5-05-2024, 14:15
İçərişəhərdə Milli Xalça Festivalı keçirildi - FOTO
4 may 2024-cü il tarixdə İçərişəhərdə Milli Xalça Festivalının açılışı keçirilib. Açılış mərasimində “İçərişəhər” Dövlət Tarix-Memarlıq Qoruğu İdarəsinin İdarə Heyətinin sədri Şahin Seyidzadə, “Azərxalça” Açıq Səhmdar Cəmiyyətinin İdarə Heyətinin sədri, Azərbaycan Respublikasının Əməkdar incəsənət xadimi Emin Məmmədov, İxracın və İnvestisiyaların Təşviqi Agentliyinin – AZPROMO-nun icraçı direktoru Yusif Abdullayev çıxış ediblər.
“İçərişəhər” DTMQİ-nin İdarə Heyətinin sədri Şahin Seyidzadə öz çıxışında: “UNESCO-nun Ümumdünya İrs Siyahısına daxil olan İçərişəhərin Milli Xalça Festivalına ev sahibliyi etməsi heç də təsadüfi deyil. İçərişəhər Qoruğu üçün Azərbaycanın qədim milli-mədəni ənənələrinin, sənət nümunələrinin yaşadılmasına töhfə vermək və bu istiqamətdə işlər görmək prioritet istiqamətlərdən biridir. Bu baxımdan, UNESCO-nun Qeyri-maddi mədəni irs nümunələri siyahısına daxil edilmiş Azərbaycan xalçaçılıq sənətinin İçərişəhərdə təşkil olunan Milli Xalça Festivalı vasitəsilə təşviqi və yaşadılması önəmlidir”, - deyib.
“Azərxalça” Açıq Səhmdar Cəmiyyətinin İdarə Heyətinin sədri və Azərbaycan Respublikasının Əməkdar incəsənət xadimi Emin Məmmədov çıxışında: “Bu gün Azərbaycan xalçaçıları üçün əlamətdar gündür. Azərbaycan Respublikasının Prezidenti cənab İlham Əliyevin 25 noyabr 2016-cı il tarixli Sərəncamı ilə 5 may - “Xalçaçı günü” peşə bayramı kimi qeyd edilməyə başlanıb və eyni zamanda 5 may “Azərxalça” ASC təsis edildiyi gündür. Xalçaçı gününün rəsmi səviyyədə qeyd olunması, Milli Xalça Festivalının təşkili xalçaçılıq ənənəsinin qorunub saxlanması və bu sənətin daha da inkişaf etdirilməsində vacib rol oynayır”, - vurğulayıb.
İxracın və İnvestisiyaların Təşviqi Agentliyinin – AZPROMO-nun icraçı direktoru Yusif Abdullayev çıxışında bildirib: “Azərbaycan xalçaçılıq sənətini beynəlxalq səviyyədə təşviq etmək məqsədilə AZPROMO mütəmadi olaraq sərgilər keçirir və bugünki Milli Xalça Festivalı da həmin işə töhfədir. Azərbaycanın mədəni-irsinin xalçalar vasitəsilə dünyaya tanıdılması ilə yanaşı, ölkəmizin qonaqlarına xalça istehsalatımızı göstərmək vacibdir”.
Tədbirdə iştirak edən Milli Məclisin üzvləri, rəsmi qonaqlar, mədəniyyət və incəsənət xadimləri ilə yanaşı festivalının digər ziyarətçiləri açılış mərasimindən sonra Azərbaycan xalqının ümummilli lideri Heydər Əliyevə həsr olunan “Dövlətin memarı. Bir ömrün ensiklopediyası” triptix və “Heydər Əliyev 100” xalça sərgilərini ziyarət ediblər. Həmçinin, xalçaçıların nümayiş etdirdiyi xalça emalı prosesinin müxtəlif mərhələlərini maraqla izlədikdən sonra, İçərişəhərdəki gül xalçası da daxil olmaqla, digər sərgi məkanları ilə tanış olublar.
İki gün davam edən festivalda İçərişəhər ərazisində xalçaçılıq sənətinə həsr edilən bir sıra tədbirlər keçirilməkdədir. Bura qədim, müasir, eləcədə müəllif xalçalarından ibarət eksklüziv sərgilərin nümayişi, xalçatoxuma sənəti ilə bağlı böyüklər və uşaqlar üçün ustad dərsləri, maarifləndirici seminarlar, interaktiv teatr tamaşası, yarmarka, muğam axşamı və konsert proqramı daxildir. Festivalın ilk günündə İçərişəhərin sakinləri və qonaqları üçün açıq səma altında film nümayişi təşkil olunub.
Qeyd edək ki, Milli Xalça Festivalı “İçərişəhər” Dövlət Tarix-Memarlıq Qoruğu İdarəsi və “Azərxalça” Açıq Səhmdar Cəmiyyətinin təşkilatçılığı, Azərbaycan Respublikasının İqtisadiyyat Nazirliyi, İxracın və İnvestisiyaların Təşviqi Agentliyinin – AZPROMO-nun dəstəyi ilə keçirilir.
4-05-2024, 07:32
GÜLNARIN RƏNGLƏR DÜNYASI
Şəkinin Baş Zəyzid kəndində yaradıcılıq ezamiyyətindəyəm. Hər gün onlarla sakinlə görüşür, milli adət-ənənələrimizlə bağlı söhbətlər aparır, qədim yurd yerlərimizin tarixi, folklor və etnoqrafiyamızla bağlı müəyyən məlumatlar toplamağa çalışıram. Deməliyəm ki, yaxın iki aydakı görüşlərimizdən, söhbətlərimizdən belə anlaşıldı ki, bu yerlərdə illərlə toplasan belə tükənməyəcək zəngin milli-mənəvi dəyərlər xəzinəsi yatır.
Kəndimizin Seyid dayı adlı məşhur bir zurna ustası olub. Başının dəstəsi ilə saysız-hesabsız toy və el şənliklərini idarə edib. Hətta 1991-ci ildə kənd fəallarının böyük fədakarlığı sayəsində kəndimizdə ilk dəfə baş tutan milli Novruz bayramı şənliyinin musiqi bəzəyi də Seyid dayının adı ilə bağlıdır.
“Gülnarın rənglər dünyası” sərlövhəli yazıma Seyid dayını xatırlamaqla başlamağım heç də səbəbsiz deyil. Çünki haqqında söhbət açacağım gənc rəssam qızımız məhz Seyid dayının nəticəsidir. Doğru deyiblər ki, həyatda heç nə təsadüfi olmur. Bizə təsadüf kimi görünən hadisələrin alt qatında əslində böyük həqiqətlər gizlənir. Belə ki, mən Seyid dayı haqqında məlumat toplamaq məqsədilə onun oğlu Cəlal müəllimlə görüşmək qərarına gəldim və bu ailənin qonağı olarkən də Gülnar qızımızın bir-birindən gözəl əl işləri ilə tanış oldum.
Gülnar Məmmədli ziyalı ailədə doğulub. Şəki rayon Baş Zəyzid kənd tam orta məktəbinin 9 “a” sinif şagirdidir. Gülnarın babası Cəlal Məmmədov, atası Səxavət Məmmədov da həmin məktəbin idman müəllimləridir. Nənəsi Rəfiqə Məmmədova ibtidai sinif müəllimi, anası Günel Məmmədova tibb bacısıdır.
Cəlal müəllim hazırda təqaüdçü olsa da, bütün ailə üzvləri kimi onun da diqqəti istedadlı nəvəsi Gülnarın gələcək həyat yolunda tutacağı istiqaməti müəyyənləşdirməyə, ona dəstək olmağa yönəlib. Bunu onunla söhbətimiz zamanı açıqca hiss etmək olur:
“Hələ üçüncü sinif şagirdi olduğu zamanlardan hiss etdik ki, Gülnar dərslərini yaxşı oxumaqla yanaşı, televizorda izlədiyi cizgi filmi qəhrəmanlarının rəngli qələmlərlə şəklini çəkir. Düzü, əvvəlcə bunu adi bir uşaq həvəsi hesab etdik. Sonradan onun fırçadan, rəngli qələmlərdən heç cür ayrılmadığını, rəsm sənətini qəlbən sevdiyini gördük. İstəyirdik ki, həkimliyi seçsin. Dərslərindən ancaq əla qiymətlər alırdı, biologiyaya isə xüsusi həvəsi vardı. Bu fənni çox yaxşı oxuyurdu. Bununla belə, Gülnarın get-gedə rənglərə daha dərindən bağlandığını gördük. Ev tapşırıqlarını yerinə yetirdikdən sonra, boş vaxtlarında ancaq şəkil çəkdiyini görüb ona mane olmamağı qərara aldıq. Şəkil çəkmək onda heç də pis alınmırdı. Düşündük ki, nəvəmin rəssamlıq sənətinə bağlılığı adicə həvəs çərçivəsindən çoxdan çıxıb. Soraqlaşıb Şəki Dövlət Dram Teatrının baş rəssamı Sahib Əhmədovu tapdıq. Onun kurslarına yazdırdıq Gülnarı. Sahib müəllimin yanına gedəndə Gülnarın abstrakt mövzularda işlədiyi şəkilləri də özümüzlə götürmüşdük. Müəllim həm onun çəkdiyi şəkillərə baxdı, həm də bu şəkillərin izahatına qulaq asdı və dedi ki, Gülnarı bu sənətdən ayırmaq günahdır...”
Öyrənirik ki, o vaxtdan etibarən – bir ildən çoxdur Gülnar davamlı olaraq Sahib müəllimin rəsm kurslarına gedir. Artıq Sahib müəllimin fikri qətiləşib ki, Gülnarın bügünəcən çəkdiyi əsərlərdən ibarət fərdi sərgisi təşkil olunmalıdır. Müəllimi düşünür ki, gənc bir rəssam kimi o öz yaradıcılıq fəaliyyətini daha da genişləndirməli, onun sənət uğurları ətrafdakı istedadlı uşaqlara da sirayət etməli, onları da sənət yollarında uğurlar qazanmağa ruhlandırmalıdır.
Gülnar barədə daha ətraflı məlumat əldə etmək üçün Baş Zəyzid kənd tam orta məktəbində olduq. İnformatika müəllimi Sevda Balənmədova Gülnar barədə yazmaq istədiyimizi eşidəndə çox sevindi. Bu cür istedadların həqiqətən xüsusi diqqət və qayğı ilə əhatə edilməsinin vacibliyindən danışdı. Məktəbin əlaçı şagirdi kimi Gülnarı digər şagirdlərdən fərqləndirən bacarıq və qabiliyyətlərə malik olmasını həm də bütövlükdə təhsil aldığı məktəbin və doğulub böyüdüyü kəndin uğuru kimi dəyərləndirdi.
Məktəbin rəsm müəllimi Gülxatın Məhərrəmova hələ aşağı siniflərdə Gülnarın istedadını büruzə verdiyini, onun digər uşaqlardan fərqləndiyini müşahidə etdiyini söylədi. Onu da qeyd etdi ki, məktəbdə hansısa əlamətdar günlər və bayramlarla əlaqədar təşkil olunan sərgilərdə Gülnarın işləri həmişə diqqəti cəlb edib.
Uşaqlarla məktəbdənkənar və sinifdənxaric işlər üzrə təşkilatçı Sahib Məhyəddinov, biologiya müəllimləri Aynur Qədirova, Sevinc Nəsrullayeva, sinif rəhbəri Aytəkin Həmidova da Gülnarın bütün dərslərdə xüsusi fəallıq göstərdiyindən böyük razılıq hissi ilə danışdılar.
Gülnar əlaçıdır, dərslərindən həmişə yüksək qiymətlər alır. Çünki elmin bütün sahələri ilə dərindən maraqlanır, dayanmadan, durmadan mütaliə edir. Mütaliəsinin zənginliyi elə çəkdiyi rəsmlərdən bəllidir.
“Əsərlərimin əksəriyyətini hiss edib duyduqlarımdan, oxuduğum əsərlərdən aldığım məlumat və enerjidən əxz eləmişəm. Eyni zamanda, bu əsərlərdə dünyanın yaranış, törəniş və gələcəyə doğru inkişafını, təkamül prosesini rənglərin dili ilə verməyə çalışmışam. İşlərimin bir çoxunu sürrealist əsərlər təşkil edir. Bunlar mənim duyğu və düşüncələrimin inikasıdır” – deyir Gülnar.
Əsərlərinin bəzilərinin adlarını çəkməklə bu işlərin mövzu müxtəlifliyinə və məzmun dərinliyinə diqqəti cəlb etmək istərdim: “Qaranlığın rəqsi”, “Yerin yaradılması”, “Qanadlı arzular”, “Bəyaz işıq” və s…
Həqiqətən də, Gülnarın düşüncələri kimi, düşüncə və istedadının, təxəyyül və idrakının ortaq məhsulu kimi ortaya çıxan əsərləri adamı dərindən düşünməyə vadar edir. Düşünür və deyirsən ki, nə yaxşı bu bozbulanıq dünyada Gülnar və onun istedadlı yoldaşları kimi bəşəri ideallarla yaşayıb gələcəyə doğru inamla addımlayan gənclərimiz var. Çünki gələcəyimizi məhz bu cür azadfikirli, açıqdüşüncəli istedad sahibləri olan gənclərimiz quracaqlar. Gələcək onlarındır!
Şəki Dövlət Dram Teatrının baş rəssamı Sahib Əhmədovun Gülnar barədə dediklərindən:
“İlk dəfə Gülnarın işlərinə baxdıqda onda bu sənətə böyük həvəs olduğunu hiss etdim. Bir müəllim kimi ona bu sənətdə təkan verdim. Dərsində hər zaman çalışqandır. Gülnar Məmmədlinin özünəməxsus kompozisiyaları var. Gələcəkdə onun ali təhsil alıb, sənətdə daha da yüksək nailiyyətlər qazanacağına inanıram. Bu yolda ona uğurlar arzulayıram”.
Biz də Gülnara (Gül Nar) sevib-seçdiyi rəssamlıq sənətinin çətin və rəngarəng yollarında saysız uğurlar arzulayırıq.
Qiymət MƏHƏRRƏMLİ,
AMEA Folklor İnstitutunun aparıcı elmi işçisi,
Filologiya üzrə fəlsəfə doktoru, şair.
3-05-2024, 20:42
“Turan yolu-Zəngəzurum” əsərinin təqdimatı olub - FOTO
Mayın 3-də Bakıda Yunus Əmrə İnstitutunun təşkilatçılığı ilə dekorativ tətbiqi sənət ustaları Lalə, Toğrul və İsgəndər Sərdarlıların ərsəyə gətirdiyi "Turan yolu-Zəngəzurum" adlı əsərin təqdimatı olub.
Təqdimatda Sərdarlı ailəsinin müəllifi olduğu 50-yə yaxın əsər nümayiş olunub.
Sərdarlıların əl işləri Azərbaycan mədəniyyət tarixində ilk dəfə müvafiq qurumlar tərəfindən sənət əsərləri kimi dəyərləndirilərək, qeydiyyata alınan dekorativ tətbiqi sənət nümunələridir.
Bakı Yunus Əmrə İnstitutunun başqanı Selcuk Karakılıç, Əməkdar incəsənət xadimi, sənətşünas Ziyadxan Əliyev və İstanbul millət vəkili Doğan Bekin sərginin əhəmiyyətindən danışıblar. Onlar Sərdarlılar ailəsinin yaradıcılığına xüsusi dəyər verdiklərini qeyd ediblər.
Çıxışlarda ailənin unudulmuş tətbiqi sənət nümunələrini yenidən fərqli məzmun və formatda ictimaiyyətə təqdim etməsinin əhəmiyyət vurğulanıb.
Azərbaycan Rəssamlar ittifaqının üzvü, Tətbiqi Sənət Nümunələrinin Qorunmasına və Təbliğinə Yardım İctimai Birliyinin Beynəlxalq əlaqələr bölməsinin rəhbəri, dekorativ tətbiqi sənət ustası İsgəndər Sərdarlı bildirib ki, tədbirin əsas məqsədi unudulmaqda olan xalq sənəti nümunələrimizin günümüzə qayıdışını təbliğ etməkdir.
Daha sonra qonaqlar Sərdarlıların bir-birindən maraqlı əsərləri ilə tanış olublar.
Qərbi azərbaycanlılara məxsus tarixi memarlıq abidələrini, mədəni irs incilərini tərənnüm edən özünəməxsus üslubda işlənmiş dekorativ tətbiqi sənət nümunələri və digər əsərlər milli koloriti və orijinallığı ilə göz oxşayıb.
Sərdarlılar ailəsinin yaratdığı sandıq, mücrü və zinət əşyaları Azərbaycan mədəniyyət tarixində ilk dəfə olaraq sənət əsərləri kimi dəyərləndirilib.
Hazırda Sərdarlılar ailəsinin bir sıra əsərləri Macarıstan, Şimali Kipr, Kanada muzeylərində, həmçinin müxtəlif ölkələrdə şəxsi kolleksiyalarda saxlanılır.
3-05-2024, 13:59
Ağdamın mədəni irsi talan edilib - Nazir müavini
30 illik işğal ərzində Ağdamın zəngin mədəni irsi dağıdılıb, talan edilib və oğurlanıb. Hazırda bura xarabalıqlar şəhəridir.
Bunu mədəniyyət nazirinin müavini Fərid Cəfərov VI Ümumdünya Mədəniyyətlərarası Dialoq Forumu çərçivəsində Ağdamda keçirilən "Minaların və partlamamış hərbi sursatların mədəni mülkiyyətə təsiri" mövzusunda keçirilən xüsusi sessiyada deyib.
O qeyd edib ki, Prezident İlham Əliyevin tapşırığı ilə Ağdam şəhəri yüksək standartlara uyğun şəkildə bərpa edilir.
Nazir müavini minaların mədəni irsə təsirindən danışarkən xatırladıb ki, UNESCO-nun bununla bağlı xüsusi konvensiyası var:
"Rəsmi rəqəmlərə görə dünya üzrə 110 milyondan çox mina quraşdırılıb. Azərbaycan isə mina problemi ilə bağlı əziyyət çəkən ölkələr siyahısında öndədir. Təkcə Ağdamda 1,5 milyona yaxın mina quraşdırılıb”.
1-05-2024, 17:00
“Avroviziya” 1 həftə sonra başlayır! - Azərbaycan nə vaxt çıxış edəcək?
Gələn həftə İsveçin Malmö şəhərində “Avroviziya” mahnı müsabiqəsi start götürəcək. Dünyanın ən böyük canlı musiqi tədbiri hesab edilən müsabiqəyə 37 ölkədən gələn iştirakçılar qatılacaq.
68-ci dəfə keçirilən yarışma üçün həftə ərzində 89 ölkədən təxminən 100.000 ziyarətçinin Malmöyə gələcəyi gözlənilir.
Mayın 7-də müsabiqənin birinci yarımfinalı, mayın 9-da isə ikinci yarımfinalı keçiriləcək. Mayın 11-də “Avroviziya”nın böyük final mərhələsi baş tutacaq.
İsveçin 362 min əhalisi ilə üçüncü ən böyük şəhəri olan Malmödə 1992 və 2013-cü illərdə də “Avroviziya”ya ev sahibliyi edib. İsveçdə ümumilikdə 7 dəfə bu müsabiqə keçirilib.
Müsabiqənin ilk yarımfinalında Kipr, Serbiya, Litva, İrlandiya, Ukrayna, Polşa, Xorvatiya, İslandiya, Sloveniya, Finlandiya, Moldova, Azərbaycan, Avstraliya, Portuqaliya və Lüksemburq, ikinci yarımfinalında isə Malta, Albaniya, Yunanıstan, İsveçrə, Çexiya, Avstriya, Danimarka, Ermənistan, Latviya, San Marino, Gürcüstan, Belçika, Estoniya, İsrail, Norveç və Niderland təmsilçiləri çıxış edəcək.
27-04-2024, 16:24
Ermənilər illərdi musiqimizi oğurlayır
Agentlik sədri: Qərbi Azərbaycan ərazisindən xalq mahnıları lentə alınaraq erməni nümunələri kimi təqdim edilib
Qərbi Azərbaycan torpaqlarında Ermənistan Respublikası yaradıldıqdan sonra, artıq 1925-ci ildə İrəvanda Elm və İncəsənət İnstitutunda xüsusi şöbə fəaliyyətə başladı. Onun vəzifəsinə xalq musiqisi və folklor nümunələrini toplamaq və tədqiq etmək daxil edildi. Onların toplanması və arxivləşdirilməsi keçmiş Azərbaycan torpaqlarında aparılırdı və təbii ki, onların mənşəyi türk-azərbaycanlı olmuşdu.
Bunu Əqli Mülkiyyət Agentliyinin İdarə Heyətinin sədri Kamran İmanov Agentliyin və Qərbi Azərbaycan İcmasının birgə təşkilatçılığı ilə keçirilən “Qədim mətnlər və klassik mənbələr erməni saxtakarlıqlarını və uydurmalarını ifşa edir və ya Qərbi Azərbaycan torpaqları nədən bəhs edir” mövzusunda konfransda söyləyib. Qeyd edib ki, 1959-cu ildə nəşr edilmiş “Ensiklopedik musiqi lüğəti”nə əsasən, “müasir erməni musiqisinin atası” Komitas tərəfindən ümumilikdə üç mindən çox mahnı lentə alınmışdı. Komitasın Azərbaycan xalq musiqisinin oğurluqlarından ibarət olan bu etnoqrafik toplusu S.Melikyan tərəfindən şərhlərlə nəşr edildi.
“Özününküləşdirilən əsərlər arasında “Es kes tesa” adı altında “Sarı gəlin” mahnısı da olub. Bu mahnının dəfələrlə oğurlanması hallarına bu günə kimi də rast gəlirik. 1970-ci ildə “SSRİ xalqlarının musiqi tarixi” I cildində qeyd olunduğu kimi, bu kompilyasiya K.Zaxaryan tərəfindən erməni mahnısı kimi verilib”, - deyə Kamran İmanov bildirib. Agentlik sədri bildirib ki, XIX əsrin sonlarında nəşr olunan kitablarda “Uzundərə”, “Ceyranı”, “Şalaxo” Azərbaycan folklor rəqsləri erməni nümunələri elan edilib, 1959-cu ildə buraxılmış “Musiqili ensiklopedik lüğət”də isə “həm də Azərbaycanda geniş yayılmış erməni solo rəqsləri” kimi təqdim edilib.
“A.Babacanyanın “Vaqarşapat rəqsi”nin plagiat kökləri dahi Üzeyir Hacıbəylinin “O olmasın, bu olsun” musiqili operettasına gedib çıxır.
Lakin ötən əsrin 80-ci illərində Mərkəzi Radio və Televiziyanın proqramlarından birində Babacanyan həyasızcasına bəyan etdi ki, o, Üzeyir bəyin başqa bir gözəl operettasının köklərini guya Qarabağın hansısa erməni kəndlərində oxunan melodiyalarda tapıb. Bununla o, dolayısı ilə dahi Azərbaycan bəstəkarını plagiatda ittiham etməyə çalışıb”, - Kamran İmanov qeyd edib.
27-04-2024, 12:32
Ruhumuzun ehtiyacından doğan görüş
Ruhumuzun ehtiyacından doğan görüş
Bugünkü cümlələrim həm fərəhlidir, həm qürurlu, bir az utandığından yanağı qızaran qız uşağıtək, bir az imtahanqabağı həyəcanlanan tələbətəkdir. Bəli, cümlələrim öz mənbəyini uca dağlardan götürən çaya da bənzəyir. Axı o mənbələr çox ucadan boylanır. Uca dedim həm qəlbimdə insani xüsusiyyətləri ilə yer alan, həm də çağdaş ədəbiyyatımızda sözünü demiş yazarlar yadıma düşdü. Hansı ki, "Sirli güzgü" kitabımı o sevimli yazarın "Qırmızı ləçəklər" romanından təsirlənib yazmışdım. Kitabı sadə xarakteri və imzası ilə hədiyyə etməsi məsuliyyətimi daha çox artırırdı. Bəli, söhbət Varis bəydən gedir. Onun ismi yetər, əlavə cümlələrə ehtiyac yoxdur.
Bəli, bu nəsrdə inkişafımı sürətləndirən əsas amil idi. Axı poeziya da var, hələ sıxılanda ürəyimi ovundurduğum qiraət də var…Bu yolda sıradan olmamaq var. Mükəmməl yazar xanım, dosta, məni anlayana, arada danlayana, sözləri ilə ruhuma naxış vurana da ehtiyacım olacaqdı. Allah arzumu gerçəyə çevirib Təranə Dəmirlə məni rastlaşdırmışdı. İlk gördüyüm andan ruhumun parçası hiss etmişdim, bəlkə də, bəziləri onu soyuqqanlı kimi qələmə verə bilər, amma o xanım məni ilk görəndə elə sarılmışdı ki…
O sarılmağın sehri indi də qəlbimi sarıb. Onun poeziyasının gücü qollarıma güc verib, ruhuma təsəlli…Hər zaman Ədəbiyyatdan damla olduğumu söyləmişəm, amma adlarını çəkdiyim yazarlar yalandan ümid verib "Qara Ədəbiyyatı" təbliğ etmirlər. Deməli, Əbülfəzqızında nə isə görüblər. Özümü tərifləmək istəmirəm. Təranə xanımın yazılarındakı səmimilik mənim cümlələrimin canına hopub.
U. Şekspir demiş ki: "Sadəlikdən, səmimilikdən uzaq olan şeirlər yağlanmamış təkərlərin cırıltısından daha çox əsəbləri pozur."
Təranə xanımın, Varis bəyin çox "oxunulmasının" əsas səbəblərindən biri elə oxucu ilə arasında o səmimiyyət körpüsünü inşa etmələrindədir. Gənc yazarlara nümunə olmaq asan deyil, amma bəzi yazarlarımız öz daxili bənzərsizliyi və istedadı ilə bunu başarıblar. Elə Təranə xanımın oxucularla görüşünə təşrif buyurub oxucuları valeh edən İbrahim İlyaslı, Qəşəm Nəcəfzadə bu yazarlara nümunədir.
Xırdalan şəhərində yerləşən "Kitab evində" Azərbaycan YaIçılar Birliyinin üvləri Təranə Dəmir və Fəxrəddin Teyyubun oxucularla görüşü zamanı gözəl poeziya dəqiqələri keçdi. Çox sevindirici haldır ki, həmin gün şairləri elə çağdaş ədəbiyyatımızda öz imzaları ilə tanınan şairlərimiz də tək buraxmadılar. Görüşdə sevilən şairimiz İbrahim İlyaslı, Qəşəm Nəcəfzadə, Elvin İntiqamoğlu, Azərbaycan radiosunun əməkdaşı, baş redaktor Dilşad Mirzəyeva, jurnalist Vaqif Nəcəf, şair Rizvan Nəsiboğlu, Qəzənfər Məsimoğlu, politoloq Hüseyn Naibov, Mübariz Süleymanlı və başqaları iştirak ediblər.
Möhtəşəm ədəbi görüş 3 saat davam edib. Təranə Dəmir və Fəxrəddin Teyyuba oxucular və tədbirin aparıcısı- bəndəniz müxtəlif suallar verib və ətraflı cavablar alıblar. Şairlərin hər birinin ifasında gözəl şeirlər səsləndirilib. Tədbirdə gənc yazarlardan Fərqanə Səfərli və Murad Vəlixanov da iştirak edib. Təranə Dəmirin "balaca fanatı" Əli Aslanlı "Vətən" şeirini səsləndirib. Sonda isə məkanın rəhbəri, filoloq Rzaqulu Məmmədov şairlərə təşəkkürünü bildirərək kitab oxumağı sevdirmək və gənc nəslə mütaliənin vacibliyini anlatmaq üçün bu məkanı istifadəyə verdiyini söyləyib.
Ədəbiyyat saatı yekunlaşanda isə yorulmaq bilməyən şairlər və oxucular zamanın tez keçdiyini söyləyərək xoş xatirələrlə məkanı tərk ediblər, amma “Kitab evi"nin divarları daş yaddaşına olanları həkk etmişdir.
Ədəbiyyatla keçən zamana ruhumuzun ehtiyacı var, axı Ədəbiyyat elə həyatın özüdür.
Ülviyyə ƏBÜLFƏZQIZI
25-04-2024, 19:11
Çinin Çendu şəhərində “Azərbaycan Ticarət Evi” nin açılışı olub
Çinin Sıçuan vilayətinin paytaxtı olan Çendu şəhərində “Azərbaycan Ticarət Evi”nin açılıb. “Azərbaycan Ticarət Evi” Çendu şəhərindəki azad ticarət zonasında yerləşir. Açılış mərasimdə çıxış edən Azərbaycanın Çindəki səfiri Bünyad Hüseynov, Sıçuan şəhəri Çinbaycian rayonunun xalq hökuməti sədrinin müavini Ley Tin, “Azərbaycan Ticarət Evi”nin rəhbəri Huan Çao iki ölkə arasında iqtisadi-ticarət əlaqələrinin inkişafından danışıblar. Bildirilib ki, ticarət evi Azərbaycanın dadı və keyfiyyəti ilə seçilən məhsullarının Çində təşviqi ilə yanaşı, xalqlar arasında mədəni əlaqələrin dərinləşməsinə də töhfə verəcək.
Ticarət evində Azərbaycanın zəngin mədəni irsinə, turizm potensialına, iqtisadi imkanlarına, eləcə də sərmayə mühitinə aid materiallar nümayiş olunur. İqtisadiyyat Nazirliyinin dəstəyi, ölkəmizin Çindəki ticarət nümayəndəliyinin təşkilatçılığı ilə yaradılan ticarət evində “Made in Azerbaijan” brendli məhsullar çinli istehlakçılara təqdim olunur. Bura əsasən çaylar, meyvə şirələri, şərablar, konservlər, mürəbbələr, qənnadı məmulatları və s.daxildir. Bu, Azərbaycanın Çində sayca 5-ci ticarət evidir. Digər 4 ticarət evi Çindao, Canciaciye, Sian və paytaxt Pekində fəaliyyət göstərir. Ticarət evlərindən başqa, Azərbaycanın Şanxay, Harbin, Cinan və Uhan şəhərində 4 ticarət bölməsi, Urumçi və Şanxayda isə 3 şərab evi də fəaliyyət göstərir. Ticarət və şərab evləri “Made in Azerbaijan” brendi ilə istehsal olunan ixracyönümlü və rəqabətqabiliyyətli məhsulların Çin bazarında daha çox tanıdılmasına, eləcə də Azərbaycan məhsullarının ixracının təşviqinə və genişləndirilməsinə çox böyük təsir göstərir.
Ticarət evinin operatoru olan “Sichuan Rongda Juxin International Trade” şirkəti geniş işgüzar əlaqələri vasitəsilə gələcəkdə Azərbaycan məhsullarının Çendu şəhərində satışını genişləndirməyi hədəfləyib. Xatırladaq ki, Çinin Sıçuan vilayətinin paytaxtı olan Çendu şəhəri 21 milyondan çox əhali ilə ölkənin 4-cü ən iri şəhəridir. Ölkənin əsas iqtisadi, maliyyə, ticarət, nəqliyyat, kommunikasiya və tədqiqat mərkəzlərindən biri olan Çendunun ümumi daxili məhsulunun dəyəri 310 milyard ABŞ dollarını ötüb. Ölkənin əsas dəmir yolu qovşaqlarından biri olan Çendudan Avropa da daxil olmaqla dünyanın 61 şəhərinə qatralarla yüklər daşınır.
21-04-2024, 15:22
DÜNYA BƏRABƏRİ DOST İTİRMİŞİK...
“Möcüzə barmaqlar” sahibi Əli Haqşünasın anım gecəsi keçirildi.
DOST İTİRMİŞİK
Qoy dünya eşitsin, qoy bilsin aləm,
Dünya bərabəri dost itirmişik.
Dillər kilidlənib, yas tutub qələm,
Dünya bərabəri dost itirmişik.
Söhbəti xoş idi, sözü xoş idi,
Bir mələk simaydı, üzü xoş idi.
Halaldan-halaldı, özü xoş idi,
Dünya bərabəri dost itirmişik.
Gözlərə işıqdı, qəlblərə nurdu,
Neçə ürəklərdə taxtı-tac qurdu.
Dünyanı sevgiylə, eşqlə qucurdu,
Dünya bərabəri dost itirmişik.
Təbrizdən başlanan yolu variydi,
Şuşaya uzanan qolu variydi.
Dosta səxavətli əli (Əli) variydi,
Dünya bərabəri dost itirmişik.
Ruhu başdan-başa nəğmə seliydi,
İnsan aşiqlydi, yurda vəliydi.
Mələk xislətliydi, tutidiliydi,
Dünya bərabəri dost itirmişik.
Yaşayan bəstədi, ucalan səsdi,
Cənnətə üz tutan bir müqəddəsdi.
Heyf, ayrılmağa yaman tələsdi,
Dünya bərabəri dost itirmişik...
Dünya bərabəri dost itirmişik...
Əli bəy Haqşünası (1961-2024) soydaşlarımız otaylı-butaylı Azərbaycanımızın milli-mənəvi dəyərlər xəzinəsinin ən fədakar və təmənnasız cəfakeşlərindən biri kimi tanıyıb-sevməkdədirlər. Əfsuslar olsun ki, biz bu böyük sənətkarı, dəyərli şəxsiyyəti, vətənsevər türk oğlunu vaxtsız itirdik.
Təsadüfi deyil ki, Əli bəyin xatirəsinə həsr olunmuş anım gecələri təkcə doğulub boya-başa çatdığı Təbrizimizdə, illərdən bəridir yaşayıb-fəaliyyət göstərdiyi ABŞ-ın Hyuston şəhərində təşkil olunmaqla yekunlaşmadı. Yaxın günlərdə Əli bəyin canı qədər sevdiyi doğma Bakımızda yüksək səviyyədə keçirilən anım mərasimi bu böyük sənətkar-şəxsiyyətin xatirəsinə düzənlənmiş olduqca səmimi bir gecə kimi yaddaşlara əbədi yazıldı. Gecəyə Əli bəyin sənət, ailə və pərəstişkar dostları, sənətsevərlər toplaşmışdılar.
Xatirə gecəsi xalqımızın dəyərli sənətkarı, virtuoz qarmon ifaçısı, sənətsevərlərin sevimlisi Ənvər Sadıqovun “Renever” adlı möhtəşəm yaradıcılıq studiyasında baş tutdu. Ənvər bəyin komandası gecənin yüksək səviyyədə alınması üçün bütün gücünü səfərbər etmişdi.
“Zər qədrini zərgər bilər” deyən atalarımızın bu hikmətli kəlamı nahaqdan işlətmədiklərini biz o axşam bütün varlığımızla duyduq. Ənvər bəyin, eləcə də gecənin təşkilində xüsusi fədakarlıq göstərən Təbriz əsilli sənət fədaisi Cavad bəy Həssasın, məclisin aparıcısı-sənətşünaslıq doktoru, dəyərli tədqiqatçımız Əhsən bəy Rəhmanlının peşəkarlıqla ərsəyə gətirdikləri gecədə unudulmaz qarmon ifaçısı Əli Haqşünasın ömür və yaradıcılıq yolu tamaşaçıların gözləri qarşısında birər-birər sərgiləndi. Sənətkarımızın özündən sonra qalan yadigar səs yazıları, möhtəşəm ifalarından ibarət video-çarxlar, foto-slaydların nümayişi, Əhsən müəllimin sənətkarlığına və şəxsiyyətinə yüksək dəyər verdiyi unudulmaz sənət dostunun ömür yoluna güzgü tutan açıqlamaları ilə müşayiət olunurdu.
Gecənin musiqi ərmağanı Əli bəyin sənət dostlarından gəldi. Əməkdar artist Zakir Əliyev, kamança ifaçısı Hüseyn Nağıyev, tarzən Rəşad İbrahimov, pianoçu Sevinc Kərimova, ustad Aşıq Cahangir, qarmon ifaçıları-Şəmsi Ağamalıyev, İlqar Kərimov, Nemət Hüseynov və Natiq Mirzəyevin klassik və xalq musiqimizin ən gözəl örnəklərini ifa etmələri gecəni unudulmaz etdi. Şair, tədqiqatçı-alim Qiymət Məhərrəmlinin çıxışı və unudulmaz sənətkarın xatirəsinə həsr etdiyi “Dünya bərabəri dost itirmişik” şeiri mərasim iştirakçılarını dərindən təsirləndirdi.
Xatirələr dilə gəldi. Əli bəyin dostları Cavad Həssas və Kazıminin qürur və səmimiyyət dolu çıxışları bu böyük Vətən, Millət fədaisinin, unudulmaz sənətkarın qısa, lakin olduqca dolğun və şərəfli həyatından səhifələrin “oxunmasına” imkan yaratdı. Gecədə mərhum sənətkarın sədaqətli ömür-gün dostu Rübab xanımın mərasim iştirakçılarına ünvanladığı səs yazısı da nümayiş etdirildi.
Sonra söz mərasimə evsahiblyi edərək, sənətə və sənətkara yüksək ehtiramını təcəssüm etdirən Ənvər bəyə verildi. Ə.Sadıqov həyatda cəmi bir dəfə görüşsələr də, bu bircə görüşdə insanlığına, vətənpərvərliyinə və sənətkarlığına vurulduğu Əli bəy Haqşünas kimi əvəzolunmaz Vətən övladının ən yüksək ehtirama layiq olduğunu vurğuladı. Vətənimizdə, eləcə də Vətəndən uzaqda yaşayan hər bir soydaşımızı Azərbaycanımızın adını ucalara qaldıra biləcək səviyyədə - Əli bəy Haqşünas kimi ləyaqətlə, Vətənimizin, millətimizin adına layiq şərəflə yaşamağın vicdan, qürur və şərəf borcu olduğunu vurğuladı.
İllərin sınağından çıxmış dostluqlarının mənəvi yaşantılarını dilə gətirən Əhsən Rəhmanlı, Azərbaycanımızın ifaçılıq sənətində özünəməxsus yeri və rolu olan bütün sənətkar dostlara Əli Haqşünasın anım mərasimindəki iştiraklarına və göstərdikləri məharətli ifalara görə minnətdarlığını bildirdi. Dünyaya səs salmış qarmon sənətini yaşadanlarla bağlı apardığı tədqiqatlardan, bugünədək yazdığı araşdırma kitablarından və gələcək planlardan danışdı. Əli Haqşünasın qarmon ifaçılığı sənətinin musiqi tariximizdə daim yaşayacağına inamını ifadə etdi.
Mərasim xatirə şəkillərinin çəkilməsi ilə yekunlaşdı.
Qiymət MƏHƏRRƏMLİ,
Filologiya üzrə fəlsəfə doktoru, şair.
20-04-2024, 17:07
Əməkdar artist dəfn olundu
Əməkdar artist Cavanşir Məmmədov dəfn olunub.
Sənətçi bu gün “Qurd Qapısı” qəbiristanlığında torpağa tapşırılıb.
Dəfn mərasimində mərhumun ailə üzvləri, sənət yoldaşları, ictimaiyyət nümayəndələri iştirak ediblər
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Tanınmış telejurnalist vəfat edib
Tanınmış telejurnalist Nailə Əkbərova vəfat edib.
Bu barədə onun dostları məlumat yayıblar.
O, ağır xəstəlikdən əziyyət çəkirmiş.
Əkbərova Nailə Ənvər qızı 27 avqust 1963-cü ildə Şamaxı şəhərində anadan olub. Azərbaycan Dövlət Mədəniyyət və İncəsənət Universitetinin məzunudur. 1981-ci ildən Azərbaycan Dövlət Televiziyasında çalışmağa başlayıb. 1997-2006-cı illərdə musiqi verlişləri baş redaksiyasında baş rejissor vəzifəsində çalışıb.
2006-ci ildə “Space” telekanalında bir neçə verlişin rejissoru işləyib. 2009-cu ildən TRT telekanalının əməkdaşıdır. TRT Avaz-da yayımlanan “Qafqazlara əsən yellər” proqramının müəllifi, rejissoru və aparıcısı olub. Azərbaycanda ilk klip yaradıcılarındandır.
Allah rəhmət etsin!
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!