25-01-2025, 14:15
HƏMAS 4 israilli qadını girovluqdan azad etdi
HƏMAS 4 israilli qadın girovu – Karina Ariyev, Daniella Gilboa, Naama Levi və Liri Albagı azad edib.
Bu barədə İsrail Müdafiə qüvvələri məlumat yayıb.
Qeyd edilib ki, girovlar Qəzzada Beynəlxalq Qırmızı Xaç Komitəsinin əməkdaşlarına təhvil verilib.
25-01-2025, 13:30
Ağsuda ağır qəza: sürücünün bel fəqərəsi sındı
Ağsu rayonunda 2000-ci il təvəllüdlü Sarızadə Nicat Nizami oğlu idarə etdiyi avtomobili yol kənarındakı maneəyə çırpıb. Yaralı təcili tibbi yardımın köməkliyi ilə rayon mərkəzi xəstəxanasına çatdırılıb. Lakin vəziyyəti ağır olduğu üçün Bakıda yerləşən xəstəxanalardan birinə gətirilib.
Tibbi Ərazi Bölmələrini İdarəetmə Birliyindən (TƏBİB) bildirilib ki, 2000-ci il təvəllüdlü şəxs (kişi cinsli) 24.01.2025-ci il tarixində saat 11:10 radələrində Ağsu Rayon Mərkəzi Xəstəxanasına hospitalizasiya olunub. 7-ci bel fəqərəsinin sınığı, başın sıyırılmış açıq yaraları diaqnozu ilə ona zəruri tibbi yardımlar göstərilib.
Qeyd edilibn ki, pasiyent daha ixtisaslı tibbi xidmət almaq üçün Respublika Neyrocərrahiyyə Xəstəxanasına hospitalizasiya olunub. Hazırda müalicəsi davam etdirilir, vəziyyəti stabil qiymətləndirilən şəxsin gün ərzində əməliyyat edilməsi nəzərdə tutulub.
25-01-2025, 13:26
Qazaxıstanın neft bazasında partlayış
Qazaxıstanın Jezkazğan şəhərində yerləşən neft bazasında üç xüsusi təyinatlı avtomobil yanıb.
Yanğınsöndürənlərin gəlişinə qədər partlayış baş verib və anqar uçub.
FHN-in yanğınsöndürənləri yanğını söndürüb və yanacaq çəninin yanmasının qarşısını alıblar. Yanğın 100 kvadratmetr ərazini əhatə edib. Neft bazasının xəsarət alan dörd əməkdaşı xəstəxanaya yerləşdirilib. Yanğının səbəbi araşdırılır.
25-01-2025, 13:12
Sabahın hava proqnozu
Bakıda və Abşeron yarımadasında yanvarın 26-da hava şəraitinin dəyişkən buludlu olacağı, arabir tutulacağı, gün ərzində bəzi yerlərdə arabir çiskinli yağış yağacağı gözlənilir.
Milli Hidrometeorologiya Xidmətindən verilən məlumata görə, şimal-qərb küləyi əsəcək.
Havanın temperaturu gecə 3-6° isti, gündüz 6-9° isti olacaq. Atmosfer təzyiqi 770 mm civə sütunundan 773 mm civə sütununa yüksələcək. Nisbi rütubət 70-80 % olacaq.
Azərbaycanın rayonlarında hava şəraiti əsasən yağmursuz keçəcək. Lakin gündüzdən bəzi yerlərdə arabir yağıntılı olacağı, dağlıq ərazilərdə qar yağacağı gözlənilir. Əsasən şərq rayonlarında intensivləşəcəyi ehtimalı var.
Bəzi yerlərdə arabir duman olacaq. Şərq küləyi əsəcək.
Havanın temperaturu gecə 1° şaxtadan 4°-dək isti, gündüz 7-11° isti, dağlarda gecə 3-8° şaxta, gündüz 2-7° isti olacaq.
25-01-2025, 12:59
Yeni Kaledoniyada yenidən Azərbaycan bayrağı dalğalandı
Yanvarın 23-24-də Kanakidə (Yeni Kaledoniya) Fransa müstəmləkəsi olan əraziləri özündə birləşdirən Beynəlxalq Dekolonizasiya Cəbhəsinin ilk konqresi keçirilib.
Konqresdə Yeni Kaledoniya, Fransız Polineziyası, Martinik, Qvadelup, Fransız Qvianası və Korsikanın müstəqilliyi uğrunda mübarizə aparan parlamentarilər, siyasi partiyalarının liderləri, qeyri-hökumət təşkilatlarının rəhbərləri, ictimai hərəkatların başçıları və digərləri iştirak edib.
Bakı Təşəbbüs Qrupunun nümayəndələrinə Konqresdə iştirak üçün viza verilməməsi səbəbindən təşkilat sözügedən konqresin işinə onlayn qatılıb. Bu xüsusda, BTQ-in rəhbəri Abbas Abbasov konqresdə video-formatda çıxış edib.
O, Azərbaycan Prezidenti İlham Əliyevin Kanak xalqına qarşı törədilmiş cinayətləri açıq şəkildə pislədiyini və müstəmləkə altında olan regionlara dəstəyini ifadə etdiyini xatırladıb.
Kanak xalqı minnətdarlıq əlaməti olaraq Azərbaycan bayrağını yenidən paytaxt Numea şəhərində ucaldıb.
Xatırladaq ki, Beynəlxalq Dekolonizasiya Cəbhəsi 2024-cü ilin iyulunda Bakı Təşəbbüs Qrupunun dəstəyi ilə Bakıda Fransanın son koloniyalarının nümayəndələri tərəfindən yaradılıb.
25-01-2025, 12:47
Dağda meyiti tapılan qazinin FOTOları
Ov tüfəngindən açılan atəş nəticəsində həyatını itirən Zaqatala rayon Axaxdərə kənd sakini 1993-cü il təvəllüdlü Hüseyn Məmmədovun fotoları yayılıb.
Xatırladaq ki, H.Məmmədovun meyiti Car kənd inzibati ərazisinə daxil olan Əlibəy zirvəsində aşkarlanıb.
Butov.az qazinin fotolarını təqdim edir:
25-01-2025, 12:03
Trampın neft hədəfi: supergüc olmaq, yoxsa sadəcə hədə-qorxu...
Dünya iqtisadiyyatının mühüm mövzularından biri enerji bazarlarının idarə edilməsi və neft qiymətlərinin dəyişkənliyidir. Davosda keçirilən Dünya İqtisadi Forumunda ABŞ Prezidenti Donald Trampın videobağlantı vasitəsilə etdiyi çıxış enerji bazarlarında təsir edib. Tramp, Səudiyyə Ərəbistanı və OPEC-ə müraciət edərək, neft qiymətlərinin aşağı salınmasını təklif edib.
Trampın fikrincə, əgər neftin qiyməti azaldılsa bu Ukrayna müharibəsinin dərhal sona çatmasına səbəb ola bilər. Trampın bəyanatlarına görə ABŞ-ın enerji siyasəti Rusiya üzərində təzyiq yaradaraq onu Ukrayna məsələsində danışıqlara məcbur etməlidir. ABŞ Prezidenti Rusiyanın müharibədən əvvəlki dövrə nisbətən daha çox neft və qaz satdığını qeyd edərək enerji bazarlarının bu müharibənin gedişatına təsir etməsinin vacibliyini vurğulayıb.
O, bu təsirin təkcə Ukraynada müharibəni dayandırmaqla kifayətlənməyəcəyini, eyni zamanda ABŞ-ı neft istehsalı sahəsində "super güc"ə çevirəcəyini vurğulayıb. ABŞ-ın dünyanın ən böyük neft və qaz ehtiyatlarına sahib olduğunu qeyd edən prezident bu resursları daha fəal istifadə etməyə hazır olduqlarını bildirib.
Trampın Davosdakı çıxışı neftin qiymətlərinə dərhal təsir edib. "Brent" markalı neftin qiyməti bir barrel üçün 78,29 dollara, WTI markalı neftin qiyməti isə 74,62 dollara enib.
Ekspertlər düşünür ki, neft qiymətlərinin aşağı salınması tələbi təkcə ABŞ iqtisadiyyatı üçün deyil, həm də qlobal enerji bazarı üçün mühüm nəticələr doğura bilər. Neft istehsalçıları bu təzyiqi nəzərə almalı və qiymət siyasətlərini buna uyğun tənzimləməli olacaq. Mütəxəssislər hesab edir ki, neft qiymətlərinin enməsi yeni enerji layihələrinin maliyyələşdirilməsini çətinləşdirə bilər, çünki enerji sektoru böyük sərmayələr tələb edir.
Səudiyyə Ərəbistanı və OPEC+ ölkələrinə neft qiymətlərini endirmək sərfəli deyil, çünki istehsalın artırılması halında bütün dünya enerji istehsalçıları, o cümlədən ABŞ zərər çəkər, – deyə Rusiyalı ekspert İqor Yuşkov bildirib. Yuşkov sual verir.
"Səudiyyə Ərəbistanı və OPEC-ə Trampın dediklərini yerinə yetirmələri lazımdırmı? Qiymətləri endirmək üçün OPEC+ ölkələri hasilat azaltmaq barədə sazişi pozmalı və maksimum istehsal etməlidir". Ekspertin fikrincə, bu vəziyyət OPEC+ ölkələrinə sərf etməz, çünki bu addım qiymətlərin 30-40 dollar/barel səviyyəsinə enməsinə səbəb ola bilər. Yuşkovun sözlərinə görə Trampın təklifi heç bir neft istehsalçısına sərfəli deyil, hətta ABŞ-ın özünə belə. Çünki ABŞ-da şist neftinin hasilatının xərcləri olduqca yüksəkdir.
Ekspert qeyd edir ki, "Səudiyyə Ərəbistanı, İraq və digər istehsalçılar hasilatı artırmaq üçün niyə öz gəlirlərini zəiflətsinlər? Həmişə az istehsal edib çox gəlir əldə etmək daha sərfəlidir.. Bu ölkələrin büdcələri neftin yüksək qiymətləri ilə tərtib edilir. Səudiyyə Ərəbistanında qeyri-rəsmi olaraq 85-87 dollar/barel arasında qiymət nəzərdə tutulub. Niyə o, qiymətləri 40 dollar səviyyəsinə endirsin?"
Ekspertlər bildirirlər ki, ABŞ Prezidenti Donald Trampın OPEC+ neft ixracatçıları ittifaqını neft qiymətlərini azaltmağa çağırması Respublikaçı liderin ABŞ-ı enerji baxımından dominant etmək hədəfi ilə ziddiyyət təşkil edir.
Kanada Biznes Şurasının məsləhətçisi Hezər Exner-Pirot bildirib ki, ABŞ-ın enerji dominantlığı məqsədi ilə “OPEC, neft qiymətlərini endirin” tələbi bir-birinə ziddir. "Əgər OPEC+ ölkələri istehsalı artırarsa, qiymətlər düşəcək və ABŞ-ın istehsalını məhdudlaşdırmalı olacaq. Çünki ABŞ-da neft hasilatı çox baha başa gəlir. Hazırda ABŞ-da neft hasilatı qiymətlərin 70 dolardan yüksək olduğu halda sərfəlidir.
Trampın təklifləri həm qlobal enerji bazarını, həm də ABŞ-ın enerji siyasətini yenidən formalaşdırma potensialına malik olsa da bu cür təzyiqlər iqtisadi sabitliyi təmin etməkdə çətinlik yarada bilər.
25-01-2025, 11:42
İran səfiri XİN-ə çağırıldı: Etiraz edildi
İranın Azərbaycandakı səfirliyinin müvəqqəti işlər vəkili Seyid Cəfər Ağayi Məryan Xarici İşlər Nazirliyinə (XİN) çağırılıb.
Bu barədə Azərbaycan XİN məlumat yayıb.
Məlumata görə, görüş zamanı son zamanlar hökumət dairələrinə yaxın İran mətbu orqanlarında Azərbaycan əleyhinə, ölkəmizin rəhbərliyinə qarşı açıq-aşkar şəkildə aparılan kampaniyaya etiraz bildirilib.
Xüsusilə, uzun fasilədən sonra Tehranda keçirilmiş “Azərbaycan Respublikası ilə İran İslam Respublikası arasında iqtisadi, ticarət və humanitar sahələrdə əməkdaşlıq üzrə Dövlət Komissiyasının” 16-cı iclasından və səmərəli rəsmi görüşlərdən sonra Azərbaycanın İrandakı səfirinin XİN-ə çağırılaraq əsassız şəkildə etiraz bildirilməsinin və İran mətbuatında kampaniyanın genişləndirilməsinin anlaşılmazlıq yaratdığı qeyd olunub.
Bununla yanaşı, Ərdəbildə toplantı zamanı Azərbaycana qarşı səsləndirilən təhqiramiz ifadələrə görə imam cümə Seyid Həsən Amelinin üzr istəməsi əvəzinə, Amelini dəstəkləyən kampaniya aparılması, Qəzvin imam cüməsi daxil bir sıra din xadimlərinin Azərbaycan əleyhinə fəaliyyətdə iştirak etməsinin qəbuledilməz olduğu diqqətə çatdırılıb.
Bu kimi addımların iki ölkə arasında münasibətlərə zərər vurmaq məqsədi daşıdığı, bunların qarşısının alınmasının zəruri olduğu vurğulanıb.
İranın müvəqqəti işlər vəkili bəzi xoşagəlməz bəyanat və hərəkətlərdən təəssüfləndiyini bildirib və məsələni ölkəsinin səlahiyyətli orqanlarına çatdıracağına söz verib.
25-01-2025, 10:47
Ağsuda əməliyyat: silahlı narkokuryer tutuldu
Ağsu Rayon Polis Şöbəsinin əməkdaşlarının həyata keçirdikləri əməliyyat zamanı narkotik vasitələrin qanunsuz dövriyyəsi ilə məşğul olan 61 yaşlı Taleh Həziyev və əvvəllər də məhkum olunmuş 60 yaşlı Mübariz Əzizov saxlanılıb.
Daxili İşlər Nazirliyinin mətbuat xidmətinin Şəki regional qrupundan bildirilib ki, onların idarə etdiyi avtomobildən 3 kiloqramdan artıq marixuana, “Kalaşnikov” markalı avtomat və patronlar aşkarlanıb. Saxlanılanlar narkokuryerliyə cəlb edildiklərini və Ağsu rayonunda gizlədilən narkotik vasitələri pul qarşılığında deyilən yerə aparmağa razılaşdıqlarını bildiriblər.
Faktla bağlı cinayət işi başlanılıb, araşdırmalar davam etdirilir.
25-01-2025, 10:09
Qazinin meyiti dağda tapıldı
32 yaşlı Zaqatala rayon sakini yüksək dağlıq ərazidə, məşhur Şamil yaylağında ölü tapılıb.
Zaqatala rayon Axaxdərə kənd sakini 32 yaşlı Hüseyn Nəcməddin oğlu Məmmədovun meyiti bu gün axşam saatlarında Böyük Qafqaz sıra dağlarının cənub ətəyinin Zaqatala rayonu Car kənd inzibati ərazisinin yüksək dağlıq hissəsində Şamil yaylağının yaxınlığında aşkar olunub. Hadisə ilə bağlı bir sıra detallar məlum olub.
Rayonun Axaxdərə kənd sakini, 1993-cü il təvəllüdlü Hüseyn Məmmədov dağlıq ərazidə yıxılıb və ehtiyatsızlıqdan üzərində daşıdığı ov tüfəngindən açılan atəş nəticəsində aldığı xəsarətlərdən ölüb.
Fakt araşdırılır.
Qeyd edək ki, H. Məmmədov 44 günlük Vətən müharibəsi iştirakçısı olub və qazidir.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!