Azərbaycançılıq ideyası və milli-mənəvi inkişaf mövzusunda yeni layihə


Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə “Müstəqilliyin 25 ili: Azərbaycançılıq ideyası və milli-mənəvi inkişaf mövzusunda araşdırmalar və tədbirlər” adlı yeni layihənin icrasına start verilib.

“Türk Dünyası İnfo” İctimai Birliyinin 4 ay müddətinə həyata keçirəcəyi bu layihənin məqsədi böyük dövlət və ictimai-siyasi xadim Heydər Əliyevin həyat və fəaliyyəti örnəyində Azərbaycançılıq ideologiyası əsasında dünya azərbaycanlılarının həmrəyliyi, mill-mənəvi dəyərlərin, ana dilinin qorunması, inkişafı istiqamətində siyasətin özəllikləri, bu sahədə görülmüş işlərə nəzər salmaq, araşdırmalar aparmaqdır.

Birliyin sədri Dəyanət Osmanlı AZƏRTAC-a bildirib ki, Azərbaycan xalqının müasir taleyində azərbaycançılıq ideyasının dövlət ideologiyasına çevrilməsi prosesini öyrənilməsi və araşdırılması xüsusilə mühüm bir əhəmiyyət kəsb edir. Azərbaycançılıq ideyasının tərkib hissəsi olan milli birliyin yaranması, ana dilinin təkmilləşdirilməsi yönümündə görülmüş mühüm işlərin yaradıcı gənc nəslə çatdırılmasına bir ictimai təlabat duyulmaqdadır. Bu baxımdan Azərbaycanın bölgələrində yaşayıb yaradan yazarlar və yaradıcı gənc nəslin nümayəndələri arasında ictimai əhəmiyyətli məsələlərin, o cümlədən milli-mənəvi dəyərlərimizin təbliği bu gün də önəmlidir. Layihə çərçivəsində “Azərbaycanlıların birliyi ideyası: dilimizin, bugünü və sabahı naminə” devizi altında “Müstəqilliyin 25 ili: Azərbaycançılıq ideyası və dil siyasəti” adlı kitabın təqdimatı və Azərbaycan dilinin qorunması və təbliği ilə bağlı görüş-müzakirələr keçiriləcək.

Sözügedən kitabın nəşri ilə Azərbaycançılıq ideologiyasının xalqımızın milli-mənəvi inkişafında, dilimizin qorunmasında və zənginləşməsində rolunu əks etdirən seçmə materiallar ictimaiyyətin diqqətinə təqdim olunacaq.

Butov.az