3-01-2023, 19:00
İranda casusluq edən Fransa vətandaşları saxlanıldı
İranda 2 Fransa vətəndaşı saxlanılıb. Bu barədə İranın Ədliyyə Nazirliyi məlumat yayıb. Bildirilib ki, iki Fransa vətəndaşı casusluqda və ölkənin milli təhlükəsizliyinə qarşı təxribatda ittiham olunaraq saxlanılıb. Onların işinə inqilab məhkəməsi baxacaq. Təqsirləndirilən şəxslərin kimliyi açıqlanmayıb. Fransanın xarici işlər naziri Ketrin Kolonna da İrandakı genişmiqyaslı etirazlar fonunda iki Fransa vətəndaşının saxlanıldığını təsdiqləyib. Qeyd edək ki, İranda daha əvvəl də Avropa ölkələrinin vətəndaşları, o cümlədən turistlər saxlanılıb. İran Ədliyyə Nazirliyinin məlumatına görə, İranda 2022-ci ilin sentyabrında kütləvi etirazlar başlayandan bəri azı 40 əcnəbi vətəndaş saxlanılıb.
3-01-2023, 18:58
Türkiyə Bolqarıstana təbii qaz satmağa başlayacaq
Türkiyə Bolqarıstana 1.5 milyard kubmetr həcmində təbii qazın satışına başlayacaq. Türkiyənin enerji və təbii ehtiyatlar naziri Fatih Dönmezin Bolqarıstana səfəri çərçivəsində müvafiq razılaşma əldə olunub. Tərəflər arasında qaz transferi ilə bağlı müqavilə imzalanıb. Dönmez və bolqarıstanlı həmkarı Rosen Xristovun müşayiəti ilə müqaviləyə Türkiyə tərəfdən BOTAŞ-ın baş direktoru Burhan Özcan, Bolqarıstan tərəfdən isə "Bulqarqaz" şirkətinin rəhbəri Denitsa Zlateva imza atıblar. Sözügedən müqavilə 13 il müddətinə imzalanıb. Bu anlaşmanın Avropanın qaz bazarında tələb-təklif balansının təhlükəsizliyi baxımından böyük önəm daşıdığı vurğulanıb.
3-01-2023, 18:52
Ukrayna 84 İran dronunu zərərsizləşdirdi
2023-cü ilin ilk iki günündə Ukrayna Rusiya Silahlı Qüvvələrinə məxsus 84 İran zərbə dronunu zərərsizləşdirib. Bu barədə Ukrayna Hərbi Hava Qüvvələrinin sözçüsü Yuri İqnat bildirib. O, sentyabrdan bəri Rusiyanın 500-ə yaxın dronunun zərərsizləşdirildiyini açıqlayıb. "Pilotsuz uçuş aparatlarını məhv edirik. Yeni ildən sonra atılan 84 dronun hamısı vurulub. Belə nəticələr indiyə qədər görülməyib", - deyə hərbçi bildirib. Xatırladaq ki, ötən ilin 24 fevralında Rusiyanın Ukraynaya hücumu nəticəsində başlayan müharibə davam edir. Rusiya Ukraynanın Xerson və Zaporojye vilayətlərini, habelə qondarma "Donetsk XR" və "Luqansk XR" separatçı qurumlarını birtərəfli qaydada ilhaq etdiyini açıqlayıb.
3-01-2023, 18:46
ABŞ-ın Suriyaya qarşı olduğunu anlayırıq - Çavuşoğlu
Türkiyənin xarici işlər naziri Mövlud Çavuşoğlu ABŞ-a səfər edəcək. Bu barədə nazir özü məlumat verib. "ABŞ bizə "niyə görüşürsünüz?" demədi, amma Suriya ilə normallaşmaya qarşı olduqlarını anlayırıq. Rejim (Əsəd hakimiyyəti nəzərdə tutulur) suriyalıların geri dönməsi mövzusunda əməkdaşlıq etmək istəyir. Türkiyə-ABŞ strateji mexanizmi toplantısı üçün 17 yanvarda ABŞ-a gedəcəyəm", - deyə Çavuşoğlu söyləyib.
3-01-2023, 18:33
Polaşının baş naziri ölüm hökmünü dəstəklədiyini bildirdi
Polşanın baş naziri Mateş Moraveyski ölkədə ölüm hökmünün bərpasını dəstəklədiyini bildirib. Baş nazir feysbuk səhifəsində sual-cavab marafonu təşkil edib və vətəndaşların suallarını cavablandırıb. Bu mövzuda verilən suala cavabında Moraveyski edam cəzası ilə bağlı kilsənin nəzəri baxışlarına qatılmadığını söyləyib. "Bunun ümumilikdə yenidən təhlil olunmasının vacibliyi haqqında düşünürəm. Çox ağır cinayətlərdə ölüm hökmünə icazə verilməlidir", - deyə baş nazir vurğulayıb. Qeyd edək ki, Polşada ölüm hökmü 1998-ci ildə ləğv olunub.
3-01-2023, 18:19
İranda həbs olunan daha bir etirazçının edam hökmü təsdiqləndi
İranda etirazlar zamanı həbs olunan daha bir aksiyaçının edam hökmü Ali Məhkəmə tərəfindən təsdiqlənib. Nümayişlər zamanı təhlükəsizlik qüvvələri əməkdaşını yaralamaq, ictimai binanı yandırmaq kimi ittihamlarla edam cəzasına məhkum edilən 19 yaşlı Məhəmməd Buruqaninin hökmü qüvvədə saxlanılıb. Hökmün Ali Məhkəmə tərəfindən təsdiqləndiyi açıqlanıb. Tehranda etirazlar zamanı həbs edilən Buruqani “öldürmək məqsədi ilə güc strukturu əməkdaşına hücum və xəsarət yetirmək”, “ictimai asayişi pozmaq” və “təxribat törətmək”də təqsirli bilinib. O, 2022-ci il oktyabrın 29-da inqilab məhkəməsində ölüm cəzasına məhkum edilib. "Amnesty International" beynəlxalq insan hüquqlarını müdafiə təşkilatı Ali Məhkəmənin Məhəmməd Buruqaniyə verilən edam hökmünü qüvvədə saxlamasını pisləyib. Xatırladaq ki, ötən ilin sentyabr ayında 22 yaşlı Məhsa Əminin hicab qaydasını pozmaq ittihamı ilə polis tərəfindən saxlanılmasından sonra müəmmalı ölümü İranda böyük etirazlara səbəb olub. Polis gənc qızın ürək çatışmazlığından vəfat etdiyini, ailəsi isə Əmininin heç bir xəstəliyinin olmadığını və döyülərək öldürüldüyünü bəyan edir.
3-01-2023, 18:16
Rusiya güzəştli kredit proqramı elan etdi
Rusiya Ukraynanın ilhaq etdiyi Zaporojye və Xerson vilayətləri ərazisində yaşayan insanlar, habelə "Donetsk XR" və "Luqansk XR" sakinləri üçün güzəştli kredit proqramı elan edib. Bu barədə Rusiya Federasiyasının Nazirlər Kabineti qərar imzalayıb. Sözügedən qərara əsasən, ilhaq edilmiş Ukrayna ərazilərində yaşayanlar illik 2 faizdən çox olmayan güzəştli ipoteka imkanlarından yararlana biləcəklər. Xatırladaq ki, ötən ilin 24 fevralında Rusiyanın Ukraynaya hücumu nəticəsində başlayan müharibə davam edir. Rusiya Ukraynanın Xerson və Zaporojye vilayətlərini, habelə qondarma "Donetsk XR" və "Luqansk XR" separatçı qurumlarını birtərəfli qaydada ilhaq etdiyini açıqlayıb.
3-01-2023, 18:09
Ukraynanın Drujkovka şəhəri raket zərbələrinə məruz qaldı
Ukraynanın Donetsk vilayətində yerləşən Drujkovka şəhəri raket hücumuna məruz qalıb. Bu barədə Ukrayna Prezident Ofisi rəhbərinin müavini Kiril Timoşenko məlumat verib. Bildirilib ki, ümumilikdə 2 raket zərbəsi endirilib.“Şəhərin özünə bir raket düşüb, iki yaralı haqqında məlumat var. Digər raket Yakovlovka kəndinə düşüb. Məlumat dəqiqləşdirilir”, - deyə Timoşenko qeyd edib. “Donbass” xokkey klubunun baş direktoru Fyodor İlenkonun sözlərinə görə, zərbə “Altair” buz arenasına düşüb. Arenanın raket zərbələri nəticəsində dağıdıldığı bildirilir. Hadisənin görüntüləri yayılıb. Belə ki, raket zərbələri Fransanın "TMC" telekanalının ərazidən canlı yayım verməsinə təsadüf edib.
3-01-2023, 17:47
Dardanel boğazında su nəqliyyatının hərəkəti dayandırıldı
Türkiyədə Egey və Mərmərə dənizlərini birləşdirən Dardanel (Çanaqqala) boğazında su nəqliyyatının hərəkəti dayandırılıb. Buna səbəb əlverişsiz hava şəraiti olub. Belə ki, ərazidə 3 gündür davam edən dumanlı havanın hakim olması görmə məsafəsini minimuma endirib. Çanaqqala Gəmi-Nəqliyyat Xidmətləri İdarəsi hər iki istiqamətdə gəmilərin boğazda hərəkətinin dayandırılması və boğazın bağlanması ilə bağlı qərar qəbul edib. Yerli səfərlər həyata keçirən kiçik qayıqların isə hərəkətinə hər hansı məhdudiyyət qoyulmayıb. Bildirilib ki, hava şəraiti normallaşandan sonra boğazda nəqliyyatın hərəkəti bərpa ediləcək. Qeyd edək ki, İstanbul, Çanaqqala, Bursa, Manisa, Balıkesir, həmçinin Türkiyənin Balkan yarımadasına düşən hissəsində yerləşən şəhərlərdə dumanlı hava müşahidə olunur.
3-01-2023, 17:40
Çinlə işləmək olduqca vacibdir - Rusiya XİN
Rusiya XİN başçısının müavini Andrey Rudenko ölkəsinin Çin Xalq Respublikası ilə əlaqələrindən danışıb. Nazir müavini bu barədə TASS-a müsahibəsi zamanı söz açıb. "Rusiya hava yolu və dəmir yolu sahələrində sərnişin daşımalarının bərpası məsələsində Çinlə işləməyi vacib hesab edir. Bu kontekstdə Rusiya tərəfi iki ölkə xalqları arasında qarşılıqlı əlaqələrin möhkəmləndirilməsində mərkəzi rol oynayan humanitar əlaqələrin intensivləşdirilməsində maraqlıdır", - deyə Rudenko bildirib. O həmçinin qeyd edib ki, müvafiq sahələrdə əlaqələrin inkişafı iki ölkə arasındakı münasibətlərə müsbət töhfə verəcək.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!