Azərbaycan Hərb Tarixi Muzeyində Silahlı Qüvvələrin yaradılmasının 98 illiyi münasibəti ilə “Ordumuz - qürurumuz!” adlı tədbir keçirilmişdir.

Cəmi 23 ay yaşamış Azərbaycan Xalq Cümhuriyyətinin yaradılmasından bir müddət sonra - 1918-ci ilin 26 iyununda Əlahiddə Azərbaycan Korpusunun yaradılması ilə təməli qoyulmuş müasir Azərbaycan Silahlı Qüvvələri çətin, əzablı, amma şərəfli bir inkişaf yolu keçmişdir. Azərbaycan Respublikası Silahlı Qüvvələrinin yaradılması müstəqil Azərbaycanın dövlət quruculuğunun mühüm nailiyyətlərindən biridir. Müharibə şəraitində olan Azərbaycan Respublikasında ordu quruculuğuna böyük onəm verilir, onun inkişaf tempi daim diqqət mərkəzində saxlanılır və fəxrlə deyə bilərik ki, Silahlı Qüvvələrimiz son illərdə regionda öz sözünü deməyə qadir olan ən qüdrətli hərbi gücdür.

Tədbirdə Müdafiə Nazirliyinin, Heydər Əliyev adına ali hərbi məktəblərin, MN Tibb Baş İdarəsinin, Veteran şuralarının, Beynəlxalq Hərbi Əməkdaşlıq İdarəsinin, Təlim Tədris Mərkəzinin, Hərbi Dənizçilik məktəbinin, Qarabağ müharibəsi veteranlarının, hərbi hissələrin, şəhər muzeylərinin və digər müəssisələrin nümayəndələri iştirak etmişdir.

Tədbirdə muzey rəisi e.o. polkovnik Əzizağa Qənizadə, Elmi işlər üzrə rəis müavini, tarix üzrə fəlsəfə doktoru Hacı Həsənov və digərlərinin çıxışları dinlənilmiş, Azərbaycan Silahlı Qüvvələrinin yaranma və inkişaf tarixinə həsr olunmuş sənədli filmin nümayişi olmuşdur.

Tədbirin bədii hissəsində estradamızın məşhur müğənnilərinin ifasında hərbi-vətənpərvərlik mövzusunda mahnılar səsləndirilmişdir.

Nuranə Nəcəfova