Azərbaycanda da, digər ölkələrdə də yaşayan soydaşlarımız bilir ki, Azərbaycan Dövləti ağır günlərində həmişə Gürcüstan dövlətinin yanında olub. Ona təkcə mənəvi-siyasi deyil, həm də iqtisadi dəstək göstərib. Bütün regional layihələrdə Gürcüstan əsas partnyor seçilib. Amma qonşu dövlət nədənsə, ölkəmizə qarşı siyasətdə səmimi deyil. Azərbaycan rəhbərliyinin onlara göstərdiyi xoş məramın Gürcüstandakı soydaşlarımıza münasibətdə əksinin şahidi oluruq. Qonşularımız müxtəlif vasitələrlə oradakı aborogen soydaşlarımızın dinc yaşamasına əngəl törədirlər. Onların hüquqlarının müdafiəsinə çalışan "Borçalı" Cəmiyyətinin fəaliyyətinə açıq və dolayısı ilə mane olurlar. Dünyada, regionda barış istəyən, Gürcüstan dövlətinin ərazi bütövlüyü uğrunda mübarizə aparan, separatçılığı lənətləyən Zəlimxan Məmmədlinin və çəmiyyətin sədr müavininin doğulduqları yurda buraxılmaması ədalətsizlik, haqsızlıq olmaqla bərabər, həm də millətimizi zəif bilmək, bizə həqarət etmək, aşağılamaq anlamındadır. Türk kimliyinə hörmət edən hər kəs bu zorakılığa qarşı çıxmalıdır. Çünki özümüzə dost-müttəfiq bildiyimiz bir ölkədən belə qeyri humanist münasibət təkcə borçalıların problemi deyil, ümummilli bir məsələdir.
Borçalı mahalındakı Şindilər kənd məktəbində lentə aldığım görüntüləri diqqətinizə çatdırıram. Bu soydaşlarımıza olan münasibətin təzahürüdür. Tamxil Ziyəddinoğlu,
"Bütöv Azərbaycan" qəzetinin baş redaktoru
"Zəngəzur" Cəmiyyətinin sədr müavini
Fotolar müəllifindir