11-07-2023, 14:05
“Neftçi” Futbol Klubu yeni baş məşqçisini təqdim etdi
"Neftçi" Peşəkar Futbol Klubu yeni baş məşqçisi Adrian Mutunu təqdim edib. "Ağ-qaralar"ın Müşahidə Şurasının sədri, SOCAR-ın prezidenti Rövşən Nəcəf rumıniyalı mütəxəssislə görüşüb. Görüşdə “Neftçi” PFK-nın hazırki durumu və qarşıya qoyulan hədəflər barədə fikir mübadiləsi aparılıb, klubla bağlı gözləntilər diqqətə çatdırılıb. Daha sonra rumıniyalı mütəxəssis Adrian Mutu ilə iki illik müqavilə imzalanıb.
Xatırladaq ki, ötən mövsüm “Neftçi” PFK-nı çalışdıran baş məşqçi Laurentsiu Regekampf və onun köməkçiləri ilə iyunun 21-də yollar ayrıldıqdan sonra bir sıra namizədlərlə danışıqlar aparılıb, onların arasından klubumuzla maraqları üst-üstə düşən, bacarıq və potensialı ən yüksək olan mütəxəssislə anlaşılıb. Yeni baş məqşçinin ictimaiyyətə təqdimatı klub rəhbərliyi və komanda üzvləri təlim-məşq toplanışından qayıdandan sonra baş tutacaq, bu xüsusda mətbuat konfransı təşkil olunacaq.
Qeyd edək ki, Adrian Mutu 1979-cu il yanvarın 8-də anadan olub. Rumıniya tarixinin ən yaxşı futbolçularından biri olan A.Mutu ölkəsində bir neçə klubla yanaşı, İtaliyada “İnter”, “Hellas Verona”, “Parma”, “Yuventus”, “Fiorentina”, “Çezena”, İngiltərədə “Çelsi”, Fransada “Ayaçço” və Hindistanda “Puna Siti” klublarının formasını geyinib, Rumıniya milli komandasının heyətində 77 oyun keçirib, 35 qol vurub. 2003, 2005, 2007 və 2008-ci illərdə Rumıniyada, 2007-ci ildə isə İtaliyada ilin futbolçusu seçilib. Adrian Mutu “Voluntari” (Rumıniya, 2018), “Əl Vəhdə” U-21 (BƏƏ, 2018-2019), Rumıniya U-21 milli komandası (2020-2021), “Universitatya Krayova” (Rumıniya, 2021) və “Rapid”in (Buxarest, Rumıniya, 2022-2023) baş məşqçisi olub. UEFA-nın PRO kateqoriyalı məşqçilik lisenziyasına malikdir.
10-07-2023, 18:27
Pakistanda hökm sürən güclü yağışlar 80 nəfərin ölümünə səbəb olub
Pakistanda iyunun 25-dən bəri davam edən musson yağışları nəticəsində həyatını itirənlərin sayı 80-ə çatıb. Bu barədə ölkənin Milli Fəlakət İdarəetmə Agentliyi (NDMA) məlumat yayıb. Məlumata görə, Pəncab, Sind və Bəlucistan əyalətlərində son 24 saat ərzində güclü yağışlar nəticəsində 4 nəfər ölüb, 9 nəfər yaralanıb. Yaralananların ümumi sayı isə 142-yə yüksəlib.
Qeyd edək ki, hər il iyun-sentyabr aylarında yağan musson yağışları Pakistana böyük ziyan vurur. Ötən il musson yağışların səbəb olduğu daşqınlar nəticəsində 1739 nəfər həlak olub.
10-07-2023, 18:00
Stalkoviç “Neftçi”dən ayrıldı
"Neftçi" futbolçusu Voislav Stankoviçlə yollarını ayırıb. Klubdan verilən məlumata görə, serbiyalı müdafiəçi ilə başa çatan müqavilənin müddəti yenilənməyib.
Qeyd edək ki, 36 yaşlı oyunçu 2019-cu ilin yayından Bakı klubunun formasını geyinirdi. O, Azərbaycanda "İnter" (hazırkı "Şamaxı") və "Qəbələ" komandalarında da çıxış edib.
10-07-2023, 15:22
Daha bir futbolçu “Qarabağ” klubundan ayrılır
"Qarabağ"ın futbolçusu Kevin Medina karyerasını Türkiyə Superliqasına davam etdirməyə çox yaxındır. 30 yaşlı kolumbiyalı müdafiəçinin qardaş ölkə təmsilçisi "Rizəspor"a keçidi gözlənilir. Gələn məlumatlar arasında futbolçunun artıq klubdan ayrıldığı da var.
Qeyd edək ki, Kevin Azərbaycan Premyer Liqasında keçirdiyi üç mövsümdə 66 matçda 1 qol vurub.
8-07-2023, 11:44
Taekvondoçularımız Ankarada keçirilən çempionatda 4 medal qazandı
Azərbaycanın gənc taekvondoçuları Ankarada keçirilən açıq Türkiyə çempionatında 4 medal qazanıblar. Azərbaycan Taekvondo Federasiyasından bildiriblər ki, yarışın ikinci günündə mübarizəyə qoşulan yığmamız aktivinə 1 qızıl, 1 gümüş və 2 bürünc mükafat yazdırıb. Millimizin üzvü Zemfira Həsənzadə (44 kq) bütün rəqiblərinə qalib gələrək, qızıl medala sahib olub. Yalnız finalda məğlub olan Hüseyn Xudiyev (73 kq) gümüş medalla kifayətlənib. Vasif Səlimov (59 kq) və Səlimə Quliyeva (42 kq) isə G-2 kateqoriyalı çempionatı bürünc mükafatla başa vurub.
Qeyd edək ki, yarışın ilk günündə Azərbaycanın yeniyetmə taekvondoçuları 4 qızıl və 4 bürünc medal əldə ediblər.
7-07-2023, 21:12
Yeniyetmə güləşçimiz tarixi medalın sahibi oldu
Azərbaycanın yeniyetmə güləşçisi Esra Məmmədli Macarıstanın Kaposvar şəhərində keçirilən U-15 Avropa çempionatında gümüş medal qazanıb. 46 kq-da çıxış edən idmançı finalda yerli Mariya Jitovoza 0:7 hesabı ilə uduzub və qitə ikincisi olub. Bununla da Məmmədli qadın güləşi üzrə U-15 Avropa çempionatları tarixində medal qazanan ilk Azərbaycan güləşçisi olub.
6-07-2023, 16:26
Futbol klublarının yeni reytinq cədvəli açıqlandı - “Qarabağ” irəlilədi, “Neftçi”..
Avropanın futbol klublarının yeni reytinq cədvəli açıqlanıb. Siyahıda 415 klub yer alıb. Reytinq cədvəlində Azərbaycanın 4 klubu qərarlaşıb. Yalnız “Qarabağ” klubu “Top-100”də yer alıb. Azərbaycan çempionu 192 xalla qitənin 74-cü pillədə qərarlaşıb. Qurban Qurbanovun yetirmələri ötən siyahı ilə müqayisədə yeddi pillə irəliləyiblər. Hesabında 37 xal olan “Neftçi” 10 pillə geriləyib. Belə ki, Bakı təmsilçisi 228-cidir. Bundan əlavə, Avrokuboklarda debüt edəcək “Sabah” 20 xalla 255-ci sırada yer alıb. “Qəbələ” isə 5 xalla 357-cidir. Azərbaycan kubokunun qalibi 6 pillə irəliləyib. Qeyd edək ki, siyahıya 2147 xala malik olan “Real” başçılıq edir.
4-07-2023, 22:50
“Qarabağ” klubu Avstriyada qələbə qazandı
Avstriyada təlim-məşq toplanışında olan “Qarabağ” klubu son yoxlama matçını keçirib. Çempion Bolqarıstan təmsilçisi SSKA-ya qalib gəlib. Oyunda qapılara bir qol vurulub. Birinci hisssənin sonlarında Cica fərqlənib. Ağdam klubu bundan əvvəl iki yoldaşlıq oyununda qüvvəsini sınamışdı. “Legiya” ilə 2:2 oynayan “Qarabağ”, “Ferentsvaroş”a 0:2 hesabı ilə uduzmuşdu.
Qeyd edək ki, Avstriya toplanışını başa vuran “Qarabağ” İspaniyaya yola düşəcək. Komanda Marbelya bölgəsində 4 günlük hazırlıq keçəcək.
4-07-2023, 16:06
İdmançımız Avropa birinciliyində bir qızıl və iki gümüş medal qazandı
Azərbaycanın yeniyetmə ağırlıqqaldıranı Amin Osmanov Moldovanın paytaxtı Kişineuda 15-17 yaşlı oğlan və qızlar arasında keçirilən Avropa birinciliyində bir qızıl və iki gümüş medal qazanıb. Ağır Atletika Federasiyasından verilən məlumata görə, yaşı 17-yə qədər olan oğlanlar arasında 55 kq çəki dərəcəsində mübarizə aparan idmançı birdən qaldırma hərəkətində 99 kq nəticə göstərib və bütün rəqiblərini üstələyib. "Göyəzən" Ağır Atletika Klubunun təmsilçisi təkanla qaldırma hərəkətində də uğurlu çıxış edib. O, 117 kq-ı başı üzərinə qaldırıb və bu hərəkətdə gümüş medala sahib çıxıb. Toplam 216 kq (99+117) nəticə göstərən Osmanov yekun sıralamada da ikinci yeri tutub.
Qeyd edək ki, iyulun 10-dək davam edəcək yarışda 40-a yaxın ölkədən 356 atlet (165 qız və 191 oğlan) iştirak edəcək.
2-07-2023, 13:50
Kikboksçumuz Avropa Oyunlarını qızıl medalla başa vurdu
Azərbaycan kikboksçusu Fərid Ağamoğlanov Polşada təşkil olunan III Avropa Oyunlarında qızıl medal qazanıb. Full-kontakt növündə 63.5 kq-da mübarizə aparan idmançı finalda İtaliya təmsilçisi Damiano Salvatore Tramontana ilə üz-üzə gəlib. Rəqibinə aşkar üstünlüklə - 3:0 qalib gələn kikboksçu fəxri kürsünün ən yüksək pilləsinə qalxıb.
Qeyd edək ki, bu, Avropa Oyunlarında Azərbaycan komandasının üçüncü qızıl medalı olub. Daha əvvəl karateçilər İrina Zaretska (68 kq) və Tural Ağalarzadə (67 kq) hamıdan güclü olmağı bacarıblar.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!