Demokratik Qüvvələrin Milli Şurasının icra aparatının rəhbəri, “EL” hərəkatının lideri Eldar Namazov avqustun 29-da saat 15:00-a Baş Prokurorluğun Ağır Cinayətlər üzrə İdarəsinə çağırılıb: “Çağırış “EL” hərəkatının keçmiş üzvü Əflan İbrahimovun bəyanatı ilə əlaqədardır. Bəyanatda bildirilir ki, guya Milli Şura kütləvi iğtişaşlar hazırlayır. Eldar Namazovun “Turan”a verdiyi məlumata görə müstəntiq Orxan Dəmirli bununla bağlı onu ifadə verməyə çağırıb. O, bu cür fikirləri “absurd” adlandıraraq qeyd edib ki, vəkilin köməyinə ehtiyacı yoxdur. E. Namazov Ə. İbrahimovun bəyanatını şərh edərkən bildirib ki, o, “EL” təşkilatından xaric edilib. Belə ki, onun hakimiyyətin agenti olması və onun əli ilə təxribatın hazırlanması barədə məlumat əldə edilib. Məhz bu səbəbdən də o, Milli Şuraya qəbul edilməyib.
Musavat.com-un əldə etdiyi məlumata görə, “EL” hərəkatının idarə heyətinin daha 3 üzvü prokurorluğa çağırılacaq.

Bu məqamda qeyd edək ki, Əflan İbrahimov “EL” hərəkatının rəhbərliyində olmaqla yanaşı, Eldar Namazovun da xüsusi etimadını qazana bilib. Milli Şuradakı qaynaqlar iddia edirlər ki, onun Milli Şuraya namizədliyini hələ ilk vaxtlarda Eldar Namazov israrla irəli sürüb; lakin AXCP sərdi Əli Kərimlinin veto qoyması ilə o, Milli Şuraya üzv ola bilməyib.