23-09-2024, 16:39
Sabahdan külək güclənəcək - XƏBƏRDARLIQ
Küləkli hava şəraiti ilə bağlı sarı xəbərdarlıq verilib.
Bununla bağlı milli Hidrometeorologiya Xidməti məlumat yayıb.
Bildirilib ki, sentyabrın 24-ü gündüzdən 25-i axşamadək Bakıda və Abşeron yarımadasında, eyni zamanda bölgələrdə gözlənilən küləkli hava şəraiti ilə bağlı Milli Hidrometeorologiya Xidməti tərəfindən sarı xəbərdarlıq verilib.
Bakıda və Abşeron yarımadasında şimal-qərb küləyi sarı xəbərdarlığa uyğun olaraq arabir 13.9-20.7 m/san təşkil edəcək.
Sarı xəbərdarlığa uyğun olaraq Şabran, Xaçmaz, Siyəzən, Xızı, Salyan, Neftçala, Cəlilabad, Qobustanda fasilələrlə qərb küləyi əsəcək, küləyin sürəti 13.9-20.7 m/san təşkil edəcək.
23-09-2024, 16:21
“Qarabağ”ın futbolçuları İngiltərəyə yola düşdü
“Qarabağ”ın UEFA Avropa Liqasının əsas mərhələsinin ilk turunda “Tottenhem”lə oyun üçün İngiltərəyə səfər planı bəlli olub.
Klubdan verilən məlumata görə, Ağdam təmsilçisi Londona sentyabrın 24-də çarter reysi ilə yollanacaq. Komandanı aparan təyyarə saat 17:00-da Heydər Əliyev Beynəlxalq Aeroportundan havaya qalxacaq.
“Qarabağ”ın monteneqrolu müdafiəçisi Marko Veşoviç zədə səbəbindən matçda iştirak edə bilməyəcək.
Azərbaycan çempionu oyundan dərhal sonra Bakıya qayıdacaq.
Qeyd edək ki, sentyabrın 26-da Londondakı “Tottenhem Hotspur” stadionunda oynanılacaq görüş Bakı vaxtı ilə saat 23:00-da start götürəcək.
23-09-2024, 15:47
İlham Əliyev Pezeşkiana başsağlığı verdi
Azərbaycan Prezidenti İlham Əliyev İran İslam Respublikasının Prezidenti Məsud Pezeşkiana başsağlığı məktubu ünvanlayıb. Mətndə deyilir:
"Hörmətli cənab Prezident,
Təbəs şəhərindəki kömür mədənində baş vermiş partlayış nəticəsində çoxsaylı insan tələfatı barədə xəbər bizi olduqca sarsıtdı. Bu faciə ilə əlaqədar dərdinizi bölüşür, Sizə, həlak olanların ailələrinə və yaxınlarına, bütün İran xalqına şəxsən öz adımdan və Azərbaycan xalqı adından dərin hüznlə başsağlığı verir, yaralananlara şəfa diləyirəm. Allah rəhmət eləsin!".
23-09-2024, 15:36
"Quru sərhədlərin qapalı olmasının COP29-a təsir edəcəyini düşünmürük"
Quru sərhədlərin qapalı olması amilinin BMT-nin İqlim Dəyişikliyi üzrə Çərçivə Konvensiyasının 29-cu Tərəflər Konfransında (COP29) iştirakçı sayına təsir edəcəyi ehtimalını düşünmürük.
Bunu Azərbaycan Respublikası xarici işlər nazirinin müavini və COP29-un baş danışıqçısı Yalçın Rəfiyev deyib.
O vurğulayıb ki, quru sərhədlər Nazirlər Kabinetinin sərəncamında olan məsələdir.
“Həmin dövr üçün qiymətləndirmə müvafiq qurumlarımız tərəfindən aparılıb qərar veriləcək. Əvvəlki COP və digər beynəlxalq tədbirlərlə bağlı təcrübələrə əsasən, yerli sanitariya, epidemioloji vəziyyət həmişə ön planda tutulur. Ancaq ümumi qiymətləndirmə olaraq quru sərhədlərin qapalı olması amilinin COP29-dakı iştirakçı sayına təsir edəcəyi ehtimalını düşünmürük”, - Baş danışıqçı əlavə edib.
23-09-2024, 15:21
Türkiyə-Azərbaycan Universitetində ilk dərs günü - FOTO
Bu gün Azərbaycanda daha bir yeni ali təhsil müəssisəsi olan Türkiyə-Azərbaycan Universitetində tədris prosesi başlayıb.
Ali təhsil müəssisəsində hazırda 86 tələbə təhsil alır.
Xatırladaq ki, Türkiyə-Azərbaycan Universitetinin yaradılması ilə bağlı 2024-cü il fevralın 19-da Azərbaycanın Elm və Təhsil Nazirliyi ilə Türkiyənin Ali Təhsil Şurası arasında Anlaşma Memorandumu imzalanıb. Memorandumu Azərbaycanın elm və təhsil naziri Emin Əmrullayev və Türkiyənin Ali Təhsil Şurasının sədri Erol Özvar imzalayıblar.
Türkiyə-Azərbaycan Universitetinin (TAU) rəhbərliyi müvəqqəti olaraq Azərbaycan Texniki Universitetinin (AzTU) rektoru Vilayət Vəliyevə həvalə olunub.
23-09-2024, 15:01
İlham Əliyev Xocayevi qəbul etdi
Azərbaycan Respublikasının Prezidenti İlham Əliyev sentyabrın 23-də Özbəkistan Respublikasının Baş nazirinin müavini Cəmşid Xocayevi qəbul edib.
Qəbula görə minnətdarlığını bildirən Cəmşid Xocayev, ilk növbədə, Özbəkistan Respublikasının Prezidenti Şavkat Mirziyoyevin salamlarını və ən xoş arzularını dövlətimizin başçısına çatdırdı.
Prezident İlham Əliyev salamlara görə təşəkkürünü bildirdi, onun da salamlarını Şavkat Mirziyoyevə çatdırmağı xahiş etdi.
Cəmşid Xocayev vurğuladı ki, Prezident İlham Əliyevin uzaqgörən siyasəti nəticəsində Azərbaycanın əldə etdiyi böyük uğurlar Özbəkistanda sevinc hissi ilə qarşılanır. O, 20 Sentyabr - Azərbaycanın Dövlət Suverenliyi Günü münasibətilə təbriklərini çatdırdı.
Özbəkistan üçün Azərbaycanın mühüm dövlətlər sırasında layiqli yeri olduğunu deyən qonaq ölkəmizin həm regionda, həm də dünyada böyük nüfuza malik olduğunu vurğuladı. O qeyd etdi ki, Prezident İlham Əliyevin müdrik qərarları ilə azad olunmuş ərazilərimizdə, o cümlədən tarixi şəhərlər olan Şuşa və Xankəndidə həyata keçirilən böyük yenidənqurma və bərpa işləri Özbəkistanda maraqla izlənilir.
Cəmşid Xocayev iş adamları ilə birgə ölkəmizə səfərinin Azərbaycan və Özbəkistan prezidentlərinin tapşırıqlarının yerinə yetirilməsi ilə bağlı olduğunu diqqətə çatdırdı.
Prezident İlham Əliyev Özbəkistana dövlət səfərini, ondan əvvəl isə Özbəkistan Prezidentinin Azərbaycana səfərini məmnunluqla xatırladı. Özbəkistana dövlət səfəri zamanı iki ölkənin iş adamları ilə keçirdikləri görüşün əhəmiyyətinə toxunan Azərbaycan Prezidenti investisiya layihələri üzərində fəal iş aparılması istəyinin olmasını məmnunluqla qeyd etdi. Bu baxımdan Prezident İlham Əliyev yaradılmış birgə investisiya fondunun artıq konkret layihələrlə təmin olunduğunu vurğuladı.
Əziz qardaşı Şavkat Mirziyoyevlə qarşıdakı görüşlərini məmnunluqla gözlədiyini deyən Azərbaycan Prezidenti hər iki dövlət başçısının görüşlərinin əməkdaşlığın gündəliyində duran məsələlərin həyata keçirilməsi baxımından önəmini qeyd etdi.
Prezident İlham Əliyev Özbəkistan Baş nazirinin müavininin ölkəmizə səfərinin əməkdaşlığımızın genişləndirilməsi işinə xidmət edəcəyinə əminliyini bildirdi.
Görüşdə əlaqələrimizin perspektivləri ilə bağlı fikir mübadiləsi aparıldı.
23-09-2024, 14:59
Prezident bu icra başçısını işdən çıxardı
Asif Əsgərov Nəsimi Rayon İcra Hakimiyyətinin başçısı vəzifəsindən azad edilib.
Bu barədə Prezident İlham Əliyev sərəncam imzalayıb.
O, Azərbaycan Respublikası Prezidentinin 2 sentyabr 2015-ci il tarixli Sərəncamı ilə Bakı şəhəri Nəsimi Rayon İcra Hakimiyyətinin başçısı vəzifəsinə təyin edilib.
Asif Əsgərov 112 saylı Zaqatala seçki dairəsindən deputat seçilib.
23-09-2024, 14:52
Polad Bülbüloğlu səfir vəzifəsindən çıxarıldı
Polad Bülbüloğlu Azərbaycan Respublikasının Rusiya Federasiyasında fövqəladə və səlahiyyətli səfiri vəzifəsindən geri çağırılıb.
Prezident İlham Əliyev bununla bağlı sərəncam imzalayıb.
Xatırladaq ki, Polad Bülbüloğlu VII çağırış Milli Məclisin deputatı seçilib.
Polad Bülbüloğlu 4 fevral 1945-ci ildə Bakıda anadan olub. O, 2006-cı ildən Azərbaycanın Rusiyadakı fövqəladə və səlahiyyətli səfiri idi. Sonuncu parlament seçkilərində 124 saylı Şuşa-Ağdam-Xocalı-Xocavənd seçki dairəsindən deputat seçilib.
O, yeni parlamentdə Mədəniyyət komitəsinə rəhbərlik edəcək.
23-09-2024, 14:17
COP29-un Azərbaycanda keçirilməsi beynəlxalq nüfuzumuzu göstərən vacib amildir
COP29-un Azərbaycanda keçirilməsi 200-ə yaxın ölkə tərəfindən yekdilliklə qəbul edilmiş qərardır və bizim beynəlxalq nüfuzumuzu, hörmətimizi göstərən vacib amildir.
Bu fikri Prezident İlham Əliyev VII çağırış Milli Məclisin ilk iclasındakı çıxışında səsləndirib.
Xarici siyasətdə bundan sonra da geriyə heç bir addımın olmayacağını vurğulayan dövlətimizin başçısı bütün qitələrdə dostlarımızın sayının artdığını söyləyib. Deyib ki, biz indi - İkinci Qarabağ müharibəsindən və suverenliyimizi bərpa edəndən sonra daha fəal xarici siyasət aparacağıq.
23-09-2024, 14:13
Bu deputatlar Milli Məclisdəki vəzifələrini itirdilər
VII çağırış Milli Məclisin bu gün keçirilən ilk iclasında komitələrin sədrləri və müavinləri seçilib.
Yeni seçkilər bəzi komitələrdə dəyişikliklərə səbəb olub. Belə ki, VI çağırışda komitə sədri və ya müavin vəzifəsini tutan bəzi parlamentarlar bu dəfə həmin postdan kənarda qalıblar.
Ziyafət Əsgərov Milli Məclis sədrinin müavini seçildiyindən ona Müdafiə, təhlükəsizlik və korrupsiya ilə mübarizə komitəsinin sədri vəzifəsi də həvalə olunmayıb. Komitə sədri vəzifəsinə Arzu Nağıyev seçilib. Ötən çağırışda bu komitənin sədr müavini olmuş Hikmət Babaoğlu (Məmmədov) bu dəfə sıravi deputat kimi fəaliyyət göstərəcək. Müdafiə, təhlükəsizlik və korrupsiya ilə mübarizə komitəsinin sədr müaviniliyini Qüdrət Həsənquliyev edəcək.
İqtisadi siyasət, sənaye və sahibkarlıq komitəsinin sədri Tahir Mirkişilini bu vəzifədə Azər Əmiraslanov əvəz edib. Bu komitənin sədri müavini olmuş Əli Məsimli də yenidən görəvləndirilməyib. Əvəzində Azər Badamov İqtisadi siyasət, sənaye və sahibkarlıq komitəsində sədrin müavini seçilib.
Aqrar siyasət komitəsinə də yeni sədr müavini seçilib. Razi Nurullayev bu postda Sabir Hacıyevi əvəz edib. S.Hacıyev sıravi deputat olacaq.
Əmək və sosial siyasət komitəsinin sədr müavini Məlahət İbrahimqızını ilk dəfə parlamentə seçilən Böyük Azərbaycan Partiyasının sədri Elşad Musayev əvəzləyib.
Nurlan Həsənov Regional məsələlər komitəsində yeni sədr müavini olub. Ötən parlamentdə Regional məsələlər komitəsində sədr müavini olmuş Elşən Musayev vəzifəsini qoruya bilib. O bu dəfə Hüquq siyasəti və dövlət quruculuğu komitəsində sədrə müavinlik edəcək.
Elm və təhsil komitəsinin sədri Bəxtiyar Əliyev əvvəlki vəzifəsini itirib. Onun yerinə Anar İskəndərli seçilib. Elm və təhsil komitəsində sədr müavini də dəyişib. Bu posta ilk dəfə mandat qazanmış Fariz İsmayılov gətirilib. Komitə sədrinin əvvəlki müavini Musa Qasımli vitse-spiker seçildiyindən ona iki vəzifə həvalə olunmayıb.
Beynəlxalq münasibətlər və parlamentlərarası əlaqələr komitəsində də dəyişiklik olub. Sevinc Fətəliyeva bu dəfə komitə sədrinin müavini seçilə bilməyib. Onun yerinə bu vəzifə Nigar Arpadaraiyə qismət olub.
Mədəniyyət komitəsində həm sədr, həm də sədr müavini yenilənib. Polad Bülbüloğlu sədr, Günay Əfəndiyeva sədr müavini olub. Əvəzində Ülviyyə Həmzəyeva sədr müavini vəzifəsini itirib. Keçmiş sədr Fazil Mustafa isə İctimai birliklər və dini qurumlar komitəsinin sədri vəzifəsinə aparılıb.
Gənclər və idman komitəsinə yeni sədr və müavin seçilib. Şahin İsmayılov sədr, Könül Nurullayeva müavin olub. Keçmiş sədr Adil Əliyev və eks-müavin Mahir Abbaszadə ümumiyyətlə deputat seçilməyiblər.
İnsan hüquqları komitəsində də yeni müavin var – ilk dəfə mandat əldə edən Arzuxan Əlizadə. Keçmiş sədr müavini Tahir Kərimli bu dəfə heç sıravi deputat da ola bilməyib.
Təbii ehtiyatlar, energetika və ekologiya komitəsindəki dəyişiklik sədr müavini ilə bağldır. Belə ki, Asim Mollazadə bu dəfə sədr müavinliyindən kənarda qalıb. Əvəzində onun yerinə Fatma Yıldırım seçilib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!