Fazil Mustafa tanıdığımız simalar arasında birsifətli, əqidəli siyasətçi olmaqla bərabər, həm də ləyaqətli millət vəkili, ləyaqətini qorumağa çalışan ziyalı, peşəkar jurnalistikanın tərəfini tutan qələm əhli, ən nəhayət Azərbaycanın ən çox dəyər veriləsi vətəndaşlarındandır. Ona açıq-gizli hücumlar nədənsə, ara vermir. Azərbaycana, Türkiyəyə uzanan caynaqlar bu iki ölkəni sevənlərə uzanan türk düşmənlərinin qanlı pəncələrindədir. Fazil bəy də tez-tez o caynaqlara tuş gəlir. Bunu onun növbəti yazısından da hiss etmək olur. Butov.az həmin yazını təqdim edir:

tərəfdar.az saytı barədə sabah həm Mətbuat Şurasına, həm də hüquq-mühafizə orqanlarına müraciət edəcəyəm. Bir orta məktəb şagirdi necə olur ki, atasının müəyyənləşdirdiyi hədəfləri nişan almaq məqsədilə açdığı sayta baş redaktor təyin olunur? Bu adam sayt işçilərinin maaşını hansı mənbədən verir? Məktəbə dərsə getmir, hansı hüquqi əsaslarla bu vəzifəni daşıyır? Baxıram, haçansa reketçilik və böhtançılıq fəaliyyətinə görə həbs yatmış, yaxud da redaksiyalardan qovulmuş və hələ də mediada barınan şəxslər müdrikcədinə müdafiə səngərində yer alaraq jurnalisti təhqir etmənin doğru olmadığını söyləyirlər. Bizim böhtançılıq fəaliyyətinə görə təhqir etdiyimizə kim jurnalist deyirsə, buyurub bunun əsaslandırmasını ortaya qoysun. Buyurun, bütün orta məktəb şagirdləri, kimin dədəsinin pulu varsa, hərəniz bir sayt açın, oğlunuz, qızınız ağzına gələni yazın və sonra da sərt cavabla qarşılaşanda "uşaqla işiniz olmasın" deyib məsələni ötüşdürsünlər. Hətta bütün redaksiyalardan qovulmuş birisi üzr istəməyi də bizə tövsiyə edir. Yəqin ki, bu adamlar barədə yeni bir termin işlədəcəyəm. Avtoş jurnalistika. Yəni Azərbaycanda olmalıdır Mətbuat Şurası, bir də ona alternativ olan Avtoş Jurnalistlər Assosasiyası. Bu adamlar artıq açıq reketlik edə bilmirlər, fürsət düşən kimi avtoşluqla məşğul olurlar. Azərbycan polisinin bu avtoşları necə zərərsizləşdirdiyinin kadrları ilə çoxunuz tanışsınız. Bu jurnalist-avtoşları zərərsizləşdirməyin yollarını Azərbaycanın həqiqətən savadlı, əxlaqlı və peşəkar jurnalistləri özləri tapmalıdırlar. Əvvəl bəhanə edirdilər ki, qarşı tərəfdən informasıyaya şərh ala bilmədiyimizə görə yoxlanmamış yazını vermişik. Hesab etmirəm ki, Azərbaycan jurnalistlərinə mənim qədər yaxın və açıq çox siyasətçi var, üstəlik də ən məhsuldar jurnalistlərimiz qədər məqalələr yazanlardan biriyəm, telefonum da hamıya açıq, mənim mövqeyimi öyrənmədən hansısa sifarişli yazını verilməsinin adı nədir? Azərbaycanın ən peşəkar və ciddi saytları ilə aramızda niyə hansısa bu biçimdə mübahisələr ortaya çıxmır? Sosial şəbəkədə olan peşəkar saytlarla niyə problemimiz yoxdur? Mənim siyasi fəaliyyətimlə bağlı, şəxsimlə bağlı istənilən araşdırma aparmağa hər kəsin haqqı var, ancaq böhtan yazmağa, təhqir etməyə, hansısa yalanı fakt olaraq sırımaq istəyənlərə qarşı cavab haqqımı istifadə edərkən məsləhət almağa ehtiyac duymuram. Hələ də bu bədxahlar anlaya bilmirlər ki, siyasətdə də, inancda da, şəxsi həyatda da Allaha şükür utanacağımız, baş aşağı gəzəcəyimiz heç bir məqam, epizod yoxdur. Hər əməlimizə görə, Allaha və Millətə hesabata çox-çox məsuliyyətlə yanaşan insanlarıq. Allah hamımızı böhtançıların şərindən qorusun!