12-11-2025, 16:41
Şagird müəllimi döydü - qadın xəstəxanaya yerləşdirildi
Moskva məktəblərindən birində şok hadisə baş verib: 10-cu sinif şagirdi qadın müəlliminə hücum edib.
Moskva Təhsil və Elm Departamentinin məlumatına görə, tənəffüs zamanı yeniyetmə müəllimin sinifdən çıxmasını gözləyib, daha sonra onun masasından yoxlama işi dəftərlərini götürüb və çantasına qoyub.
Sinfə qayıtdıqdan sonra müəllim dəftərlərin götürüldüyünü görüb və şagirddən onların qaytarılmasını tələb edib, bu zaman şagird onun başına vurmağa başlayıb. Müəllim xəstəxanaya yerləşdirilib.
Hüquq-mühafizə orqanları işə cəlb olunub və məktəb daxili araşdırma aparır.
“Araşdırmadan sonra hücum edən şəxs qanunun bütün tələblərinə uyğun olaraq cəzalandırılacaq. Şagirdin məktəbdən xaric edilməsi ehtimalı da nəzərdən keçiriləcək", - deyə idarədən bildirilib.
12-11-2025, 16:37
Hamiləlik və doğuma görə verilən müavinətlərin ümumi məbləği artırılır
2026-cı ildə Azərbaycanda hamiləlik və doğuma görə verilən müavinətlərin ümumi məbləği 71 milyon manat olacaq.
Bu barədə Hesablama Palatasının Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondunun (DSMF) 2026-cı il büdcəsi haqqında qanun layihəsinə verdiyi rəydə bildirilir.
Sənədə əsasən, bu göstərici 2025-ci illə müqayisədə 9,2 % çoxdur.
Gələn il üzrə orta müavinət məbləğinin 3 676 manata qədər artacağı, müavinət alanların sayı isə 19 310 nəfər təşkil edəcəyi gözlənilir.
Artımın əsas səbəbi kimi minimum əməkhaqqı və sosial təminat məbləğlərinin yüksəlməsi, eləcə də işçi qadınların sosial sığorta haqları üzrə ödənişlərinin artması göstərilir.
Hesablama Palatası vurğulayıb ki, bu artım ailələrin sosial müdafiəsinin gücləndirilməsinə və uşaq doğumu ilə bağlı sosial ödənişlərin adekvatlığının artırılmasına xidmət edir.
12-11-2025, 16:22
“Zəfərin izi ilə” veloyürüşün final mərhələsi Xankəndidə keçirilib - FOTO
Noyabrın 12-də Xankəndi şəhərində “Gənc Peşəkar Velosipedçilər Klubu” İctimai Birliyi tərəfindən reallaşdırılan “Qarabağa veloyürüş– Zəfərin izi ilə” layihəsinin final mərhələsi baş tutub.
Xankəndi şəhərində, Ağdərə və Xocalı rayonlarında Bərpa, Tikinti və İdarəetmə Xidmətinin ictimaiyyətlə əlaqələr şöbəsindən verilən məlumata görə, yarışın əsas məqsədi gənclər arasında sağlam həyat tərzinin təbliği, azad olunmuş ərazilərdə idmanın inkişafına dəstək olmaq və Qarabağda sosial-iqtisadi dirçəlişə töhfə verməkdir.
Final mərhələsi Xankəndidəki Zəfər meydanında təşkil olunmuş veloyürüş iştirakçılarını, Xankəndi şəhərində, Ağdərə və Xocalı rayonlarında Azərbaycan Respublikası Prezidentinin xüsusi nümayəndəsi Elçin Yusubov qarşılayıb. Yarış iştirakçıları arasında Azərbaycan Respublikası Təhlükəsizlik Şurası katibinin müavini, milli qəhrəman, general-polkovnik Mədət Quliyev də olub.
Tədbirdə vurğulanıb ki, “Qarabağa veloyürüş Zəfərin izi ilə” layihəsi təkcə idman yarışı deyil, həm də Azərbaycanın dövlətçilik ənənələrinin, milli həmrəyliyin və Zəfərin rəmzidir. "Gənc Peşəkar Velosipedçilər Klubu”nun nümayəndələri bildiriblər ki, bu kimi tədbirlər gələcəkdə də davam etdiriləcək və Azərbaycanın müxtəlif bölgələrində velosiped idmanının inkişafına, eləcə də gənclərin sağlam həyata yönləndirilməsinə xidmət edəcək. Qeyd edək ki, sonda fəal veloyürüş iştirakçılarına təşəkkürnamələr təqdim olunub.
12-11-2025, 16:21
Zığ-Hövsan kanalizasiya kollektoru tikilir - VİDEO
Azərbaycan Dövlət Su Ehtiyatları Agentliyinin (ADSEA) Tikilməkdə Olan Obyektlərin Müdiriyyəti Bakı şəhəri və Abşeron rayonunda yeni kanalizasiya kollektorları və tullantı sular üçün sutəmizləyici qurğuların tikintisi layihələrinə başlayıb.
Bakı şəhərinin ekoloji vəziyyətinin yaxşılaşdırılması və kanalizasiya-infrastrukturunun müasirləşdirilməsi məqsədilə həyata keçirilən mühüm layihələrdən biri də Zığ–Hövsan kanalizasiya kollektorunun tikintisidir. Layihə çərçivəsində ümumi uzunluğu 28 kilometr olan yeni kollektor xəttinin inşası, həmçinin müasir tələblərə cavab verən nasos stansiyasının qurulması planlaşdırılır.
Bu layihə nəticəsində "Şəhərkənarı" kanalizasiya kollektorunun istismar vəziyyəti əhəmiyyətli dərəcədə yaxşılaşdırılacaq, tullantı sularının idarə olunması prosesi daha səmərəli və təhlükəsiz şəkildə təşkil ediləcək. Bununla yanaşı, layihə Bakı buxtasının ekoloji durumunun qorunmasına mühüm töhfə verəcək.
Kollektorun fəaliyyət sahəsinə Xətai rayonunun bir hissəsi, eləcə də Suraxanı rayonunun Zığ, Hövsan, Bahar və Dədə Qorqud qəsəbələri daxil olacaq. Bu ərazilərdə yaşayan əhalinin kanalizasiya və tullantı sularının idarə olunması ilə bağlı mövcud problemləri aradan qalxacaq, mühəndis-kommunikasiya infrastrukturu daha dayanıqlı sistemə çevriləcək.
Layihənin icrasına 2025-ci ildə başlanılıb və bütün tikinti işlərinin 2028-ci ildə tamamlanması nəzərdə tutulur. İşlər mərhələli şəkildə aparılacaq, inşaat zamanı ekoloji standartlara və təhlükəsizlik qaydalarına ciddi riayət olunacaq.
Zığ–Hövsan kollektorunun inşası zamanı yeraltı mikrotunel texnologiyasından da istifadə olunacaq. Bu tipli layihələr, xüsusilə mikrotunel texnologiyası ilə qurulan kanalizasiya şəbəkələri müasir və dayanıqlı olması ilə seçilir, geniş ərazilərdə qurulma imkanı və əhalinin məmnunluq səviyyəsinin yüksəldilməsinə şərait yaradır.
Görülən işlər yeni kollektorlar vasitəsilə daşınan tullantı suların sutəmizləyici qurğulara ötürülməsi və təmizlənməsinə, su hövzələrinin çirklənməsinin qarşısının alınmasına xidmət edəcək.
12-11-2025, 16:15
19 şəhidin nəşi tapılıb, birinin axtarışı davam edir - Ərdoğan
Türkiyə Prezidenti Rəcəb Tayyib Ərdoğan bu gün hakim Ədalət və İnkişaf Partiyasının iclasında Gürcüstanda baş verən təyyarə qəzasından danışıb.
Ərdoğan bildirib ki, Azərbaycan Respublikasında keçirilən Qarabağ zəfərinin 5 illiyi münasibətilə təşkil olunan tədbirlərdən qayıdarkən Türkiyə Hərbi Hava Qüvvələrinə məxsus C-130 tipli hərbi nəqliyyat təyyarəsi Gürcüstan–Azərbaycan sərhədinə yaxın ərazidə qəzaya uğrayıb.
“Bu faciə nəticəsində 20 qəhrəmanımız şəhid olub. Onların adları ürəklərimizin ən dərin yerinə yazılıb. Allah şəhidlərimizə rəhmət eləsin, ailələrinə səbir versin”, - dövlət başçısı deyib.
Ərdoğanın sözlərinə görə, qəza barədə məlumat daxil olan kimi Türkiyənin müdafiə, daxili işlər və xarici işlər nazirləri dərhal həm Gürcüstan, həm də Azərbaycan tərəfi ilə əlaqə saxlayıblar. Axtarış-xilasetmə işləri sürətlə başlayıb, Türkiyəyə məxsus pilotsuz uçuş aparatları bölgəyə göndərilib.
“Axşam saat 17:00-də uçağın qalıqları tapılıb, ərazi təhlükəsizlik məqsədilə nəzarətə alınıb. Hadisə yerinə 46 nəfərlik ixtisaslı araşdırma qrupu göndərilib. Təyyarənin "qara qutusu" tapılıb və araşdırmalara başlanıb”, – Ərdoğan qeyd edib.
Prezident bildirib ki, şəhidlərin 19-nun nəşi tapılıb, sonuncu şəhidin axtarışı davam edir.
Türkiyə lideri həm Azərbaycan Prezidenti İlham Əliyev, həm də Gürcüstanın Baş naziri İrakli Kobaxidze ilə telefon danışığı apardığını söyləyib:
“Azərbaycanlı qardaşlarımız və gürcü dostlarımız bu ağır gündə bizimlə həmrəy oldular. Hər iki ölkə hadisənin araşdırılması və şəhidlərimizin tapılması üçün bütün imkanlarını səfərbər edib”.
Ərdoğan hadisənin bütün detallarının aydınlaşdırılacağını vurğulayıb:
“Türkiyə Respublikası, Azərbaycan və Gürcüstan bu məsələdə birgə hərəkət edir. Heç bir detal diqqətdən kənarda qalmayacaq.”
Ərdoğan sosial şəbəkələrdə yayılan yalan məlumatlara və siyasi məqsədlərlə aparılan manipulyasiyalara qarşı xalqı ehtiyatlı olmağa çağırıb: “Milli Müdafiə Nazirliyi və Kommunikasiya İdarəsi cəmiyyətimizi mütəmadi olaraq məlumatlandırır. Millətimizdən xahiş edirəm ki, bu cür ağrılı hadisələr üzərindən siyasi qazanc əldə etmək istəyənlərə inanmasınlar.”
Sonda Ərdoğan şəhidlərə Allahdan rəhmət, ailələrinə və Türk Silahlı Qüvvələrinə səbir diləyib, həmçinin başsağlığı mesajı göndərən bütün dost ölkələrə təşəkkür edib.
12-11-2025, 16:04
“Kurtlar vadisi”nin aktrisası qəzaya düşdü
Türkiyənin məşhur aktrisası Özgü Namalın maşını ağır yol qəzasına uğrayıb.
Qəza zamanı aktrisa iki övladı ilə birgə olub.
Hadisə İstanbul Beykoz istiqamətində baş verib. Özgü Namalın avtomobili başqa bir maşına çırpılıb. Aktrisa “Kıskanmak” serialının çəkilişlərinə gedirmiş. Hadisə yerinə təcili tibbi yardım çağırılıb. Yaralanan aktrisa, oğlu və qızı ilkin tibbi müdaxilədən sonra xəstəxanaya aparılıb. Onların həkim nəzarətinə götürüldüyü bildirilir.
Qeyd edək ki, Özgü Namal azərbaycanlı tamaşaçılara məşhur “Kurtlar vadisi” serialından Elif obrazı ilə tanışdır.
12-11-2025, 15:36
Onlara da “Leytenant” rütbəsi veriləcək
Müddətli həqiqi hərbi xidmətdə zabit hazırlığı kursunu uğurla bitirən və könüllü olaraq zabit xidmətinə keçən ali təhsilli hərbi qulluqçulara “Leytenant” rütbəsi veriləcək.
Bu qanun layihəsi Milli Məclisin Müdafiə, təhlükəsizlik və korrupsiyaya qarşı müdafiə komitəsinin iclasında müzakirə edilib.
Layihəyə əsasən, müddətli həqiqi hərbi xidmət dövründə zabit hazırlığı kursunu müvəffəqiyyətlə bitirərək zabitlərin həqiqi hərbi xidmətinə könüllü daxil olan ali təhsilli müddətli həqiqi hərbi xidmət hərbi qulluqçularına leytenant hərbi rübəsi veriləcək.
12-11-2025, 15:28
Mətbuat katibinə yeni vəzifə verildi
İqtisadiyyat Nazirliyi yanında Dövlət Vergi Xidmətinin (DVX) mətbuat katibi Şahin Məmmədova yeni vəzifə verilib.
Bu barədə Ş.Məmmədovun özü bildirib. O, jurnalistlərə xitabında deyib:
“Bu gündən Dövlət Vergi Xidmətində yeni məsul bir vəzifədə işimi davam etdirirəm. Dövlət Vergi Xidmətinin media üzrə əlaqələrinə indi Gunel xanım (Günel Bəhramqızı-red.) baxacaq.
Uzaqda deyiləm, eyni strukturdayam. Hər hansı məsələ və ya sual yarandıqda mənimlə də rahatlıqla əlaqə saxlaya bilərsiniz.
İndiyədək göstərdiyiniz dəstəyə və əməkdaşlığa görə hər birinizə təşəkkür edirəm”.
Xatırladaq ki, telejurnalist Günel Bəhramqızı İqtisadiyyat Nazirliyi yanında Dövlət Vergi Xidmətinin (DVX) Media və kommunikasiya idarəsinin rəis müavini - şöbə rəisi vəzifəsinə təyin edilib.
12-11-2025, 15:17
Azərbaycanda bu şəxslərin hərbi xidmət müddəti 6 ay AZALDILIR
Ehtiyatdan müddətli həqiqi hərbi xidmətə çağırılan və ya bağlaşma əsasında həqiqi hərbi xidmətə könüllü daxil olan zabitlərin dinc dövrdə həqiqi hərbi xidmət müddətinin 6 ay azaldılacaq.
Bu qanun layihəsi Milli Məclisin Müdafiə, təhlükəsizlik və korrupsiyaya qarşı müdafiə komitəsinin iclasında müzakirə edilib.
Layihəyə əsasən, ehtiyatdan müddətli həqiqi hərbi xidmətə çağırılanlar və ya bağlaşma əsasında həqiqi hərbi xidmətə könüllü daxil olanlar üçün bu müddət 1 il (bu müddət bitdikdən sonra tərəflərin razılığı ilə onlar kadr zabit heyətinə keçirilirlər), bağlaşma əsasında həqiqi hərbi xidmətə könüllü daxil olan əcnəbilər və vətəndaşlığı olmayan şəxslər üçün bu müddət 3 ilədək (bu müddət bitdikdən sonra tərəflərin razılığı ilə yeni bağlaşma bağlanılır) olacaq.
Qeyd edək ki, qüvvədə olan qanuna əsasən dinc dövrdə həqiqi hərbi xidmətin müddəti ehtiyatdan həqiqi hərbi xidmətə çağırılanlar və ya könüllü daxil olan zabitlər üçün 1 il 6 ay, bağlaşma üzrə həqiqi hərbi xidmətə könüllü daxil olan zabitlər üçün 3 ilə qədədir.
12-11-2025, 14:55
Fuad Nəcəflinin işdən çıxarılmasının 10 SƏBƏBİ
Prezident İlham Əliyevin Sərəncamı ilə Fuad Nəcəfli Naxçıvan Muxtar Respublikasında Azərbaycan Prezidentinin səlahiyyətli nümayəndəsi vəzifəsindən azad edilib. Digər sərəncamla bu vəzifəyə Ceyhun Cəlilov təyin edilib.
Naxçıvan Televiziyasının (NTV) sabiq sədri Sahil Tahirli Prezidentin Muxtar Respublikadakı xüsusi nümayəndəsi Fuad Nəcəflinin işdən çıxarılmasına rəy bildirib.
NTV-nin sabiq sədri Fuad Nəcəflinin işdən çıxarılmasının 10 səbəbini açıqlayıb.
O bildirib ki, Fuad Nəcəfli iş görmək əvəzinə şəkil çəkdirir, daim özünüreklamla məşğul olurdu.
“Nəcəflinin 3 illik fəaliyyəti və ya, fəaliyyətsizliyi ilə bağlı hadisələrin içində olan biri kimi dəqiq deyə bilərəm:
1. İş görmək əvəzinə şəkil çəkdirdi, daim özünüreklamla məşğul oldu;
2. Sosial-iqtisadi nəticəyə gedə bilmədi, şişirdilmiş statistik rəqəmlərlə oynadı;
3. Üst orqan və rəhbərliyi yalan məruzə və məlumatlarla aldatmağa çalışdı (buna nail ola bilmədi);
Ətraflı
4. Öz məsuliyyətini, işlərin zəif gedişini nazir və komitə sədrlərinin adına yazıb onları gözdən salaraq özü həmişə məsuliyyətdən yayındı;
5. İllərdir Naxçıvanda dövlətin yetişdirdiyi peşəkar yerli kadrlar öncə vəzifədən, sonra Naxçıvandan uzaqlaşdırdı, beləcə, Gənclər-idman, Mədəniyyət, Əmək və Əhalinin Sosial Müdafiəsi, Rəqəmsal inkişaf və nəqliyyat nazirlikləri, Culfa icra hakimiyyəti, Naxçıvan dövlət televiziyası və digər mühüm qurumlar başsız buraxıldı. Bakıdan dəvət edilən bir çox qurum rəhbəri də eyni aqibəti yaşadı, bir il tamam olmamış şərlənib və ya təhqirlərə dözməyib vəzifələrindən uzaqlaşdırıldılar (bərbad kadr islahatları);
6. Kiçik və orta sahibkarlığın qarşısını öz maddi maraqları naminə aldı;
7. İdarəetmədə xaotik mühit yaradaraq dövləti insanların gözündən saldı;
8. Təmsil etdiyi orqanın güclənməsi və nüfuzunun artmasına çalışmadı;
9. Xüsusən, ən mühüm strateji sahələrin inkişafını blokladı;
10. Şəxsi nümunə göstərə bilmədi, əyyaşlıqdan, boş və mənasız iclaslar keçirməkdən başı ayırd olmadı".
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!