2-09-2024, 21:22
Paralimpiya çempionu: "Çox şükür ki, bacardım"
"Çox şükür ki, bacardım, qızıl medalı əldə etdim".
Bu sözləri "Paris-2024" Yay Paralimpiya Oyunlarında qızıl medal qazanan Azərbaycan paraatleti Səid Nəcəfzadə deyib.
T12 kateqoriyasında uzunluğa tullanma üzrə yarışda bütün rəqiblərini qabaqlayan idmançı Paralimpiya Oyunlarında ikinci dəfə iştirak etdiyini xatırladıb: "Üç il əvvəl "Tokio-2020"də bürünc medal əldə etmişdim. Bu, məni Parisdə keçirilən Paralimpiya Oyunlarına daha da yaxşı hazırlaşmağa sövq etdi. Çox çalışmışdıq. Bura gəlməzdən əvvəl dünya çempionu olmuşdum. Bu da məni favoritlər arasında göstərirdi. Bunun üçün də daha çox həyəcanlı idim".
O, sosial şəbəkələrdə verilən dəstəyə görə Azərbaycan xalqına təşəkkür edib: "Prezident İlham Əliyevə və Birinci vitse-prezident Mehriban Əliyevaya idmana və paralimpiyaya diqqətinə görə minnətdarlığımı bildirmək istəyirəm. Dəstəyinə görə məşqçimə, üzvü olduğum "Neftçi" İdman Klubuna, Milli Paralimpiya Komitəsinə və rəhbərliyinə, Gənclər və İdman Nazirliyinə bu yolda bizə dəstək olduğu üçün təşəkkür edirəm".
1-09-2024, 22:53
"Qarabağ"dan möhtəşəm qələbə
Futbol üzrə Azərbaycan Premyer Liqasında V tura yekun vurulub.
Son çempion "Qarabağ" səfərdə "Zirə"nin qonağı olub. Görüş Ağdam təmsilçisinin 3:1 hesablı qələbəsi ilə başa çatıb. Bu nəticədən sonra "Qarabağ" 9 xalla turnir cədvəlinin 3-cü pilləsinə yüksəlib. "Zirə" isə 6 xalla 5-ci yerdə qərarlaşıb.
Qeyd edək ki, turun əvvəlki matçlarında "Turan Tovuz" evdə "Səbail"ə, "Araz-Naxçıvan" səfərdə "Sumqayıt"a 1:0, "Sabah" Tovuzda "Kəpəz"ə 3:2 hesabı ilə qalib gəlib, "Şamaxı" isə doğma meydanda "Neftçi" ilə qolsuz heç-heçə edib.
1-09-2024, 14:08
UEFA "Qarabağ"ın rəqibini cərimələdi
UEFA "Qarabağ"ın Avropa Liqasının Liqa mərhələsində rəqiblərindən olan "Malmö" klubunu cərimələyib.
Buna İsveç təmsilçisinin evdə Çexiyanın "Sparta" komandasına qarşı keçirdiyi Çempionlar Liqasının pley-off mərhələsinin ilk matçında yaşananlar səbəb olub.
Azarkeşlər sözügedən qarşılaşmada pirotexniki vasitələrdən istifadə ediblər. "Malmö" buna görə 38 000 avro ziyana düşüb.
Qarşılaşma Skandinaviya klubunun məğlubiyyəti ilə bitib - 0:2. Cavab görüşündə də eyni hesabla uduzan ölkə çempionu Çempionlar Liqası ilə vidalaşıb.
"Qarabağ" bu komanda ilə oyununu oktyabrın 3-də, saat 20:45-də Bakıda keçirəcək.
1-09-2024, 12:05
"Kəpəz"in yeni baş məşqçisi o oldu
“Kəpəz” komandasının yeni baş məşqçisi bəlli olub.
Klubdan verilən məlumata görə, Gəncə təmsilçisini Azər Bağırov çalışdıracaq.
40 yaşlı mütəxəssislə 2 illik müqavilə imzalanıb.
Qeyd edək ki, Azər Bağırov son olaraq "Araz-Naxçıvan"da analoji vəzifəni yerinə yetirib. O, “Kəpəz”də Adil Şükürovu əvəzləyib.
31-08-2024, 10:53
Cüdoçumuz dünya çempionu oldu
Azərbaycan cüdoçusu Cəsur İbadlı Perunun paytaxtı Limada yeniyetmələr arasında keçirilən dünya çempionatında qızıl medal qazanıb.
73 kiloqram çəki dərəcəsində çıxış edən idmançı finalda Timur Davidovla (AİN) qarşılaşıb.
Rəqibinə qalib gələn C.İbadlı fəxri kürsünün ən yüksək pilləsinə qalxıb.
81 kiloqram çəkidə mübarizə aparan Mehdi Abbasov isə üçüncü yer uğrunda görüşdə Kenzo Kremersi (Belçika) məğlub edərək mundialın bürünc mükafatına sahib çıxıb.
Qeyd edək ki, dünya çempionatına bu gün yekun vurulacaq. Azərbaycanın 7 cüdoçu ilə təmsil olunduğu yarışda daha əvvəl Nihad Məmişov (55 kiloqram) qızıl, Məhəmmədəli Hüsiyev (50 kiloqram) isə bürünc medala yiyələnib.
30-08-2024, 15:47
“Qarabağ”ın AvroLiqadakı rəqibləri məlum oldu
Bu gün UEFA Avropa Liqasında Liqa mərhələsinin püşkü atılıb.
Monakoda keçirilən püşkatma mərasimi Bakı vaxtı ilə saat 15:00-da başlanıb.
Püşkatmada Azərbaycan təmsilçisi "Qarabağ"ın da rəqiblərinin adına aydınlıq gəlib.
Qeyd edək ki, komandamız 3-cü səbətdə yer alıb.
Yarışda ilk dəfə Liqa formatı tətbiq olunur və 36 komanda iştirak edəcək.
36 komandanın hər birinə 8 rəqib seçilib. Yeni formata əsasən, hər komanda rəqiblə 8 matç keçirəcək. Oyunlardan 4-ü evdə, 4-ü səfərdə olacaq.
Yekunda 36 komanda arasında ən çox xal toplayan ilk 8 yeri tutan komanda 1/8 finala yüksələcək. 9-24-cü yeri tutanlar isə 1/8 finalda oynamaq üçün iki matçdan ibarət pley-off qarşılaşmaları keçirəcəklər. 25-36-cı yeri tutanlar isə avrokuboklarda mübarizəni başa vuracaqlar.
"Qarabağ"ın rəqibləri aşağıdakı klublar seçilib:
1-ci səbətdən: "Tottenhem" (İngiltərə) səfərdə, "Ayaks" (Niderland) evdə
2-ci səbətdən: "Olimpiakos" (Yunanıstan) səfərdə, "Lion" (Fransa) evdə
3-cü səbətdən: "Malmö" (İsveç) evdə," Bodo Glimqt" (Norveç) səfərdə
4-cü səbətdən: "FCSB" (Rumıniya) evdə, "Elfsborq" (İsveç) səfərdə
Oyunların təqvimi avqustun 31-də açıqlanacaq.
29-08-2024, 13:02
"Kəpəz"in baş məşqçi istefa verdi
Azərbaycan Premyer Liqasının 2024-2025-ci illər mövsümündə ilk baş məşqçi istefası reallaşıb.
"Kəpəz" klubunun çalışdırıcısı Adil Şükürov vəzifəsini tərk edib.
Gəncə təmsilçisi 47 yaşlı mütəxəssislə müqaviləyə qarşılıqlı razılıq əsasında xitam verib.
Qeyd edək ki, "Kəpəz" bu mövsüm Premyer Liqada keçirdiyi 4 oyunun hamısında uduzub və qol vura bilməyib.
28-08-2024, 22:43
"Qarabağ" mübarizəni dayandırdı
UEFA Çempionlar Liqasının pley-off mərhələsinin cavab oyunu çərçivəsində üz-üzə gələn “Qarabağ” və Xorvatiyanın “Dinamo” klubları arasındakı görüş başa çatıb.
Tofiq Bəhramov adına Respublika Stadionunda keçirilən qarşılaşma rəqibin 2:0 hesablı qələbəsi ilə yekunlaşıb.
İlk görüşdə də 3:0 hesabı ilə qalib gələn xorvatiyalılar turnirin liqa mərhələsinə vəsiqə qazanıblar. “Qarabağ” isə yoluna Avropa Liqasının liqa mərhələsində davam edəcək.
28-08-2024, 20:20
Olimpiya mükafatçısı Azərbaycan Prezidenti və xalqından üzr istədi
Fransada keçirilən Yay Olimpiya Oyunlarının bürünc medalını qazanan Azərbaycanın sərbəst güləşçisi Maqomedxan Maqomedov Rusiya KİV-lərinə verdiyi müsahibədə səsləndirdiyi bəzi ifadələrə görə Prezident İlham Əliyev və Azərbaycan xalqından üzr istəyib.
М.Maqomedov bildirib ki, Azərbaycan Prezidentinin verdiyi orden çox dəyərlidir.
“Mən 2022-ci ildən Azərbaycanı təmsil edirəm. Mənə bu şəraiti yaratdığı üçün Azərbaycan Respublikasının prezidentinə, o cümlədən Azərbaycan Güləş Federasiyasının rəhbərliyinə və bu imkanı yaradan hər kəsə təşəkkürümü bildirirəm. Azərbaycanı sevirəm və bu ölkəni təmsil etdiyim üçün fəxr edirəm. Məhz Azərbaycan bayrağı altında Avropa çempionu, dünya və Olimpiya mükafatçısı olmuşam. Rusiya mətbuatına verdiyi müsahibədə səsləndirdiyim fikirlər yanlış anlaşılmanın nəticəsidir. Azərbaycan Respublikası Prezidentinin mənə verdiyi orden mənim üçün çox dəyərlidir və heç bir hörmətsizlikdən söhbət gedə bilməz. Baş verənlərlə əlaqədar mən Azərbaycan Respublikasının Prezidentindən və bütün Azərbaycan xalqından üzr istəmək istəyirəm", - deyə Olimpiya mükafatçısı bildirib.
Qeyd edək ki, Maqomedxan Maqomedov 97 kq çəki dərəcəsində Paris-2024 Yay Olimpiadasının bürünc medalını qazanıb.
Prezident İlham Əliyevin sərəncamı ilə M.Maqomedov 3-cü dərəcəli “Vətənə xidmətə görə” ordeni ilə təltif olunub.
27-08-2024, 17:38
“Komandam oyuna pis hazırlaşmayıb" - Qurban Qurbanov
“Komandam oyuna pis hazırlaşmayıb. Demək olar ki, hər şey qaydasındadır”.
Bu sözləri “Qarabağ”ın baş məşqçisi Qurban Qurbanov UEFA Çempionlar Liqasının pley-off mərhələsində Bakıda Xorvatiyanın “Dinamo” (Zaqreb) klubuna qarşı keçiriləcək cavab oyunundan öncə təşkil olunmuş mətbuat konfransında deyib.
52 yaşlı mütəxəssis ilk matçdakı məğlubiyyətə baxmayaraq, mərhələni keçəcəklərinə inamın böyük olduğunu bildirib: “Sabah meydanda əlimizdən gələni etməyə çalışacağıq. İstərdik ki, azarkeşlərimiz oyundan razı qalsınlar”.
Qeyd edək ki, avqustun 28-də Tofiq Bəhramov adına Respublika Stadionunda keçiriləcək “Qarabağ” – “Dinamo” görüşü saat 20:45-də başlayacaq. İlk matçda Ağdam təmsilçisi 0:3 hesabı ilə uduzub.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!