“Azərbaycanda dini etiqad üçün heç bir maneə yoxdur. Reallıq odur ki, ötən dövr ərzində məscidlər, kilsələr, senaqoqlar o insanların bütün rituallarını yerinə yetirməsi üçün verilib. Məsələnin digər tərəfi ondan ibarətdir ki, Azərbaycan iqtisadi, siyasi cəhətdən hədəfdə olduğu üçün həmişə dini qüvvələrdən hazır bir baza kimi istifadə etmək istəyiblər”. Bunu SİA-ya Bakıxanov qəsəbəsində bir qrup radikal-ekstremist ruhlu şəxslərin din pərdəsi altında polis idarəsinin qarşısında iğtişaş yaratmaq cəhdinə münasibət bildirən millət vəkili Zahid Oruc deyib.Onun sözlərinə görə, o da bir faktdır ki, siyasi müxalif kəsimlər zəifləyəndə sanki bütün o proses dindarların, dini etiqad sahiblərinin üzərinə qoyulur: “Məscidləri siyasi partiyalar evinə, siyasi qərargahlara çevirməyə çalışırlar. Halbuki edilən bütün dini hərəkətlər, inanclar, inamlar, etiqadlar Allah və Məhəmməd Peyğəmbərimiz (s.ə.s ) adındadırsa, Peyğəmbər Əleyhisalamımız çox gözəl buyurub ki, “məktəblər məscidlərdən üstündür və elm Çində də olsa onun dalınca gedin”.Z.Oruc əlavə edib ki, bu mənada Azərbaycanda ziyalılığı, elmi, intellekti, təhsili bütün digər proseslərdən aşağı yerə qoyub sanki konkret bir ünvanda müxtəlif cərəyanlara, müxtəlif dini təriqətlərə yurvarlanmaqla Azərbaycanı öz ideoloji siyasi yolundan sapdırmaq, dünyəvi modelindən çıxarmaq yolverilməzdir: “Biz bayrağımızı bütövlükdə yaşıl rəngə boyaya və “yaşıl inqilab”lar həyata keçirə bilmərik. Azərbaycan din və dövlətin dəqiq sərhədini cızıb. Bunlar bir-birinə qarışanda ictimai, siyasi münasibətlər qarışır. Ona görə də harada olmasından asılı olmayaraq hər bir inanclı bilməlidir ki, məscid ibadəti həyata keçirmək yeridir. Azərbaycanın lokal ərazilərində dini toqquşmalar çıxarmaqla bu ölkənin sabitliyinə zərbə vurmaq olar. Ona görə də bunlar yolverilməzdir”.Qeyd edək ki, Bakının Sabunçu rayonunun Bakıxanov qəsəbəsində bir qrup radikal-ekstremistin iştirakı ilə aksiya keçirilib. “Müsəlman birliyi hərəkatı” adlı təşkilatın sədr müavini Elçin Qasımlının polis tərəfindən saxlanılmasına etiraz edən şəxslər Sabunçu RPİ-nin Bakıxanov qəsəbəsində yerləşən inzibati binasının qarşısına yığışıblar. Onlar E.Qasımlının azad olunmasını tələb ediblər. Nəticədə bir neçə nəfər polis tərəfindən saxlanılıb.