19-10-2024, 16:49
Mobil operatorlar müştərilərin razılığı olmadan bunu edə biləcək
Kredit tarixçəsi subyektlərinin (barəsində kredit tarixçəsi formalaşdırılan fiziki və ya hüquqi şəxsin) kredit tarixçələri ilə bağlı məlumatları razılıq almadan təqdim edən məlumat təchizatçılarının sırasına mobil telefon operatorlarının daxil edilir.
Bu, Milli Məclisin oktyabrın 22-də keçiriləcək iclasının gündəliyinə daxil edilən "Kredit büroları haqqında" qanuna təklif edilən dəyişiklikdə əksini tapıb.
Bununla da mobil telefon operatorları müştəriləri olan kredit tarixçəsi subyektlərinin məlumatlarını onların razılığı olmadan kredit bürolarına təqdim edə biləcəklər.
Qeyd edilib ki, bu, kredit təşkilatlarından kredit götürmək üçün müraciət edən şəxslərin ödəmə qabiliyyətini və borc öhdəliklərinin icra intizamını qiymətləndirmək imkanını artıracaq.
Hazırda analoji qayda (müvafiq məlumatların təqdim olunması üçün razılığın tələb olunmaması) kommunal xidmətləri göstərən müəssisələrə tətbiq olunur.
Layihəyə əsasən, kredit bürosuna verilən neqativ məlumatlar (kredit tarixçəsi subyektinin borc öhdəliyinin yarandığı vaxtdan onun ödəmə qabiliyyətini və borc öhdəliyinin icra intizamını mənfi xarakterizə edən hər hansı məlumat) barədə bildirişlər kredit tarixçəsi subyektinə kredit bürosu tərəfindən ötürüləcək. Bu dəyişikliyə əsasən kredit tarixçəsi subyekti onun barəsində kredit bürosuna daxil olan neqativ məlumatla bağlı ödənişsiz bildiriş almaq hüququna malik olacaqdır. Bildirişə neqativ məlumatı verən məlumat təchizatçısı barədə məlumat daxil ediləcək. Nəticədə borcalanlar hər hansı ehtiyatsızlıqdan, vaxt məhdudiyyətindən və s. oxşar xarakterli səbəblərdən yaranan neqativ məlumatlar barəsində xəbərdar olaraq, onları vaxtında aradan qaldıra biləcəklər.
Qeyd edilib ki, qanun layihəsi kredit bürolarında toplanan məlumatların dairəsini genişləndirilərək kredit tarixçəsi subyektlərinin ödəmə qabiliyyətinin və borc öhdəliklərinin icra intizamının daha geniş məlumatlar əsasında qiymətləndirilməsi imkanlarını artıracaq, həmçinin borcalanların onlar barəsində yaranan neqativ məlumatlar barəsində məlumatlandırılması təmin ediləcək və bu əsasda borcalanlar öz borclarını daha effektiv idarəetmə imkanları əldə edəcəklər.
19-10-2024, 16:32
Ərdoğan Şoltsla görüşdü - FOTO
Türkiyə Prezidenti Rəcəb Tayyib Ərdoğan Almaniya kanslerlə görüşüb.
Görüş Dolmabahçe sarayında baş tutub.
Görüşdə Türkiyənin xarici işlər naziri Hakan Fidan, Milli Kəşfiyyat Təşkilatının sədri İbrahim Kalın, Prezidentin kommunikasiyalar üzrə direktoru Fahrettin Altun və prezidentin xarici siyasət və təhlükəsizlik məsələləri üzrə baş müşaviri Akif Çağatay Kılıç iştirak edib.
19-10-2024, 16:30
"Biz sülhü Paşinyanla deyil, Ermənistanla imzalamaq istəyirik"
Azərbaycan Respublikası Prezidentinin xüsusi tapşırıqlar üzrə nümayəndəsi Elçin Əmirbəyov Almaniyada dərc edilən "Berliner Zeitung" qəzetinə müsahibə verib.
Elçin Əmirbəyov Azərbaycanla Ermənistan arasında normallaşma və sülh prosesini, həmçinin Bakı-İrəvan münasibətlərinə dair aktual sualları cavablandırıb.
Ermənistanın Almaniyadakı səfirinin İrəvanın artıq növbəti həftənin bazar ertəsi günü Bakı ilə sülh sazişi imzalamağa hazır olmasına dair bəyanatına münasibət bildirən Elçin Əmirbəyov bildirib ki, o bu bəyanatın səmimiliyinə şübhə edir.
"Günü sabah yarımçıq bir müqaviləni imzalamaq təklifi nəinki real deyil, həmçinin qəbuledilməz və aldadıcıdır. Tərəflər hələlik saziş layihəsinin açıq qalan bir neçə mühüm müddəasını razılaşdıra bilməyiblər, onlar olmadan sənəd xam və natamam olacaq. Sülhə nail olmaq yolunda əsas maneə Ermənistan konstitusiyasında öz əksini tapmış Ermənistan Respublikasının ölkəmizin beynəlxalq səviyyədə tanınmış suveren ərazisinə qarşı ərazi iddialarıdır. Bu mühüm məsələni görməzdən gəlmək otaqdakı fili görməməkdir. Bununla da Ermənistan beynəlxalq ictimaiyyəti çaşdırmaq istəyir, guya o, sülh prosesində konstruktiv mövqedə dayanıb. Əslində isə İrəvan vaxtı gecikdirir və sülh prosesini dalana dirəyir. Aydındır ki, Ermənistan Qərbdən, o cümlədən Avropa İttifaqından, ABŞ-dən və Avropa İttifaqının ayrı-ayrı üzv dövlətlərindən qeyri-məhdud miqdarda diplomatik, iqtisadi və hərbi yardım almağa başlayan kimi danışıqlarda konstruktiv iştirakda bütün marağını itirdi. Deyəsən, artıq sülhə nail olmaq Ermənistan üçün prioritet deyil", - deyə E.Əmirbəyov vurğulayıb.
Nəticənin əldə olunmasını sürətləndirmək məqsədilə tərəflər müvəqqəti olaraq Zəngəzur dəhlizinin açılmasını və Ermənistan konstitusiyasına düzəlişi təxirə sala bilərlərmi sualına cavab verən Azərbaycan Respublikası Prezidentinin xüsusi tapşırıqlar üzrə nümayəndəsi söyləyib ki, bu iki məsələ arasında paralel aparmaq tamamilə yanlışdır, çünki bu iki məsələ davamlı sülhün əldə olunması üçün əhəmiyyətinə görə fərqlənir:
"Ermənistanın Azərbaycan Respublikasına ərazi iddiaları ilk gündən münaqişənin əsas səbəbi olub və davamlı, birdəfəlik sülhə nail olmaq üçün onu kökündən həll etmək lazımdır. Bu isə Ermənistan Konstitusiyasına dəyişiklik edilmədən mümkün deyil. Konstitusiya indiki formada qalsa, sülh müqaviləsi qısamüddətli olacaq, çünki Azərbaycanla sülhə qarşı çıxan Ermənistan Respublikasının hər hansı yeni rəhbərliyi müqavilənin ən yüksək hüquqi qüvvəyə malik olan Konstitusiyaya uyğunsuzluğunu əsas gətirərək, onu sadəcə olaraq denonsasiya edəcək. Yəni Azərbaycan sülhü baş nazir Paşinyanla yox, Ermənistanla imzalamaq istəyir".
E.Əmirbəyovun sözlərinə görə, Azərbaycan zaman keçdikcə münaqişənin yenidən alovlanması və yeni faciələrə səbəb olmaması üçün hər hansı hüquqi boşluq saxlaya bilməz. Bu səbəbdən, uzunmüddətli Ermənistan-Azərbaycan qarşıdurmasının əsas səbəbi aradan qalxmalıdır.
"Zəngəzur dəhlizinə gəlincə, Azərbaycan hələ də onun açılmasına böyük əhəmiyyət verir, lakin onu sülh sazişindən kənara çıxarmağa razılıq verməyin əsas səbəbi bu problemin həll olunmamasından istifadə edərək Azərbaycana qarşı əsassız iddialarla çıxış edən bədxahların bəhanəsini əlindən almağa xidmət edir", - deyə Elçin Əmirbəyov fikrini tamamlayıb.
19-10-2024, 15:44
600-dən yuxarı bal toplayanların hərbi xidməti barədə yeni detallar
Yüksək intellektual potensiala malik gənclərin bütün digər sahələrdə olduğu kimi müdafiə sahəsində də geniş dəyərləndirilməsi fürsətlərinin yaradılması Müdafiə Nazirliyinin diqqət mərkəzindədir. Azərbaycan Ordusunun kadr potensialının gücləndirilməsi istiqamətində görülən fəaliyyətlərdə Milli Müdafiə Universitetinin də üzərinə önəmli vəzifələr düşür. Bu gün dəyişən dünya təhlükəsizliyi mühitində rəqabətli insan kapitalının formalaşdırılması, eləcə də insan resurslarının düzgün və məqsədyönümlü layihələrdə dəyərləndirilməsi fəaliyyəti Milli Müdafiə Universitetinin prioritet istiqamətlərindən biridir.
Bu hədəflərə nail olmaq məqsədilə Milli Müdafiə Universiteti Azərbaycan Ordusunda həqiqi hərbi xidmət keçən yüksək intellektli gənclərin seçilməsi, onların Müdafiə Nazirliyinin struktur qurum və bölmələrində fəaliyyətlərə cəlb edilməsi üzrə xüsusi layihəni həyata keçirir.
Milli Müdafiə Universiteti rektorunun təhsil məsələləri üzrə müşaviri Rəşad Əhmədov proqramın məqsədləri, şərtləri və gələcək perspektivləri barədə “Azərbaycan müəllimi”nə açıqlama verib.
O qeyd edib ki, ali məktəblərə qəbul olduqları zaman imtahanlardan 600 və daha yuxarı bal toplayan şəxslər, respublika və beynəlxalq fənn olimpiadalarının qalibləri, həmçinin “Times Higher Education World University Rankings” beynəlxalq reytinqində ilk 500 yerə sahib ali təhsil müəssisələrinin bakalavriat və magistratura proqramlarının məzunları layihədə yer alırlar. Burada məqsəd yüksək intelekt sahibi gənclərin potensial imkanlarından müdafiə fəaliyyətləri çərçivəsində milli maraqlar naminə yararlanmaq, eləcə də gənclərə xidmətlərini çəkdikləri müddətdə unikal təcrübə qazandırmaq fürsəti yaratmaqdan ibarətdir:
“Bu layihə iştirakçılara ciddi və unikal təcrübə qazandıracaq ki, bu da öz növbəsində onların gələcək karyera inkişafında təkanverici rol oynayacaq. Layihə iştirakçıları hərbi xidmətdən sonra Azərbaycan Ordusunda qalıb xidmət də edə bilərlər”.
Müşavir əlavə edib ki, Silahlı Qüvvələrin Ali Baş Komandanı cənab İlham Əliyevin gənclərin vətənpərvərlik ruhunda yetişdirilməsi istiqamətində tövsiyələrinin icrasına müvafiq olaraq onların müxtəlif elmi və praktiki layihələrə cəlb edilmələri layihənin önəmini artırır:
“Milli Müdafiə Universiteti tərəfindən həyata keçirilən bu proqram müdafiə sahəsində ixtisaslaşmaq və karyera qurmaq istəyən gənclər üçün geniş fürsətlər yaradır. Gənclər həm ölkənin müdafiə qabiliyyətinin artırılmasına öz töhfələrini verə bilmək, həm də gələcək karyeralarını qurmaq imkanına sahib olacaqlar. Layihənin digər önəmli tərəfi də orta məktəb şagirdlərinin bu layihə sayəsində təhsilə olan marağının artırılmasının təşviqidir”.
Müsahibənin sonunda Rəşad Əhmədov layihədə iştirak edən gənclərə inam və etimadın böyük olmasından və onların bu layihə sayəsində öz potensiallarını reallaşdıracaqlarından əminliyini ifadə edib.
19-10-2024, 15:38
Naxçıvanda 2 hərbi sursat tapıldı
Naxçıvan şəhər, Kəngərli rayon Çalxanqala kəndi ərazisində hərbi sursat aşkarlanıb.
Naxçıvan Muxtar Respublikası Fövqəladə Hallar Nazirliyindən verilən xəbərə görə, məlumatla əlaqədar Nazirliyinin pirotexnikləri hadisə yerinə cəlb edilib.
Kəngərli rayon Polis Şöbəsinin əməkdaşları ilə birgə ərazidə müvafiq təhlükəsizlik tədbirləri görüldükdən sonra hadisə yerinə baxış zamanı aşkar edilmiş sursatın 2 ədəd 85 mm-lik top mərmisi olduğu müəyyən edilib.
Sursat zərərsizləşdirilməsi üçün pirotexniklər tərəfindən ərazidən götürülərək kənarlaşdırılıb.
Hadisə yerində və ona yaxın ətraf ərazidə əlavə axtarış zamanı başqa hər hansı təhlükəli və ya şübhəli əşya aşkar edilməyib.
19-10-2024, 15:13
Bu qərar Laçına ciddi status qazandıracaq - Deputat
Oktyabrın 8-də keçirilən MDB Dövlət Başçıları Şurasının iclası zamanı Laçın şəhəri 2025-ci il üçün MDB-nin mədəniyyət paytaxtı elan olunub. Laçının mədəniyyət paytaxtı elan olunmasında şəhərdə aparılan qurucluq işlərinin, yenidənqurma və qayıdışın rolu böyük olub.
Milli Məclisin deputatı Ceyhun Məmmədov bildirib ki, MDB-nin 2025-ci ildə paytaxtının Laçın olması bu şəhərə öz töhfəsini verəcək, region daha da dirçələcək və inkişaf edəcək:
“Bu gün Qarabağda - Şərqi Zəngəzurda çox böyük quruculuq və abadlıq işləri həyata keçirilir. Konkret olaraq işğaldan azad olunmuş ərazilərin inkişaf planları var. Laçında, Zəngəzurda hava limanlarının inşası, həmin ərazilərdə yeni və müxtəlif obyektlərin tikintisi, yolların bərpa edilməsi önəmli məqamlardır. Bir müddət bundan əvvəl cənab Prezidentin həmin ərazilərə gedərək yeni tikililərin əsasını qoymasının şahidi olduq, bu da öz növbəsində Laçın - Şərqi Zəngəzur bölgəsində minlərlə insanın işləməsinə şərait yaradacaq. MDB-nin mədəniyyət paytaxtının Laçın olması görüləcək işləri daha da intensivləşdirir və gələcəkdə bu aspektdən şəhərdə keçiriləcək tədbirlər də öz növbəsində Laçına ciddi status qazandıracaq”.
19-10-2024, 14:50
Diaqnostikadan keçməyən bağça müəllimləri işdən çıxarılacaq? - RƏSMİ
Bu gün ilk dəfə dövlət məktəbəqədər təhsil müəssisələrində pedaqoji fəaliyyətlə məşğul olan tərbiyəçi-müəllim və metodistlərin peşəkarlıq səviyyəsinin və peşə yararlılığının yoxlanılması üçün diaqnostik qiymətləndirilmə həyata keçirilir.
Prosesin test imtahanı mərhələsi respublikanın müxtəlif şəhər və rayonları üzrə 28 imtahan mərkəzində təşkil olunur.
Ümumilikdə prosesdə azərbaycan, rus və gürcü dillərində tədris aparan 13 000-ə yaxın tərbiyəçi-müəllim və metodistin iştirakı nəzərdə tutulur.
Məktəbəqədər və Ümumi Təhsil üzrə Dövlət Agentliyinin Məktəbəqədər təhsilin təşkili şöbəsinin müdiri İlahə Rəsulova jurnalistlərə açıqlamasında deyib ki, məktəbəqədər təhsil müəssisələrində pedaqoji heyətin peşəkarlığının artırılması tədrisin keyfiyyətinə təsir edən əsas amillərdən biridir.
O bildirib ki, diaqnostik qiymətləndirmə ilə bağlı ölkə üzrə bütün məktəbəqədər təhsil müəssisələrində fəaliyyət göstərən pedaqoji heyətlə daha əvvəl maarifləndirici görüşlər keçirilib, onlayn formada 2 sınaq qiymətləndirilmə və seminarlar təşkil olunub.
"Diaqnostik qiymətləndirmənin test imtahanı mərhələsində iştirakçılar 4 istiqamət üzrə hazırlanmış 60 suala cavab verirlər. 120 dəqiqə ərzində məzmun və metodika, təhlükəsizlik, pedaqoji etika və əməkdaşlıq, özünüinkişaf mövzularını əhatə edən sualları cavablandırılır. Hər düzgün sual 1 (bir) balla qiymətləndirilir. Səhv cavablar və ya sualın cavabsız qoyulması 0 (sıfır) bala bərabər tutulur və düzgün cavablara təsir göstərmir. Ümumilikdə 60 ballıq qiymətləndirmə sistemi tətbiq edilir. Diaqnostik qiymətləndirmənin nəticəsi məktəbəqədər təhsil müəssisələrində çalışan pedaqoji heyətin təlim ehtiyaclarını müəyyən edəcək”.
Şöbə müdirinin sözlərinə görə, diaqnostik qiymətləndirmənin əsas məqsədi sertifikatlaşdırmaya hazırlıq və tərbiyəçi-müəllimlərin təlim ehtiyaclarını müəyyən etməkdir. O bildirib ki, burada heç bir inzibati tədbirdən söhbət getmir. "Dünən diaqnostik qiymətləndirilməyə hazırlıq məqsədilə simulyasiya təşkil edilib. Simulyasiya müxtəlif şəhər və rayonlar üzrə 28 mərkəzdə keçirilib".
19-10-2024, 13:52
Putin COP29-a dəvət edilib, amma...
Rusiya Prezidenti Vladimir Putin noyabrda Bakıda keçiriləcək COP29 tədbirində iştirak etməyəcək.
Bu barədə məlumatı Azərbaycan hökumətindəki mənbələrə istinadən “BBC Azərbaycanca” yayıb. Bildirilib ki, Rusiya sözügedən tədbirdə Baş nazir səviyyəsində təmsil olunacaq.
Bununla yanaşı, mənbələr Rusiya liderinə rəsmi dəvət göndərildiyini də təsdiqləyiblər.
Bildirilir ki, Rusiya tədbirdə Baş nazir səviyyəsində təmsil olunacaq.
Qeyd edək ki, noyabrın 11-22-də Bakıda COP29 iqlim konfransı keçiriləcək.
Kremlin mətbuat katibi Dmitri Peskov bildirib ki, Putinin COP29 tədbirində iştirakı ilə bağlı hələ qərar qəbul edilməyib. O, Rusiyanın mütləq şəkildə tədbirdə təmsil olunacağını vurğulayıb. “Hələ heç bir qərar verilməyib”, - Kreml nümayəndəsi "RİA Novosti"nin Vladimir Putinin konfransda iştirakı ilə bağlı sualına cavab verib.
Bir neçə gün əvvəl Rusiya Prezidentinin köməkçisi, prezidentin iqlim məsələləri üzrə xüsusi nümayəndəsi Ruslan Edelgeriyev jurnalistlərə açıqlamasında bildirib ki, Putin və ya baş nazir Mixail Mişustin noyabrın 11-22-də Bakıda keçiriləcək BMT-nin COP29 iqlim konfransında iştirak edə bilər.
“Mən prezidentin fərmanı ilə Rusiya nümayəndə heyətinə rəhbərlik edirəm. Amma ümid edək ki, bu il onlardan biri - ya prezident, ya da hökumət sədri olacaq. Azərbaycan strateji əhəmiyyətli tərəfdaşdır və mən əlbəttə ki, statusun daha yüksək olmasını, açılışda ya prezident, ya da hökumət sədrinin olmasını istərdim, ondan sonra danışıqların əsas hissəsini məntiqi sonluğa çatdırardım”, - Edelgeriyev qeyd edib.
19-10-2024, 13:28
Tağı Əhmədov dəfn olundu - FOTO
“Bakı Metropoliteni” QSC-nin sabiq rəisi Tağı Əhmədov dəfn olunub.
Mərhum Yeni Günəşli qəbiristanlığındada torpağa tapşırılıb.
Dəfn mərasimində T.Əhmədovun qohumları, keçmiş iş yoldaşları, ictimai xadimlər və media nümayəndələri iştirak ediblər.
19-10-2024, 13:18
Türkiyə bölgədə müharibə istəmir - Hakan Fidan
Türkiyə bölgədə müharibə istəmir.
Bunu Türkiyənin xarici işlər naziri Hakan Fidan İstanbulda İranın xarici işlər naziri Abbas Əraqçi ilə birgə mətbuat konfransında bildirib.
Nazir vurğulayıb ki, müharibənin bütün bölgəyə yayılma riskini görməzdən gəlmək olmaz:
“Türkiyə olaraq bölgəmizdə müharibə istəmirik. Bizim məsələlərə yanaşmamızda sağlam düşüncə olmalıdır. Mövcud gərginliyi azaltmaq üçün Qəzzada dərhal atəşkəs elan edilməlidir. İsrail Livana qarşı hücumlarına son qoymalıdır. İsrail bütün təcavüzkar davranış və təxribatlardan əl çəkməlidir. Türkiyə və İran bu bölgədə əbədi olaraq var olacaqlar. Biz bütün sahələrdə ikitərəfli münasibətlərimizi yaxşılaşdırmaq və regional məsələlərdə əməkdaşlığımızı artırmaq üçün səylərimizi davam etdirəcəyik. Son hadisələr bu əməkdaşlığın vacibliyini vurğulayıb".
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!