Səbail rayonunda xalqımızın ümummilli lideri Heydər Əliyevin anadan olmasının 94 illiyi ilə əlaqədar növbəti iməcilik keçirilib.

Butov.az xəbər verir ki, Rayon icra hakimiyyətindən AZƏRTAC-a verilən məlumata görə, Badamdar qəsəbəsinin yeni yaşayış massivində və keçən il Şıx yamacında salınmış «Ekoloji park»da keçirilən iməciliklərdə min nəfərə yaxın sakin iştirak edib.

Badamdar qəsəbəsində 4,8 hektar sahədə salınmış Zeytun bağında ağaclara qulluq göstərilib, ərazi daş və məişət tullantılarından təmizlənib. Ağaclara ilboyu qulluq göstərilməsi üçün burada su çənləri quraşdırılıb və damcı üsulu ilə suvarma xətləri çəkilib.

İməcilikdə 1000 ədəd yeni ağac əkilib. Yeni əkilən ağacların əksəriyyətini ərazinin iqliminə uyğun olan Eldar şamı və zeytun ağacları təşkil edib.

Şıx yamacında 29 hektar sahədə salınmış «Ekoloji park»ın ərazisində keçirilən iməcilikdə isə keçən il əkilən ağaclara qulluq göstərilib. Ərazidə təmizlik işləri görülüb, yaşıllıqlar alaq otlarından təmizlənib, damcı üsulu ilə suvarılmaq üçün çəkilən xətlər yoxlanılıb.

Rayonda yaşıllaşdırma, yeni ağacların əkilməsi, yaşıllıqlara qulluq və abadlıq işləri davam etdiriləcəkdir.