Sənubər İsgəndərli: "Teatrın Rövşən Almuradlıya ehtiyacı var"

Tanınmış rejissor Rövşən Almuradlıya qarşı Mədəniyyyət və Turizm nazirliyi tərəfindən edilən haqsızlıqlar son günlər mətbuatın gündəmindədir. Məlumat üçün bildirək ki, rejissor Rövşən Almuradlının son 3 ildə heç bir işlə təmin olunmaması ciddi narazılıqlara səbəb olub. Bununla bağlı artıq ölkənin bir neçə tanınmış ziyalısı öz fikrini bildirib. Məsələ ilə bağlı Akademik Milli Dram Teatrının aktrisası, Azərbaycan Respublikasının Əməkdar Artisti Sənubər İsgəndərlinin  də münasibətini öyrəndik. O, mövzu ilə bağlı bunları söylədi: "Rövşən bəy əsl peşəkardır və çox istedadlıdır. Onun quruluş verdiyi səhnə əsərləri həmişə öz orijinallığı ilə seçilir. Mən həmin əsərdə rol oynamağımla fəxr edirəm.Ona teatrın ehtiyacı var. Sözün əsl mənasında professional rejissordur. Mətbuatda ona edilən haqsızlıqla bağlı oxudum. Sözün düzü mən teatra az gedirəm və rəhbər rejissor arasında baş verənlərdən xəbərim yoxdur. Amma bilirəm ki Rövşən bəy iki ildir ki, İblis əsərini səhnələşdirmək istəyir və ona şərait yaradılmır. Ümid edirəm yaxın vaxtlarda o bu istəyini reallaşdıra biləcək."

Qeyd edək ki, Sənubər xanım Rövşən Almuradlının quruluş verdiyi “Yaşlı xanımın gəlişi” tamaşasında baş rolun ifaçısıdır.

Həcər