“İnşaat bölməsindəki tənəzzül digər bazarları da çökdürürür. Ötən ildən inşaat bölməsində müşahidə olunan tənəzzülün təsirləri ilə bu ilin ilk 4 ayında tikinti materiallarının istehsalı 28,6 faiz, mebel istehsalı isə 14,2 faiz azalıb”.

Butov.az xəbər verir ki, bunu AzNews.az-a açıqlamasında iqtisadçı-alim Qubad İbadoğlu deyib. Onun sözlərinə görə, bunlarla yanaşı tikinti maşın və avadanlıqlar parkının yenilənmə sürəti də aşağı düşüb: “Hazırda mövsümi amillərin təsiri ilə nisbi canlanma müşahidə edilən bölmədə əsas sifarişlər fərdi xarakter daşıdığından qısa müddətli effekt yarada biləcək və uzunmüddətli dövrə gözlənilən tənəzzülün qarşısını ala bilməyəcək. Hazırda bu bölmə ciddi sərmayə qıtlığı, kapital qoyuluşları problemini yaşayır. İnvestisiya cəlbi bütövlükdə iqtisadiyyatda işgüzar mühitin yaradılması, tikintiyə icazənin verilməsi, inşa olunmuş tikintinin qeydiyyat prosedurlarının sadələşdirilməsi hesabına mümkündür”.

Q.İbadoğlu qeyd edir ki, Dünya Bankının "Biznesə necə başlamalı" hesabatında göstərilir ki, Azərbaycan tikintiyə icazənin alınması və onun qeydiyyatı ilə bağlı prosedurların mürəkkəbliyi, tələb olunan müddətinin uzunluğu və xərclərin bahalığına görə, dünyanın 189 ölkəsi arasında 114-cüdür: “Həmin hesabatda göstərilir ki, tikintiyə icazə alınması üçün orta hesabla 18 prosedur və 203 gün tələb olunur. Müqayisə üçün qeyd edək ki, bu göstərici üzrə Gürcüstan 11, Qırğızıstan 20-ci, Ermənistan 62-ci, Qazaxıstan 92, Türkiyə 98-ci yeri tutur. Nə qədər ki, Azərbaycanın reytinqi yaxşılaşmayıb, bir o qədər də inşaata yönələn xarici sərmayələr adları çəkilən qonşu dövlətlərə yönələcək”.

Ekspertin fikrincə, iqtisadiyyatın modenləşdirilməsi üçün başlıca bölmələrdən hesab olunan tikintinin problemlərinin həlli həmin bölmədə təxirəsalınmaz islahat tədbirlərindən asılıdır.