Avqust ayının 26-da Prezident İlham Əliyev və birinci xanım Mehriban Əliyeva Abşeron rayonunda şəhid ailələrinə, müharibə əlillərinə və Vətən müharibəsi qəhrəmanlarına 300 mənzilin, həmçinin müharibə əlillərinə 50 avtomobilin təqdim edilməsi mərasimində iştirak etdilər. Bu, şəhid və qazi ailələrinə dövlətimizin diqqət və qayğısının təzahürü olmaqla bərabər sosial-mənəvi kontekstdə mühüm bir hadisədir. Dövlətimizin başçısının tədbirdəki çıxışı və verdiyi mesajlar isə tarixi strateji müstəvi baxımından son dərəcə əhəmiyyətlidir.

Bunu Milli Məclisin deputatı, “Yeni Azərbaycan” qəzetinin baş redaktoru Hikmət Babaoğlu deyib.

Deputat vurğulayıb ki, Azərbaycan Prezidenti tarixi yada salaraq əsirlər boyu xalqımıza qarşı necə məkrli siyasətin həyata keçirildiyinin və son 101 ildə baş verən hadisələrin üstündə xüsusi dayandı. Dövlətimizin başçısı ilk dəfə “Dağlıq Qarabağ” ifadəsinin işlədilməsindən və tarixi vətənimiz olan Zəngəzurun bölünməsinədək olan məsələlərə toxundu: “Prezident İlham Əliyev qeyd etdi ki, 1920-ci ildə sovet hakimiyyəti bizim tarixi torpağımız olan Zəngəzuru Azərbaycandan qoparıb Ermənistana birləşdirib. Ondan sonra həmin bölgədə azərbaycanlılar deportasiyaya məruz qalıblar. 1923-cü il iyul ayının 7-də isə bizim ərazimizdə süni bir qurum - Dağlıq Qarabağ Muxtar Vilayəti yaradılıb. Hazırki reallıq isə ondan ibarətdir ki, Müzəffər Ali Baş Komandanımız tərəfindən bu acı gerçəklik dəyişdirildi. Azərbaycan Prezidentinin 7 iyul 2021-ci ildə imzaladığı Sərəncamla tarixi ədalət bərpa edildi. Artıq uzun illər siyasi-iqtisadi və diplomatik müstəvidə manipulyasiya predmetinə, siyasi şantaj vasitəsinə çevrilən “Dağlıq Qarabağ” termini yoxdur. Azərbaycan ərazisində dağı və aranı ilə bütöv olan vahid Qarabağ iqtisadi rayonu və Qarabağ mahalı var”.

H.Babaoğlu qeyd edib ki, Şərqi Zəngəzur iqtisadi rayonunun yaradılması da önəmli məsələdir. Qərbi Zəngəzur isə ermənilərin nəzarətindədir. “Aranlı-dağlı vahid Qarabağ kimi gələcəkdə şərqli-qərbli Zəngəzuru da bütöv görəcəyik”, - deyə deputat vurğulayıb. Hazırki tarixi mərhələdə isə Azərbaycan Prezidenti İlham Əliyevin rəhbərliyi altında Qarabağı və Şərqi Zəngəzuru sözün həqiqi mənasında cənnətə çevrilməkdədir. Hər iki iqtisadi rayonda görülən böyük logistika və kommunikasiya işləri, yol–nəqliyyat və enerji kommunikasiyaları ən qısa zamanda bu torpaqlarımızda olan iqtisadi potensialdan da bəhrələnməyimizə imkan yaradacaq. Tezliklə insanlarımız öz ana yurdlarına qayıdacaqlar. Nəhayət ki, illərdir həsrəti ilə yaşadığımız “Böyük qayıdış” arzusu reallığa artıq çevriləcək.