6-04-2026, 17:50
Nazirliyinin yeni strukturu - 13 şöbə, 4 sektor
Mədəniyyət Nazirliyinin Aparatının yeni strukturunun tərkibi məlum olub.
Hazırkı strukturda 13 şöbə, 4 sektor formalaşdırılıb.
Bildirilib ki, "Azərbaycan Mədəniyyəti – 2040" konsepsiyası əsasında optimallaşdırmadan sonra Strateji inkişaf və kommunikasiya, həmçinin Tədbirlər və incəsənət layihələrinin idarə edilməsi adlı iki yeni şöbə və Maliyyə monitorinqi və auditi adlı yeni sektor yaradılıb.
Ümumilikdə Aparatda İncəsənət siyasəti, Tədbirlər və incəsənət layihələrinin idarə edilməsi, Azərbaycan dili və ədəbiyyat siyasəti, Beynəlxalq əməkdaşlıq, Yaradıcı sənayelər və rəqəmsal inkişaf, Strateji inkişaf və kommunikasiya, Regional əlaqələndirmə, İnsan kapitalının idarə edilməsi, İqtisadiyyat və maliyyə, Hüquq, Daxili nəzarət, Sənəd və vətəndaşlarla iş, Təchizat və əmlak şöbələri formalaşdırılıb.
Həmçinin, Mədəniyyət Nazirliyinin Aparatında Kino sənayesi, Maliyyə monitorinqi və auditi, Elm və təhsil, Media ilə iş və Protokol xidməti sektorları da var.
Xatırladaq ki, "Azərbaycan Mədəniyyəti – 2040" Mədəniyyət Konsepsiyasında nəzərdə tutulmuş hədəflərə nail olunması və Konsepsiya üzrə tapşırıqların icrasının təmin edilməsi məqsədilə Mədəniyyət Nazirliyi tərəfindən mədəniyyət sahəsində idarəetmənin təkmilləşdirilməsi həyata keçirilir.
İdarəetmədə səmərəliliyinin artırılması, mədəniyyət sahələrində idarəetmənin tənzimlənməsi məqsədilə ilk mərhələdə Mədəniyyət Nazirliyinin aparatında struktur təkmilləşdirilməsi həyata keçirilib, şöbə və bölmələrin fəaliyyəti optimallaşdırılıb.
5-04-2026, 16:07
Göytəpə abidəsi ciddi təhlükədədir - VİDEO
Cənubi Qafqazın ən qədim yaşayış məskənlərindən biri hesab olunan Göytəpə arxeoloji abidəsi ciddi təhlükə altındadır.
Təbii aşınma və diqqətsizlik nəticəsində abidənin ilkin quruluşu tədricən dağılır.
Göytəpə təkcə Azərbaycan üçün deyil, ümumilikdə region üçün böyük tarixi əhəmiyyət daşıyır. Burada eramızdan əvvəl VI minillikdə neolit dövrü insanlarının yaşadığı müəyyən edilib.
Bir neçə il əvvəl aparılan arxeoloji qazıntılar zamanı qədim insanların məişət əşyaları, əmək alətləri və hətta qəbirlər aşkar edilib. Bu tapıntılar Göytəpənin regionun ən qədim sivilizasiya mərkəzlərindən biri olduğunu təsdiqləyir.
Lakin hazırda abidə baxımsız vəziyyətdədir və təbii amillərin təsiri ilə aşınaraq məhv olmaq təhlükəsi ilə qarşı-qarşıya qalıb.
Yerli sakinlər və müəllimlər hesab edirlər ki, ərazidə açıq muzey yaradılması vacibdir. Onların fikrincə, bu, həm tarixi irsin qorunmasına, həm də gənc nəslin maarifləndirilməsinə xidmət edər.
“Burada açıq muzey təşkil olunsa, şagirdlər üçün çox faydalı olar. Gələcək nəsillər də bu tarixi yaxından tanıya bilər”, – deyə sakinlər bildiriblər.
Məsələ ilə bağlı Azərbaycan Milli Elmlər Akademiyası-nın Arxeologiya və Antropologiya İnstitutundan qeyd olunub ki, Göytəpədə 2008-ci ildən etibarən Yaponiyanın Tokiya Universiteti ilə birgə uzunmüddətli tədqiqatlar aparılıb.
Hətta 2012-ci ildə dövlət səviyyəsində ərazidə arxeoloji parkın yaradılması ilə bağlı sərəncam verilsə də, layihə müxtəlif texniki səbəblərdən bu günədək həyata keçirilməyib.
2-04-2026, 20:04
Nazirliyin Media və kommunikasiya şöbəsi ləğv edilib
Mədəniyyət Nazirliyində aparılan struktur dəyişikliyi çərçivəsində Media və kommunikasiya şöbəsi ləğv edilib.
Ləğv edilən şöbənin əvəzinə müstəqil Media ilə iş sektoru yaradılıb.
Həmçinin Nazirlikdə Kommunikasiya sektoru formalaşdırılıb.
Qeyd edək ki, ləğv edilən şöbənin müdiri vəzifəsini Aynur Kərimova icra edirdi.
2-04-2026, 13:13
Rasim Balayevin səlahiyyətlərini o icra edir
Azərbaycan Kinematoqrafçılar İttifaqının sədri vəzifəsini hazırda Xalq artisti Şəfiqə Məmmədova icra edir.
Bunu ittifaqın katibi Baba Vəziroğlu deyib.
"Şəfiqə Məmmədova ittifaqın birinci katibidir. Bu mənada, hazırda sədr vəzifəsinin səlahiyyətlərini o icra edir. Düşünürəm ki, qurultay üçün tələsməyə ehtiyac yoxdur".
Baba Vəziroğlu ittifaqda sədr seçkisi ilə bağlı qurultayın çağırılmasının uzun zaman çəkə biləcəyini də istisna etməyib.
"Ola bilsin, qurultayın çağırılması bir neçə ay, hətta bir il çəksin. Bunu demək həm çətindir, həm də tezdir. Bilirsiniz ki, ittifaqda bu kimi məsələlər katiblik səviyyəsində müzakirə olunur. Katiblik toplanacaq, həm cari, həm də perspektiv məsələlər müzakirə olunacaq. Amma faktiki olaraq, ittifaqa Şəfiqə Məmmədova rəhbərlik edir".
Xatırladaq ki, Azərbaycan Kinematoqrafçılar İttifaqının sədri Rasim Balayev martın 29-da Türkiyədə müalicə olunduğu xəstəxanada vəfat edib.
Xalq artisti Fəxri xiyabanda dəfn olunub.
31-03-2026, 17:11
Rasim Balayevin yerinə onlardan biri seçiləcək
Xalq artisti Rasim Balayevin 40 mərasimindən sonra onun rəhbərlik etdiyi Azərbaycan Kinematoqrafçılar İttifaqına yeni sədr seçkisi keçiriləcək.
İttifaqdan bildirilib ki, İdarə Heyətinin məsələ ilə bağlı iclasını mayın 8-dən sonra keçirmək planlaşdırılıb.
Yeni sədrin İdarə Heyətinin üzvləri arasından seçiləcəyi gözlənilir.
Hazırda Azərbaycan Kinematoqrafçılar İttifaqının İdarə Heyətində 37 nəfər təmsil olunur. Onlar aşağıdakılardı:
Anar – Xalq yazıçısı, AKİ katibi
Nizami Abbas - Operator, rejissor, Əməkdar incəsənət xadimi
Adil Abbasov - Kinooperator, Əməkdar incəsənət xadimi
Suğra Bağırzadə - Aktrisa, Əməkdar artist
Nadir Bədəlov - Sənətşünas, ssenarist, AKİ katibi
Əli İsa Cabbarov - Kinorejissor, prodüser
Akif Əli - Filoloq alim, AKİ katibi
Tahir Əliyev - kinorejissor, AKİ katibi
Şamil Əliyev - Kinorejissor
Azər Əsgərov - Bəstəkar
Əmir Hacılı - Ssenarist, jurnalist
Türkan Hüseynova - Kinorejissor, prodüser, AKİ katibi
Fatimə İbrahimbəyova – Prodüser
Mahirə İsgəndərova - Aktrisa
Kamran Qasımov - Kinorejissor, ssenarist
Arzu Qulamov - Kinoejissor, prodüser
Cəmil Quliyev - Kinorejissor, Əməkdar incəsənət xadimi
Eldəniz Quliyev - Ssenarist
Xalidə Quliyeva - Aktrisa, Əməkdar artist
Firəngiz Qurbanova - Rejissor, Əməkdar incəsənət xadimi
Rəfail Qəmbərov - Kinooperator, Əməkdar incəsənət xadimi
Cahangir Mehdiyev - Kinorejissor, Əməkdar incəsənət xadimi
Məbud Məhərrəmov - Aktyor, Xalq artisti
Rövşən Məmmədov - Rejissor, ssenarist, aktyor
Şəfiqə Məmmədova - Xalq artisti, professor
Amil Məmiyev - Kinorejissor
Baba Məsimov - Şair, Əməkdar incəsənət xadimi, AKİ katibi
Mirbala Səlimli - Rejissor, ssenarist, Əməkdar incəsənət xadimi, aki katibi
Oktay Mir-Qasım - Xalq artisti, professor
Ramiz Mirzəyev - Xalq artisti, AKİ katibi
Vaqif Mustafayev - Xalq artisti, professor, AKİ katibi
Həmidə Ömərova - Xalq artisti, AKİ katibi
Oleq Səfərəliyev - Rejissor, AKİ katibi
Sevda Sultanova - Kinotənqidçi
Ziya Şıxlinski - Rejissor, Əməkdar incəsənət xadimi, AKİ katibi
Şükufə Yusupova - Aktrisa, Xalq artisti
29-03-2026, 16:17
Mədəniyyət Nazirliyi Rasim Balayevin ölümü ilə bağlı nekroloq yaydı
Azərbaycan Kinematoqrafçılar İttifaqının sədri, görkəmli aktyor, Xalq artisti Rasim Balayev vəfat edib.
Bu, Mədəniyyət Nazirliyinin R. Balayevin vəfatı ilə bağlı paylaşdığı yazıda qeyd olunub.
"Azərbaycan mədəniyyətinə ağır itki üz verib", - yazıda qeyd olunub.
Əlavə edilib ki, görkəmli kino aktyoru, Azərbaycan Kinematoqrafçılar İttifaqı İdarə Heyətinin sədri, Dövlət Mükafatı laureatı, Prezidentin fərdi təqaüdçüsü, Xalq artisti Rasim Balayev 29 mart 2026-cı il tarixində, ömrünün 77-ci ilində müalicə olunduğu Türkiyənin İstanbul şəhərində vəfat edib.
Rasim Əhməd oğlu Balayev 8 avqust 1948-ci ildə Ağsu rayonunda anadan olub. 1969-cu ildə Azərbaycan Dövlət İncəsənət İnstitutunu bitirib.
Rasim Balayev 1972-ci ildə "Azərbaycanfilm" kinostudiyasında aktyor kimi fəaliyyətə başlayıb.
İlk dəfə "Ulduzlar sönmür" filmində çəkilən aktyor sonradan "Nəsimi", "Babək", "Dədə Qorqud", "Həm ziyarət, həm ticarət", "Otel otağı", "Cavid ömrü" və s. filmlərdə yaratdığı obrazlarla tamaşaçıların rəğbətini qazanıb. O, eyni zamanda onlarla filmdə obrazları səsləndirib.
Rasim Balayevin sənət şöhrəti ölkəmizin hüdudlarını aşıb. Aktyor "Özbəkfilm", "Mosfilm" və başqa studiyalarda da filmlərə çəkilib.
İctimai xadim kimi də tanınan sənətkar
1990-2013-cü illərdə Azərbaycan Kinematoqrafçılar İttifaqının katibi vəzifəsində çalışıb. 2022-ci ildən Azərbaycan Kinematoqrafçılar İttifaqı İdarə Heyətinin sədri idi.
Rasim Balayevin Azərbaycan kinosunun inkişafına verdiyi töhfələr dövlətimiz tərəfindən daim yüksək qiymətləndirilib.
1976-cı ildə "Əməkdar artist", 1982-ci ildə "Xalq artisti" fəxri adlarına, 1986-cı ildə isə respublikanın Dövlət Mükafatına layiq görülüb. Aktyor həmçinin 1998-ci ildə "Şöhrət", 2018-ci ildə "Şərəf", 2023-cü ildə "İstiqlal" ordenləri ilə təltif olunub. 2005-ci ildən Prezidentin fərdi təqaüdçüsü idi.
Mədəniyyət Nazirliyinin kollektivi Xalq artisti Rasim Balayevin vəfatından kədərləndiyini bildirir, mərhumun ailəsinə və yaxınlarına dərin hüznlə başsağlığı verir.
Allah rəhmət eləsin.
29-03-2026, 14:00
Rasim Balayev VƏFAT ETDİ
Azərbaycan Kinematoqrafçılar İttifaqının sədri, Xalq artisti Rasim Balayev vəfat edib.
Bu barədə Azərbaycan Kinematoqrafçılar İttifaqından məlumat verilib.
Məşhur aktyor Türkiyənin İstanbul şəhərində yerləşən “Memorial” xəstəxanasında dünyasını dəyişib. O, bir müddətdir səhhətində yaranmış ciddi problemlərlə əlaqədar müalicə alırdı.
Qeyd edək ki, Rasim Balayev ağciyər xərçəngi və şəkər xəstəliyindən əziyyət çəkirdi.
27-03-2026, 14:51
Tarix-diyarşünaslıq
muzeylərində monitorinq
Muzey mütəxəssisləri Mərkəzi Aran regionundakı tarix-diyarşünaslıq muzeylərinin ümumi monitorinqini ediblər.
Azərbaycan Respublikasının Mədəniyyət Nazirinin əmri əsasında 2-6 mart 2026-cı ildə Milli Azərbaycan Tarixi Muzeyinin Numizmatika Fondunun baş mütəxəssisi, tarix üzrə fəlsəfə doktoru Aygün Məmmədova və Azərbaycan Milli İncəsənət Muzeyinin Tikmə bölməsinin müdiri Könül Zeynalova Mərkəzi Aran regionundakı (Ağdaş, Mingəçevir, Yevlax, Zərdab, Göyçay, Ucar, Kürdəmir) tarix muzeylərinə ezam ediliblər.
Muzey mütəxəssisləri regionun tarix-diyarşünaslıq muzeylərinin işçilərinin ümumi monitorinqi çərçivəsində muzey ekspozisiyası, fondlar, davamiyyətin ümumi vəziyyəti, arxiv, sənədləşmə işləri və d. məsələləri nəzərdən keçirərək müasir elektronlaşma, rəqəmsallıq işləri ilə əlaqədar məsləhətlərini bildiriblər.
Ezamiyyət müddətində hər bir muzeydə muzey materiallarının nümayişi, qorunması, qeydiyyatı ilə əlaqədar nəzərə çarpan iradlar, qeydlər də edilmiş, müasir muzeylərdə tətbiq edilən fond materialları ilə işləmə üsulları barədə izahlar verilmişdir.
Ağdaş, Mingəçevir, Yevlax, Zərdab, Göyçay, Ucar, Kürdəmir tarix-diyarşünaslıq muzeylərinin əməkdaşlarına muzeylərin elektron məlumat bazası ilə işləmə qaydaları açıqlanmış, hər bir muzey əməkdaşının qiymətləndirməsi edilmişdir. Hər bir muzeydə ekspozisiyanın ümumi görünüşü, vitrinləri, daxili qeydiyyat kitabları, seçilmiş muzey materiallarının çeşidlənməsi, qorunması ilə bərabər beynəlxalq qaydalara uyğun tədqiqi və təbliğinin mühümlüyü bildirilmişdir.
Ezamiyyət nəticəsində fəaliyyət planına müvafiq işlər yerinə yetirilmiş və Mərkəzi Aran regionundakı tarix-diyarşünaslıq muzeylərinin müasir vəziyyəti barədə qənaətlər əldə edilmiş, mövcud problemlər qeydə alınmışdır.
Regionda olduqları müddətdə Bakıdan ezam olunan muzey əməkdaşlarına məsləhət və köməyini əsirgəməyən Mərkəzi Aran regionunun muzey işçilərinə, Mərkəzi Aran Regionunun Mədəniyyət İdarəsinin rəisi v.i.e. Namiq Tarverdiyevə, həmin idarənin mədəniyyət müəssisələri ilə iş sektorunun müdiri Zəfər Hacıyevə, inzibati-təşkilat işləri sektorunun müdiri Orxan İbrahimova və Mingəçevir şəhərinin sakini, sahibkar, xeyriyyəçi Knyaz Yusifova xüsusi təşəkkür bildirilmişdir.
Aygün Məmmədova
AJB üzvü, t.ü.f.d.
26-03-2026, 16:52
''Sözlərdə yatan
xəzinə''
Bakı Xətai Sənət Mərkəzində Mirvarid Dilbazi Poeziya Məclisi İB-nin təşkilatçılığı ilə 44 günlük vətən müharibəsinin iştirakçısı, qazi, gənc şair Nadir Həsənoğlunun ''Sözlərdə yatan xəzinə'' adlı kitabının təqdimatı keçirildi.
Dövlət himnimiz səsləndirildi. Şəhidlərimizin əziz xatirəsi bir dəqiqəlik sükutla yad edildi.
Mirvarid Dilbazi Poeziya Məclisinin sədri, Kəlağayı Muzeyinin direktoru Güllü Eldar Tomarlı gənc şair Nadir Həsənoğlunun yaradıcılıq yolundan söhbət açdı. Qeyd etdi ki, Nadir Həsənoğlunun vətənpərvərlik mövzusunda yazdığı şeirlər gənclərə nümunədi.
Tədbirdə Xətai Rayon Ağsaqallar Şurasınn sədri, şəhid atası Mürvət Əsgərov, müavini Nizami Hüseynov, qazi Vidadi Şabanov, Kərbalayi Ramil Əzimov, şairlərdən Zaməddin Ziyadoğlu, Şəlalə Niyazlı, Fərman Borçalı, Alim Aslanoğlu, Sumaya Yunusova, Yunis Qaraxanlı, ''Nənə qızlar'' folklor ansamblı, Azərbaycan nəşriyyatınn diretoru Sənan Aslansoy, Mirvarid Dilbazi Poeziya Dərnəyinin gənclər şöbəsinin rəhbəri Polad Ağa İbrahimov, 64 saylı məktəbin şagirdləri Zəhraxanım Əzimova və Mədinə Hüseynli çıxış etdilər.
Qazi, şair Nadir Həsənoğlunun valideynləri təsirli çıxışları ilə yadda qaldı. Övladları ilə fəxr etdiklərini qeyd etdilər.
Sonda Güllü Eldar Tomarlı Bakı Xətai Sənət Mərkəzinin direktoru Zahid Əvəzova və tədbir iştirskçılarına təşəkkürünü bildirib.
25-03-2026, 21:57
“Çərşənbə günündə
çeşmə başında”
Martın 24-də Rəşid Behbudov adına Azərbaycan Dövlət Mahnı Teatrında “Aşıq Pəri Məclisi Ozan Sənətinin Təbliği” İctimai Birliyinin təşkilatçılığı ilə “Çərşənbə günündə çeşmə başında” adlı bayram konserti keçirilib. Azərbaycanın dövlət müstəqilliyi, ərazi bütövlüyü və suverenliyi uğrunda şəhid olanların xatirəsi sükutla yad edildikdən sonra meydan saza-sözə verildi. Aşıq Pəri Məslisinin sədri, şair Pərvanə Zəngəzurlu dəvəti qəbul edib sazın-sözün işığına yığışanları salamladı. Mübarək bayramlar münasibəti ilə tədbir iştirakçılarını, ümimilikdə bütün xalqımızı təbrik etdi, xoş arzularını bildirdi. Şair Südabə İrəvanlı da meydana çıxıb həmkarı ilə birlikdə qonaqları şeirlə qarşıladı.
Respublikamızın hər yerindən çəmləşən Aşıq Pəri incilərinin hərəsi özü ilə məmləkətimizin bir guşəsinin ətrini gətirmişdi. Elə zalda əyləşənlər də. Göyçədən, Borçalıdan, Zəngəzurdan, Gədəbəydən, Dərələyəzdən, Kəlbəcərdən, İrəvandan, Şəkidən, Şirvandan, Naxşıvandan təşrif buyuranların yarısının xəyalları Xıdır Qursalının səsləndirdiyi qara zurnanın sədası ilə havalanıb qərib yurdlarımızı dolaşırdı. Peşə sahiblərini təsnifləndirmədən yadımda qalan aşıq, şair, müğənni, qiraət ustalarının adlarını sadalayaraq, həm də onlara ozan sənətimizi, incəsənətimizi, poeziyamızı sevə-sevə yaşatdıqları üçün tamaşaçı təşəkkürümüzü bildiririk. Bu təşəkkür əslində zalı inlədən alqış səsləri, səhnəyə daşınan gül buketlərində öz əksini tapırdı.
Zəngəzurlunun “pərvanə”ləri ətrafına yığışmış, qalan sənət ustaları da bir-bir, iki-iki səhnə arxasından meydana çıxıb sazları, zəngulələri ilə ruhumuzu qidalandırırdılar. Onların arasında Aşıq Sevil Ədalət, Ruhiyyə Qarabağlı, Mənsurə Xıdırova, Həqiqət Şınıxlı, Səbinə Gədəbəyli, Xanım Göyçəli, Dərya Mərdanzadə, Lalə Əbilova, Zəhra Şuşalı, Xədicə Göyçəli, Əli Zeynalabdin, Xaqani Zeynalabdin, Ramil Şınıxlı, Sahil Laçınlı, Anar Laçınlı, Təranə Gədəbəyli, Fazil Gədəbəyli, İlqar Gədəbəyli, Ələkbər Kəlbəcərli, Mahirə Göyçəli, Məlahət Göyçəli, Şəfəq Ələsgərqızı, Pəri Rəncbərli, Mehparə Səfərli və Sona Dərələyəzlinin hərəsi yaddaşımızda bir iz buraxdı. Amma sazı və könül oxşayan rəqsi ilə ortalığı ayağa qaldıran balaca qız hər musiqi nömrəsinə özgə bir naxış vururdu.
Gənclik illərini “Lalə Qızlar” ansamblına həsr etmiş Əməkdar artist Rəhilə Bəndəliyevanın ifa etdiyi “Sənsiz yaşaya bilmərəm” mahnısı 40 ilə yaxındır yurd həsrətilə qovrulan Qərbi Azərbaycanlı tamaşaçıları duyğulandırdı.
"Dədə Ələsgər Ocağı" İctimai Birliyinin sədri Xətai Ələsgərov Pərvanə xanıma tədbirin belə yüksək səviyyədə təşkilinə və Dədə Ələsgər irsini, ozan sənətini yaşatdıqlarına, mədəniyyətimizin inkişafına verdikləri töhfəyəyə görə minnətdarlığını bildirdi.
Sənətşünaslıq üzrə fəlsəfə doktoru, dosent Maya Qafarovanın rəhbərlik etdiyi “İrəvan Xalq Çalğı alətləri ansamlı”nın kollektivi də “Çeşmə başı”ndaydı. Beləcə Dədə Ələsgər dühasının işığında - “Çərşənbə günündə çeşmə başında” bayram ovqatlı bir gün yaşadıq. Sizlərə də xoş ovqat arzusu ilə:
Tamxil ZİYƏDDİNOĞLU
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Zəngilanın dirçəliş
və qayıdış dövrü
Azərbaycan tarixinin ən şanlı səhifəsi olan Vətən müharibəsi bizə təkcə torpaqlarımızı deyil, ləyaqətimizi, qürurumuzu qaytardı. Həmin qürurun ən parlaq ünvanlarından biri də Zəngilandır. 2020-ci il sentyabrın 27-də başlanan Zəfər yürüşü zamanı şərqdən, Cəbrayıl istiqamətindən düşmənə vurulan sarsıdıcı zərbələr nəticəsində Azərbaycan Ordusu 30-dan çox yaşayış məntəqəsini azad edərək Zəngilanın inzibati hüdudlarına çatdı. Oktyabrın 18-də rayonun tam azad edilməsi uğrunda genişmiqyaslı əməliyyata start verildi və cəmi iki gün sonra, oktyabrın 20-də Müzəffər Ali Baş Komandan, Prezident İlham Əliyev xalqa müraciətində Havalı, Zərnəli, Məmmədbəyli, Həkəri, Şərifan, Birinci Muğanlı kəndlərinin və Zəngilan şəhərinin işğaldan azad edildiyini elan etdi. Beləliklə, Zəngilan döyüşləri nəticəsində 1 şəhər, 4 qəsəbə və 49 kənd düşmən tapdağından xilas edildi və bununla da 132 kilometrlik Azərbaycan-İran dövlət sərhədi tam bərpa olundu. İşğalın bitməsindən dərhal sonra sərhəd boyunca zəruri istehkam və mühafizə işlərinə başlanıldı.
Qərbi zəngəzurlular Zəngilan şəhidliyində
Bu tarixi qələbənin əbədiləşdirilməsi üçün 2020-ci il noyabrın 26-da “Zəngilanın azad olunmasına görə” medalı təsis edildi və 6974 hərbi qulluqçumuz bu medalla təltif olundu. Prezidentin 31 iyul 2023-cü il tarixli Sərəncamı ilə isə 20 oktyabr tarixi Zəngilan şəhəri günü kimi rəsmiləşdirildi. Zəngilanın azad olunması Böyük Qayıdışın başlanğıcı oldu. Bu gün dövlətin ən böyük hədəfi həmin torpaqları yenidən həyatla doldurmaqdır. 2026-cı il 1 oktyabr tarixinə olan məlumata görə, Zəngilan şəhərində 84 ailə, yəni 339 nəfər, Ağalı kəndində 234 ailə, yəni 1017 nəfər, Məmmədbəyli kəndində isə 179 ailə, yəni 903 nəfər öz doğma ocağına qayıdıb. Köçürülən ailələr peşə və bacarıqlarına uyğun olaraq müxtəlif dövlət qurumlarında, tikinti şirkətlərində, tikiş fabrikində və digər sahələrdə işlə təmin edilirlər.Bu qayıdışın dünyaya nümunə olan simvolu isə Ağalı kəndidir. Ağalı təkcə Azərbaycanda deyil, dünyanın ən müasir kəndlərindən biri hesab olunur. Burada “ağıllı kənd” konsepsiyası tam şəkildə tətbiq edilib. Dayanıqlı inkişafın təmin olunması üçün sosial-iqtisadi xidmətlər ən yüksək texnologiyalarla qurulub. Kəndin enerji təminatı ekoloji cəhətdən tam təmizdir, Həkəri çayı üzərində 3 turbindən ibarət Arximed tipli su elektrik stansiyası və gücü 325 kilovat olan günəş panelləri quraşdırılıb. Evlərdə istilik xərclərini azaltmaq üçün kombinə edilmiş sistemlər, mətbəx sobası və yüksək səmərəli elektrod boilerlər var. Suyun isidilməsi üçün günəş kollektorlarından, çirkab suların təmizlənməsi üçün bioloji təmizləmə qurğularından istifadə olunur.
Kənddə GPON texnologiyası ilə yüksək sürətli internet, İP TV, video müşahidə kameraları, ağıllı işıq dirəkləri və avtomatik hava müşahidə stansiyaları var. Əhalinin rahatlığı üçün Tele-səhiyyə, E-təhsil və digər elektron xidmətlər, ASAN, DOST, məktəb, bağça, tibb məntəqəsi, kiçik və orta biznesə dəstək mərkəzləri fəaliyyət göstərir. Ümumi sahəsi 2 hektardan çox olan park salınıb. Bütün bunlar onu göstərir ki, Ağalı kəndi sadəcə yaşayış məntəqəsi deyil, gələcəyin kənd modelidir. Nazirlər Kabinetinin 30 oktyabr 2023-cü ildə təsdiq etdiyi Baş Plana əsasən şəhərin 2040-cı ilədək inkişafı üçün böyük vəsait ayrılıb. 2022-ci ildə təməli qoyulan 104 mənzilli ilk yaşayış kompleksinin açılışı 2026-cı ildə olub. Kompleksin ərazisi 2 hektardan artıqdır və burada 12 bina, o cümlədən 4 ədəd üçmərtəbəli 60 mənzilli və 8 ədəd ikimərtəbəli 44 mənzilli evlər tikilib.
Azad Zəngilanın qonaqları
Zəngilan Beynəlxalq Hava Limanı bu bölgənin inkişafı üçün mühüm faktora çevrilib. Zəngəzur dəhlizinin hava infrastrukturu ilə gücləndirilməsi baxımından hava limanı strateji əhəmiyyət daşıyır. Eyni zamanda Horadiz-Zəngilan-Ağbənd dəmir yolunun inşası da böyük strateji əhəmiyyətə malikdir. Bu yol azad edilmiş torpaqlara həm vətəndaşların qayıdışı, həm də yüklərin daşınması üçün tarixi imkan yaradır. Artıq yolun birinci mərhələsi üzrə böyük hissə tamamlanıb və Araz İqtisadi Zonası Sənaye Parkına yüklər daşınır. Horadiz-Cəbrayıl-Zəngilan-Ağbənd avtomobil yolunun uzunluğu 126,3 kilometrdir, illik buraxılış qabiliyyəti 15 milyon tondur və layihənin 2026-cı ilin ikinci yarısında yekunlaşdırılması nəzərdə tutulur. İşğal dövründə tövlə kimi istifadə olunan XIX əsrə aid Zəngilan şəhər məscidi Heydər Əliyev Fondu tərəfindən bərpa olunub. Bərpa-tikinti işləri çərçivəsində tarixi məscid konservasiya edilib və onun yanında düzbucaqlı planlı, iki minarəli yeni məscid inşa edilib. Yeni məsciddə 220 və 100 nəfərlik ibadət zalları yaradılıb. Rayonun gələcəyi üçün turizm və kənd təsərrüfatı da unudulmayıb. 2024-cü il mayın 18-də Ağalı kəndində, Həkəri çayı vasitəsilə yaradılmış süni gölün sahilində “Ağalı” hoteli açılıb. Zəngilan İstirahət Kompleksində 111 nömrəli hotelin təməli 2023-cü il mayın 4-də qoyulub. 2026-cı il mayın 10-da isə “Zəngilan City Park Hotel”in təməli qoyulub. Kənd təsərrüfatı sahəsində isə “Dost Aqropark” layihəsi həyata keçirilir. Azərbaycan və Türkiyə şirkətlərinin birgə layihəsi olan bu kompleks tam başa çatdıqda 500 nəfəri işlə təmin edəcək və 100 milyon dollar sərmayə qoyulacaq. Layihənin birinci mərhələsində 5200 kvadratmetr qapalı, 113 min kvadratmetr açıq tipli heyvandarlıq kompleksləri, sosial obyektlər, kafe, kinoteatr tikilib.
Beləliklə, Zəngilan bu gün sadəcə işğaldan azad edilmiş bir rayon deyil, Azərbaycan dövlətinin qüdrətinin, iradəsinin və gələcəyə olan inamının canlı rəmzidir. Burada hər daş, hər tikilən ev, hər qayıdan ailə 30 illik həsrətin sonu və Böyük Qayıdışın əbədi başlanğıcıdır.
Mahnur Hüseynova
Xırdalan şəhər 8 nömrəli tam orta ümumtəhsil məktəbinin direktoru
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!