli Rayon Tarix Diyarşünaslıq Muzeyinin direktoru vəzifəsinə təyin edilib.
Ədalət naminə demək lazımdır ki, Vaqif Rüstəmovun rəhbərliyi ilə İmişli Rayon Tarix Diyarşünaslıq Muzeyi qısa müddət ərzində nəinki bu rayonun, eyni zamanda respublikanın ən qabaqcıl mədəniyyət müəssisələrindən birinə çevrilib. O illərdə respublikanın bir çox tanınmış simaları, eləcə də böyük alim, vətənpərvər ziyalı Xudu Məmmədov bu muzeyin qonağı olub, Vaqif müəllimi dinləyəndən sonra deyib ki, “sizin tarixmizə ekskursiyanızdan çox razı qaldım. Bundan sonra da çalışın ki, gələcək nəsillərimiz tariximizi sizin kimi dərindən öyrənsinlər. Axı Vətəni sevmək onu tanımaqdan başlayır!”
Bir müddətdən sonra Vaqif Rüstəmovu Mədəniyyət Nazirliyinin Tarixi Abidələrin Mühafizəsi və Bərpası İdarəsində işləmək üçün paytaxta dəvət ediblər. O, burada da öz işini sevən, məsuliyyətli kadr kimi fərqlənib, respublikanın əksər bölgələrindəki muzeylərdə olub, yerlərdə muzey işinin səmərəli təşkili üçün əməli tapşırıqlar verib. Sonra qısa müddət Nərimanov rayon icra hakimiyyətində müvəkkil vəzifəsində çalışıb.
Vaqif Rüstəmov muzey işini əla bilsə də, ruhən pedaqoq idi. Hiss edirdi ki, təhsil sahəsində çalışsa, millətinə, onun övladlarına daha çox fayda verə bilər. 2001-ci ildən Bakının Yeni Günəşli qəsəbəsindəki “V” massivində yerləşən 278 nömrəli orta məktəbdə tarix fənnindən dərs deməyə başlayıb. 16 il bu qabaqcıl təhsil müəssisəsində şagirdlərə tariximizi sonsuz sevgi ilə tədris edib. Onun dərs dediyi məzunların çoxu hər il qəbul imtahanlarında yüksək bal toplayıblar. Vaqif müəllim artıq 7-8 ildir ki, təqaüddədir. Təqaüdə çıxandan sonra o, çoxları kimi, elə mənim üçün də gözlənilməz olaraq, bədii və publisistik yaradıcılıqla intensiv surətdə məşğul olmağa başladı. Əvvəlcə bir xeyli şeir və hekayələr yazdı, sonra nəsrə keçdi. Əvvəlcə Qaçaq Süleymandan bəhs edən eyniadlı romanı geniş oxucu kütləsi tərəfindən maraqla qarşılandı. İkinci romanını isə “Səsverən qaya” adlandırdı.
Vaqif Rüstəmov 3-4 il əvvl muğamsevərlər arasında “Dədə Süleyman” kimi tanınan mərhum xanəndə Süleyman Abdullayev haqqında “Səsin sorağında...” adlı elə bir dəyərli sənədli-publisistik əsər qələmə aldı ki, bu əsər bir çox məziyyətləri ilə çoxlarını yaxşı mənada təəccübləndirib. Mən şəxsən bu qiymətli əsəri oxuduqca ürəyimdə müəllifə dəfələrlə “əhsən!” demişəm. Bu yaxınlarda isə onun Cəbrayıl rayonunun Daşkəsən kəndindən olan Səxavət Alı oğlu İsmayılov adlı bir nəfərin İkinci Dünya müharibəsindən sonra qürbətdə keçən keşməkeşli taleyindən bəhs edən “Yurd həsrəti” adlı yeni kitabı nəşr olunub. Qürbətin möhnəti, əlbəttə, çox ağır, dözülməz olur. Vaqif Rüstəmov təcrübəli qələm sahibi kimi qəhrəmanının narahat psixoloji durumunu ustalıqla aça bilib.
...Vaqif Rüstəmov hazırda Yeni Günəşlidə 9 mərtəbəli evin sonuncu mərtəbəsində yaşayır və onun mənzilinin eyvanından bir vaxtlar dərs dediyi məktəbin həyəti ovuc içi kimi aydın görünür. O, bəzən səhərlər dərsə tələsən şagird və müəllimləri uzaqdan müşayiət edərək kövrək xatirələrə dalır.
O, xoşbəxtlikdən, nikbin və müdrik insandır. Düşünərm ki, sadə, mənalı, maraqlı bir ömür yaşadığı üçün Vaqif Rüstəmovun geriyə boylanıb sevinməyə, yaşanan mənalı günlər, aylar, illər üçün qürur duymağa tam mənəvi haqqı var!
Məsaim ABDULLAYEV,
Əməkdar mədəniyyət işçisi.
6-03-2026, 18:39
Belarusun müdafiə naziri azərbaycanlı həmkarına zəng etdi
Martın 6-da Azərbaycan Respublikasının müdafiə naziri general-polkovnik Zakir Həsənovla Belarus Respublikasının müdafiə naziri general-leytenant Viktor Xreninin təşəbbüsü ilə telefon danışığı olub.
Müdafiə Nazirliyindən verilən xəbərə görə, tərəflər İran İslam Respublikası ərazisindən pilotsuz uçuş aparatları (PUA) vasitəsilə Naxçıvan beynəlxalq hava limanına və digər mülki infrastruktura hücum aktlarını müzakirə ediblər.
General-leytenant Viktor Xrenin Belarus Respublikasının bu tip hücumları qəti şəkildə pislədiyini diqqətə çatdıraraq ölkəmizə zəruri dəstək verməyə hazır olduqlarını diqqətə çatdırıb.
Nazirlər həmçinin, ölkələrimiz arasında hərbi, hərbi-texniki sahədə əməkdaşlıq, regional təhlükəsizlik və qarşılıqlı maraq kəsb edən məsələlər barədə geniş fikir mübadiləsi aparıblar.
6-03-2026, 18:30
“Qənirə Paşayeva mükafatı”nın builki qalibi məlum oldu
Azərbaycan Türk Ocağı Türk dünyasının tanınmış simasının adını daşıyan mükafatın qalibini açıqlayıb
Azərbaycan Türk Ocağı İctimai Birliyinin ötən il ali məktəblərin jurnalistika fakültəsi tələbələri ücün təsis etdiyi "Qənirə Paşayeva mükafatı"nın bu ilki qalibi müəyyən olunub.
Azərbaycan Türk Ocağı sədri Akif Aşırlı deyib ki, bu dəfə qalib Nuray Namiq qızı Məmmədrzayevadır. Nuray Bakı Slavyan Universiteti Jurnalistika ixtisasının lll kurs tələbəsidir. Yüksək təhsil göstəriçiləri , içtimai fəallığı ilə seçilən Nuray həm də mətbuatda fərqli yazılarla çıxış edir.
A.Aşlrlı qeyd edib ki, Türk Dünyası ücün böyük işlər görmüş, jurnalistikamızda silinməz izlərlə yaddaşlarda yaşayan Qənirə Paşayevanın adını daşıyan mükafata sahib olmaq böyük şərəfdir və bu ilki qalib tələbə Nurayın da bu yolda fədakarlıq göstərəçəyinə inanır.
Qeyd edək ki, 2025-ci ilin fevral ayının 25-də Azərbaycan Türk Ocağı İdarə Heyyətinin qərarı ilə ali məktəbin Jurnalistika fakültəsi tələbələri ücün Qənirə Paşayeva mükafatı təsis edib, davamlı olaraq hər il 8 mart Qənirə Paşayevanın doğum günündə veriləcəyi qərarlaşdırılıb. Qalib plaket və pul ilə mükafatlandırılır.
Nuray Məmmədrzayeva 2006-cı ildə Bakıda anadan olub. Bakı şəhəri Nəsimi rayonu 14 nömrəli tam orta məktəbi bitirib. Elə həmin il Bakı Slavyan Universitetinin Jurnalistika ixtisasına qəbul olub. Hazırda Bakı Slavyan Universitetinin III kurs tələbəsidir.Təhsil göstəriciləri yüksəkdir, yaradıcılıqla məşğuldur, ictimai fəaldır. Yazıları universitet qəzetində və müxtəlif saytlarda dərc olunub.
Xatırladaq ki, ötən ilin mükafatçısı BDU-nun Jurnalistika fakültəsinin ll kurs tələbəsi Banuçiçək Kalbalıyeva idi.
Mükafat yaxın günlərdə qalibə təqdim olunacaq.
6-03-2026, 18:24
“Avroviziya 2026”da Azərbaycan təmsilçisi məlum oldu
Azərbaycanı “Avroviziya 2026” mahnı müsabiqəsində JIVA təmsil edəcək. JIVA (Cəmilə Həşimova) azərbaycanlı müğənnidir.
Bu barədə müsabiqənin rəsmi səhifəsində məlumat verilib.
Onun yaradıcılıq yolu 2003-cü ildə keçirilən “Bakı Payızı” müsabiqəsində 2-ci yer qazanması ilə başlayıb. O, 2007-ci ildə “Show Time” layihəsində iştirak edib, 2011-ci ildə isə “Avroviziya” milli seçim həftəsində ilk üçlüyə daxil olmağı bacarıb.
Müğənni müxtəlif musiqi layihələrində iştirak edib. O, Xalq artisti Rəşad Haşımovun rəhbərlik etdiyi məşhur RAST ansamblı ilə çıxış edib və “Montreux Jazz” festivalında səhnəyə çıxıb. Daha sonra Hazz Band qrupunun solisti kimi fəaliyyət göstərərək caz elementlərini müasir estrada ilə birləşdirib.
2017-ci ildən etibarən JIVA karyerasını solo olaraq davam etdirir. O, pop, dance və R&B janrlarında azərbaycan, rus və ingilis dillərində mahnılar ifa edir.
Xatırladaq ki, Azərbaycanın “Avroviziya 2026” beynəlxalq mahnı müsabiqəsində təmsil olunması üçün keçirilən seçim mərhələsinə ümumilikdə 100 müraciət daxil olub və bu çərçivədə 186 mahnı təqdim edilib. Təqdim olunan mahnılardan 107-si yerli müəllif və ifaçılar, 79-u isə xarici müəlliflər tərəfindən göndərilib.
İlkin qiymətləndirmə mərhələsində müraciətlər peşəkar heyət tərəfindən nəzərdən keçirilib və növbəti mərhələyə 18 namizəd dəvət olunub. Onlar üçün canlı dinləmələr və fərdi müsahibələr təşkil edilib. Bu mərhələdə namizədlərin vokal imkanları, səhnə təqdimatı və beynəlxalq auditoriya üçün potensialı qiymətləndirilib.
Qiymətləndirmələrin nəticəsində üç namizəddən ibarət qısa siyahı (shortlist) formalaşdırılıb. Yekun qərar xüsusi formalaşdırılmış fokus qrupunun qiymətləndirməsi əsasında qəbul olunub və Azərbaycanın builki təmsilçisi kimi JIVA seçilib.
Qeyd edək ki, “Avroviziya 2026” beynəlxalq mahnı müsabiqəsi Avstriyanın paytaxtı Vyana şəhərində keçiriləcək. Yarışmanın birinci yarımfinalı 12 may, ikinci yarımfinalı 14 may, böyük final isə 16 may 2026-cı il tarixində baş tutacaq.
6-03-2026, 18:15
Azərbaycan-İran sərhədində yük maşınlarının hərəkətinə icazə verildi
Məlumat verildiyi kimi, Azərbaycan Respublikası Nazirlər Kabinetinin 2026-cı il 5 mart tarixli 66 nömrəli Qərarına əsasən Azərbaycan Respublikası ilə İran İslam Respublikası arasında dövlət sərhədindən bütün növ nəqliyyat vasitələri üçün yüklərin daşınması məqsədilə giriş-çıxış (o cümlədən tranzit məqsədilə giriş-çıxış) müvəqqəti olaraq dayandırılıb.
Bu barədə Nazirlər Kabinetindən xəbər verilib.
Qeyd edlib ki, bununla əlaqədar hazırda İran İslam Respublikasından Azərbaycana qayıdan Azərbaycan Respublikasına məxsus yük avtomobillərinin, həmçinin Azərbaycan Respublikasından İrana qayıdan İran İslam Respublikasına məxsus yük avtomobillərinin Astara, Biləsuvar və Culfa dövlət sərhədindən buraxılış məntəqələrindən buraxılışına başlanılıb.
6-03-2026, 18:08
Tramp İrandan kapitulyasiya tələb etdi: "Heç bir razılaşma olmayacaq"
İranla heç bir razılaşma olmayacaq, qeydsiz-şərtsiz kapitulyasiyadan başqa.
Bunu ABŞ Prezidenti Donald Tramp "Truth" sosial şəbəkəsində yazıb.
"İranla qeyd-şərtsiz kapitulyasiyadan başqa heç bir razılaşma olmayacaq! Bundan sonra və layiqli lider(lər)in seçilməsindən sonra biz və bir çox müttəfiqlərimiz, tərəfdaşlarımız İranı məhv olmaq astanasından geri çəkmək üçün yorulmadan çalışacağıq, onu iqtisadi cəhətdən əvvəlkindən daha böyük, yaxşı və güclü edəcəyik. İranın böyük gələcəyi olacaq. "İranı yenidən böyük edək (MIGA!)". Bu məsələyə diqqətiniz üçün təşəkkür edirəm!", - o vurğulayıb.
6-03-2026, 18:01
Prezident Azərbaycan qadınlarını təbrik etdi
Prezident İlham Əliyev 8 Mart – Beynəlxalq Qadınlar Günü münasibətilə Azərbaycan qadınlarına təbrik ünvanlayıb.
Təbrik mətnində deyilir:
"Hörmətli xanımlar!
Sizi Beynəlxalq Qadınlar Günü münasibətilə səmimi-qəlbdən təbrik edir, hamınıza cansağlığı, səadət və işlərinizdə müvəffəqiyyətlər arzulayıram.
Azərbaycan xalqı qadın adını hər zaman zərifliyin, gözəlliyin, ülviyyətin rəmzi bilmiş və ona dərin ehtiram göstərmişdir. Mübarizələrlə dolu böyük keçmişimiz qadınlarımızın müdrikliyi, fədakarlığı və qəhrəmanlığının parlaq nümunələri ilə zəngindir. Hər bir azərbaycanlının qəlbində məhz Ana məfhumu daim doğma yurdla, Vətən torpağı ilə bağlı işıqlı duyğular yaradır. Bəşər mədəniyyəti xəzinəsinə töhfəmiz olan milli-mənəvi dəyərlərimizin bir bütöv halında qorunub saxlanılmasında, dilimizin əsrlərin sınağından çıxaraq layiqincə yaşadılmasında analarımızın misilsiz xidməti vardır.
Ölkəmizdə tarixən qadının cəmiyyət həyatında fəal iştirakına həmişə rəğbət və hörmətlə yanaşılmışdır. Azərbaycan qadınlarının bir çox qabaqcıl dünya ölkələri qadınlarından daha əvvəl seçib-seçilmək hüququ əldə etmələri bu mütərəqqi münasibətin ifadəsidir. Ötən illərdə sosial-mədəni təşəbbüskarlıqları ilə yüksək ictimai mövqe və nüfuz sahibi olmuş qadınlarımız təhsil, mədəniyyət, səhiyyə və elm sahələrində bu gün də uğurla çalışmaqdadırlar. Maarifpərvər sələflərinin ənənələrini davam etdirən xanımlarımızın ölkənin müasir simasının müəyyənləşməsinə yönəlmiş çoxsaylı nailiyyətləri müstəqillik salnaməmizin qürurverici səhifələridir.
Əminəm ki, qadınlarımız gənc nəslin Vətənə və milli ideallara sədaqət ruhunda tərbiyəsi üçün bundan sonra da qüvvələrini əsirgəməyəcək, ictimai-mənəvi mühitimizə yeni töhfələr bəxş edəcəklər.
Əziz xanımlar!
Bayramınız mübarək olsun!"
6-03-2026, 17:46
Milli Məclisin Komissiyası Naxçıvanla bağlı bəyanat qəbul etdi
Milli Məclisin Xarici müdaxilələrə və hibrid təhdidlərə qarşı Komissiyası Azərbaycan Respublikasının Naxçıvan Muxtar Respublikasına İran İslam Respublikası ərazisindən olunan PUA hücumlarına dair Bəyanat qəbul edib.
Bəyanatda deyilir:
“2026-cı il martın 5-də Naxçıvan Muxtar Respublikasına İran İslam Respublikasının ərazisindən partlayan döyüş başlığı ilə təchiz edilmiş pilotsuz uçuş aparatları (PUA) ilə hücumlar həyata keçirilib.
PUA-lardan biri Naxçıvan Beynəlxalq Hava Limanının terminal binasını zədələyib, digəri isə Babək rayonunun Şəkərabad kəndində orta məktəb binasının yaxınlığına düşüb. Hücumlar zamanı dörd nəfər mülki şəxsin xəsarət aldığı müəyyən edilib.
Muxtar Respublikanın yeganə beynəlxalq hava qapısı olan Hava Limanının və mülki infrastrukturun hədəfə alınmasını beynəlxalq hüququn norma və prinsiplərinin pozulması, dövlətimizin ərazi bütövlüyü və suverenliyinə yönəlmiş qəsd və terror aktı kimi qiymətləndiririk.
Komissiya İran tərəfindən həyata keçirilən, özündə hərbi, siyasi və informasiya komponentlərini birləşdirən bu xain hərəkəti həm də hibrid hücum əməliyyatı hesab edir. Eyni zamanda, Azərbaycanın sosial media seqmentində İranın bu fəaliyyətini dəstəkləyən informasiya kampaniyasının aparıldığı və manipulyativ fikirlərin yayıldığı müşahidə olunur.
Bu hücumların vətəndaşlarımız arasında çaşqınlıq və qorxu yaratmaq, müvafiq dövlət qurumlarına olan etimadı sarsıtmaq, Azərbaycanın regional mövqeyinə və beynəlxalq nüfuzuna zərər vurmaq məqsədilə edildiyi şübhə doğurmur.
Azərbaycan tərəfi beynəlxalq hüquq çərçivəsində müvafiq cavab tədbirləri görmək hüququnu özündə saxlayır.
Xarici müdaxilələrə və hibrid təhdidlərə qarşı komissiya vətəndaşlarımızı və xaricdə yaşayan soydaşlarımızı dövlətimizin gücünə və rəsmi məlumatlara inanmağa çağırır”.
6-03-2026, 17:43
Azərbaycan Beynəlxalq Mülki Aviasiya Təşkilatına müraciət etdi
Azərbaycan hökuməti İrandan Naxçıvan Beynəlxalq Hava Limanına dron hücumu ilə bağlı Beynəlxalq Mülki Aviasiya Təşkilatına (ICAO) müraciət edib.
Bu barədə Rəqəmsal İnkişaf və Nəqliyyat Nazirliyinin məlumatında bildirilib.
Xatırladılıb ki, 5 mart tarixində İran İslam Respublikası ərazisindən Naxçıvan Muxtar Respublikasının “Naxçıvan” Beynəlxalq Hava Limanına, onun terminal binasına pilotsuz uçuş aparatlarının hücumları həyata keçirilib.
“Beynəlxalq Mülki Aviasiya haqqında” 1944-cü il 7 dekabr tarixli Konvensiyaya, o cümlədən Konvensiyaya 17 nömrəli Əlavə – “Aviasiya təhlükəsizliyi” sənədinin beynəlxalq standartlarına uyğun olaraq, hava limanına qanunsuz müdaxilə aktı baş verdikdə üzv dövlət tərəfindən hazırlanmış ilkin hesabat Beynəlxalq Mülki Aviasiya Təşkilatına (ICAO) göndərilməlidir.
Beynəlxalq standartlardan irəli gələrək Azərbaycan Respublikası Rəqəmsal İnkişaf və Nəqliyyat Nazirliyinin tabeliyində “Dövlət Mülki Aviasiya Agentliyi” publik hüquqi şəxsi “ICAO”ya müvafiq ilkin hesabat göndərib.
6-03-2026, 17:26
Azərbaycanın İranla sərhədə hərbi texnika yığması dezinformasiyadır - MEDİA
"Sosial şəbəkələrdə Azərbaycan Respublikasının İran İslam Respublikası ilə dövlət sərhədinə guya Azərbaycan Ordusuna məxsus ağır silahların yerləşdirilməsi haqqında paylaşım mahiyyəti bilərəkdən təhrif olunmuş informasiya manipulyasiyasıdır".
Bu barədə Azərbaycan Respublikası Medianın İnkişafı Agentliyinin (MEDİA) açıqlamasında bildirilib.
Açıqlamada deyilir:
"Bu ilin yanvar ayında hərbi texnikanın yerdəyişmə prosesini əks etdirən həmin görüntünün yönləndirici ifadələrlə yeni “fakt” kimi təqdim edilməsi ictimai rəyi çaşdırmaq məqsədi güdür.
Yaxın Şərqdə davam edən hərbi əməliyyatlar zamanı məlumatları manipulyasiya edərək təşviş yaratmağa yönəlmiş bu kimi informasiya təxribatlarını qəti şəkildə pisləyirik.
Xatırladırıq ki, Azərbaycan Silahlı Qüvvələrinin şəxsi heyətinin, hərbi silah, sursat və ya hərbi texnikasının hərəkəti və ya dislokasiyası haqqında məlumatları yaymaq cinayət məsuliyyəti daşıyır.
Regiondakı gərginlik fonunda sosial şəbəkələrdə qeyri-dəqiq və mənbəyi bilinməyən məlumatların verilməsi dezinformasiya riskini artıraraq cəmiyyətdə çaşqınlıq yaratmağa yönəlmişdir.
Media subyektləri sosial şəbəkələrdəki informasiya axınına münasibətdə yüksək peşəkarlıq göstərməli, yalnız rəsmi mənbələrə istinad etməli, mənbəyi şübhə doğuran, manipulyativ xarakterli məzmunu tirajlamamalıdır".
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!