Azərbaycan Respublikasının Prezidenti yanında Bilik Fondu Şəmkir rayonunun Səməd Vurğun adına Təzəkənd tam orta məktəbində “Kitabi-Dədə Qorqud”-200: əxlaq dərsliyimiz” mövzusunda mühazirə təşkil edib. Bilik Fondunun Ölkədaxili layihələr sektorunun müdiri Hacı Abdullanın kənd sakinləri, müəllim və şagirdlər qarşısında mühazirəsi maraqla dinlənilib.

Mühazirəçi Prezident İlham Əliyevin 7 may 2014-cü il tarixli Fərmanı ilə yaradılmış Azərbaycan Respublikasının Prezidenti yanında Bilik Fondunun Nizamnaməsindən irəli gələn vəzifələrin yerinə yetirilməsi ilə əlaqədar gördüyü işlər, həyata keçirdiyi layihələr barədə də məlumat verib.

Dinləyicilərin çoxsaylı sualları cavablandırılıb. Çıxışlarda Bilik Fondunun layihələrinin, fəaliyyətinin cəmiyyətdə razılıqla qarşılandığı vurğulanıb.

Məktəbin direktoru Əbülfət Cəfərov respublikamızın qabaqcıl təhsil müəssisələrindən olan məktəbin tarixi, uğurları barədə məlumat verib. Bildirib ki, məktəbin yetirmələri arasında onlarla tanınmış alim, idmançı, ictimai xadim vardır. Şagirdlərimiz dəfələrlə respublika miqyaslı bilik yarışlarının, fənn olimpiadalarının qalibi olublar.

H.Abdulla Bilik Fondu adından təhsil ocağının kitabxanasına 50 adda kitab hədiyyə edib. Xatirə şəkilləri çəkdirilib.