Aysellə ilk ünsiyyətimiz “Nəsimi ili” çərçivəsində keçirilən tədbirlərin birində olmuşdu. Təsadüfdən ya zərurətdən idimi, yan-yana əyləşmişdik. Böyük zal ağzına kimi dolu idi. Dünyanın dördbir tərəfindən söz adamları, şairlər, yazıçılar cahana sığmayan, sirr dolu Nəsimi sözünün cəzbində bir araya toplaşmışdılar. Gün ərzində birlikdə olduq. Anar müəllimin, Elçin müəllimin, Sabir Rüstəmxanlının, Ramiz Rövşənin, Oljas Süleymanovun, Konstantin Kedrovun, Fernando Rendonun və s. ünlü şair və yazıçıların çıxışlarını, şeirlərini dinlədik. Az söhbət etsəkdə gözlərimiz ürəyimizdən keçənləri oxumuşdu. Günün sonunda yaxın günlərdə görüşüb doyunca söhbət edəcəyimiz vədi ilə ayrıldıq. Ədəbi, nəzakəti, yüksək mədəniyyəti, gənclik zövqlü geyimi ilə Aysel ürəyimə çox yatmışdı. Çox qarışıq zəmanəmizdə onun simasında belə istedadlı, ədəbli, böyük-kiçik yeri bilən gənclərin olması mənə gələcəyə ötürülən bu günümüzün layiqli davamçılarının olması sevincini yaşatdı. Covid-19 pandemiyası planlaşdırdığımız görüşün uzanma səbəbi oldu. Və nəhayət ki, Ayselin yeni çapdan çıxan “Kəpənəyin göz yaşı” adlı kitabı ürəkdolusu söhbətləşdiyimiz görüşümüzə vəsilə oldu. Bir sərin yaz günü Xəzərin sahilində dənizin mehi, yarpaqların nəğməsi, Günəşin alabəzək şüaları musiqinin, sözün sehri ilə çulğaşmışdı...
Bu qərib misraya kəpənək qonub,
Deyir ki, üç günə sığdır ömrünü.[/b]

Ayselin gözlərinin dərinliklərindəki kədəri hələ ilk ünsiyyətimizdə sezmişdim. Səbəbini bu gün bildim. Həyat onu çox düşündürür... O ətrafında baş verən hadisələrə çox həssaslıqla yanaşır. Kədəri olanın kədərini bölüşməyə, sevinənin sevincinə sevinməyə can atandır bu kəpənək kimi zərif xanım.
[b]Suriyalı uşaq
Sən açılan atəşləri,
Şimşək çaxmasımı zənn etdin, yavrum?
Yağan qurşunları dolu,
Uçqun uçurumu oyuncaq,
Qaçıb gizlənəni gizlənqaçmı bildin?
Səni necə aldatdı atanla anan?
Ağlama yavrum...
“Bu da böyük insanların oyunudur”-
Dedikləri üçünmü susdun?
Sən heç silahla qazanılan,
Ölümlə itirilən oyun görmüsdünmü?
Nə idi günahın yavrum?
Həyata məsumca baxmağınmı?
Ana südünün qoxusunu unudub,
Hiylə qoxusunu dadmağınmı?
Dərd çəkdirənin cəzasız qaldığı dünyanın adı batsın.
Torpağın altında torpağın üstü üçün darıxdınmı heç?
Gəl günahkar dünyanın günahından keç.
Tanrıya şikayət edə bildinmi?
Ona danışdınmı canına necə qıydıqlarından?
Uşaqlar öləndə o biri dünyada mələk olarmış,
Yalana bax, yalana. Başımızı qata-qata,
Təskinliklə ömrü sata-sata,
Belə yaşamağın adı batsın.
Kaşki, böyüyəydiniz,
O dünyanın cəhənnəmində yerinizə şeytan belə olardım.
Belə mələk olmaqdansa...
Böyüyəndə nə olmaq istədiyini bilmədim,
Fəqət şərəfsiz terrorist olmaq istəmədiyini gözlərindən oxumuşdum.

Aysel Kərim 1993-cü ildə Bakı şəhərində anadan olub. Azərbaycan Milli Konservatoriyası nəzdində Musiqi Kollecinin və Üzeyir Hacıbəyli adına Bakı Musiqi Akademiyasının məzunudur. 2013-2015-ci illərdə Bakı Slavyan Universitetinin Yaradıcılıq fakültəsini bitirib. Eyni zamanda həmin illərdə AYB-nin nəzdində fəaliyyət göstərən “Gənc ədiblər Məktəbi” nin də məzunu olub. Məqalələri 2008-ci ildən dövrü mətbuatda dərc edilir. İlk şeir kitabı 2011-ci ildə “Bir ovuc yağış” adı ilə çap olunub. 2014-cü ildə Gənclər və İdman Nazirliyi tərəfindən “İlin ən fəal gənci” seçilərək, “Gənclər mükafatı”na layiq görülüb. Şeirləri bir çox toplu və antologiyalarda dərc edilib. 2016-cı ildə Azərbaycan Respublikası Prezidentinin gənc yazarlar üçün nəzərdə tutulmuş təqaüdünə layiq görülüb. 2019-cu ildə Azərbaycan Televiziya və Radio Verilişləri QSC-nin Teleradio Akademiyasının məzunu olub. 2013-cü ildən Azərbaycan Yazıçılar Birliyinin, 2019-cu ildən isə Azərbaycan Bəstəkarlar İttifaqının üzvüdür. Aysel Kərimin musiqi yaradıcılığında öz şeirləri ilə yanaşı Leyla Əliyevanın, Qənirə Paşayevanın, Rəşad Məcidin sözlərinə bəstələdiyi mahnılar da yer alır. O, Azərbaycanın xalq və əməkdar artistləri ilə çalışır. Onun bəstələrini Alim Qasımov, Fərqanə Qasımova, Gülüstan Əliyeva, Mətanət İsgəndərli, Nüşabə Ələsgərli, Fidan Hacıyeva, Brilliant Dadaşova kimi sənətkarlar ifa edir. Əməkdar artistlər Lalə Məmmədovanın, Fərid Əliyevin ifasında onun şeirlərinə bəstələnmiş mahnılar da tamaşaçılar tərəfindən zövqlə dinlənilir. Eyni zamanda musiqi yaradıcılığından onun romansları, prelüdiyaları və fortepiano pyesləri Müslüm Maqomayev adına Azərbaycan Dövlət Filarmoniyasında, uşaq mahnıları “Qış nağılı”, “Balaca sərçə”, “Mən arıyam” və s. Rəşid Behbudov adına mahnı teatrında və tv proqramlarında daim səsləndirilir. “ Dünya uşaq himni”, “Bayram yallısı”, “ Qardaşlıq himni”, “Yaradan” və digər əsərləri bəstəkar kimi Aysel Kərimin böyük imkanlarının nümunəsidir.
Ayselin öz ifasında səsləndirdiyi “Gecə-gündüz”, “Bulud”, “Dünyaya ana lazım” və. s. şeirləri həssaslığının, gözəl şair duyumunun seçilən nümunələrindəndir.

Bir Allah eşqidir sonsuz kainat,
Bir ucsuz-bucaqsız səhralardayıq.
O bizə gizləyib özünü deyən,
Görəsən özümüz haralardayıq?


Şeirlərinin təravəti, bəstələrinin ahəngi könüllərin məlhəmidir, QARAGÖZ QIZ. İstedadın, ədəbin, təmkinin səni yaradıcılığının ən uca zirvəsinə qədər ucaldacaq. Tanrı yolunu daim nurlandırsın, əziz Ayselim. Səni yeni kitabının çap olunması, oxuculara təqdim olunması münasibətilə ürəkdən təbrik edir, nailiyyət, səadət dolu ömür arzulayıram. Uğurlar!
Dünya can alveri- bir ət, bir sümük...

Azadə Novruzova,
Şairə-publisist,Azərbaycan Yazıçılar Birliyinin,
Azərbaycan Jurnalistlər Birliyinin üzvü