Əli NƏCƏFXANLI

( fraqmental duyğular)

Vətən başdan da ucadı,

Vətən tacdan da ucadı,

vətəndaşdan da ucadı!..

Ata-babamızın əyildiyi canamaz, alnını qoyduğu möhürdü Vətən!

Məhəmmədhüseyn Şəhriyar rəhmətlik Vətənə xitabla yazırdı: "Can qurban etmənin vaxtı çatıbsa, səndən hansı namərd əsirgəyər can?" - Amma əsirgəyənlər az olmadı...

Məmməd Araz rəhmətlik yazırdı: "Vətən mənə oğul desə, nə dərdim?.." -Dedi eee, intəhası, bizim hay verən səsimiz zəif çıxdı...

Məmməd Aslan yazır: "Vətən gözdü, biz kirpik, gözümüzün keşiyini çəkirik"... -Bunu da axıracan edə bilmədik. Vətəni öz ucalığında saxlamadıq.  

Məmməd İsmayıl yazır: "Keçilməz qaladı Vətən, keçilməz"... -Amma Şuşa keçildi, Şuşadan keçildi. Qürur kiçildi. Söz verənlər başlarına güllə çaxmadılar..

Əməllərimizlə ünlü şairləri xəcil elədiyimiz yetməzmi?

Unutmayaq: Vətənə qıyan, onu ucuz tutan hər kəs kötülük hizmətkarıdır!

 Qarabağ mötərizəyə salınıb. Çıxardılmalı!

Ali Baş Komandan bundan ötrü əlindən gələni edir. Dünyaya sülh niyyətimizi, eləcə dəərazi bütövlüyümüzün bərpasından ötrü işğalçıları kürüyüb atmaq əzmimizi bəyan edir. Yeni müdafiə naziri bu yöndə layiqli işlər görür. Ordumuz xeyli güclənib. Müasir hərbi texnikamız yetərincədir. Döyüşçülərimizin qələbə təşnəliyi qürur doğurur. Qırımı xain qonşularda xof yaradır.

Elə hərbi xidmətə çağırışda da müəyyən qayda yaradılıb.

Amma bəzi valideynlər yenə də  əndişə keçirirlər. Orduya gedən övladlarının cəbhə xəttindən, səngər rütubətindən, atəş səsindən, barıt qoxusundan uzaq olmasını istəyirlər. Gənc əsgərlərin andiçməsindən sonra "balam yaxşı yerə düşsün" deyə qapıların dabanını çıxarırlar. Bəzi çinli  çiyinlərsə... Ayıb, ayıb!..

Sayaq ki, hesab dərsi - hesabat vaxtıdı:

Olsa da vətənin sərhədi bəlli,

Yaddadı torpağın yarısı, yadda...

Qəliz məsələdir üç-dörd əməlli:

Vurursan, bölürsən, üstə gəlirsən-

Yarısı yazılır, yarısı yadda...

Əlbir olaq, həll eləyək!