Dünən, 17:47
Türkiyədə dönərdən 300 nəfər zəhərləndi
Türkiyənin Kocaeli şəhərində 300-dən çox insan toyuq dönərindən zəhərlənib.
Hadisə Körfəz rayonunda qeydə alınıb.
Zəhərlənənlər xəstəxanaya yerləşdirilib, ikisinin vəziyyəti ağırdır.
Müəssisənin fəaliyyəti dayandırılıb. Hadisə ilə bağlı araşdırma başladılıb.
Dünən, 17:33
Azərbaycanda bu ailələrə “uşaq pulu” veriləcək
Bu gün Azərbaycan əhalisinin 99 faizi “uşaq pulu” istəyir. Bu sahədə müəyyən müsbət siqnallar var.
Bunu müsahibəsində Milli Məclisin deputatı Razi Nurullayev deyib.
Deputatın sözlərinə görə, artıq Əmək və Əhalinin Sosial Müdafiə Nazirliyi ilə ümumi razılığa gəlinib və qısa müddətdən sonra üçuşaqlı ailələrə “uşaq pulunun” verilməsinə başlanılacaq.
O qeyd edib ki, prosesin bu il və ya gələn ildən başlayacağı gözlənilir.
"Üçuşaqlı ailələrə “uşaq pulu”nun verilməsi həm Milli Məclisin Əmək və sosial siyasət komitəsi səviyyəsində, həm də Sahil Babayevin əmək və əhalinin sosial müdafiəsi naziri olduğu müddətdə müzakirə edilib. Hazırkı yeni nazirlə də bu sahədə müzakirələr gedir”, - deputat bildirib.
R. Nurullayev üçuşaqlı ailələrə “uşaq pulu”nun verilməsinin əhəmiyyətindən də danışıb:
“Ölkədə üçuşaqlı ailələrə “uşaq pulu”nun verilməsi təmin olunacaq, çünki araşdırmalar da göstərir ki, 2016-cı ildən etibarən Azərbaycanda doğulan uşaqların sayında ciddi azalma müşahidə edilir, eyni zamanda 2022-ci ildən etibarən hər il 25-30 mindən daha az uşaq doğulur. Bu da o deməkdir ki, bir neçə ildən sonra birinci sinifə gedən uşaqların sayında belə ciddi azalma görəcəyik”.
Deputat sonda onu da vurğulayıb ki, uşaqların sayının azalması ölkəni demoqrafik problemlə üz-üzə qoya bilər. Bunun üçün də ailələrin uşaq dünyaya gətirməsinə marağı artırmaq və problemin qarşısını əvvəlcədən almaq lazımdır.
Qeyd edək ki, Azərbaycan qanunvericiliyində 6 və daha çox uşağı olan ailələr çoxuşaqlı ailə hesab olunur. Bir müddət əvvəl parlamentdə çoxuşaqlı ailə anlayışının dəyişdirilməsi təklif edilib. Belə ki, 3-dən çox uşağı olan ailələrin çoxuşaqlı ailə hesab edilməsi təklif olunur.
Hazırda ölkəmizdə beşdən çox uşağı olan qadınlara dövlət tərəfindən aylıq hər uşağa görə 105 manat məbləğində müavinət verilir. Bu o deməkdir ki, məsələn, ailədə 18 yaşına çatmamış 6 uşaq varsa, həmin ailəyə aylıq 630 manat müavinət ödənilməlidir. Son beş ildə bu müavinətin məbləği 3,5 dəfə artırılıb.
2024-cü il 1 yanvar tarixinə beşdən çox uşağı olan 2,6 min qadına 11,5 min uşaq üçün sosial müavinət ödənilir.
Çoxuşaqlı ailələrə sosial dəstək verilməsinin səbəbləri müxtəlifdir. Ekspertlər deyir ki, əhalinin azalması cəmiyyətdə sosial sabitliyə və iqtisadi inkişafa xələl gətirir, ona görə də dövlət çoxuşaqlı ailələrə dəstək verir. Əsas hədəf doğum nisbətinin artırılmasıdır və bunun üçün əhali dəstək paketləri ilə daha çox uşaq dünyaya gətirməyə təşviq edilir.
Dünən, 17:15
Müəllimlərin attestasiyası: hər üç müəllimdən biri...
Mədəniyyət Nazirliyinin sistemindəki musiqi və incəsənət məktəblərində çalışan təhsilverənlərin peşəkar bilik, bacarıq və səriştələrinin qiymətləndirilməsi məqsədilə müəllimlərin attestasiyasına başlanılıb.
Nazirlikdən bildirilib ki, attestasiya zamanı 650 nəfər, başqa sözlə hər üç müəllimdən biri, ən yüksək nəticə ilə attestasiya prosesindən uğurla keçib.
Nazirlikdən bildirilib ki, attestasiya prosesinin ilk mərhələsində iştirak edən 47 məktəbdən 15-nin müəllimlərinin 90 faizi attestasiyanı uğurla başa vurub:
"492 müəllim attestasiya komissiyalarının qiymətləndirməsinə əsasən tutduğu vəzifəyə uyğun hesab edilməyib. Onlardan 37 nəfər Əmək Məcəlləsinin 79-cu maddəsinin təsir dairəsinə düşdüyünə görə, əmək müqavilələrinə xitam verilməyəcək. Attestasiya prosesi tam videomüşahidə ilə şəffaf şəkildə keçirilib, iştirakçı müəllimlərin cavabları tam arxivləşdirilib".
Məlumatda qeyd olunub ki, yaşı 60-dan yuxarı olan, habelə ağır xəstəliklərdən əziyyət çəkən təxminən 40 nəfərə alternativ iş yeri təklif olunacaq:
"Attestasiyada iki lehinə, üç əleyhinə səslə tutduğu vəzifəyə uyğun hesab edilməyən 112 nəfər təlimlərə cəlb ediləcək və müəyyən müddətdən sonra təşkil olunacaq imtahanın nəticələrinə əsasən əvvəlki iş yerlərinə qəbul edilə biləcəklər. Attestasiyada uğur qazanmayan, lakin gələcəkdə daha yaxşı nəticələr əldə etmək potensialı olan müəllimlərin (təxminən 300 nəfər) işə qəbul imtahanlarında iştirak etmək hüququ saxlanılır. Onlar MİQ imtahanlarında yüksək nəticə göstərməklə məktəblərə qayıtmaq imkanı əldə edəcəklər".
Həmçinin bildirilib ki, yaşı 60-dan yuxarı olan müəllimlərin əksəriyyəti də attestasiya prosesində müsbət qiymətləndirilib:
"Bu, yaşlı müəllimlərimizin təcrübəsinin və müasir pedaqoji yanaşmalara uyğunlaşmalarının təhsildəki mühüm rolunu bir daha sübut edir. Attestasiyada uğur qazanmış müəllimlər arasında Bakı şəhəri üzrə Qara Qarayev adına Mərkəzi İncəsənət Məktəbi və Rəşid Behbudov adına 2 nömrəli Onbirillik Musiqi Məktəbi kimi məktəblərin müəllimləri xüsusilə yaxşı nəticələr əldə ediblər".
Nazirlik məlumata əlavə edərək yerli təhsili idarəetmə orqanlarında xüsusi komissiyalar yaradılacağını da vurğulayıb:
"Bu komissiyalar vasitəsilə uğur qazanmayıb, lakin gələcəkdə inkişaf edəcək müəllimlərə dəstək veriləcək, sosial statusları mərhələli şəkildə qiymətləndiriləcək və alternativ iş yerlərinə yönləndiriləcəklər. Bu müsbət nəticələr, Azərbaycan təhsilinin daha da inkişafı üçün atılan mühüm addımları göstərir və gələcəkdə daha keyfiyyətli təhsil təminatı baxımından əhəmiyyətli irəliləyişlərə yol açacaq".
Dünən, 17:00
Gürcüstandan Azərbaycana gələn maşında xeyli dərman aşkarlandı
Gürcüstandan Azərbaycana gələn maşında xeyli miqdarda dərman preparatı aşkar edilib.
Bu barədə Dövlət Gömrük Komitəsinin Mətbuat və İctimaiyyətlə Əlaqələr İdarəsi məlumat yayıb.
Tovuz Gömrük İdarəsinin "Qırmızı körpü" gömrük postunda Gürcüstandan gələn yük nəqliyyat vasitəsinə gömrük baxışı keçirilib.
Yoxlama zamanı nəqliyyat vasitəsinin dartıcısında gömrük nəzarətindən gizlədilmiş 3 920 ədəd "Trittico" adlı dərman preparatı aşkar edilib.
Faktla bağlı araşdırma aparılır.
Dünən, 16:56
Goranboyda dəhşət - Anası şagirdi döymək istədi, müəllimi bıçaqladı
3 aprel tarixində Goranboy rayonu Hazırəhmədli kənd tam orta məktəbdə insident baş verib. 2-ci sinifdə oxuyan şagirdlərdən birinin valideyni məktəbə daxil olaraq övladını döyməyə və xəsarət yetirməyə cəhd edib.
Gəncə-Daşkəsən Regional Təhsil İdarəsindən bildirilib ki, sinif rəhbəri şagirdi qorumaq istəyən zaman valideyn müəllimə xəsarət yetirib.
"Dərhal məktəb rəhbərliyi tərəfindən təcili tibbi yardım xidmətinə və hüquq-mühafizə orqanlarına məlumat verilib. Müəllimə müvafiq tibbi yardım göstərilib. Şagirdin valideyninin uyğunsuz davranışı ilə bağlı hüquq-mühafizə orqanları tərəfindən araşdırma aparılır.
Qeyd edirik ki, şagirdin psixoloji durumu məktəb rəhbərliyi və idarə tərəfindən izlənilir. Təhsil müəssisəsinin psixoloqu tərəfindən profilaktik tədbirlərin həyata keçirilməsi üçün müvafiq tapşırıqlar verilib", - açıqlamada qeyd olunub.
***
16:05
Goranboyun Hazırəhmədli kənd tam orta məktəbində valideyin müəllimi bıçaqlayıb.
Hadisəni törədən şəxs kənd sakini 25 yaşlı Əfsanə Rzayeva olub.
O, Hazırəhmədli kənd tam orta məktəbinin inzibati binasına daxil olaraq əlindəki bıçaqla məktəbin müəlliminin əlinə xəsarət yetirib.
Məlumata görə, Ə.Rzayeva şagirdlərə də xəsarət yetirməyə cəhd edib.
Hadisə ilə bağlı Daxili İşlər Nazirliyinin Gəncə regional qrupundan bildirilib ki, Goranboy Rayon Polis Şöbəsinə rayonun Hazırəhmədli kənd sakini olan bir nəfər qadın valideyinin kəsici-deşici alətlə məktəbə gəlməsi, övladını döyməsi və onu sakitləşdirmək istəyən müəllimə xəsarət yetirməsi barədə məlumat daxil olub. Polis əməkdaşları məktəbə gələrək müvafiq tədbirlər həyata keçirib. Hadisəni törətməkdə şübhəli Ə. Rzayeva saxlanılıb, faktla bağlı araşdırmalar davam etdirilir.
Dünən, 16:38
Sahil Babayev iki rəisi işdən çıxardı
Maliyyə Nazirliyində iki yüksəkvəzifəli şəxs işdən azad edilib.
Qurumun Aparatının strukturunda və ştat vahidlərinin struktur bölmələri üzrə bölgüsündə təkmilləşdirmələr aparılıb.
Eyni zamanda, Maliyyə Nazirliyinin Dövlət Maliyyə Nəzarəti Xidmətinin rəisi Elman Piriyev və nazirlik yanında Dövlət Xəzinədarlıq Agentliyinin 1 saylı Xəzinədarlıq İdarəsinin rəisi Nadir Qarayevin dövlət qulluğuna öz arzuları ilə xitam verilib.
Məlumat Maliyyə Nazirliyinin İctimaiyyətlə əlaqələr və vətəndaş müraciətləri ilə iş şöbəsi tərəfindən təsdiq edilib.
Dünən, 16:35
Azərbaycan-Almaniya münasibətlərində yeni səhifə
Azərbaycanın Avropada etibarlı tərəfdaş kimi münasibətlərini ildən-ilə inkişaf etdirdiyi ölkələrdən biri də Almaniyadır. Dünya iqtisadiyyatında və siyasətində mühüm rol oynayan ölkələrdən biri kimi Almaniya Federativ Respublikası da öz növbəsində Azərbaycanla bütün sahələrdə əməkdaşlığın genişləndirilməsinə tərəfdardır.
Hər iki ölkə ötən əsrin sonlarından başlayaraq bir sıra mühüm sazişlər imzalamaqla əlaqələrin inkişafına əhəmiyyətli dərəcədə zəmin yaradıb. Ümummilli lider Heydər Əliyevin Almaniyaya səfərləri ölkələrimiz arasında qarşılıqlı siyasi-iqtisadi əlaqələrin inkişafına təkan verib.
Prezident İlham Əliyevin Avropa İttifaqı ölkələri ilə, xüsusilə də Avropanın ən inkişaf etmiş ölkəsi olan Almaniya ilə qarşılıqlı məkdaşlığı intensivləşdirməsi Azərbaycan-Almaniya münasibətlərini daha da zənginləşdirib. Son illərdə bu münasibətlər siyasi-iqtisadi mahiyyət kəsb etməklə yanaşı həm də humanitar, sosial, elm, təhsil, səhiyyə, idman, turizm, infrastruktur sahələrini əhatə edərək ölkələrimiz arasında əməkdaşlıq sferasının daha da genişləndirilməsini təmin edib.. Tərəflər arasında sıx təmasların genişlənməsi isə Avropa strukturları çərçivəsində əməkdaşlığın miqyasına da öz müsbət təsirini göstərib.
Bu günlərdə Almaniya Prezidenti Frank-Valter Ştaynmayerin Azərbaycana rəsmi səfəri və qarşılıqlı əməkdaşlıq perspektivləri ilə bağlı Prezident İlham Əliyevlə Almaniya prezidenti arasında aparılan müzakirələrin də Azərbaycan – Avropa əlaqələrinə əlavə stimul verəcəyi şübhəsizdir. Rəsmi səfər çərçivəsində aprelin 2-də Azərbaycan Prezidenti İlham Əliyevin Almaniya Prezidenti Frank-Valter Ştaynmayer ilə təkbətək və geniş tərkibdə görüşləri keçirilib, daha sonra Prezidentlər mətbuata bəyanatlarla çıxış edib və jurnalistlərin suallarını cavablandırıblar.
“İkitərəfli münasibətlər tarixində bu, Almaniya Prezidentinin Azərbaycana birinci rəsmi səfəridir və əminəm ki, səfərin yekunları ölkələrimizi bir-birinə daha yaxın edəcəkdir”, - deyən dövlət başçımız Almaniya Prezidentinin Azərbaycana bu səfərinin çox müsbət nəticələrinin olacağından əminliyini vurğulayıb.
Öz növbəsində mətbuata bəyanatında Almaniya Prezidenti Frank-Valter Ştaynmayer bildirib ki, “Qarabağ Azərbaycandır, bu, rəsmi Berlinin birbaşa və aydın mövqeyidir”. “Biz həmişə demişik ki, bu, sizin (Azərbaycan) ərazinizdir və bu gün Almaniyanın bu mövqeyini təsdiqləyirik”.
Prezident İlham Əliyev mətbuata bəyanatında bildirib ki, bu səfər ölkələrimiz arasında iqtisadi tərəfdaşlıq, təhsil mübadiləsi və bütün sahələrdə əlaqələrimizə yeni müsbət təkan verəcək.
Mətbuata bəyanatında dövlətimizin başçısı bildirib ki, “İqtisadi sahədə əldə edilmiş nəticələr bizi təbii olaraq ruhlandırır. Çünki bu ilin yanvar-fevral aylarında bizim ticarət dövriyyəmiz təxminən üç dəfə artıb”.
Azərbaycanda yaradılmış əlverişli biznes mühiti alman şirkətlərinə ölkəmizdə fəaliyyətini daha da genişləndirmək imkanı verir. Almaniyadan Azərbaycana əsasən avtomobillər, dəmir və polad məmulatları, istehsal avadanlıqları gətirilir. Hazırda Azərbaycanda 100-ə yaxın alman müəssisəsi xüsusi fəallıq və yüksək məhsuldarlıqla çalışır. Bunlardan “Simens”, “Ferrosstal”, “İnterselekt”, “Mersedes Bens” kimi iri şirkətlər Azərbaycanda uğurlu və səmərəli biznes fəaliyyəti göstərirlər.
Bu gün Azərbaycan Avropanın enerji təminatında açar rolunu oynayan dövlətlərdən biri kimi qəbul olunması, xüsusilə son illər Avropanın enerji təminatında Azərbaycanın mövqeyinin möhkəmlənməsi Almaniya hökumətini respublikamızla daha dərin təməllərə əsaslanan əməkdaşlığa sövq edir. O cümlədən, Almaniya özünün enerji təhlükəsizliyinin təmin olunmasında Azərbaycanın təşəbbüskarı olduğu enerji marşrutlarının əhəmiyyətini yüksək dəyərləndirir və ölkəmizin enerji resurslarından faydalanmaq niyyətini bəyan edir.
Görüşdə İlham Əliyev vurğulayıb ki, xarici investorların sərmayəsi hesabına 2030-cu ilə qədər bərpaolunan enerji növlərinin istehsal gücünü 6 qiqavata çatdırmaq nəzərdə tutulur ki, bunun da bir hissəsi Avropaya ixrac ediləcək.
Dövlətimizin başçısı xüsusilə diqqətə çatdırıb ki, bərpaolunan enerji sahəsində Almaniya şirkətlərinin çox böyük təcrübəsi olduğu qədər Azərbaycanın da çox böyük planları və layihələri var. Prezident Əliyev bu güclərin birləşdiriləcəyi halda daha səmərəli nəticələr əldə olunacağına inamını ifadə edib. Ölkə başçısı mətbuata bəyanatında onu da qeyd edib ki, Azərbaycanın tarixi Zəfəri bölgədə sülh danışıqlarına yol açıb və bu gün Azərbaycanın və Ermənistanın mövqeləri bir-birinə kifayət qədər yaxınlaşmışdır.
Dövlət başçısının Qarabağ və Şərqi Zəngəzur bölgələri ilə bağlı səsləndirdiyi önəmli bəyanatları da diqqətçəkəndir. Onun sözlərinə görə, artıq bu ərazilər "yaşıl enerji" zonası elan edilib. Bu enerji mənbələri nəinki həmin yerlərdə insanların və sənayenin tələbatını ödəyəcək, o cümlədən ölkənin qalan hissəsinə də xidmət edəcək. Azərbaycanın bərpaolunan enerji potensialının bununla yekunlaşmadığını diqqətə çatdıran Prezident İlham Əliyev həmçinin bildirib ki, Qarabağ və Şərqi Zəngəzur iqtisadi rayonları ilə yanaşı, Naxçıvanı da "yaşıl enerji" zonasına çevirmək planları mövcuddur.
Almaniya Prezidenti Frank-Valter Ştaynmayer də öz növbəsində Ermənistan ilə Azərbaycan arasında sülh prosesinin çox böyük əhəmiyyətə malik olduğunu vurğulayıb. Son bir il ərzində bu istiqamətdə atılan addımlar və əldə olunmuş irəliləyişlərlə bağlı təbriklərini ifadə edən Almaniya Prezidenti tezliklə iki ölkə arasında sülh müqaviləsinin imzalanacağına və regionda davamlı sülhün bərqərar olunacağına ümid bəslədiyini qeyd edib və Almaniyanın da bu proseslərə lazımi dəstək verməyə hazır olduğunu bildirib.
Almaniyanın Transxəzər Beynəlxalq Nəqliyyat Marşrutu layihəsinə böyük əhəmiyyət verdiyini vurğulayan Ştaynmayerin sözlərinə görə, Azərbaycan mühüm ticarət yollarının kəsişdiyi bir qovşağa çevrilib. “Berlin nəqliyyat sahəsində əməkdaşlığın inkişaf etdirilməsinin tərəfdarıdır. Azərbaycan Mərkəzi Asiya, Uzaq Şərq və Çinlə nəqliyyat əlaqələrimizin inkişafında mühüm rol oynaya bilər. Bu baxımdan Orta Dəhliz Almaniya iqtisadiyyatı üçün vacib layihədir”, - deyən Frank-Valter Ştaynmayer həmçinin vurğulayıb ki, Cənubi Qafqazda dayanıqlı sülh və sabitlik regionun iqtisadi inkişafına daha böyük təkan verəcək.
Qarşılıqlı anlaşma, hörmət və etimad şəraitində keçən görüşlər bir daha onu göstərdi ki, Almaniya Azərbaycanla əlaqələrini inkişaf etdirməkdə maraqlıdır və dövlət başçılarının bu görüşü Azərbaycan-Almaniya münasibətlərində yeni səhifə açacaq.
Cavanşir Feyziyev
Milli Məclisin deputatı
3 aprel 2025-ci il
Dünən, 16:21
İran sülh sazişi üçün İrəvanla Bakıya bu formatı təklif edir
İran sülhün qorunması, atəşkəs rejiminə riayət edilməsi və sülh sazişinin imzalanması üçün Ermənistan və Azərbaycanın təklif etdiyi istənilən formatı dəstəkləməyə hazırdır.
Bunu İranın Ermənistandakı fövqəladə və səlahiyyətli səfiri Mehdi Sobhani aprelin 3-də jurnalistlərlə söhbətində deyib. Onun fikrincə, bu mənada “3+3” yaxşı formatdır və onun köməyi ilə Yerevanla Bakı arasında sülh sazişinin imzalanmasına nail olmaq mümkündür.
Səfir izah edib ki, İran sərhəddə sülh və əmin-amanlığın tərəfdarıdır və hesab edir ki, gərginliyin artmasına səbəb ola biləcək istənilən addımdan çəkinmək lazımdır.
Diplomat ümid etdiyini bildirib ki, Ermənistan və Azərbaycan təmkin nümayiş etdirəcək və sülh sazişinin imzalanmasına davam edə biləcəklər.
"Ümid edirik ki, tərəflər sülh və əmin-amanlığa yönəlmiş prinsiplərə sadiq qalacaqlar. Biz həm Ermənistan, həm də Azərbaycanla əlaqə saxlayırıq. Təmaslarımız zamanı tərəfləri sülh sazişinin imzalanması istiqamətində irəliləməyə çağırırıq", - Sobhani vurğulayıb.
Dünən, 16:10
[b]İntihara cəhd edən gənc şair evə buraxılıb - Gəzə bilmir[/b]
Bir müddət əvvəl intihara cəhd edən gənc şair Həsən Zeynallı (Kür) dünən xəstəxanadan evə buraxılıb.
Bu barədə Sabunçu Tibb Mərkəzinin anestezioloqu və reanimatoloqu dr. Leyla Mərcan məlumat verib.
Leyla Mərcan bildirib ki, Həsən Kürün əməliyyatdan sonrakı yaraları sağalmağa doğru gedir, vəziyyəti stabildir:
“Hələ ki yeriyə bilmir, ancaq ümidvarıq ki, bir ay sonra həkimlərin səyi nəticəsində ayağa qalxacaq”.
Həkim qeyd edib ki, evə buraxılmazdan əvvəl Həsən Kürün beyni Kompüter Tomoqrafiyasından keçirilib: “Nəticələrə əsasən deyə bilərik ki, beynindəki qansızmalar tədricən sovrulur. Qanın tamamilə çəkilməsi üçün vaxt lazımdır. Bir qədər yaddaş pozuntusu var. Həmin istiqamətdə ambulator müalicə təyin etmişik”.
Qeyd edək ki, fevralın 22-si gənc şair Həsən Kür intihara cəhd edib. Belə ki, o "Sevinc Mall" ticarət mərkəzinin 3-cü mərtəbəsindən özünü atıb. O həmin gün 19:10 radələrində müştərək travma diaqnozu ilə Sabunçu Tibb Mərkəzinə hospitalizasiya olunub. Qapalı kəllə-beyin travması, sol bud sümüyünün qapalı sınığı, kəllə sümüyünün sınığı diaqnozu ilə ona zəruri tibbi yardımlar göstərilib. Fevralın 27-i Sabunçu Tibb Mərkəzinin anestezioloqu və reanimatoloqu dr. Leyla Mərcan tərəfindən APA-ya məlumat verilib ki, o, komadadır, süni tənəffüs aparatına qoşulub. Martın 5-də süni tənəffüs aparatından ayrılıb, səhhəti stabilləşib, palataya köçürülüb. Martın 20-i sol ayağından əməliyyat olunan gənc şair reaninmasiyaya yerləşdirilib, daha sonra isə palataya köçürülüb. Son məlumata əsasən, hazırda Həsən Kür evdə müalicə alır.
Qeyd edək ki, şair Həsən Kür İkinci Qarabağ müharibəsinin iştirakçısıdır.
Dünən, 16:07
Rəsmi Bakı Fransanın xarici işlər nazirinə cavab verdi
2 aprel 2025-ci il tarixində Fransanın Avropa və xarici işlər naziri Jan Noel Baronun Milli Assambleyanın Xarici İşlər Komissiyasında çıxışı zamanı Azərbaycan-Ermənistan sülh prosesi və erməni əsilli şəxslərin məhkəmə işi ilə bağlı səsləndirdiyi iddiaları qətiyyətlə rədd edirik.
Bu barədə Xarici İşlər Nazirliyinin mətbuat katibi Ayxan Hacızadə bildirib.
Onun sözlərinə görə, Azərbaycan ərazilərinə qarşı iddiaların mövcud olduğu Ermənistan konstitusiyasının dəyişdirilməsi kimi son 2 ildən artıq müddətdə müzakirə edilən legitim tələbin sual altına alınması və bunun yeni şərt kimi təqdim edilməsi qəbuledilməzdir: "Əgər Fransa iddia etdiyi kimi həqiqətən də sülh sazişinin tezliklə imzalanmasını dəstəkləyirsə, o zaman Ermənistan tərəfindən müvafiq addımların atılmasını təşviq etməlidir".
Müharibə cinayətləri, etnik təmizləmə, hərbi təcavüz, işgəncə və digər ağır cinayətlərdə ittiham olunan və ya məhkum olunmuş erməni əsilli şəxslərin azadlığa buraxılması çağırışlarına gəldikdə, XİN rəsmisi vurğulayıb ki, bu cinayətləri araşdırmaq və mühakimə etmək Azərbaycanın haqqıdır: "BMT-nin İnsan Hüquqları Şurasının Əsassız Həbslər üzrə İşçi Qrupunun 13 mart 2025-ci il tarixində dərc olunmuş rəyi də bunu bir daha təsdiqləyib və məhkəmə prosesinə qarşı aparılan qarayaxma kampaniyasının əsassız olduğunu sübut edib.
Ümumiyyətlə, digər ölkələrdə məhkəmə prosesinə müdaxiləyə cəhd edən Fransa tərəfinin ilk növbədə Fransada siyasi təqibləri və müxtəlif aksiyalarda etirazçıların öldürülməsi, Fransanın neokolonial siyasəti nəticəsində dənizaşırı ərazilərdə yerli əhaliyə qarşı işgəncələri, Fransa parlamentində rüşvətxorluq və korrupsiya hallarının yayılması kimi faktları araşdırması daha uyğun olardı. Misal üçün, eyni iclasda bir deputatın Fransada məhkəmə sistemindən siyasi rəqiblərə qarşı təzyiq vasitəsi kimi istifadə edildiyi halda qanunun aliliyi ilə bağlı digər dövlətlərə müdaxilənin qəbuledilməzliyi ilə bağlı sualına cavabda Fransa nazirinin Fransa məhkəməsinin qərarını şərh edə bilməyəcəyi cavabı da Fransa tərəfinin ikili standartlarının bir göstəricisidir.
Fransadan sülhə xidmət etməyən və regionda sabitliyi pozan addımlarına son qoymağı tələb edirik".
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!