6-09-2022, 21:08
İtaliyada ölən azərbaycanlı gəncin nəşi vətənə gətiriləcək
Azərbaycanlı gənc həyat yoldaşını çayda boğulmaqdan xilas edərkən özü həyatını itirib. Butov.az xəbər verir ki, bədbəxt hadisə İtaliyada baş verib. Belə ki, Çexiyada yaşayan Sərkər adlı azərbaycanlı gənc həyat yoldaşı Helena ilə İtaliyada turist kimi səfərdə olub. 28 avqustda xanımı ilə İtaliyanın Komo gölündə gəzintiyə çıxmaq üçün qayıq kirayələyib. Sərkər anidən suya düşən xanımını xilas etmək üçün onun arxasınca özünü çaya atıb. O, qızı xilas etsə də, özü suda boğulub. Hazırda azərbaycanlı gəncin nəşi İtaliyada saxlanılır. Yaxınları onun cənazəsini maliyyə probleminə görə Vətənə gətirə bilməyiblər. Helena həyat yoldaşının nəşini Azərbaycana aparmaq üçün yardım aksiyasına başlayıb. Əldə etdiyimiz son məlumata görə, mərhumun nəşi ekspertizaya verilib. Ekpertizanın rəyi açıqlandıqdan sonra cənazə Azərbaycana göndəriləcək. Qeyd edək ki, S.Almasov Çexiyada “ZeroTurnaround” şirkətində çalışıb, həmçinin sarkaralmasov.com saytı vasitəsilə daşınmaz əmlak kirayəsi işi ilə məşğul olub. O, bir neçə ay əvvəl Helena ilə ailə qurmuşdu.
6-09-2022, 21:01
Kamran Əliyevdən yeni təyinatlar
Prokurorluq orqanlarında yeni təyinatlar olub. Butov.az xəbər verir ki, baş prokuror Kamran Əliyevin imzaladığı müvafiq əmrlə Xaçmaz rayon prokurorunun böyük köməkçisi İsbəndiyar İsgəndərov vəzifəsindən azad edilərək Quba rayon prokurorunun müavini təyin olunub. Quba rayon prokurorunun müavini Pərviz Nərimanov isə Qaradağ rayon prokurorunun müavini vəzifəsinə, Baş Prokurorluğun İstintaq İdarəsinin əməkdaşı Tural Haqverdiyev Nərimanov rayon prokurorunun müavini, Nərimanov rayon prokurorunun müavini vəzifəsindən azad edilən Elgiz Qənizadə isə Suraxanı rayon prokurorunun müavini vəzifəsinə təyin edilib. Baş Prokurorluğun Mətbuat xidmətindən təyinatlarla bağlı məlumatı təsdiq ediblər.
6-09-2022, 20:59
Avqustda 8 nəfər mina partlamasından zərər çəkib
Rəsmi strukturlardan, regional koordinatorlardan və digər mənbələrdən alınmış məlumatlar nəticəsində 2022-ci ilin avqust ayı ərzində 6 hadisə (5 mina və bir partlamamış hərbi sursat hadisəsi) nəticəsində 8 nəfərin minalardan və partlamamış hərbi sursatlardan zərər çəkdiyi qeydə alınıb. Bu barədə Minalar Əleyhinə Azərbaycan Kampaniyası İctimai Birliyinin məlumatında deyilir. Qeyd olunub ki, nəticədə ANAMA-nın dörd mina təmizləyəni mina partlamasından, bir mülki şəxs partlamamış hərbi sursat partlayışından zərər çəkib. Bir hərbçi həlak olub və digər iki hərbçi isə yaralanıb. Mina hadisələrin hamısına piyada əleyhinə minalar, partlamamış hərbi sursat kimi isə əl qumbarasının alışdırıcısı səbəb olub. Bildirilib ki, 2022-ci ilin iyul ayında hadisələr Füzuli, Kəlbəcər, Laçın, Qubadlı rayonlarının və Gəncə şəhərinin ərazisində baş verib. 2022-ci ilin ötən səkkiz ayında 2 nəfəri kasetli silah partlamasından olmaqla 4 nəfər həlak olub və 37 nəfər yaralanıb. Məlumata görə, 2020-ci il noyabrın 10-dan 2022-ci il sentyabrın 1-dək minaların və partlamamış hərbi sursatların partlaması nəticəsində 202 nəfər (120 hərbçi, 82 mülki) yaralanıb, 40 nəfər (8 hərbçi, 32 mülki) həlak olub: "Bütün rəsmi strukturların və vətəndaş cəmiyyəti təsisatlarının mütəmadi çağırışlarına baxmayaraq hələ də işğaldan azad olunmuş ərazilərə qanunsuz səfər edənlər var və bununla da öz həyatlarını riskə atırlar. Həlak olanlar və yaralananlar arasında işğaldan azad olunmuş ərazilərə qanunsuz səfər edənlərin və həmin ərazilərdə infrastruktur layihələrində çalışanların da olmasını nəzərə alaraq “Minalar Əleyhinə Azərbaycan Kampaniyası” ictimai birliyi növbəti dəfə əhaliyə müraciət edərək xahiş edir ki, işğaldan azad olunmuş ərazilərə səfər etməsinlər və partlamamış hərbi sursatlara toxunmasınlar. İnfrastruktur layihələrinin və kənd təsərrüfatı işlərinin yerinə yetirilməsinə cəlb olunmuş vətandaşlarımız isə verilən təlimatlara ciddi əməl etməli və heç bir özfəaliyyətlə məşğul olmamalıdırlar".
6-09-2022, 20:35
Mətbuat Şurasının qurultay vaxtı məlum oldu
Azərbaycan Mətbuat Şurasının növbəti qurultayının keçiriləcəyi tarix məlum olub. Butov.az xəbər verir ki, qurultay sentyabr ayının 24-nə təyin olunub. Növbəti qurultayda Mətbuat Şurasına yeni sədrin seçilməsi gözlənilir. Qeyd edək ki, Mətbuat Şurasının sonuncu qurultayı 2018-ci ildə keçirilib.
6-09-2022, 20:32
Qadınların rəhbərlik etdiyi ölkələr
Dünyanın əksər ölkələrində hakimiyyət kişilər tərəfindən idarə olunsa da, son vaxtlar rəhbərliyə seçilən xanımların sayının artdığını görürük. Dövlət başçısı postuna layiq görülən qadınların bir çoxu yenilikçi və effektiv liderlik bacarıqlarına görə digərlərindən fərqlənir. Onlar habelə ölkələrinin üzləşdiyi problemlərə unikal və operativ reaksiya verməklə, heç də kişilərdən geri qalmadıqlarını göstərməyə çalışırlar. Hazırda hansı ölkələrə xanım liderlər rəhbərlik edir? Butov.az bu suala cavab tapmaq üçün qadınlar tərəfindən idarə olunan məşhur ölkələri araşdırıb.
Böyük Britaniya
Ötən gün Liz Trass Böyük Britaniyanın yeni Baş naziri və hakim Mühafizəkarlar Partiyasının sədri seçilib. O, hökumət rəhbəri postu uğrunda seçkilərdə səs çoxluğu ilə qalib gələrək, Boris Consonun postuna sahib çıxıb. Keçmiş dövlət katibi və Mühafizəkarlar Partiyasının yeni lideri Liz Trass 1975-ci ildə Oksfordda anadan olub, evlidir və iki övladı var. O, 1983-cü ildə Şotlandiyanın Peysli şəhərindəki məktəbin teatrında tamaşa zamanı ölkənin qüdrətli baş naziri və Mühafizəkarlar Partiyasının lideri Marqaret Tetçer rolunu oynayıb. Trass həm siyasi mövqeyinə, həm də "dəmir ledi" kimi tanınan Marqaret Tetçeri təqlid etməsinə görə tez-tez diqqət mərkəzində olub. Mühafizəkarlar Partiyasının liderliyi üçün keçirilən ilk debatda Trassın geyindiyi paltarla 1979-cu ildə Marqaret Tetçerin geyindiyi paltar arasındakı oxşarlıq diqqət çəkib. Bu vəziyyət Trassın özünü Tetçerə bənzətməsinə dair şərhlərə səbəb olub.
Yunanıstan
Yunanıstanın hazırkı prezidenti Katerina Sakellaropuludur. O, 13 mart 2020-ci ildə prezident vəzifəsinə seçilib. Sakellaropulou 30 may 1956-cı ildə Yunanıstanın Saloniki şəhərində anadan olub. Prezident seçilməzdən əvvəl Sakellaropulou Yunanıstanın ən yüksək inzibati məhkəməsi olan Dövlət Şurasının prezidenti vəzifəsində çalışıb. O, ölkənin ilk qadın prezidentidir.
Slovakiya
Zuzana Çaputova 15 iyun 2019-cu ildə Slovakiyanın prezidenti seçilib. O, üç ildir ki, hakimiyyətdədir. Çaputova ixtisasca hüquqşünas olsa da, daha çox ekoloji fəal kimi tanınır. O, Slovakiyanın beşinci prezidenti, eyni zamanda prezident postunu tutan ilk qadın, həmçinin Slovakiya tarixində 45 yaşında seçilən ən gənc liderdir. Çaputova 2019-cu ildə keçirilən prezident seçkilərində ikinci turda 58% səslə qalib gəlib.
Gürcüstan
Salome Zurabişvili 16 dekabr 2018-ci ildə Gürcüstanın prezidenti seçilib. O, bu postda əyləşən ilk qadın liderdir. Zurabişvili 1952-ci il martın 18-də Fransanın Paris şəhərində gürcü siyasi qaçqın ailəsində anadan olub. 2003-2004-cü illərdə Fransanın Gürcüstandakı səfiri vəzifəsində çalışıb. 2004-cü ildə Fransa və Gürcüstan prezidentlərinin qarşılıqlı razılaşması ilə Gürcüstan vətəndaşlığını qəbul edib və ölkənin xarici işlər naziri təyin olunub.
Moldova
Moldova Şərqi Avropada dənizə çıxışı olmayan ölkədir, prezidenti Maya Sandudur. O, 24 dekabr 2020-ci ildə ölkə başçısı seçilib və hələ də vəzifəsini icra edir. Maya Sandu 24 may 1972-ci ildə anadan olub, 8 iyun 2019-cu ildən 14 noyabr 2019-cu ilə qədər Moldovanın baş naziri vəzifəsində çalışıb. 12 noyabr 2019-cu ildə Sandu hökuməti etimadsızlıq səsverməsindən sonra dağılıb. O, Moldovanın ilk qadın prezidentidir.
Nepal
Bidya Devi Bhandari 29 oktyabr 2015-ci ildə Nepalın prezidenti seçilib. O, 28 oktyabr 2015-ci ildə ölkənin parlament tərəfindən seçilən ilk qadın prezidenti olub. Bhandari 2009-cu ildən 2011-ci ilə qədər müdafiə naziri vəzifəsində çalışıb. O, həm də Nepalda ekoloji maarifləndirmə və qadınların hüquqlarının müdafiəsi üzrə fəal kampaniyaçı kimi yadda qalıb.
Tayvan
Tsai İnq-ven 20 may 2016-cı ildə Tayvanın prezidenti seçilib, hələ də hakimiyyətdə qalır. Tsai İnq-ven Tayvanın ilk qadın prezidentidir və ölkə tarixində hakim partiya tərəfindən prezidentliyə namizəd kimi irəli sürülən ilk qadın siyasətçi olub. O, 2016-cı il seçkilərində ilk prezidentlik müddətində rəqiblərinə böyük üstünlüklə qalib gəlib. 2020-ci il seçkilərində də postunda qalmağı bacarıb.
Sinqapur
Sinqapur Cənub-Şərqi Asiyada yerləşən suveren ada ölkəsidir. Hazırda ölkəni qadın prezident Həlimə Yaqub idarə edir. O, 14 sentyabr 2017-ci ildə Sinqapurun prezidenti seçilib. Həlimə Yaqub həm də Sinqapur tarixinə düşən ilk qadın prezident titulunu daşıyır.
Barbados
Barbados Şimali Amerikada yerləşir. Ölkənin rəhbəri Sandra Meysondur. O, 30 noyabr 2021-ci ildə Barbados prezidenti seçilib. Meyson 17 yanvar 1949-cu ildə anadan olub. 2021-ci ildən Barbadosun ilk prezidenti vəzifəsini icra edən siyasətçi ixtisasca hüquqşünasdır. Eyni zamanda təcrübəli diplomatdır.
O, 2018-ci ildən 2021-ci ilə qədər Barbadosun səkkizinci, eyni zamanda sonuncu general qubernatoru, bu vəzifəni tutan ikinci qadın idi. 20 oktyabr 2021-ci ildə Meyson Barbados parlamenti tərəfindən ölkənin ilk prezidenti seçilib və 30 noyabr 2021-ci ildə Barbados konstitusiya monarxiyasını dayandıraraq respublikaya çevrildikdən sonra vəzifəsinin icrasına başlayıb. Qeyd edək ki, prezidentliklə yanaşı, bir çox ölkələrdə Baş nazir vəzifəsini məhz xanım siyasətçilər icra edir.
6-09-2022, 20:17
Bakıda müdafiə nazirlərinin görüşü keçirildi
Sentyabrın 6-da müdafiə naziri general-polkovnik Zakir Həsənov Bakı Ekspo Mərkəzində keçirilən "ADEX 2022" dördüncü Azərbaycan Beynəlxalq müdafiə sərgisində iştirak etmək üçün ölkəmizə gələn Bosniya və Herseqovina Respublikasının müdafiə naziri cənab Sifet Podçiç ilə görüşüb. Bu barədə Müdafiə Nazirliyindən bildirilib. Görüşdə ölkələrimiz arasında hərbi əməkdaşlığın inkişaf etdirilməsi məqsədilə qarşılıqlı səfərlərin təşkili və digər məsələlər müzakirə edilib.
6-09-2022, 20:10
Prezident rektoru vəzifədən azad etdi
Prezident İlham Əliyev Azərbaycan Dövlət Aqrar Universitetinin rektoru ilə bağlı sərəncam imzalayıb. Butov.az xəbər verir ki, sərəncama əsasən, İbrahim Həsən oğlu Cəfərov Azərbaycan Dövlət Aqrar Universitetinin rektoru vəzifəsindən azad edilib. İbrahim Cəfərov 20 yanvar 1956-cı ildə Naxçıvan Muxtar Respublikasının Şərur rayonu Düdəngə kəndində anadan olub. 1980-1985-ci illərdə Azərbaycan Kənd Təsərrüfatı İnstitutunda ali təhsil alıb. 1993-cü ildən 2002-ci ilədək Azərbaycan Kənd Təsərrüfatı Akademiyasının Meyvə-tərəvəzçilik və üzümçülük fakültəsinin, sonra isə Aqronomluq və torpaqşünaslıq fakültəsinin dekanı işləyib. 2009-2013-cü illərdə Azərbaycan Dövlət Aqrar Universitetinin tədris işləri üzrə prorektoru vəzifələrində çalışıb. Azərbaycan Prezidentinin 25 iyul 2013-cü il tarixli sərəncamı ilə professor İbrahim Cəfərov Azərbaycan Dövlət Aqrar Universitetinin rektoru vəzifəsinə təyin edilmişdi. Kənd təsərrüfatı elmləri doktoru, professor İ.Cəfərov Azərbaycan Milli Elmlər Akademiyasının müxbir üzvüdür.
6-09-2022, 20:05
Azərbaycanlı iş adamları Ukraynaya qayıdır
“Artıq Ukrayna strateji baxımdan qalib gəlib, Rusiya 6 ay əvvəl qarşısına qoyduğu və 3 günə yerinə yetirəcəyini dediyi məqsədlərdən heç birinə nail ola bilməyib. Əksinə, bütün Ukrayna xalqı liderin - Prezident Volodimir Zelenskinin ətrafında birləşib, demoktarik dünyanın bütün güclü və zəif təmsilçiləri Ukrayna üçün həmrəy olub, günü-gündən yardımlarını artırırlar. Bu gün Ukraynanın yanında olmaq demokratiyanın, haqqın, ədalətin yanında olub, diktaturanın, zorakılğın, zülümün qarşısında olmaq deməkdir”. Bunu açıqlamasında Ukrayna Azərbaycanlıları Radasının (UAR) baş katibi Ceyhun Məmmədov bildirib. Onun sözlərinə görə, Rusiya Ukraynada istəyinə çata bilməyib: “Ukrayna Silahlı qüvvələri hər gün güclənir. Ukrayna ordusu həm texniki, həm taktiki, həm də motivasiya cəhətdən güclüdür. Hazırda İngiltərədə NATO standartlarında uyğun təlim görən 10 000 döyüşçünün və oktyabr ayında başlayacaq Amerikanın ayırdığı 50 milyard dollar həcmindəki “Lend-liz” yardımının gəlməsi müharibəni azad dünyanın xeyrinə həll edəcək. Müharibə bir xalqın verə biləcəyi ən ağır imtahandır”. Ceyhun Məmmədov, həmçinin Ukraynaya yaşayan azərbaycanlıların son durumunu açıqlayıb. Onun sözlərinə görə, azərbaycanlı iş adamlarının bəziləri artıq Ukraynaya qayıdıblar: “Biz bu hadisələri çox yaxşı bilirik və başa düşürük. Həm də qələbənin nə qədər möhtəşəm bir hiss olduğunu da bilirik. Ukraynada yaşayan azərbaycanlılar bu savaşda Ukrayna uğurunda mübarizə aparırlar. Şəhidlərimiz də var. Allah onlara rəhmət eləsin. Həm də sevindiricidir ki, haqq savaşında Azərbaycan dövləti də Ukraynanın yanındadır və davamlı humanitar yardımlarla öz dəstəyini verir. Ukrayna xalqı bu yardımları çox yüksək qiymətləndirir və xalqımıza, dövlətimizə təşəkkür edir. Soydaşlarımızın geri qayıdanlar var. İqtisadi vəziyyətin hələ düzəlməyib deyə, Ukraynanı tərk edən iş adamlarından bir neçəsi qayıdıb. Onların sayı çox azdır. Amma məktəblərin və universitetlərin açılması ilə əlaqədar olaraq az da olsa, geri qayıdanlar var. Onların dəqiq sayı və siyahısını tərtib eləmək hələ mümkün deyil”.
6-09-2022, 20:02
“Həcilər məşuqələrinə psixologiya mərkəzi açır” - Elmir Əkbərdən şok ittihamlar
"Bu gün Azərbaycanda psixologiya sahəsində vəziyyət ürəkaçan deyil". Bu barədə tanınmış psixoterapevt Elmir Əkbər bir neçə gün əvvəl loqopediya mərkəzində uşaqlara işgəncə verilməsi faktı ilə bağlı danışarkən bildirib. E.Əkbər qeyd edib ki, respublikanı bir-birinə qatan bu hadisə ölkədə birinci hal deyil: "Zaman-zaman belə hallar xırda şəkildə gündəmə gəlib. Mən bu camiədən xəbərdar olduğum üçün deyə bilərəm ki, belə hallar çox olub. Sadəcə bu dəfə sosial şəbəkələr müsbət sosial tənqid rolunu oynadığı üçün bu hadisəni gündəmdən çıxara bilmədilər". Onun sözlərinə görə, yaşanan bu hadisələrin səbəbi həcilərin öz məşuqələrinə, məmurların ağıldan kəm, "debil" qızlarına psixologiya mərkəzləri açmasıdır: “Əvvəllər bu cür qızlara gözəllik salonu açırdılar. İndi isə həmin şəxslərin bu mərkəzi işlətməyə mənəvi haqqının çatıb-çatmadığının fərqinə varmadan onlara psixologiya mərkəzi açırlar. Heyf ki, təhsil haqqında düşünmürlər. Başa düşmürlər ki, istənilən bir problemli insanla loqopedin, psixoloqun işləyə bilməsi üçün pasiyentə ilk növbədə psixoterapevt diaqnoz qoymalıdır. Həkim psixoterapevt kimdir? Azərbaycanda insanlar bunu hələ də bilmir. Dələduzlar da çalışır ki, bunu heç kəsə bildirməsinlər. Həkim psixoterapevtin diplomunda nevropatoloq, yaxud başqa ixtisas yazılmalı deyil. Sırf həkim-psixoterapevt yazılmalıdır. Həkim-psixoterapevtin diaqnostikasından sonra klinik psixoloq, yaxud psixoloq işə başlaya bilər. Panikatak, depressiya kimi problemlər olduqda əgər həkim psixoterapevt yoxdursa, onun seanslarını adi psixoloq yox, klinik psixoloq həyata keçirə bilər. Bütün bunlaradan Azərbaycanda kimin xəbəri var? Heç kimin. Ona görə də, vəziyyət belə bərbad, acınacaqlıdır”. “Ümumiyyətlə, bu hadisədə hamı bir məqamı yaddan çıxarır. Həmin savadsız, səriştəsiz, dırnaqarası mütəxəssis qəzəblənib uşağı sadəcə döymür, hətta ağıza alınmayacaq nalayiq sözlər işlədir. Həmin adam manyakdır. Bu onun verdiyi işgəncədən zövq aldığını göstərir. Başqa bir videoda müəssisənin rəhbərinin də eyni cür davrandığı görünür. Hələ videolarda əks olunmayan nələr yaşanır. Ümumiyyətlə, o kollektiv manyak, psikopat yığınıdır. Təkcə o müəssisədə yox, göbələk kimi çıxmış psixologiya mərkəzlərində vəziyyət belədir”,-deyə E.Əkbər vurğulayıb. Psixoterapevt qeyd edib ki, ümumiyyətlə günah valideynlərdədir: “Valideynlər özlərinə bir corab, ayaqqabı alanda ölçüb-biçib maraqlanıb alırlar. Bəs uşağını bu tip mərkəzlərə aparanda maraqlanırmı ki, orada fəaliyyət göstərən psixoloqların təhsili nədir, onlar hansı savada malikdir. Valideyn niyə maraqlanmayıb dələduzun, fırıldaqçının yanına gedir. Bu göstərir ki, valideyn öz övladına səhlənkar yanaşır. Yəqin, hər kəsin tanıdığı elə bir adam var ki, dünənə kimi başqa adam olub indi isə psixoloq kimi ortalığa çıxıb fəaliyyət göstərir. Nə oldu, Görüş filmində kişinin başına boranı düşən kimi, boranı düşür başlarına psixoloq olurlar? Corab toxuyan, yorğan sırıyan hamı özünü psixoloq adlandırır. Fahişəliklə məşğul olanlar belə bugün özünü psixoloq adlandırır. Dəhşətdir. Bu hal çox geniş yayılıb. Nəticədə həqiqi psixoloqların günü qara olub. Problem odur ki, Azərbaycanda psixologiya, psixoterapiya liqası hələ bu il yaranıb. Ona görə də, bu halların tənzimlənməsi belə bərbaddır. Nəticədə, çox savadlı, dəyərli psixoloqlar xaricə köçüb gedirlər. Çünki camaatın gözündən bu ixtisası çox pis şəkildə salıblar. İnsanlar sosial şəbəkələrdə hələ də fəaliyyət göstərən dırnaqarası psixoloqların yanına gedir. Elə bilirlər ki, elə hamı o cürdür. Düşünürəm ki, Liqa belələrini məhkəməyə verməlidir. Onların ucbatından psixoloqların adı batır”. Onun sözlərinə görə, bu gün Azərbaycanda psixoterapevtlərin sayı da çox azdır: “Mütəxəssislər barmaqla sayılacaq qədərdir. Onların da təhsil peoblemi var. Psixologiya, psixoterapiya elə bir elmdir ki, ona kitab oxumaqla yiyələnmək mümkün deyil. Kitab oxumaqla böyrək, ciyər həkimi olmaq olar, ancaq psixoterapiyanı, klinik psixologiyanı öyrənən adam mütləq Viktor Franka, Karl Qustoya, Vi Yonqaya, ya da Zigmund Freydə gedib çıxmalıdır. Əgər bu əlaqəlilik, bu zəncir yoxdursa, demək o heç vaxt peşəkar mütəxəssis ola bilməz. İnsanlar təəssüf ki, öz təhsillərinə yatırım etmək istəmirlər. İndi bir çoxu attestatla Türkiyəyə gedib oranın geridə qalmış universitetlərini bitirir. Dörd ildən sonra Azərbaycana böyük bir sürünün axını olacaq. Onlar hansı ağlın sahibidir, onlardan nə olacaq? Mən qızlardan abituriyent imtahanı götürülməməsinin tərəfdarıyam. Ancaq insanların intellektual qabiliyyəti yoxlanılmalıdır. Həkim olan, psixoloq olan adamın vəziyyəti çox bərbaddır. Yoxlanılmalıdır ki, onun bu sahədə olub, insanlarla işləməyə haqqı çatır? Yenə deyirəm ki, başqa sahədən olan insanların əksəriyyəti daha sonra onlayn şəkildə Ukraynadan saxta diplomlar alıblar. Yaxud Türkiyə universitetlərinə attestatla qəbul olub oxuyublar. İnsanlar ayıq olmalıdır. Hara, kimin yanına gedtiklərini bilməlidirlər. İşgəncə verən qadına gəlincə, o necə qadındır, necə anadır ki, dili ilə dərdini deyə bilməyən bir uşağa o cür zülm edir. Mən hesab edirəm ki, o heç öz övladlarına da yaxşı ana deyil. Bu tip insanlara başqalarına nümunə olması üçün ən ağır cəza verilməlidir”.
6-09-2022, 19:55
Azərbaycan nefti bahalaşdı
“Azeri Light” (CIF) markalı Azərbaycan neftinin qiyməti artıb. Butov.az-ın məlumatına görə, dünya bazarında “Azeri Light” (CIF) markalı Azərbaycan neftinin 1 barelə olan qiyməti 1,53 ABŞ dolları və ya 1,57% artaraq 99,06 dollar təşkil edib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!