Azərbaycan Hərb Tarixi Muzeyində Müsəlman Şərqində ilk Demokratik Respublika - Azərbaycan Xalq Cümhuriyyətinin yaradılmasının 98 illiyinə həsr edilmiş “İstiqlal yollarında” adlı tədbir keçirilmişdir.

1918-1920-ci illərdə mövcud olan və Azərbaycan xalqına beynəlxalq vətəndaşlıq vəsiqəsi verən Azərbaycan Xalq Cümhuriyyəti çətin və mürəkkəb bir tarixi yol keçmişdir.
Azərbaycan Xalq Cümhuriyyəti ölkənin daxilində və xaricində yaranmış gərgin və mürəkkəb ictimai- siyasi şəraitdə fəaliyyət göstərmişdir. Demokratik dövlət quruculuğu, iqtisadiyyat, mədəniyyət, təhsil, hərbi quruculuq sahəsində atılmış addımlar Azərbaycan Xalq Cümhuriyyətinin 23 aylıq fəaliyyətini əks etdirən əsas istiqamətlərdir.
[/center]
Azərbaycan Xalq Cümhuriyyətinin ideaları davam etdirilərək, 18 oktyabr 1991-ci ildə Azərbaycanın dövlət müstəqilliyi bərpa ediləndə məhz həmin tarixi varislik üzərində yeni, müstəqil Azərbaycan dövləti yaradılmışdır. Hazırda Müstəqil Azərbaycan dövləti hərtərəfli inkişaf edir. Azərbaycan Respublikasının prezidenti cənab İlham Əliyevin rəhbərliyi altında inkişaf edən, öz iqtisadi qüdrəti və hərbi potensialı ilə regionda güc mərkəzinə çevrilən, hər cür məkrli niyyətlər qarşısında durmağa qadir sabit və qüdrətli bir Azərbaycan dövləti yaradılmışdır. Möhtərəm prezidentimizin qeyd etdiyi kimi, bu gün müstəqil və azad xalq kimi yaşamağımız ən böyük qürurverici amildir.

Tədbirdə Müdafiə Nazirliyinin, H.Əliyev adına ali hərbi məktəblərin, hərbi hissələrin, Hərbi Akademiyanın, veteran təşkilatlarının, şəhər muzeylərinin və digər idarə - müəssisələrin nümayəndələri iştirak etmişdir.

Tədbirdə muzey rəisi e.o.polkovnik Əzizağa Qəni-zadənin, muzeyin elmi işçisi t.ü.f.d. Zəfər Kərimovun, t.ü.f.d. Vahid ismaylovun və digər tədbir iştirakçılarının çıxışları dinlənilmiş, Respublika gününə həsr olunmuş 10 dəqiqəlik sənədli film nümayiş olunmuşdur.


Tədbirin bədii hissəsində hərbi-vətənpərvərlik mövzusunda mahnılar səsləndirilmiş, Vətənpərvər müğənni Rəşad İsmayılın, Mədəniyyət və İncəsənət Universitetinin I kurs tələbələrinin və Kukla Teatrının nəzdində Oyuq Studiyasının kiçik solistlərinin ifaları dinlənilmişdir.

Nuranə Nəcəfova