17-01-2023, 18:09
Rusiya Silahlı Qüvvələrinin sayı artırılacaq
Rusiya Silahlı Qüvvələrinin sayı 1,5 milyon nəfərə çatdırılacaq. Bu məsələ Rusiya müdafiə naziri Sergey Şoyqunun keçirdiyi müşavirədə geniş müzakirə olunub. Bildirilib ki, silahlı qüvvələrin sayının artırılması silah təchizatı və infrastrukturun inkişafı ilə paralel həyata keçiriləcək. Nazir onu da qeyd edib ki, 2023-2026-cı illəri əhatə edəcək proses çərçivəsində Rusiya silahlı qüvvələrinin komandanlığı müvafiq qərarlar qəbul etməlidir. Müşavirədə Rusiya ordusunun yeni Moskva və Leninqrad dairələrinin yaradılması, Kareliyada ordu korpusunun formalaşdırılması, Hərbi Dəniz Donanması, Kosmik Hava Qüvvələri və Strateji Təyinatlı Hava Qoşunlarının döyüş hazırlığının gücləndirilməsi barədə qərar qəbul edilib.
17-01-2023, 18:05
Türkiyə və Çexiyanın müdafiə nazirləri görüşdü
Türkiyənin milli müdafiə naziri Hulusi Akar çexiyalı həmkarı Jana Çernoçova ilə görüşüb. Bu barədə "TRT Haber" məlumat yayıb. Görüş Akarın Çex Respublikasına səfəri çərçivəsində baş tutub. Rəsmi qarşılanma mərasimindən sonra tərəflər nümayəndə heyətləri ilə geniştərkibli görüş keçiriblər. Çexiya MN-in binasındakı müzakirələr zamanı iki nazir regional və ikitərəfli məsələləri, müdafiə, təhlükəsizlik və hərbi sənaye sahələrində əməkdaşlıq perspektivləri haqqında fikir mübadiləsi aparıblar.
17-01-2023, 18:02
Avropa İttifaqına üzvlüyümüzün gecikməsindən narahat deyiləm - Vuçiç
Serbiya prezidenti Aleksandr Vuçiç ölkəsinin Avropa İttifaqına üzvlük perspektivlərindən danışıb. Bu barədə Vuçiç yerli telekanallardan birinə müsahibəsi zamanı söz açıb. "Mən ölkəmizin Avropa İttifaqına üzvlüyünün gecikməsi ilə bağlı narahat deyiləm. Bunda problem yoxdur və bizdən əvvəl heç kimi ittifaqa qəbul etməyəcəklər. Məni narahat edən investisiyaların ölkəyə cəlb olunmasının qarşısının alınması ehtimallarıdır. Rusiyanı necə tərk etdiklərini gördüm. Orada maraqları bizdəkindən daha çox idi", - deyə Vuçiç bəyan edib. Serbiya prezidenti ölkəsinin ABŞ-la yaxşı münasibətlərə malik olmasının mühüm əhəmiyyət kəsb etdiyini bildirib.
17-01-2023, 17:32
Bağçalıdan çağırış - Seçki işini mayda bitirək
Türkiyənin Milliyyətçi Hərəkat Partiyasının (MHP) sədri, iqtidarın "Cümhur İttifaqı"ndakı siyasi müttəfiqi Dövlət Bağçalı seçkilərlə bağlı müxalifətə çağırış edib. Bağçalı bu barədə partiyasının parlament fraksiyasının toplantısında danışıb. "Millət iradəsindən yayınmağın heç kimə yararı toxunmayacaq. Gəlin, uzlaşaq. Seçki işini mayda bitirək. Ölkəni hamılıqla seçkilərə aparaq", - deyə MHP sədri söyləyib. Qeyd edək ki, müxalifətdəki "Altılı Masa" ittifaqı erkən seçkiləri yalnız siyasi bloklar üçün bir sıra əlverişsiz müddəaların əks olunduğunu söylədiyi yeni seçki qanununun qüvvəyə minəcəyi 6 apreldən əvvəl keçiriləcəyi təqdirdə dəstəkləyəcəyini açıqlayıb.
17-01-2023, 17:27
Ermənistanda Fransa əleyhinə etiraz aksiyası keçirilib
Bu gün Ermənistanda Fransa əleyhinə etiraz aksiyası keçirilib. Aksiya Fransanın İrəvandakı səfirliyinin qarşısında təşkil olunub. Etirazçılar Fransanı Laçın dəhlizindəki situasiyaya səssiz qalmaqda ittiham ediblər. Bundan əlavə, aksiyaçılar rəsmi Parisi addım atmağa, ermənilərə kömək etməyə çağırıblar. Aksiya zamanı saxlanılanlarla bağlı məlumat yoxdur. Qeyd edək ki, Fransa Laçın yolundakı ekoloji aksiya ilə bağlı BMT Təhlükəsizlik Şurasında Azərbaycanın maraqlarına zidd olan qətnamənin qəbul olunmasına çalışırdı. Belə olan halda Ermənistanın rəsmi Parisdən narazı qalması qəribə görünür.
17-01-2023, 17:22
Avropa İttifaqı Ermənistana 2 illik müşahidə missiyası göndərəcək
Avropa İttifaqı Ermənistana yeni müşahidə missiyası göndərəcək. Bu barədə Ermənistan mətbuatında məlumat yayılıb. Bildirilib ki, Ermənistanın Azərbaycanla sərhəd bölgələrində yerləşdiriləcək missiyanın səlahiyyət müddəti 2 il olacaq. Müşahidə missiyasının 20 fevraldan fəaliyyətə başlayacağı deyilir. Qeyd edək ki, bundan əvvəlki missiyanın səlahiyyət müddəti 2 ay idi.
17-01-2023, 17:09
Hulusi Akardan xəbərdarlıq - Prosesləri yaxından izləyirik
Türkiyənin milli müdafiə naziri Hulusi Akar İsveçin paytaxtı Stokholm şəhərində keçirilən PKK aksiyası zamanı Rəcəb Tayyib Ərdoğana qarşı təxribatı qınayıb. Akar belə addımları pislədiyini bildirib. "NATO-ya girmək istəyən bir ölkədə 70 illik NATO üzvü olan bir dövlətin prezidentinə qarşı terror təşkilatı tərəfdarlarının törətdiyi iyrənc əməli şiddətlə qınayırıq. İsveçi dərhal tədbir görməyə dəvət edirik. Buna səssiz qalmaq mümkün deyil. Prosesləri yaxından izləyirik", - deyə nazir söyləyib. Akar Finlandiya və İsveçin üzərinə götürdüyü öhdəlikləri yerinə yetirmədiyini bəyan edib. Qeyd edək ki, sözügedən aksiya zamanı Ərdoğana qarşı təxribat törədilmişdi.
17-01-2023, 17:05
PUA istehsalçılarımıza böhtan atılmasını qınayırıq - Hulusi Akar
Türkiyənin milli müdafiə naziri Hulusi Akar müdafiə sənayesi ilə bağlı tənqidlərə cavab verib. Akar belə addımları pislədiyini bildirib. "PUA istehsalçılarımıza böhtan atılmasını qınayırıq. Müdafiə sənayesindəki uğurlarımızdan narahatlıq keçirmək böyük bədbəxtlikdir. Bunu edənləri millətimizə həvalə edirik", - deyə nazir bəyan edib. Qeyd edək ki, müxalif DEVA Partiyasının sədri Ali Babacan PUA-larla bağlı mövzunun iqtidar tərəfindən müqəddəsləşdirildiyini və təbliğat vasitəsinə çevrildiyini bildirmişdi.
17-01-2023, 17:02
Enerji sahəsində qərarlı addımlarla irəliləyirik - Türkiyəli nazir
Türkiyənin sənaye və texnologiya naziri Mustafa Varank ölkəsinin enerji siyasətindəki yeniliklər barədə açıqlama verib. Nazir bu barədə Macarıstana səfəri çərçivəsində keçirilən birgə iqtisadi komissiyanın iclasında danışıb. ''Türkiyə enerji sahəsində mərkəz olmaq yolunda qərarlı addımlarla irəliləyir. Bilirsiniz, Azərbaycandan gələn xəttin gücünü gələcəkdə iki qat artıracağıq. Trakyada yeni terminalın hazırlıqları bitmək üzrədir. Buradan da ölkəmizə qaz gəlməyə başlayacaq. Son zamanlarda Qara dənizdə təbii qaz kəşf etmişik", - deyə Varank qeyd edib.
17-01-2023, 00:01
Britaniyadan Ukraynaya yeni hərbi dəstək planı
Böyük Britaniya Ukraynaya "Bulldog" zirehli personal daşıyıcıları göndərəcək. Bu barədə Britaniya müdafiə naziri Ben Uolles parlamentdə çıxışı zamanı bildirib. Zirehli maşınların sayı açıqlanmayıb. London, həmçinin Kiyevə onlarla pilotsuz uçuş aparatı və “Startstreak” zenit-raket kompleksləri göndərməyə hazırlaşır. Yeni yardım paketinə "Challanger 2” tankları, 8 AS90 silahı daxil olacaq və onların sayı daha da artırılacaq. Bundan əlavə, siyahıya 100.000 artilleriya mərmisi daxildir. Müdafiə naziri onu da bildirib ki, hərbi yardım Ukraynadakı müharibənin gedişatını dəyişdirə və Rusiya qoşunlarını sıxışdırıb çıxara bilər.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!