Türkiyə Cümhuriyyətinin Azərbaycandakı səfirliyinin mətbuat müşaviri Hamit Karadəniz "Bütöv Azərbaycan" qəzetinin qonağı olub.
Görüşdə qardaş ölkə səfirliyinin əməkdaşı bildirib ki, Türkiyə səfirliyinin öz fəaliyyətində önəm verdiyi ciddi məsələlərdən biri də yerli mətbuat orqanları ilə sıx təmas qurmaqdan ibarətdir. Biz vaxtaşırı Azərbaycan mətbuatı ilə görüşlər keçiririk . Növbəti görüşümüz də bu sıradan biridir. Bizə çox xoşdur ki, Azərbaycanda hər zaman özümüzü öz evimizdəki kimi hiss etmişik. Bu gün biz ayrı-ayrı dövlətləri təmsil etsək də eyni millətin övladlarıyıq, heç bir qüvvənin ayıra bilməyəcəyi qardaşlarıq. Azərbaycanın hər bir uğurunu öz uğurumuz, ağrısını ağrımız hesab edirik. Bəzən bizim qardaşlığımızı gözü götürməyən qüvvələr də tapılır və onlar müxtəlif dezinformasiyalar yayaraq ürək bulandırmağa çalışırlar. Bir də görürsən kimsə yazır ki, Türkiyə Ermənistanla sərhədləri açır, Türkiyə öz maraqlarını güdür kimi reallıqdan uzaq dezinformasiyalar yayırlar. Türkiyənin prezidenti cənab Ərdoğan və digər yüksək məqam sahibi olan yetkililərimiz də dəfələrlə ən yüksək kürsülərdən bəyan ediblər ki, Azərbaycanın torpaq bütövlüyü təmin olunmayınca Ermənistanla heç bir təmasdan söhbət gedə bilməz. Düşünürəm ki, qardaşlığımızın möhkəmlənməsində mətbuatın da üzərinə böyük məsuliyyət düşür və biz birlikdə çalışmaqla bütün qara niyyətlərin qarşısını ala bilərik.

"Bütöv Azərbaycan" qəzetinin təsisçisi və baş redaktoru Tamxil Ziyəddinoğlu hörmətli qonağı "Bütöv Azərbaycan" qəzetinin redaksiyasında salamlamaqdan məmnunluğunu bildirdi. "Bütöv Azərbaycan" qəzetinin nəşrə başladığı ilk gündən əsas qayəsinin milli birliyimizin və dövlətçiliyimizin möhkəmləndirilməsi uğrunda çalışmaqdan ibarət olduğunu qeyd etdi. Bildirdi ki, uzun illər ermənilərin və onların havadarlarının türk xalqlarına qarşı apardıqları bölücülük və soyqırımı siyasətinin ağrılarını bu gün də yaşayırıq. Yaxşı anlayırıq ki, bu işdə mətbuatın da üzərinə böyük məsuliyyət düşür. Qəzetimiz daim tarixi faktlara müraciət edərək erməni yalanlarının ifşa olunması üçün əlindən gələni əsirgəmir. Bu işdə bizim əsas yardımçılarımız xarici ölkələrin və öz ölkəmizin tanınmış alimlərinin yazdıqları əsərlərdir. Biz çalışırıq ki, bu missiyanı şərəflə yerinə yetirək.
T.Ziyəddinoğlu əlavə edib ki, biz həmişə inanmışıq ki, bizim ən çətin zamanlarda əsas dayağımız qardaş Türkiyə və türkdilli respublikalardır. Biz bu qardaşlığın möhkəmlənməsində bundan sonra da var qüvvəmizlə çalışacağıq.
Sonda Hamid Karadəniz Türkiyə səfirliyinin mətbuat müşavirliyinin fəaliyyətini əks etdirən kitabı və ermənilərun türklərə qarşı apardıqları soyqırımı tarixi sənədlərlə sübut edən kitabları "Bütöv Azərbaycan" qəzeti redaksiyasına hədiyyə etdi.