23-09-2022, 21:13
Avropa İttifaqı Lənkərana 300 min dollar ayıracaq
“Avropa İttifaqı Lənkəranın mədəni inkişafının maliyyələşdirilməsinə 300 min avro ayıracaq”. Bunu Fransanın Azərbaycandakı səfiri Zakari Qross tviter hesabında yazıb. “Avropa İttifaqı Lənkəranın mədəni inkişafı üçün 300 min avro məbləğində proqramı maliyyələşdirir. Fransa İnstitutu tərəfdaşlardan biri olmaqdan qürur duyur. Teatr tamaşaları, film nümayişləri, musiqi, sərgilər, kitabxanalarla əməkdaşlıq təşkil olunacaq”, - deyə səfir bildirib.
23-09-2022, 21:09
Ceyhun Bayramov Mirzoyanla nələri müzakirə etdiyini açıqladı
“Sentyabrın 19-da Nyu-York şəhərində ABŞ-ın dövlət katibi Entoni Blinkenin təşəbbüsü və iştirakı ilə Ermənistanın xarici işlər naziri Ararat Mirzoyanla görüşdüm. Müxtəlif məsələləri müzakirə etdik”. Bunu Azərbaycanın xarici işlər naziri Ceyhun Bayramov AzTV-yə müsahibəsində deyib. Nazirin sözlərinə görə, üçtərəfli görüşdə Ermənistanın sərhəddə törətdiyi son təxribatlar geniş müzakirə olunub: “Görüşdə əsas müzakirə mövzularından biri delimitasiya olunmamış dövlət sərhədindəki qarşıdurma və onun nəticələri idi. Biz bu barədə mövqeyimizi bildirdik. Razılaşmaların, o cümlədən Brüssel formatında əldə olunmuş razılıqların ləngiməsinə diqqət çəkdik”. Qeyd edək ki, sentyabrın 12-si gecə və 13-ü səhər saatlarında Ermənistan silahlı qüvvələri tərəfindən Azərbaycan-Ermənistan dövlət sərhədinin Daşkəsən, Kəlbəcər, Laçın və Zəngilan istiqamətlərində genişmiqyaslı təxribat törədilib. Azərbaycan Silahlı Qüvvələri adekvat cavab tədbirləri görüb. Nəticədə Ermənistan silahlı qüvvələrinin 207 hərbçisi ölüb, 293 nəfər yaralanıb, 20 hərbçi əsir, 2 nəfər isə itkin düşüb. Hazırda sərhəddə vəziyyət sabitdir, atəşkəsə əməl olunur. Ermənistan silahlı qüvvələrinin genişmiqyaslı təxribatının qarşısını alarkən Azərbaycan Silahlı Qüvvələrinin 80 hərbi qulluqçusu şəhid olub, 281-i yaralanıb və müxtəlif dərəcəli bədən xəsarətləri alıb.
23-09-2022, 21:07
Külək ağacı aşırdı - 3 yaşlı uşaq və yeniyetmə öldü
Tovuzda irigövdəli ağacın aşması iki nəfərin ölümünə səbəb olub. Butov.az xəbər verir ki, hadisə rayonun Əlibəyli kəndində qeydə alınıb. Məlumata görə, güclü küləyin aşırdığı ağac 2005-ci il təvəllüdlü Telman Allahverdiyevin və 2019-cu il təvəllüdlü F.Zeynalovun üzərinə aşıb. Nəticədə hər iki şəxs aldığı xəsarətdən hadisə yerində keçinib. Faktla bağlı araşdırma aparılır.
23-09-2022, 21:05
Neft sürətlə ucuzlaşır - 87 dollardan aşağı düşdü
Dünya bazarında neftin qiyməti 4%-ə qədər enib. Brent markalı neft yanvarın 25-dən bəri ilk dəfə bir barel üçün 87 dollardan aşağı düşüb. Butov.az xəbər verir ki, beynəlxalq ticarət məlumatlarına görə, WTI markalı neft yanvarın 11-dən bəri ilk dəfə olaraq 80 dollardan ucuzlaşıb, 79,78 dollar olub. Brent markalı neftin noyabr fyuçerslərinin qiyməti 3,71% azalaraq bir barel üçün 87,1 dollar olub, daha sonra isə 87 dollardan aşağı düşüb.
23-09-2022, 21:03
Şəhid ailələrinə qarşı dələduzluq - 7 il həbs verildi
Bakı Ağır Cinayətlər Məhkəməsində şəhid ailələrinə qarşı külli miqdarda dələduzluqda təqsirləndirilən Fərid Abdinovun işi üzrə məhkəmə prosesi başa çatıb. Butov.az-ın məlumatına görə, hakim Cavid Hüseynovun sədrliyi ilə keçirilən prosesdə təqsirləndirilən şəxsə hökm oxunub. Məhkəmənin hökmü ilə F.Abdinov 7 il azadlıqdan məhrum edilib. İttihama görə, vətəndaşlar Ü.Əsədova, K.İsmayılova və E.Eynullayev Daxili İşlər Nazirliyinə müraciət edərək Bakı şəhər sakini Fərid Abdinovun onlara müxtəlif vədlər verərək etibarlarından sui-istifadə etməklə külli miqdarda pul vəsaitlərini ələ keçirdiyini bildiriblər. DİN-dən verilən məlumata əsasən, vətəndaşların şikayətləri araşdırılıb və onların Fərid Abdinov barədə qeyd etdikləri qanunsuz əməllər təsdiqini tapıb. Faktla bağlı Cinayət Məcəlləsinin müvafiq maddəsi ilə cinayət işi başlanmış, Fərid Abdinova ittiham elan edilməklə barəsində məhkəmənin qərarı ilə həbs qətimkan tədbiri seçilib. İstintaqla müəyyən edilib ki, Fərid Abdinov dələduzluq yolu ilə zərərçəkənlərin ümumilikdə 178 min manat pulunu ələ keçirib.
23-09-2022, 20:54
ATƏT rəsmiləri Azərbaycan-Ermənistan münasibətlərini müzakirə etdilər
Azərbaycan-Ermənistan sərhədində sentyabrın 12-13-də baş verən gərginliyi ATƏT-in fəaliyyətdə olan sədri və üzv ölkələrin XİN başçıları müzakirə ediblər. Butov.az xəbər verir ki, məlumatı ATƏT-in saytı yayıb. Görüşdə ATƏT-in fəaliyyətdə olan sədri, Polşanın xarici işlər naziri Zbiqnev Rau, İsveçin xarici işlər naziri Ann Linde, Şimali Makedoniyanın xarici işlər naziri Buyar Osmani ilə yanaşı ATƏT-in Baş katibi Helqa Mariya Şmidt də iştirak edib. Məlumata görə, diplomatlar ATƏT-in bu istiqamətdə daha fəal iştirakının vacibliyindən danışıblar. Onlar Avropa İttifaqının vasitəçiliyi ilə Azərbaycanla Ermənistan arasında sülh danışıqlarının davam etməsinin aktual olduğunu qeyd edərək bu istiqamətdə ATƏT-in regiondakı təcrübəsini xatırladıblar. Qeyd edək ki, görüş BMT Baş Assambleyasının 77-ci sessisyası çərçivəsində baş tutub.
23-09-2022, 20:42
Altıağac Milli Parkında yanğın
Xızı rayonu, Əngilan kəndinin biçənək sahəsindən başlayan yanğın sonradan güclü külək nəticəsində kəndlə sərhəd ərazidə yerləşən Altıağac Milli Parkına keçib. Ekologiya və Təbii Sərvətlər Nazirliyinin Mətbuat katibi İradə İbrahimova bildirib ki, hazırda ETSN-in yerli qurumlarının və FHN-in Dövlət Yanğından Mühafizə Xidmətinin əməkdaşları və kənd sakinləri tərəfindən yanğının söndürülməsi istiqamətində tədbirlər görülür.
23-09-2022, 20:34
Gələn il maaş və pensiyalar nə qədər artacaq?
Dünən Nazirlər Kabinetində 2023-cü ilin dövlət büdcəsi layihəsinin müzakirəsi keçirilib. İclasda qeyd olunan məsələlərdən biri də dövlət başçısının tapşırığına uyğun olaraq əhalinin, şəhid ailələrinin, qazilərin sosial müdafiəsi və sosial təminatının gücləndirilməsinin, aztəminatlı əhalinin sosial rifahının yaxşılaşdırılması ilə bağlı tədbirlərin genişləndirilməsi olub. Bildirilib ki, inflyasiya təzyiqi nəzərə alınmaqla həssas əhali qruplarına sosial dəstək tədbirlərinin həyata keçirilməsi üçün 2023-cü il üzrə dövlət büdcəsinin sosialyönlü xərcləri bu illə müqayisədə 9,2% çox nəzərdə tutulub. Konkret rəqəmlərə gəldikdə isə 2023-cü ilin dövlət büdcəsində birbaşa sosial müdafiə və sosial təminat xərcləri 3 milyard 728 milyon manatdan 4 milyard 411 milyon manatadək artırılır. Deputat Vüqar Bayramov bildirib ki, gələn il büdcəsinin 23.7 faizi əməyin ödənilməsinə yönəldiləcək. Nəticədə həmin istiqamətə 6 milyard 495 milyon manat vəsait ayrılacaq. Eyni zamanda bu, 2022-ci ilin dövlət büdcəsində həmin istiqamət üzrə xərclə müqayisədə 5.2, ötən ilki faktiki göstəriciyə nəzərən isə 30.6 % faiz artım deməkdir. "2023-cü il üzrə dövlət büdcəsinin xərclərinin iqtisadi təsnifatında sosial ödənişlərə 4 milyard 61 milyon manat nəzərdə tutulub ki, bu da 2022-ci ilin proqnozundan 5.9 faiz, 2021-ci ilin icrası ilə müqayisədə 25.3 faiz çoxdur. Bütövlükdə, 2023-cü ildə sosial istiqamətlər üzrə artımlar nəzərdə tutulub. Bununla yanaşı, gələn ildə də inflyasiyaya qarşı mübarizə prioritet olaraq qalacaq. Dünya iqtisadiyyat üçün proqnozlar heç də ürəkaçan olmadığı üçün idxal inflyasiyası gələn ildə də istehlak bazarımıza təsirsiz ötüşməyəcəcək. Bu baxımdan da, sosial müdafiə tədbirləri fiskal siyasətdə əsas istiqamət olaraq qalmaqdadır", - deyə deputat gələn il üçün gözləntilərini dilə gətirib.
23-09-2022, 20:29
Məktəblilərə narkotik satan qadına hökm oxundu
Bakıda narkotik vasitələrin satışı ilə məşğul olmaqda təqsirləndirilən Göyçək Əliməmmədovaya hökm oxunub. O, 6 il müddətinə azadlıqdan mərhum edilib. Butov.az xəbər verir ki, Bakı Ağır Cinayətlər Məhkəməsinin hakimi İradə Həsənzadənin sədrliyi ilə keçirilən prosesə yekun vurulub. Qeyd edək ki, G.Əliməmmədova ötən ilin noyabrın 27-də saxlanılıb. O, paytaxtın müxtəlif yerlərində, həmçinin bəzi orta məktəblərin yaxınlığında yetkinlik yaşına çatmayan şəxslərə narkotik vasitə satmaqda şübhəli bilinib. İstintaq orqanı tərəfindən G.Əliməmmədovanın barəsində Cinayət Məcəlləsinin 234.4.1-ci (qabaqcadan əlbir olan bir qrup şəxs tərəfindən və ya mütəşəkkil dəstə tərəfindən qanunsuz olaraq narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, göndərmə və ya satma) və 234.4.3-cü (külli miqdarda qanunsuz olaraq narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama, daşıma, göndərmə və ya satma) maddələri ilə ittiham elan olunub.
23-09-2022, 19:57
QHT YENİ LAYİHƏYƏ START VERİB
“Uşaqların Gələcəyi Naminə” İctimai Birliyi Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə “İstedadlı məktəblilərin üzə çıxarılması və inkişafına dəstək” layihəsinin icrasına başlayıb.
Layihə çərçivəsində yeni texnologiyaların sürətlə inkişaf etdiyi müasir dövrdə xüsusi qabiliyyətə malik yeniyetmə və gənclərin cəmiyyətə tanıdılması, onların intellektual fəaliyyətlərinin təbliği və stimullaşdırılması məqsədilə “chevik.az” saytının yaradılması və onun fəaliyyətinə layihə iştirakçıları olan məktəblilərin fəal şəkildə cəlb edilməsi nəzərdə tutulub.
İctimai Birliyin sədri Könül Quliyeva layihənin məqsədini bu cür əsaslandırır: “Xüsusi istedada malik olan məktəblilər adətən orta məktəbdə yüksək bilik və bacarıqlar əldə edib təhsillərini ali məktəblərdən birində davam etdirmək arzusundadırlar.
Onlar mütəmadi olaraq məktəblilər üçün keçirilən fənn olimpiadalarında, bilik müsabiqələrində fəal iştirak edir, yüksək yer tutmağa cəhd göstərirlər. Onların bilik və bacarıqları, xüsusi qabiliyyətə malik olmaları barədə məlumatlar, bir qayda olaraq, ailə və məktəb hüdudlarından kənara çıxmır, həmyaşıdlarına, ümumilikdə isə cəmiyyətə yetərincə təqdim edilmir və təbliğ olunmur.
Nəticədə xüsusi qabiliyyət itirilmiş, istedadlı gənc unudulmuş olur. Nəzərə alaq ki, xüsusi qabiliyyətə malik məktəblilər elə məktəb illərində öz istedadlarını təbliğ və inkişaf etdirməyə dəstək ala biləcəkləri təqdirdə onlar nəinki ölkəmizdə, hətta beynəlxalq aləmdə öz bilik və bacarıqları, kəşfləri və ixtiraları ilə məşhurlaşa bilərlər. Yeni texnologiyaların sürətlə inkişaf etdiyi müasir dövrdə dünyanın bir çox ölkələrində xüsusi qabiliyyətə malik yeniyetmə və gənclərin cəmiyyətə tanıdılması, onların intellektual fəaliyyətlərinin təbliği və stimullaşdırılması istiqamətində ciddi tədbirlər həyata keçirilir və bu təcrübədən faydalanmaqla ölkəmizdə insan kapitalının zənginləşməsinə dəyərli töhfə vermiş olarıq”.
QHT sədri yeni saytda davamlı olaraq “Elm və texnika yenilikləri”, “Azərbaycançılıq: tariximiz, mədəniyyətimiz, milli-mənəvi dəyərlərimiz”, “Sağlam həyat tərzi”, “Dahilər və tanınmışlar”, “İdeyalar bankı” və digər rubrikaların layihə iştirakçıları olan məktəblilərin özləri tərəfindən idarə ediləcəyini bildirib. Qeyd olunub ki, bu cür yanaşma gənclərə istedadlı həmyaşıdlarını cəmiyyətə tanıtmaq bacarığnı aşılamaqla yanaşı, onlarda sosial şəbəkələrdə ünsiyyət mədəniyyətinin formalaşmasına, asudə vaxtlarının səmərəli və faydalı təşkilinə köməklik göstərə bilər.
Təşkilat sədrinin sözlərinə görə, bu ilin sentyabr-noyabr aylarında icra ediləcək layihə Bakı Şəhər Baş Təhsil İdarəsinin əməkdaşlarının, layihə iştirakçıları olan istedadlı məktəblilər və onların müəllimlərinin, Agentlik və KİV nümayəndələrinin iştirakı ilə keçiriləcək dəyirmi masa ilə yekunlaşacaq.
Layihə çərçivəsində yaradılacaq “chevik.az” saytının fəaliyyəti isə davamlı olacaqdır.
Redaksiya
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!