Dünən, 14:40
Bəşər Əsədin nə iş gördüyü açıqlandı - Moskvada 20 mənzili var
Suriyanın devrilmiş keçmiş prezidenti, ölkəni tərk etdikdən sonra Rusiyada sığınacaq alan Bəşər Əsəd ailəsi ilə birlikdə Moskvada yaşayır və saatlarla onlayn oyunlar oynayır.
Bu barədə Almaniyanın “Zeit” qəzeti Əsəd ailəsinin ən yaxın çevrəsindən olan mənbəyə istinadən yazıb.
Amma nəşr yazıb ki, bu məlumatı yoxlamaq mümkün deyil.
“Zeit” həmsöhbətinin dediyinə görə, Əsədin altında ticarət mərkəzi olan elit çoxmərtəbəli binada üç mənzili var və o həmin mənzillərdə yaşayır.
Bundan başqa, keçmiş prezident tez-tez Moskva yaxınlığındakı bağ evində qalır. Onun evini özəl mühafizə şirkəti qoruyur.
İddialara görə, Əsəd ailəsinin Moskva şəhərində təxminən 20 mənzili var.
2024-cü ilin dekabrında silahlı müxalifət Dəməşqə daxil olub, bundan sonra Bəşər Əsəd istefa verib və ölkəni tərk edib. Rejimin devrilməsində əsas rol oynamış “Həyat Təhrir əl-Şam” qrupuna rəhbərlik edən Əhməd əl-Şaraa Suriyada müvəqqəti prezident təyin edilib.
Əsəd ailəsi ilə birlikdə Rusiyadan sığınacaq alıb. Moskva Suriyanın yeni hakimiyyət orqanları ilə diplomatik əlaqələri davam etdirir. Rusiya Xarici İşlər Nazirliyi Əsədin Rusiyada olduğunu və təhlükəsiz yaşadığını təsdiqləyib.
“Reuters” agentlyi Bəşər Əsədin Suriyadan qaçmazdan əvvəl 500 min dollar götürə bildiyini yazıb.
“The Financial Times” hələ 2019-cu ildə Əsəd ailəsinin Moskva şəhərində daşınmaz əmlak aldığını yazmışdı. Nəşrin məlumatına görə, 2013-2019-cu illərdə Əsədin qohumları - əmisi Məhəmməd Maxloufun ailə üzvləri Moskvada 40 milyon dollar dəyərində daşınmaz əmlak alıblar.
Rusiya prezidentinin mətbuat katibi Dmitri Peskov bildirib ki, Rusiyada “azad bazar” var və Kreml Əsədin qohumlarının mənzil almasından xəbər tutmağa borclu deyil. O, həmçinin əlavə edib ki, xarici vətəndaşların paytaxtda daşınmaz əmlak alması geniş yayılmış təcrübədir.
Dünən, 14:25
Pul əl çirkidir deyənlərin başı işləmir - Ağadadaş Ağayev
"Deyirlər, pul əl çirkidir. Bunu deyənin başı işləmir. Necə əl çirkidir? Pul cəsarət verir, cəsarətləndirir. Pulsuzluq qüssə verir. Sevgilini özgələrə yar edir. Atanın, ananın gözündən düşməyə vasitədir. Etmək istədiklərinin hamısı pulladır. Əsas odur onun qulu olmayasan. Pul ancaq nəfsinə xidmət edəcəksə, səni ölümə aparacaq".
Bu sözləri Xalq artisti Ağadadaş Ağayev "Həftənin qonağı" proqramında deyib. Müğənni yığdığı kolleksiyadan danışıb:
"Rəssamlığı sevmişəm, amma musiqini seçdim. Evdə oturub cızma-qara etmişəm. Evimdə çoxlu əsərlər var. Azərbaycanda indi rəssamlar döymə əsərlər edir. Mənim evimdə isə 40 ildir döymə əsərlər var. 250-300 il yaşı olan antiq əşyalarım var. Hara getmişəmsə, oradan almışam. Dostlarım hədiyyə göndərib".
A.Ağayev var-dövlətindən, şadlıq evindən söz açıb. O bildirib ki, şadlıq evi indi mərasim zalı kimi fəaliyyət göstərir:
"Qızımı ora-bura müalicəyə aparırdım. Məcbur idim, işin başında deyildim. Arendaya verdim. 15 il icarəyə verdim. Bir gün icarə verən adam dedi mərasim zalı olsun? Dedim, pulunu ödəyirsən, nə istəyirsən et. Obyektlərim var. Öz-özünə yaranıb. Şirkət açmışdım, "Ağadadaş MMC". O qədər pulum olub ki, xərcləməyə yerim yox idi. Sovetin dövründə çox pulum var idi. Altında nə qədər pulun var, heç nə ala bilməzsən. Yoxlayırdılar. Bahalı mağazaya girirdim. Halbuki heç kimi ora buraxmırdılar. Brend almağa meyilli idim. Polislər girirdi içəri ki, haradan qazanmısınız pulları? Bakıda o qədər ev almışdım. Hətta bir binanın bir blokunu bütöv almışdım. Ən əsası evində qızıl saxlamalısan. Amma hər başın dara girəndə gedib bir külçə qızılı götürüb satmamalısan".
Dünən, 13:16
Sabahın havası
Milli Hidrometeorologiya Xidməti sabahın hava proqnozunu açıqlayıb.
Bazar günü Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi, gecə və səhər bəzi yerlərdə duman olacağı gözlənilir. Şimal-qərb küləyi gündüz mülayim cənub-şərq küləyi ilə əvəz olunacaq.
Havanın temperaturu gecə 14-17, gündüz 22-27 dərəcə isti olacaq. Atmosfer təzyiqi 760 mm civə sütunu, nisbi rütubət isə gecə 80-85 %, gündüz 60-65 % təşkil edəcək.
Azərbaycanın rayonlarında havanın əsasən yağmursuz keçəcəyi, lakin axşam bəzi qərb rayonlarında arabir yağış yağacağı, şimşək çaxacağı gözlənilir. Ayrı-ayrı yerlərdə qısamüddətli leysan xarakterli olacağı, dolu düşəcəyi ehtimalı var. Bəzi yerlərdə arabir duman olacaq. Qərb küləyi əsəcək.
Havanın temperaturu gecə 11-16, gündüz 20-25, dağlarda gecə 1-6, gündüz 8-13 dərəcə isti olacaq.
Dünən, 12:41
Ürəyi sağlam saxlamağın sirri
Niyə düzgün qidalanmırıq və necə dəyişə bilərik?
Son zamanlar ətrafımızda və sosial şəbəkələrdə tez-tez ürək çatışmazlığından dünyasını dəyişən insanlarla bağlı xəbərlər alırıq. Bu cür hadisələr bizi bir müddət özümüzə qarşı daha diqqətli olmağa vadar edir, amma bir az keçəndən sonra yenidən arxayınlaşır, hər şeyi unuduruq.
Niyə bu belə olur? Ümumiyyətlə, gəlin baxaq - ürəyi davamlı qorumaq üçün hansı addımları atmalıyıq?
Ürək sağlamlığı bizim üçün həyati əhəmiyyət daşıyır, amma çox zaman bu dəyəri yalnız nəsə baş verəndən sonra hiss edirik. Əslində isə sağlam qidalanma və düzgün həyat tərzi ilə ürək-damar xəstəliklərinin böyük hissəsinin qarşısını almaq mümkündür.
Gəlin baxaq, harada səhv edirik, niyə bunu edirik və necə düzəldə bilərik.
Harada səhv edirik?
Adətən səhər yeməyini ötürüb, günorta və axşam artıq yeyirik. Günün yorğunluğunu çıxarmaq üçün, xüsusilə axşam saatlarında, “yorğunluq mükafatı” kimi ağır yeməklərə yönəlirik.
Bədən gecə istirahət rejiminə keçəndə həzm sistemini yükləyirik, qaraciyər və ürək daha çox işləyir. Bu isə yuxunun keyfiyyətini pozur və ertəsi gün yenidən aclıq hissini artırır.
Gün ərzində tez hazırlanan qidaları seçirik, çünki “zamanımız yoxdur” deyirik. Bu da damarların daralmasına, xolesterinin yüksəlməsinə və qan təzyiqinin artmasına səbəb olur.
Qorxu hissi isə yalnız başqasına nəsə olanda və ya bizdə bir diaqnoz qoyulanda yarandığından “indi bir şey olmaz” deyirik. Halbuki bədənimiz səssiz-sədasız siqnallar verir — yüksək təzyiq, xolesterin, artıq çəki...
Bir müddətdən sonra isə işi yarımçıq qoyuruq.
Çünki:
Planlı şəkildə başlamırıq.
Qidalanmanı cəza kimi qəbul edirik, həyat tərzi kimi yox.
Sürətli nəticə gözləyirik, dözümsüzlük yaranır.
Bəs necə dəyişə bilərik?
Bunun üçün diyeti cəza yox, həyat tərzi kimi qəbul etməliyik. “Diyet” deyəndə məhdudiyyət yox, balanslı qidalanma anlamalıyıq.
Bilməliyik ki, səhər yeməyini ötürməmək ürəyi qoruyur, axşam isə yüngül qidalar seçmək rahat yuxu və normal təzyiq deməkdir.
Qeyd:
Ürək sağlamlığını qorumaq üçün varlı olmaq, çox vaxt ayırmaq və ya xüsusi dərmanlar qəbul etmək lazım deyil. Sadəcə öz bədənimizi dinləmək, balanslı qidalanmaq və hərəkətdə qalmaq kifayətdir.
Əsas özümüzü yeməklə yox, psixoloji rahatlıqla mükafatlandıraq - bir kitab, təbiət gəzintisi, sakit istirahət bədənə də, beyinə də xeyirdir.
Tədricən sağlam həyat tərzini vərdişə çevrirək və o zaman ürək-damar xəstəlikləri bizdən uzaq olar.
Tövsiyə:
Dəyişikliklər üçün heç də gec deyil. Gözləməyək ki, qorxu bizi hərəkətə keçirsin – bir hadisə, bir xəbərdarlıq bizi dəyişməyə vadar etsin.
Sağlam qidalanma məhdudiyyət deyil, əksinə, həyat keyfiyyətini artıran bir vərdişdir. Bu vərdişi formalaşdırmaq isə illərlə görə biləcəyimiz xoşbəxtliyin açarıdır.
Elnur Nemətov,
sağlam qidalanma mütəxəssisi
Dünən, 12:06
Prezident Sevil Əliyevanı təltif etdi
Sevil Heydər qızı Əliyeva "Şərəf" ordeni ilə təltif edilib.
Prezident İlham Əliyev bununla bağlı Sərəncam imzalayıb.
Sevil Əliyeva Azərbaycan musiqi sənətinin inkişafında xidmətlərinə görə mükafatlandırılıb.
Qeyd edək ki, oktyabrın 12-si Sevil Əliyevanın 70 yaşı tamam olur.
Dünən, 11:57
İsraillə HƏMAS arasında əsir mübadiləsi başladı
İsrail mənbələri cümə günü günortadan sonra rəsmi olaraq qüvvəyə minən atəşkəs razılaşmasının imzalanmasından sonra əsirlərin mübadiləsinə başlanıldığını təsdiqləyib.
İsrail KİV-nin məlumatına görə, artıq fələstinli məhbuslar qarşı tərəfə təhvil verilir.Müvafiq orqanlar İsrail həbsxanalarından azad edilməli olan fələstinli məhbusları köçürməyə başlayıb.
Fələstinin HƏMAS qrupu da öz növbəsində israilli girovları bazar ertəsi azad etmək üçün hazırlığa start verib.
Cəsədlərin təhvil verilməsinin bir qədər vaxt aparacağı gözlənilsə də, HƏMAS liderlərinin sözlərinə görə, İsrailin baş naziri Benyamin Netanyahu son günlər “ölü və diri girovların” birlikdə qaytarılacağını dəfələrlə vurğulayıb.
Bundan əvvəl İsrail hökuməti HƏMAS ilə Qəzza zolağında atəşkəs və razılaşdırılmış xətt üzrə İsrail qoşunlarının çıxarılmasına dair razılaşmanı ratifikasiya edib.
ABŞ prezidenti Donald Trampın Qəzza planının fələstinli məhbuslar müqabilində israilli məhbusların azad edilməsi üçün təyin etdiyi 72 saatlıq müddət başlayıb.
HƏMAS-ın 72 saat ərzində 20 israillini azad edəcəyi, bundan sonra İsrailin müharibə zamanı Qəzzada həbs edilmiş 1700 nəfərdən əlavə, İsrail həbsxanalarında uzun müddət cəza çəkən 250 fələstinlini azad edəcəyi gözlənilir.
İsrail Ədliyyə Nazirliyi açıqlanması gözlənilən 250 addan ibarət təfərrüatlı siyahısını dərc etsə də, o, HƏMAS-ın azad edilməsini tələb etdiyi bir neçə tanınmış Fələstin liderinin, məsələn, “Fəth” lideri Mərvan Barquti, Fələstinin Azadlıq Xalq Cəbhəsinin baş katibi Əhməd Səadət və başqalarının adlarını ehtiva etmir.
Qəzzada hələ də 48 girov var: 20-si sağdır, 26-sı ölüb, 2-si isə itkin düşüb.
Qeyd edək ki, Misirin Şarm əl-Şeyx şəhərində İsrail və HƏMAS arasında vasitəçilərin himayəsi altında aparılmış dolayı danışıqlardan sonra imzalanan anlaşma memorandumunda konkret fələstinli məhbusların adları ilə azad edilməsi müqabilində saxlanılan bütün canlı israilli girovların azad edilməsini nəzərdə tutan bənd yer alırdı.
İsrail həbsxanalarında əməliyyat əvvəlki oxşar mübadilələrdə olduğu kimi birbaşa mediada işıqlandırılmadan, silahlı və ya bayram nümayişləri olmadan aparılacaq. “Əl-Ərəbiyyə” xəbər verir ki, yalnız Qırmızı Xaç yerdə əməliyyata nəzarət edəcək və aşkar edilən pozuntular barədə məlumat verəcək.
Dünən, 11:26
Ermənistan 42 km-lik Zəngəzur dəhlizini niyə 2 ilə tikmək istəyir?
8 avqust tarixli Vaşinqton Zirvə görüşündə Azərbaycan və Ermənistan liderləri ABŞ lideri Donald Trampın iştirakı ilə Zəngəzur dəhlizinin (TRIPP) açılması ilə bağlı razılığa gəliblər. Dəhlizin Ermənistan tərəfinə düşən 42 kilometrlik hissəsi ABŞ-nin nəzarətində olacaq.
Bu yaxınlarda Ermənistan xarici işlər naziri Ararat Mirzoyan Zəngəzur dəhlizindən danışıb.
“Biz açıq şəkildə deyirik ki, Azərbaycanla dəmir yolu və digər əlaqələrin bərpası Ermənistan üçün prioritetdir. Çünki bu, ölkəmizi regional iqtisadiyyatın əsas benefisiarlarından birinə çevirir. Ekspertlər bildirirlər ki, dəmir yolunun tikintisi azı iki il çəkə bilər. Amma bu müddətdə biz Azərbaycan ərazisindən istifadə edərək yükləri göndərmək və qəbul etmək imkanına malik ola bilərik”,- o deyib.
42 kilometrlik qısa məsafənin Ararat Mirzoyanın dediyi kimi - 2 ilə tikiləcəyi bəzi suallar doğurur. Bu qədər qısa məsafənin əslində daha tez ərsəyə gələ biləcəyi mümkün deyilmi?
Nəqliyyat məsələləri üzrə ekspert Rauf Ağamirzəyev bildirib ki, burada bir neçə məsələyə diqqət yetirmək lazımdır:
“Dəmir yolu köhnə marşrutla gedəcəksə, ora qısa zamanda bərpa oluna bilər. Çünki bu zaman süni qurğular təftiş olunmalıdır. Süni qurğuların əksəriyyəti də sağlamdır. Bəzi xırda əlavələr və yaxud kosmetik təmirlə bunu etmək olar. Bir yol döşəyənin dəmir yolu üzrə günlük gücü 600 - 1000 metrə qədərdir. Təxminən 6 ay ərzində o yolun "rels-şpal" qəfəsini bərpa etmək olar. Əgər yeni marşrut üzrə daha da şimala doğru dəmir yolu xəttini çəkmək niyyətləri varsa, bəli, bu hissə dağlıq ərazidir. Orada süni qurğuların, tunel estekadaların sayı da çox olacaq. Ona görə müddət bir az arta bilər”.
Ekspert vurğulayıb ki, seçilən marşrut və qurğu üzrə neçə zolaqlı dəmir yolu və magistral yolunun olacağından çox şey asılıdır:
“Çünki burada dağlar var. Həmin dağları partlatma üsulu ilə torpaq sahəsini genişləndirmək olar. Müəyyən sahələrdə estekada tipində altdan dəmir yolu, üstdən avtomobil yolu da seçilə bilər. Orada şimal-cənub, şərq-qərb hissələrinin kəsişən nöqtələri və onların qovşaqlarla ayrılması məsələsi də var. Bəzi məsələlər var ki, onların marşrut və seçilən texnologiya ilə həlli mümkündür. Əsas məsələ hansı növ texnologiya və marşrutun seçilməsidir. Deyilən müddəti nəzərə alaraq sual yaranır ki, hansı marşrut üzrə bunu icra etmək istəyirlər və orada neçə növ süni qurğu quraşdırılacaq?”.
Dünən, 10:30
Qaradağda vulkan püskürüb - İki nazirlikdən AÇIQLAMA - VİDEO
Fövqəladə Hallar Nazirliyinə Bakı şəhəri, Qaradağ rayonu, Səngəçal qəsəbəsi istiqamətində palçıq vulkanının püskürməsi barədə daxil olmuş məlumat əsasında Nazirliyin Aviasiya dəstəsinin helikopteri vasitəsilə əraziyə baxış keçirilib.
Bu barədə FHN-in Mətbuat xidməti məlumat yayıb.
"Baxış zamanı ərazidə alov müşahidə edilməyib, həmçinin ətraf yaşayış məntəqələri üçün hər hansı təhlükənin olmadığı müəyyən edilib.
Məsələ ilə əlaqədar aidiyyəti qurumlar tərəfindən müvafiq işlər görülür", - məlumatda deyilir.
Ekologiya və Təbii Sərvətlər Nazirliyinin məlumatına görə, oktyabrın 11-də saat 08:27-də Bakı şəhəri, Qaradağ rayonu, Sahil qəsəbəsinin yüksək dağlıq ərazisində yerləşən palçıq vulkanında püskürmə hadisəsi qeydə alınıb.
Hazırda nazirliyin mütəxəssisləri tərəfindən püskürmə və onun nəticələri öyrənilir, ərazidə müvafiq müşahidələr aparılır.
Dünən, 10:25
Moskva Azərbaycanın tələblərini yerinə yetirir - Rusiyalı politoloq
Rusiya və Azərbaycan prezidentlərinin oktyabrın 9-da keçirilən Düşənbə görüşü, analitiklərin fikrincə, Moskva ilə Bakı arasında müşahidə olunan gərginliyin getdikcə zəifləməyə başlayacağından və bu ölkələrin münasibətlərinin normallaşma mərhələsinə keçəcəyindən xəbər verir.
Rusiyalı politoloq Arkadi Dubnov hesab edir ki, həm Əliyev, həm də Putin əsas problemli məsələnin - ötən il dekabrın 25-də Azərbaycan Hava Yollarının (AZAL) təyyarəsinin qəzaya uğraması ilə bağlı qarşılıqlı məqbul düstur tapıblar və bu, tərəflərə böhrandan çıxmağa imkan verəcək.
Dubnovun sözlərinə görə, Putinin Düşənbə görüşündə təyyarə qəzası mövzusunu qaldırması və onun izahatları belə deməyə əsas verir ki, Rusiya tərəfi baş verənlərə görə məsuliyyəti öz üzərinə götürmüş hesab oluna bilər və Azərbaycan tərəfinin tələbləri yerinə yetirilir.
Dubnovun fikrincə, Putin Əliyevlə müzakirə zamanı bilərəkdən elə lüğət və terminologiya seçib ki, bu ona ikitərəfli münasibətlərdə yaranmış böhrandan çıxmağa imkan verəcək.
Xatırladaq ki, prezidentlərin Düşənbə görüşündə Putin deyib:
“Bizim aramızda birinci telefon danışığı əsnasında mən faciənin məhz Rusiya səmasında baş verdiyinə görə üzr istədim, həm də həlak olanların ailələrinə ən səmimi başsağlığı verdim. İstərdim ki, bütün bunları təkrar edim, yenidən söyləyim və qeyd edim, biz sözsüz ki, razılaşdığımız kimi, istintaqa hər cür kömək göstəririk...
... Rusiya tərəfindən kompensasiya üzrə hər şey ediləcək və bütün vəzifəli şəxslərin hərəkətlərinə hüquqi qiymət veriləcək”.
Dünən, 09:59
Trampa Nobel mükafatı düşür? - Putin cavab verdi
Rusiya prezidenti Vladimir Putin bildirib ki, ABŞ prezidenti Donald Tramp bütün dünyada mürəkkəb və uzun müddətdir davam edən münaqişələrin həlli üçün çox işlər görür.
O, ABŞ liderinin Nobel Sülh Mükafatına layiq olub-olmaması ilə bağlı sualı cavablandırarkən belə deyib.
Xatırladaq ki, mükafat dünən Venesuelanən müxalif siyasətçisi Mariya Korina Maçadoya verilib.
“ABŞ-ın hazırkı prezidenti Nobel mükafatına layiqdir, ya yox, bilmirəm, amma o, həqiqətən də mürəkkəb, onilliklər boyu davam edən böhranları həll etmək üçün çox şey edir”, - Putin deyib.
O, həmçinin qeyd edib ki, Tramp səmimi şəkildə Ukraynadakı münaqişənin həllinə çalışır. Putin Nobel Komitəsinin “sülh üçün heç nə etməyən” insanlara mükafat verməsi halları barədə də danışıb. Rusiya prezidenti hesab edir ki, bu cür qərarlarla onlar Nobel mükafatının reputasiyasına böyük zərbə vurublar.
“Mükafatın reputasiyası fikrimcə, əhəmiyyətli dərəcədə zədələnib”, – Putin deyib.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!