Vətən müharibəsində Qələbə münasibətilə Azərbaycan Ordusunun zabitləri və “Qartal” Dağçılıq İdman Klubunun alpinistlərindən ibarət heyətin Böyük Qafqaz sıra dağlarının Bazardüzü zirvəsinin şərqində yerləşən adsız yüksəkliyə (4301 m) yürüşü təşkil olunub.
“Zəfər Azərbaycanındır!” adlı ekspedisiyanın iştirakçıları mürəkkəb relyefə malik dağlıq ərazini keçərək təyin edilmiş yüksəkliyə qalxıblar.
Ekspedisiyanın iştirakçıları orada Azərbaycan Respublikasının Dövlət bayrağını ucaldıb, Dövlət himnini ifa edib və Vətən müharibəsində həlak olmuş Şəhidlərimizin əziz xatirəsini bir dəqiqəlik sükutla yad ediblər.
Sonda Vətən müharibəsində Qələbəni tərənnüm edən “Zəfər zirvəsi” adlı lövhə bu yüksəklikdə bərkidilib.

Haşiyə: Qeyd edək ki, “Zəfər zirvəsi”nin fəth olunmasında Milli Ordumuzun Xüsusi Təyinatlı Qüvvələrinin, Hərbi Hava Qüvvələrinin zabitləri iştirak edərək, II Qarabağ müharibəsində Vətən yolunda canlarından keçən şəhidlərimizin xatirəsini ehtiramla yad ediblər.
Qürurverici haldır ki, “Zəfər zirvəsi”nə qaldırılan bayraqlar arasında Azərbaycan Dövlət Bədən Tərbiyəsi və İdman Akademiyasının da bayrağı dalğalanmış, Akademiyanın 13 şəhidinin fotoşəkilləri həkk olunmuş lövhə də “Zəfər zirvəsi”nə qaldırılmışdır.

Xatırladaq ki, Vətən müharibəsinin Zəfərlə başa çatmasından iki aydan artıq vaxt keçir. Silahlar sussa da, xalqımızın torpaq uğrunda canını fəda etmiş Şəhid balalarına sevgisi tükənmir. Ölkənin müxtəlif yerlərində, kənd və qəsəbələrində şəhidlərin şəkilləri həkk olunmuş plakatlar ucaldılır, onların adları hörmətlə əbədiləşdirilir. Bu münasibət Vətən müharibəsi qəhrəmanlarına - qazilərimizə qarşı da eyni sevgiylə davam etdirilir.
Bu gün yaşadığımız günlər sabah tarixin ən şanlı səhifələri kimi gələcək nəsillər tərəfindən böyük hörmət və sayğıyla yad ediləcək.
Şəhidlər ölməz, Vətən bölünməz!

Gülnar Süleymanlı
ADBTİA-nın “Məşqçilik” fakültəsinin tələbəsi