Millət vəkili Fərəc Quliyev Afaq Süleymanovanın iddiası ilə bağlı açıqlama verib: "Nəzərinizə çatdırım ki, 2012-ci ildə Azərbaycanda NATO generallarının tədbiri keçirilirdi.Onları müşayiət etmək üçün hərbi personal və xidməti avtomobillər ayrılmışdır.14 noyabr 2012-ci ildə Sülhməramlı taborda İdman rəisi kimi xidmət edən oğlum Türkel Fərəc oğluna da NATO zabitlərinə xidmət üçün avtomobil təhkim edilmişdir.(Türkel ali məktəb məzunu olduğundan bir il xidmət etməli olmasına baxmayaraq, kurs qəbul edərək bir il doqquz ay zabit kimi xidmət etməyi seçdi) NATO Zabitlərini axşam saatlarında müvafiq yerə qoyub, avtomobillər hərbi hissəyə qayıdan zaman svetofor olmayan, piyada keçidi olmayan bir yerdə piyada qəflətən oğlumun idarə etdiyi avtomobilin qarşısına çıxaraq qəzaya səbəb olmuşdur.F.Türkel dərhal xəsarət alana ilkin yardım göstərmiş, Respublika xəstəxanasına yerləşdirmişdir. Mən hadisə zamanı Avronest Parlament Assambleyasının iclasında iştirak etmək üçün Brusseldə idim. Bakı ilə əlaqə saxlayıb, səhlənkarlığı ucbatından xəsarət almış A.Süleymanovaya bütün tibbi köməkliklərin göstərilməsini tapşırdım. Xəsarət alanın kimliyi məlum olandan sonra da, ailənin vəziyyəti nəzərə alınaraq köməklik davam etdirildi. (A.Süleymanovanın vəkili də bunu mətbuat vasitəsi ilə etiraf edir) Prosedura uyğun olaraq təhqiqat aparıldı.Təyin edilmiş məhkəmə yol nəqliyyat hadisələri ekspertizasının rəyi ilə müəyyən edildi ki, Türkel Fərəc oğlunun hərəkətlərində “Yol Hərəkəti Haqqında” Azərbaycan Respublikası Qanununun tələblərinə uyğunsuzluq olmamışdır. Faktla bağlı  Türkel Fərəc oğlunun əməlində CİNAYƏT TƏRKİBİ OLMADIĞINDAN CİNAYƏT İŞİNİN BAŞLANMASI rədd edilmişdir. 2013-cü il Prezident seçkiləri dönəmində mən Azərbaycana qarşı formalaşdırılmış “5-ci kolon”-a qarşı ciddi ifşaedici çıxışlar etdiyim zaman “5-ci kolon” tərəfindən mövqeyimə təsir etmək üçün bəzən sosial şəbəkələrdə anonim ad altında hədələr, bəzən emissarları vasitəsilə xahişlərlə üzləşirdim.(adlar aidiyyatı olanlara məlumdur)Növbəti dəfə mənimlə görüşə cəhd edildi-oğlumun qəza məsələsinə şantaj predmeti kimi işarə olundu. Mən”qanuni araşdırma aparılıb , bu və başqa hər hansı məsələ ilə bağlı görüşmək istəmirəm” cavabı ilə görüş təklifini rədd etdim. Buna qədər xəsarət alan Süleymanova Afaqın atası İsa Süleymanov Fərəcoğlu Türkelin günahkar olmadığını, buna baxmayaraq qızına hər cür kömək etdiyimizi(bu köməkliklər yalnız humanizm xarakterli idi-borc deyildi) minnətdarlıqla qarşılayırdı,polis idarəsində şikayəti olmaması ilə bağlı ərizə vermişdi. Mən görüşü rədd etdikdən sonra şikayətlər dalğası başladı. İkinci dəfə yeni bir istintaq başladıldı. Buna heç bir əsas olmasa da mən heç bir qaranlıq məqam qalmasın deyə bir daha istintaqın aparılmasından nəinki şikayət etmədim, həm də xəsarət alan tərəfin mümkün olan bütün təffərrüatla tanış olmasını arzuladım. Çünki ,bu adamlardan siyasi şou düzəltmək üçün istifadə olunmasının fərqində idim. İkinci araşdırma zamanı da CİNAYƏT TƏRKİBİ OLMADIĞINDAN CİNAYƏT İŞİNİN BAŞLANMASI rədd edildi. Nə qədər qəribə olsa da bu ərköyün “xəsarət alan tərəfin” şikayətləri ilə üçüncü dəfə hərbi prokurorluq tərəfindən yeni bir araşdırma başladıldı. Yeni araşdırmaya mənim etiraz etməməyimdən, araşdırmaçı qurumların belə mövqeyindən ruhlanan şantajçılar 100 000 (yüz min )manat mənəvi və.s təzminat istəyi ilə mülkü qaydada da Səbail məhkəməsinə müraciət etmiş, saytlarda bu istəklərini bəyan etmişlər.Bunu belə ictimailəşdirmək xəsarətalanlaramı lazım idi?-məncə yox, bu daha çox işin arxasında dayananlara lazım idi. Məhkəmə şikayətə baxıb və təbii ki,əsassız ,cəfəng iddianı rədd edib. Əminliklə bildirirəm ki, səhlənkarlığı ucbatından xəsarət almış bir insandan şantaj və siyasi şou düzəldilməsi cəhdi vardır. Hesab edirəm ki, haqlı mövqe və fəaliyyətimlə barışmayan,Vətənimizə qənim kəsilən, hər şeydən və hər kəsdən istifadə edənlər də anlamaq məcburiyyətindədirlər ki, ölkəmiz hüquq dövlətidir, qarşılarında maneə gördükləri hamını şantaj edən bir çetenin Azərbaycanın Hüquq –mühafizə orqanlarından da istifadə etmə cəhdi də nəticə verə bilməz. Şantaj və siyasi şou düzəldilməsində mətbuatdan da istifadə cəhdi var və artıq mətbuat nümayəndələrinin də istəyi ilə məsələyə aydınlıq gətirildikdən sonra qələm sahiblərinin də məsələyə münasibətinin dəyişəcəyinə tam əminəm”.