19-04-2022, 07:18
“TARİXİMİZƏ SAHİB ÇIXAQ”
“Tariximizə Sahib Çıxaq” tarixi araşdırmalar və maarifləndirmə İctimai Birliyi, “Tarixinə sahib çıx” tarixi abidələrimizin gənc nəsil arasında və xaricdə tanıdılmasının təbliği” layihəsi ilə Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin 2022-ci il üzrə elan etdiyi qrant müsabiqəsinin qalibi olmuşdur. Agentliyinin maliyyə yardımı ilə həyata keçirilən layihədə əsas məqsəd gənclərin tarixi-mədəni irsin qorunub saxlanması problemlərinə cəlb edilməsi, onların tarixi və milli kimliyinin formalaşması, tarixi-mənəvi mənsubiyyət hissinin inkişafı, xaricdə Azərbaycanın tarixi abidələrinin, qədim özkeşmişinin təbliği, tanıdılmasıdır.
Təşkilatın növbəti tədbiri 14 aprel 2022-ci il tarixində Maştağa qəsəbəsində yerləşən 128 saylı tam orta məktəbdə keçmişdir. Tədbir Azərbaycan Respublikasının himni ilə açıldı. Tədbirdə “Tariximizə Sahib Çıxaq” tarixi araşdırmalar və maarifləndirmə İctimai Birliyinin sədri Araz Şamilov, AMEA Ədəbiyyat İnstitutunun əməkdaşı fil.ü.f.d., dosent, Zəkulla Bayramlı və AMEA Folklor İnstitutunun əməkdaşı Vəfa Saleh iştirak edirdi.
Tədbirin sonunda təşkilatın rəhbəri Araz Şamilov tərəfindən başda məktəbin direktoru Sədaqət Əliyeva olmaqla tədbirin təşkilatçılarına tarix müəlliməsi Jalə Qurbanovaya, sinif rəhbəri Nəcibə Pirverdiyeva və aktiv şagirdlərə diplom və bukletlər verildi.
Tədbirə çox aktiv hazırlaşan şagirdlər Azərbaycanın müxtəlif bölgələrini əhatə edən milli-maddi nümunələri olan tarixi abidələr haqqında məlumat verdi. Şagirdlər Qarabağ, Naxçıvan, Şirvan, Aran və d. bölgələrdəki tarixi abidələr haqqında ətraflı məlumat verdikdən sonra, tarixi abidələrlə bağlı qısa slayd da göstərdi. Tədbirin sonunda çıxış edən məktəbin direktoru Sədaqət Əliyeva tədbirin aktuallığından, bu günki nəsil üçün əhəmiyyətindən danışdıqdan sonra sözü qonaqlara verdi. Qonaqlarla yanaşı, tədbirdə çıxış edən məktəbin tarix müəllimləri Jalə Qurbanova, İsfəndiyar Cəfərov da belə tədbirlərin məktəblilər üçün əhəmiyyətindən danışaraq, belə tədbirlərin gənc nəsil üçün çox vacib olduğunu bildirib, qeyd etdi ki, onları tez-tez, müxtəlif mövzularda keçirmək lazımdır. Eyni zamanda uşaqların tarixi abidələrin yerləşdiyi məkanlara da səfərlərinin təşkili zəruridir.
O belə tədbirlərin gənc nəsil arasında vətənpərvərlik hissini yüksəltməsini, milli-mənəvi və maddi sərvətlərimizin qorunması istiqamətində vacibliyini bildirdi.
Qeyd edək ki, məhz belə tədbirlər uşaqları daha aktiv olmağa, kənar bilgiləri tez qavrayıb, üzərində işləmək imkanı yaradır.
18 aprel 2022-ci il tarixdə layihə çərçivəsində Bakı şəhərində yerləşən 313 saylı tam orta məktəbdə 8 sinif şagirdləri arasında “bilik yarışı” keçirildi. Azərbaycan Respublikasının dövlət himni ilə açılan tədbirdə torpaqlarımızın bütövlüyü uğrunda şəhid olan qəhrəmanlarımızın xatirəsi 1 dəqiqəlik sükutla yad edildi. Sonra isə səhnəyə həmin məktəbin IX sinif şagirdi Pənah İbrahimov çıxaraq, şəhidlərin xatirəsinə həsr olunmuş Xudayar təsnifini sazda ifa etdi.
Sonra isə söz məktəbin direktoru Zakir Bayramova verildi. Z.Bayramov tədbir iştirakçılarını salamlayaraq, belə tədbirlərin gənc nəsil üçün əhəmiyyəti haqqında danışdı. O belə tədbirlərdə gənc nəsli daha da aktiv iştirak etməyə dəvət etdi.
Təşkilatın sədri yeni tərtib edib hazırladığı Bakı və Abşeron abidələri haqqında kitabı iştirakçılara təqdim edərək, belə kitabların şagirdlər üçün əhəmiyyətindən danışdı. Sonra isə Bakı və Abşeron abidələrinə həsr olunmuş “bilik yarışı”na start verildi. Yarışda 7 qrup iştirak edirdi. Özlərini şərti olaraq: Atəşgah, Ramana qalası, Şirvanşahlar, Mərdəkan qalası, Qobustan, Bayıl qalası və Qız qalası adlandıran qruplar təsadüfi şəkildə seçilən tarixə aid suallara cavab verərək yarşmağa başladılar. 3 mərhələdən ibarət olan yarış zaman fasilələrdə Pənah İbrahimovun sazla ifasında Naxçıvani, “Qarabağ ana yurdum” havaları dinlənildi. Gərgin keçən bilik yarışında Şirvanşahlar qrupu I yerə, Mərdəkan qrupu II yerə, Atəşgah qrupu III yerə çıxdı.
Yarışın sonunda bütün qaliblərə kitab və xüsusi diplomlar təqdim olundu.
19-04-2022, 06:51
“Həyatla oyun”
Azərbaycan Respublikası Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının və Ədliyyə Nazirliyi Penitensiar Xidmətin təşkilatçılığı ilə Bakı Uşaq və Gənclər Teatrının "Həyatla oyun" tamaşası 4 saylı cəzaçəkmə müəssisəsində nümayiş olunub.
Tamaşanın əsas məqsədi bütün insanları bəşəriyyətin ən böyük problemlərindən biri olan narkomaniya, QİÇS-ə qarşı mübarizəyə çağırmaqdır. Maarifləndirmə funksiyasını yerinə yetirən tamaşa narkomaniyanın doğurduğu faciələr, QİÇS və bir sıra başqa qorxunc xəstəliklərin yayılması yolları haqqında aydın təsəvvür yaradır, insanların sağlam həyat tərzi seçmələri üçün çox təsirli təbliğat vasitəsidir.
Tamaşa Avropa Şurasının Pampidou Qrupu tərəfindən narkotiklərə qarşı mübarizədə həyata keçirilən innovativ layihə olaraq, 80 ölkə tərəfindən təqdim olunmuş layihə arasında ilk üçlüyə düşmüşdür və teatra sertifikat təqdim edilmişdir.
Tamaşada hadisələr real həyatdan götürülmüşdür. Hadisələr əsasən bir qrup tələbələr arasında cərəyan edir. Universitet tələbəsi olan Duman narkotika aludəçisidir. Atası tərəfindən atılmış Nicat problemlərini unutmaq üçün dostu Dumanın məsləhəti ilə narkotikadan istifadəyə başlayır. Getdikcə onun vəziyyəti ağırlaşır. Oğlunun narkoman olduğunu öyrənən Nicatın anası infarkt keçirir. Universitetdə təlimçi tərəfindən Narkomaniya və QİÇS haqqında maarifləndirilən tələbələr Spiddən analiz verməyi qərara alırlar. Analizin cavabları alındıqdan sonra Nicatın QİÇS-ə yoluxduğu məlum olur. Bütün bu hadisələrin mərkəzində dayanan Dumanın narkoman olmasına səbəb isə uşaqlıqdan valideynləri tərəfindən düzgün başa düşülməməsi, bu haqda maarifləndirilməməsidir. Valideynlərinin yalnış münasibəti isə Dumanın pis yola düşməsinə təkan verir. Hətta narkoman qardaşını pis vəziyyətdə qoyub gedən Naza xanım oğlu Dumanı da qoruya bilmir. Tamaşa yeniyetmələr və böyüklər üçün nəzərdə tutulub. Müddəti 1 saatdır.
Tamaşanın rejissoru respublikanın əməkdar artisti İntiqam Soltan, müəllifi Arzu Soltan, rəssamı Sevda Məmmədovadır.
18-04-2022, 17:12
18-04-2022, 16:45
18-04-2022, 16:02
18-04-2022, 15:49
18-04-2022, 14:36
Əkrəm Bəydəmirli: "Təbliğatın çox incə metodologiyaları var"
Azərbaycan Respublikasının QHT-yə Dövlət Dəstəyi Agentliyinin vəsaiti ilə Sosial Rifah və Tədqiqatlar İctimai Birliyi “Zəfər tariximizə postmüharibə dövründə Vətəndaş Cəmiyyətinin töhfəsi” layihəsini həyata keçirir.
QHT-nin sədri Əkrəm Bəydəmirlinin verdiyi məlumata görə, layihə çərçivəsində "Virtual Qarabağ" elektron bazasının yaradılması nəzərdə tutulmuşdur. Artıq bu resurs yaradılıb. 5 dildə fəaliyyət göstərən www.fact-info.az saytınının tərkibində “Virtual Qarabağ” elektron bazasının təkmillləşdirilməsi üzərində çalışırıq. Təbliğatın çox incə metodologiyaları var. Dünyanın başa düşə biləcəyi formada və dildə real faktları çox fərqli formada ortalığa qoymaqla beynəlxalq ictimaiyyəti yetərincə məlumatlandırmaq əsas hədəflər sırasındadır. "Virtual Qarabağ" elektron bazası xarici auditoriya üçün daha əlçatan olacaq. Azərbaycanın ümumilikdə Qarabağın mədəniyyəti, tarixi və bu günü haqqında daha zəngin mənbə formalaşdırmaq hədəfdədir.
Azərbaycan Respublikasının QHT-yə Dövlət Dəstəyi Agentliyinin vəsaiti ilə Sosial Rifah və Tədqiqatlar İctimai Birliyi “Zəfər tariximizə postmüharibə dövründə Vətəndaş Cəmiyyətinin töhfəsi” layihəsini həyata keçirir.
QHT-nin sədri Əkrəm Bəydəmirlinin verdiyi məlumata görə, layihə çərçivəsində "Virtual Qarabağ" elektron bazasının yaradılması nəzərdə tutulmuşdur. Artıq bu resurs yaradılıb. 5 dildə fəaliyyət göstərən www.fact-info.az saytınının tərkibində “Virtual Qarabağ” elektron bazasının təkmillləşdirilməsi üzərində çalışırıq. Təbliğatın çox incə metodologiyaları var. Dünyanın başa düşə biləcəyi formada və dildə real faktları çox fərqli formada ortalığa qoymaqla beynəlxalq ictimaiyyəti yetərincə məlumatlandırmaq əsas hədəflər sırasındadır. "Virtual Qarabağ" elektron bazası xarici auditoriya üçün daha əlçatan olacaq. Azərbaycanın ümumilikdə Qarabağın mədəniyyəti, tarixi və bu günü haqqında daha zəngin mənbə formalaşdırmaq hədəfdədir.
18-04-2022, 14:06
16-04-2022, 13:29
Bu dəfə oxucularımıza Qubada fəaliyyət göstərən A.A.Bakıxanov adına “Gülüstan” elmi-ədəbi məclisinin və Xaçmazda fəaliyyət göstərən “Ulduzlar” ədəbi məclisinin fəallarından Azərbaycan Jurnalistlər Birliyinin üzvü Səxavət Ənvəroğlunun şeirlərini təqdim edirik:
Qarabağ Azərbaycandır!
Ali Baş Komandan cənab İlham Əliyevin rəhbərliyi altında Şanlı ordumuzun hər gün yeni zəfərlərini səbirsizliklə gözlədiyimiz 44 günlük 2-ci Qarabağ müharibəsi zamanı yazılan şeirlərdən
İlhamla irəli gedək hər zaman,
İlhamdır müzəffər, Ali komandan.
Qələbə bizimdir, duysun bu cahan,
Son nida “Qarabağ Azərbaycandır!”
Yaşadaq ürəkdə inam, etibar,
Qarşıda sevincli günlərimiz var.
Qoruyaq vətənin məğrur adını,
Duysun hər eşidən, hünərimiz var.
İrəli gedirik zəfərə doğru,
Hər kənddə, obada bayraq ucalsın.
İllərin həsrəti yetişsin sona,
Ordumuz şərəfli qələbə çalsın.
Bürünüb hər tərəf gülə, çiçəyə,
Cənnətə dönəcək gözəl yurdumuz.
İllərlə yolunu həsrət bağlayan,
Şuşanı qaytarar şanlı ordumuz.
Arzular can verir, gözü yoldadır,
Ruh uçub bədəndən, üzülən candır.
Ey, Laçın, Kəlbəcər dik tut başını,
Son nida “Qarabağ Azərbaycandır!”
Yenilməyən Şanlı Milli Ordumuz,
İnşallah savaşdan çıxar üzü ağ.
Yenə gülüstana dönər yurdumuz,
Tamam azad olar doğma Qarabağ
İlhamla irəli gedək hər zaman,
İlhamdır müzəffər, Ali komandan.
Qələbə bizimdir, duysun bu cahan,
Son nida “Qarabağ Azərbaycandır!”
Quba, 10.10.2020
Dastan olan oğullar
Hər birisi bir ərəndir, bir ərdir,
Qırx dörd gündə göstərdiyi hünərdir.
İgidlikdə, şücaətdə bir nərdir,
Dastan olan oğulları bu elin.
Hər igidi Mübarizdir, Poladdır,
Xudayarın səsi ruha qanaddır.
Vətənə arxadır, atəşdir, oddur,
Dastan olan oğulları bu elin.
Aman verməz yağılara göz aça,
Ölüm güllələri od, alov saça.
Vətəni hər şeydən tutdular uca,
Dastan olan oğulları bu elin.
Birləşərək yumruq kimi yığıldı,
Onu görən düşmən səfi dağıldı.
Hərbin tarixinə bir örnək oldu,
Dastan olan oğulları bu elin.
Hər bir əsgər sinə gərdi hünərlə,
Qaziləri dözdü əzmi, səbirlə.
Kimi şəhid, kimi döndü zəfərlə,
Dastan olan oğulları bu elin.
Ağlama şəhid anası, ağlama
Hər şəhid daşına pir deyəcəyəm,
Axan göz yaşına dürr deyəcəyəm.
Zamana müəmma, sirr deyəcəyəm,
Ağlama şəhid anası, ağlama.
Bu dünya Adəmdən qalan dünyadır,
Min üzlü, saxtakar, yalan dünyadır.
Adamı pis kökə salan dünyadır,
Ağlama şəhid anası, ağlama.
Dünya haqlıların üzünə gülmür,
Savaşın bitəcək günü bilinmir.
Torpağı uğrunda ölənlər ölmür,
Ağlama şəhid anası, ağlama.
Vətən müqəddəsdir, qorunsun gərək,
Vətən sevgisiylə döyünsün ürək.
Dar gündə yolunda can qurban verək,
Ağlama şəhid anası, ağlama.
Ağlayan gözünün yaşına qurban,
Saçları ağaran başına qurban.
Şəhidimin məzar daşına qurban,
Ağlama şəhid anası, ağlama.
Azərbaycanım
Şairlər məskəni mənim diyarım,
Bakıdır qüdrətim, Xəzərdir canım.
Azadlıq amalım, İslam vüqarım,
Döyünən ürəkdir Azərbaycanım.
Əbədi sevgimdir getsəm hayana,
Qəlbimi vermişəm məni duyana.
Sevincim sığmazdır geniş cahana,
Sonsuz bir diləkdir Azərbaycanım.
Çələnglər toxuyub həvəslə ona,
Hərarət verərəm nəfəslə ona.
Mahnılar oxuyub zil səslə ona,
Deyərəm, ləçəkdir Azərbaycanım.
Sevdalı həyatdır vuran ürəkdə,
Arzudur, ümiddir sonsuz diləkdə.
Tükənməz gücümdür qolda, biləkdə,
Ətirli çicəkdir Azərbaycanım.
20.06.1981
Səsi könlümün
Səyyahtək gəzdikcə geniş cahanı,
Həsrət acısında illər yaşadım.
Toxunub qəlbimin qəm yarasına,
Kədərə bürünmüş niskil daşıdım,
Qalmadı əl tutan kəsi könlümün.
Mən nələr görmədim, nələr duymadım,
Sibirdən dönməyən qatardır dərdim.
Ağrıya, acıya məhəl qoymadım,
Ömür ağacında nübardır dərdim,
Enibdir aşağı pəsi könlümün.
Qələm əlimdədir, qəlbim pərişan,
Ömrüm də az qala yarıya çatıb.
Qalıb deyilməmiş sözüm ərmağan,
Səbrlə dilimin ucunda yatıb,
Deməyin: “Kor qalıb gözü könlümün”.
Boğulmaz içimdə hayım, harayım,
İnləsə cismimdə damarım, qanım.
Qüssəli ürəkdə qəm daşıdıqca,
Ruhuma yük olur könül həyanım,
Dərdə ocaq çatır közü könlümün.
Gözümdə həsrətim yuva salıbdır,
Yolumun üstünə qəm ələnibdir.
Hər sözüm günəşin zərrin şəfəqi,
Deməyin qəlbimdə söz tükənibdir,
Dindirmə, tutular səsi könlümün.
Citta /S.Ərəbistanı
Çatasan qızım
Gördüyün hər işin yetsin uğura,
Mənalı gözlərin bürünsün nura.
Zərif əllərinlə telini dara,
Arzular qoynunda yatasan, qızım.
Yazılan şeirimin mənası sənsən,
Ülvi duyğuların səması sənsən.
Sevinən qəlbimin siması sənsən,
Sevgi dənizində batasan, qızım.
Taleyin baharı üzünə gülsün,
Xoş səsli soraqlar qapına gəlsin.
Xoşbəxt olduğunu el, aləm bilsin,
Kədərin yükünü atasan, qızım.
Yuvanı əziz tut qanad açanda,
Qismətin önünə işıq saçanda.
Büdrəyən arzular səndən qaçanda,
Gümanın telindən tutasan, qızım.
“Tək əldən səs çıxmaz”, budur son sözüm,
İnsana zinətdir dəyanət, dözüm.
Mən getsəm, arxamca qalmasın gözün,
Ülvi arzulara çatasan, qızım.
Camnaqar/ Hindistan,
27.11.2010
15-04-2022, 21:58
SİNƏSİ XATİRƏLƏRLƏ DOLU İNSAN
Çoxdan idi düşünürdüm ki, Vərqa müəllim haqqında bir yazı ilə mətbuatda çıxış edim. Xüsusən də onun bu il tamam olacaq 90 illik yubileyi ilə bağlı. Bu yaxınlarda onun vəfat etməsi yazının zamanına və məzmununa az da olsa təsir etdi.
Vərqa Kərimov 1 iyul 1932-ci ildə Göyçə mahalının Daşkənd kəndində Rəsullular nəslində doğulub. Vərqa müəllimə maraqlı və həm də az-az rast gəlinən adı haqqında sual edəndə belə deyərdi: “Mən dünyaya gələndə atam Hüseynlə anam Güldəstə düz 300 il əvvəl Azərbaycan şairi Məsihi tərəfindən Azərbaycan dilində yazılmış “Vərqa və Gülşa” adlı məsnəvinin baş qəhrəmanı Vərqanın adını mənə qoyublar. Deyilənlərə görə, Vərqa adı hələ ondan da qabaq xalq arasında məşhur olan qədim bir əfsanədə də çəkilirmiş. O rəvayəti Göyçədə yaşlılar nağıl kimi danışardılar. Sonralar bu əfsanə unuduldu”.
Belə bir deyim var ki, insana qoyulan ad onun taleyində mühüm rol oynayır. Vərqa müəllimin dediyi əsərin süjet xəttini əmioğlu və əmiqızının məhəbbəti təşkil edir. Elə o da 1957-ci ildə əmisi qızı Xuraman xanımla ailə həyatı qurmuşdur. Bir az da dəqiq desək, Vərqa müəllimin atası Hüseyn ilə Xuraman xalanın atası Fəzi kişi doğmaca əmioğludurlar. Vərqa müəllimlə Xuraman xala sevə-sevə, əzizləyə-əzizləyə iki oğlan, beş qız (Sərdar, Validə, Nəcibə, Aybəniz, Mehman, Gülbəniz, Sima) böyüdüb, boya-başa çatdırıblar. Onların hər birinə təhsil verib, ev-eşik sahibi ediblər. Bu ailə cütlüyü 56 illik şad-xürrəm bir ömür sürdülər. Hər ikisi də Daşkəndlilər üçün, doğmaları üçün çox əziz, doğru yol göstərən insanlar idi. Еlin-obanın hörmət bəslədiyi ağsaqqal-ağbirçək kimi hamı onlardan məsləhət alar, tövsiyələrini qanun hesab edərdilər. 7 avqust 2013-cü ildə Xuraman Fəzi qızının 78 yaşında vəfatı Vərqa müəllimi tənha buraxsa da, övladları və nəvələri onu darıxmağa, sıxıntı çəkməyə qoymadılar. O, nəvə-nəticələrinin əhatəsində ahıllıq dövrünü də gözəl keçirdi. 15 mart 2022-ci ildə Vərqa müəllim 90 yaşında yaşadığı Yeni Daşkənd kəndində vəfat etdi. Uzunömürlülüyün ilk yaşında bu dünyadan köçməyin kədərinin içində bir sevinc də var. Bu yaş az-az adama qismət olur. Bu baxımdan Allahdan onun doğmalarına, övladlarına, nəvələrinə və nəticələrinə belə bir yaş arzulayıram. İnanıram ki, iyirmi beş nəvə-nəticəsi olan baba və nənə daim xoş xatirələrlə anılacaq, yaddaşlardan silinməyəcəklər.
Vərqa müəllimlə Xuraman xala bu sətirlərin müəllifinin qayınatası və qayınanası idi. Hər ikisi Göyçə ilə, Daşkəndlə, nəsil-nəcabətləriylə bağlı maraqlı və zəngin xatirələrə, məlumatlara malik idilər. Topladığım məlumatların deyərdim ki, çox hissəsini Vərqa müəllimin söyləmələrindən qələmə almışam. Bir dəfə adətim üzrə Vərqa müəllimdən Məşədi Qasımla bağlı nəsə soruşdum. O, söhbətə başlar-başlamaz Xuraman xala qayıtdı ki, “A kişi, qoy onu mən danışım”. O da yarı zarafat, yarı ciddi dedi ki, “yaxşı danış, Məşədi Qasım sənin babandı”.
Vərqa müəllimin sinəsi xatirələrlə dolu idi. Nəsə soruşanda saatlara, həm də çox dəqiq danışar, hətta hadisələrin baş verdiyi illəri də müqayisəli şəkildə söyləyər, yorulmaq bilməzdi. Xuraman xala da ondan geri qalmazdı. Çox kiçik yaşlarından gördüyü, böyüklərdən eşitdiyi sözləri, hadisələri hafizəsində cəm etmişdi. O, Aşıq Ələsgərin, Aşıq Nəcəfin, Həsən Xəyallının, Xasay Zeynalovun, atası, el şairi Qəmgin Fəzinin şeirlərini sinədəftər etmiş, yeri gələndə həmin şeirləri xüsusi şövqlə deyərdi. Xuraman Fəzi qızı çox nəcib, xoşxasiyyət, qonaqpərvər, yanımcıl, qohumcanlı bir qadın idi. Evimizdə hərdən ondan söz düşəndə rəhmətlik Pürüzə nənəm deyərdi ki, “Heç bir bacı, heç bir övlad Xuraman ola bilməz”. Çünki Xuraman xala doqquz nəfərlik ailəsiylə yanaşı, xəstə anası Savatın, uzun illər əlil yaşamış qardaşı Qiyasın xidmətində durmuşdu. Belə xeyirxah nəcib işlərdə Vərqa müəllim də həyat yoldaşından geri qalmaz, hətta qaynı Qiyasın həyətyanı sahəsində gözəl bir bağ da salmışdı. O bağ bütün Yeni Daşkəndlilərin şəkil çəkdirmələri üçün gözəl, mənzərəli bir məkan idi. Bu gün hamımızın əlimizdə olan tarixi fotoşəkillər rəhmətlik Qiyas Fəzi oğlunun əl işləridi.
Vərqa Kərimov 1940-cı ildə Daşkənd kənd orta məktəbində ibtidai təhsil almağa başlamışdır. Təhsil müddəti müharibə və ondan sonrakı çətin illərə düşdüyündən, bir neçə il təhsilinə ara verməli olmuşdur. 1952-ci ildə, 9-cu sinifdə oхuyarkən Basarkеçər RHK-dan həqiqi hərbi хidmətə çağırılmışdır. Ukrayna, Moskva və Lеninqradda üç il hərbi хidmət kеçdikdən sonra 1955-ci ildə Bərdə rayonunun Yеni Daşkənd kəndinə gəlmiş və orta məktəbdə təhsilini davam еtdirərək 1957-ci ildə orta məktəbi əla qiymətlərlə bitirmişdir. Orta məktəbi qurtaran ildən 1961-ci ilə kimi Yеni Daşkənd kənd orta məktəbində təsərrüfat müdiri işləmişdir.
Vərqa müəllim Böyük Vətən müharibəsindən sonrakı ağrılı-acılı, əzablı illərlə bağlı belə danışardı: “Göyçədən piyada arana – Şəmkir rayonunun Keçili kəndinə gələr, orada işləyər, əmək haqqımıza düşən taxılı belimizdə Daşkəndə aparardıq. Çox çətin, qıtlıq, aclıq olan illər idi. Bir neçə ailə ilə birlikdə gəlib gedərdik. Bizimlə Hacıyev Xasay və bacıları, Ocaqverdi oğlu Məhərrəm və qardaşı uşaqları, və başqaları gedərdilər. İçimizdə bircə Ocaqverdi oğlu Məhərrəm kişinin atı vardı. Qalan hamımız piyada, özü də yüklə Göyçəyə qayıdardıq”.
Vərqa müəllimin söylədiyi bu kiçik xatirəyə əlavə olaraq onu da deyim ki, Şəmkir rayonunun Keçili kəndində olarkən nənəm Pürüzənin (Ocaqverdi oğlu Məhərrəmin qardaşı qızı) iki-üç yaşlı qızı orada vəfat etmişdir. İndi biz Daşkəndlə Şəmkir rayonu arasındakı məsafəni göz önümüzə gətirsək və o yerlərin relyefini də nəzərə alsaq onların nə qədər zəhmətə qatlaşdıqlarının şahidi olarıq.
Zəhmətdən heç vaxt usanmayan Vərqa Kərimov 14 aprеl 1962-ci ildə işləmək üçün Sumqayıt şəhərinə gedir. O, 1966-cı ilə qədər Sumqayıt Supеrfosfat Zavodunda işləyir. İşlədiyi müddətdə, yəni 1964-cü ildə Sovеt İttifaqı Komunist Partiyasının üzvü olmuş və 1965-ci ilin yanvarında Sumqayıt şəhərində üç otaqlı mənzillə təmin olunmuşdur. Həmin illərdə Bakı və Sumqayıtda Daşkəndlilərdən yeganə Vərqa müəllimin şəxsi mənzili olub. Bu ev kəndçilərimizdən çoxunun isti yuvası, ali məktəblərə imtahan verməyə gələn abituryentlərin hamısının mənzili olmuşdur. Hətta həmkəndlimiz məşhur riyaziyyatçı Tanrıverdi Hacıyev hər yay bu evdə onlarla uşağı imtahanöncəsi qəbula hazırlayar, həm də bu evdə qalarmışlar. Vərqa müəllimin bu xeyirxahlığından bu gün də həmkəndliləri dönə-dönə ürək dolusu danışırlar.
Elm və təhsil almağa böyük maraq göstərən, heç vaxt təhsilə laqeyd qalmayan Vərqa Kərimov öz təhsilini də davam еtdirmək məqsədi ilə 1966-cı ildə V.İ.Lеnin adına Azərbaycan Pеdaqoji İnstitutunun “Ümumi tехniki fənlər və fizika” fakültəsinə qəbul olmuş, institutu 1972-ci ildə bitirmişdir. Bundan sonra təyinatla 1972–1973-cü illərdə Sumqayıtın Corat qəsəbəsində müəllim işləmişdir. Ailəsi və uşaqları şəhər həyatına alışa bilmədiyindən Vərqa müəllim daimi olaraq Yeni Daşkəndə qayıtmalı olur. Yuxarıda qeyd etmişdik ki, Vərqa müəllim Sumqayıt Supеrfosfat Zavodunda işləmişdir. Elə bu səbəbdən də sonralar bronxial astma xəstəliyinə tutulur. Həkim məsləhət bilir ki, ona dağ havası müsbət təsir edər, uzun müddət yaşamasına səbəb olar. Ona görə də Vərqa müəllim 1976-cı ildə Sumqayıtdakı mənzilini Şuşa şəhərindəki eynisahəli bir mənzillə dəyişir. Hər yay üç ay tətil günlərini səfalı və cənnətməkan Şuşa şəhərində istirahət edir. Cıdır düzündə gəzib, İsa bulağının billur kimi saf suyundan içir. Bu mənzil də eyni ilə Sumqayıtdakı kimi çox qohumların, doğmaların istirahət yeri olur. Bu evdə qalıb istirahət edənlər də həmin günləri ömrün xoş və unudulmaz illəri kimi xatırlayırlar. Vərqa müəllimin övladlarından Sərdar Sumqayıtda, Mehmanla Gülbəniz isə Şuşada bir müddət orta təhsil alıblar.
Vərqa Kərimov 1973-cü ildən 2011-ci ilə qədər Bərdə rayonunun Yеni Daşkənd kənd orta məktəbində müəllim işləmiş, yaşa görə tədrisdən ayrılmışdır.
Araz Yaquboğlu,
tədqiqatçı-jurnalist
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!