11-11-2025, 14:50
Qarsdan Naxçıvana dəmir yolu tikilir - FOTO FOTO
Türkiyənin şərqində Orta Dəhlizin mühüm halqasına çevriləcək Qars-İğdır-Dilucu dəmir yolu layihəsinin (Naxçıvan Muxtar Respublikası ilə həmsərhəddir) fəal şəkildə həyata keçirilməsi davam etdirilir.
Hazırda layihə üçün bölgədə iki böyük tikinti sahəsi yaradılır: İğdır vilayətinin Suveren rayonunda və Qarsdakı Diqorda. Bundan başqa, daha dörd kiçik ölçüdə tikinti sahəsinin də işə salınması planlaşdırılır.
Yolun salınması üçün relslər Qars vilayətinə daşınır, burada böyük texniki baza yaradılıb. Ümumilikdə, hər biri 36 metr uzunluğunda ən azı 60 min ton relsin Türkiyənin şərqinə çatdırılması planlaşdırılır.
Qars ilə Naxçıvan arasında çəkiləcək dəmir yollarının ümumi uzunluğu 1 milyon metrə çatacaq.
Bu günə qədər layihədə iştirak edən işçi və mühəndislərin sayı 500-ə çatıb, tikintinin pik nöqtəsində isə bu rəqəm 1500 təşkil edəcək.
Yeni dəmir yolu marşrutunda ümumi uzunluğu 11,5 km olan beş tunel qazılacaq, 50 metr hündürlüyündə bir neçə viaduk tikiləcək, eləcə də 20-dən çox yerüstü keçid inşa ediləcək.
Layihə üçün xüsusi olaraq beton zavodu işə salınacaq, xammal Türkiyənin özündən tədarük ediləcək.
Bütövlükdə, Qarsdan Naxçıvan sərhədinə qədər yol boyunca bir neçə dəmir yolu stansiyası açılacaq: Diqora, Tuzluc, İğdır, Aralık və Dilucu.
Dəmir yolu elektrikləşdiriləcək, bunun üçün marşrut boyunca altı böyük transformator yerləşdiriləcək.
Qarsa gedən qatarların sürəti saatda 160 km-ə qədər çatacaq.
Araz çayı üzərindəki dəmir yolu körpüsünün “Kalyon” və “Cengiz inşaat” şirkətlərinin birgə səyləri ilə inşa edilməsi planlaşdırılır.
Dəmir yolunun 2029-cu ilin sonlarında istismara verilməsi planlaşdırılır.
Türkiyə Nəqliyyat və İnfrastruktur Nazirliyinin məlumatına görə, yeni dəmir yolu ildə 5,5 milyon sərnişin və 15 milyon ton yükün daşınmasına imkan verəcək.
Nəqliyyat Nazirliyi həmçinin Qarsdan muxtar respublikaya dəmir yolunun əhəmiyyətini vurğulayıb, onun Zəngəzur dəhlizinin açılışından sonra daha da artacağı gözlənilir.
Türkiyə Maliyyə Nazirliyi bundan əvvəl bu vacib infrastruktur layihəsinin həyata keçirilməsi üçün 2,4 milyard avro xarici kreditin ayrılmasını razılaşdırıb.
11-11-2025, 14:45
Naxçıvanda məşhur muzeyin ləğvi ilə bağlı RƏSMİ AÇIQLAMA
Naxçıvanda Duz Muzeyi ləğv edilib.
Naxçıvan Muxtar Respublikası Mədəniyyət Nazirliyindən bildirilib ki, muzeyin eksponatları Naxçıvan Dövlət Tarix Muzeyinə veriləcək və orada yaradılacaq guşədə nümayiş etdiriləcək: "Naxçıvan Dövlət Tarix Muzeyi xalqımızın tarixinin, mədəniyyətinin, yeraltı və yerüstü sərvətlərinin nümayiş edildiyi, həmçinin daha çox yerli və əcnəbi ziyarətçilərin gəldiyi muzeydir. Bu səbəbdən ləğv edilmiş Naxçıvan Duz Muzeyinin fondunda olan eksponatların muzeyin fonduna verilməsi qərara alınıb".
Qeyd olunub ki, Duz Muzeyi Muxtar Respublika Ali Məclisi Sədrinin 12 sentyabr 2017-ci il tarixli sərəncamı ilə yaradılıb. Muzeyin əvvəllər Duzdağ otelində ayrılmış bir ekspozisiya zalı və iki xidmət otağı olub, burada gələn qonaqlara xidmət göstərilib. 2023-cü ildə Duzdağ otelinin balanssaxlayıcısı dəyişdiyindən muzey oradan “Naxçıvanqala” Tarix-Memarlıq Muzey Kompleksinə köçürülüb.
Muzeydə olan 138 ədəd eksponatın böyük hissəsi duz materialından hazırlanıb.
11-11-2025, 14:04
Plan işə yaramadı - Qəzza parçalana bilər
ABŞ prezidenti Donald Trampın Qəzza zolağında münaqişəyə son qoymaq məqsədi daşıyan sülh planı faktiki olaraq iflasa uğramaqdadır.
"Reuters" agentliyinə danışan mənbələr bildiriblər ki, planın növbəti mərhələsinin icrası “praktiki olaraq dondurulub”.
Hazırda İsrail ordusu Qəzza zolağının 53 faizinə nəzarət edir, təxminən 2 milyon insan isə HƏMAS-ın nəzarətində olan qalan hissədə yaşayır. Trampın planına əsasən, növbəti mərhələdə İsrail ordusu “sarı xətt” adlanan müvəqqəti sərhəddən tədricən geri çəkilməli, onun yerinə “çoxmillətli təhlükəsizlik qüvvələri” yerləşdirilməli idi.
Lakin bu bəndlərin icra mexanizmi və vaxt cədvəli hələ də müəyyən olunmayıb. Qeyd edilir ki, ABŞ prosesdən çıxış yolu tapmasa, hazırkı “sarı xətt” uzun müddət Qəzzanı iki hissəyə bölən faktiki sərhədə çevrilə bilər.
Planın ilk mərhələsində, yəni girovların və fələstinli məhbusların azad edilməsindən sonra digər addımlar dayandırılıb. İsrail HƏMAS tam şəkildə silahı yerə qoymadan geri çəkilməkdən imtina edir, Qəzzanın idarə edilməsində Fələstin Administrasiyasının iştirakına qarşı çıxır. Həmçinin, çoxmillətli qüvvələrin tərkibi barədə də razılıq əldə edilməyib.
Diplomatik mənbələr deyiblər ki, bu şəraitdə heç bir dövlət, o cümlədən Avropa və ərəb ölkələri, öz hərbçilərini Qəzzaya göndərməyə hazır deyil. Onların fikrincə, əgər beynəlxalq qüvvələrin funksiyası “sülhün qorunması” çərçivəsini aşarsa, bu, fələstinli silahlı qruplarla birbaşa qarşıdurma riskini artıracaq.
11-11-2025, 13:43
Rusiya Bəşər Əsədi təhvil vermək istəmir
Suriyanın keçid dövrü prezidenti Əhməd əş-Şəraa Rusiya rəhbərliyinin devrilmiş prezident Bəşər Əsədin Dəməşqə təhvil verilməsi məsələsində fərqli mövqe tutduğunu bildirib.
O, bu barədə ABŞ prezidenti Donald Tramp ilə Ağ Evdə görüşdən sonra “Fox News” telekanalına verdiyi müsahibəsində danışıb.
Əhməd əş-Şəraa bildirib ki, Rusiya “bir və ya digər şəkildə” Suriyada baş vermiş müharibədə iştirak edib:
“Rusiya istər-istəməz Suriyaya qarşı aparılan müharibədə iştirak edib. Bizim ölkəmizlə Rusiya arasında imzalanmış razılaşmalardan biri axtarışda olan şəxslərin, o cümlədən Bəşər Əsədin Suriyaya təhvil verilməsini nəzərdə tutur. Lakin rusların bu məsələdə başqa fikri var”.
Əş-Şəraa əlavə edib ki, Suriyada yaradılan Ədalət Komissiyası sabiq prezident də daxil olmaqla bütün keçmiş rejim nümayəndələrinin məsuliyyətə cəlb edilməsini təmin etməyi hədəfləyir:
“Ədalət bərqərar olmalıdır. Biz bu məqsədlə Ədalət Komissiyasını yaratmışıq və bütün keçmiş rejim üzvləri, o cümlədən Bəşər Əsəd törətdikləri əməllərə görə cavab verməlidirlər.
Xatırladaq ki, Əhməd əş-Şəraa oktyabr ayında Moskvada Rusiya prezidenti Vladimir Putinlə görüş keçirmişdi. “The Guardian” qəzetinin yazdığına görə, Putin görüş zamanı Suriyadakı iki əsas hərbi obyektə - Tartusdakı dəniz bazası və Hmeymim aviabazasına xüsusi diqqət yetirib.
Suriyanın yeni rəhbəri isə Putinə əminlik verib ki, Dəməşqdəki yeni hakimiyyət Rusiya ilə əvvəlki hökumət arasında imzalanmış bütün razılaşmalara sadiq qalacaq.
“The Guardian”ın məlumatına əsasən, Əhməd əş-Şəraa üçün əsas məqsəd devrilmiş keçmiş prezident Bəşər Əsədin və onun rejiminin Moskvaya qaçmış nümayəndələrinin Suriyada məhkəmə qarşısına çıxarılmasıdır.
2011-ci ildə vətəndaş müharibəsinin başladığı Suriyada Bəşər Əsəd rejimi 2024-cü ildə devrilmişdi. Əhməd əş-Şəraa keçid dövrü prezidenti kimi beynəlxalq legitimlik qazanmağa və keçmiş rejim üzərində ədalətin bərpasına çalışdığını bildirir.
11-11-2025, 13:33
İşdən icazə almaq asanlaşdı - YENİLİK
Əmək və Əhalinin Sosial Müdafiəsi Nazirliyinin “Əmək və Məşğulluq” altsisteminin “İşəgötürən və işçi arasında rəsmi yazışmalar” bölməsində işdən qısamüddətli icazələrin e-rəsmiləşdirilməsi imkanı da yaradılıb.
Yeni funksionallıq işəgötürənlər üçün prosesi sadələşdirərək onun idarə olunması imkanlarını genişləndirib.
Belə ki, işəgötürənlər icazə limitlərinin təyin edilməsi zamanı “Xidməti icazə işçilərin saat limitindən hesablansın?” bölməsində “Bəli” və ya “Xeyr” seçimləri vasitəsilə bu funksionallığı aktiv və ya deaktiv edə bilirlər.
Xidmət aktiv olduqda, bu müddət “Xidməti” icazə kimi qeydə alınır və işçinin ümumi icazə saatlarına daxil edilmir.
Yeni imkan işçi və işəgötürənlər arasında rəsmi yazışmaların daha çevik və şəffaf şəkildə aparılmasına, həmçinin daxili əmək proseslərinin rəqəmsal şəkildə daha səmərəli idarə olunmasına şərait yaradır.
11-11-2025, 13:25
Pakistanda dəhşətli partlayış - 12 nəfər öldü
Pakistanın paytaxtı İslamabadda məhkəmə binasının qarşısında partlayış baş verib.
Bu barədə məlumatı “Reuters” agentliyi polis rəsmisinə istinadla yayıb.
Hadisə nəticəsində 12 nəfərin həlak olduğu bildirilir.
Polis sözçüsü bildirib ki, yaralananlardan bir neçəsinin vəziyyəti ağırdır:
“Biz partlayışın növünü araşdırırıq. Hələlik hadisənin mənbəyi dəqiqləşdirilməyib. Ətraflı məlumatı yalnız kriminal laboratoriyanın hesabatından sonra təqdim edə biləcəyik”, - açıqlamada qeyd olunub.
Hadisə İslamabadın rayon məhkəməsinin giriş hissəsində, çoxsaylı vətəndaşların toplandığı ərazidə baş verib.
Polis və təcili yardım xidməti əməkdaşları hadisə yerinə cəlb olunub, ərazi təhlükəsizlik məqsədilə tam mühasirəyə alınıb.
Hazırda hadisə ilə bağlı araşdırma davam edir. Rəsmilər ilkin mərhələdə terror ehtimalını da istisna etmirlər.
11-11-2025, 12:56
Bağçalı Azərbaycandan danışdı: “Bəziləri narahatdır!”
Türkiyə Milliyyətçi Hərəkat Partiyasının (MHP) sədri Dövlət Bağçalı “Zəfər Günü” və “Bayraq Günü” münasibətilə Azərbaycan xalqını təbrik edib.
Bu barədə o, partiyasının iclasında danışıb.
O, Vətən müharibəsində Azərbaycanın göstərdiyi əzm və qəhrəmanlığı yüksək qiymətləndirərək, Qarabağın işğaldan azad edilməsini tarixi qələbə adlandırıb və sülh prosesində atılan addımların müsbət nəticə verəcəyinə inandığını vurğulayıb.
Bağçalı əlavə edib ki, Türkiyə və Azərbaycanın strateji əməkdaşlığı bəzi dairələri narahat edir:
"Türk dünyasının iki parlayan dövləti olan Türkiyə və Azərbaycanın dərin qardaşlıq münasibətlərinə kölgə salmaq istəyənlər heç vaxt məqsədlərinə nail ola bilməyəcəklər".
11-11-2025, 12:51
Tətildən sonrakı ilk iş gününün havası
Azərbaycanın rayonlarında noyabrın 12-də 21 dərəcə isti olacaq.
Bu barədə Milli Hidrometeorologiya Xidmətindən məlumat verilib.
Bildirilib ki, Bakıda və Abşeron yarımadasında hava şəraitinin dəyişkən buludlu olacağı, arabir tutulacağı, əsasən yağmursuz keçəcəyi gözlənilir. Gecə və səhər bəzi yerlərdə zəif duman olacaq. Cənub-qərb küləyi axşam şimal-qərb küləyi ilə əvəz olunacaq.
Havanın temperaturu gecə 11-14, gündüz 17-20 dərəcə isti olacaq. Atmosfer təzyiqi 762 mm civə sütunu, nisbi rütubət isə gecə 80-85 %, gündüz 60-65 % təşkil edəcək.
Azərbaycanın rayonlarında havanın əsasən yağmursuz keçəcəyi gözlənilir. Bəzi yerlərdə arabir duman olacaq. Qərb küləyi əsəcək.
Havanın temperaturu gecə 8-12, gündüz 17-21, dağlarda gecə 3-7, gündüz 8-13 dərəcə isti olacaq.
11-11-2025, 12:29
Avropada Tramp partiyası yaradıldı
Belçikiyada ABŞ prezidenti Donald Trampın şərəfinə TRUMP adlı yeni sağçı siyasi partiya təsis edilib.
Bu barədə “Politico Europe” nəşri məlumat yayıb.
Partiyanın adı fransızca "Tous Réunis pour l'Union des Mouvements Populistes" ifadəsinin qısaltmasıdır və Azərbaycan dilinə “Populist Hərəkatların Birliyi naminə hamı birləşib” kimi tərcümə olunur.
Partiyanın yaradıcısı və lideri Salvatore Nikotra bəyan edib ki, ABŞ prezidenti Donald Tramp populizmin “mütləq simvolu”dur və yeni partiya onun ideyalarını Avropada davam etdirməyi hədəfləyir:
“Donald Tramp populizmin mütləq simvoludur. O, bizim müdafiə etdiyimiz bütün dəyərləri təcəssüm etdirir.”
Nikotranın sözlərinə görə, TRUMP “sağ-populist, lakin sosial yönümlü” bir siyasi hərəkat olacaq. O, həm Belçika səviyyəsində federal seçkilərdə, həm də 2029-cu ildə keçiriləcək Avropa Parlamentinə seçkilərdə iştirak etməyi planlaşdırır.
11-11-2025, 11:54
Sosial şəbəkədə pul tələsi - Polisdən çağırış
Son dövrlər sosial şəbəkələrdə, messencerlərdə və SMS vasitəsilə göndərilən saxta mesajlar, “bonus”, “lotereya”, “mükafat qazandınız” kimi vədlərlə vətəndaşların bank kartı məlumatlarını ələ keçirməyə yönəlmiş cəhdlər var.
Bu haqda Daxili İşlər Nazirliyinin yaydığı məlumatda deyilir.
“Heç bir bank, dövlət qurumu və ya rəsmi platforma vətəndaşlardan kartın PIN kodunu, CVV nömrəsini, kart üzərindəki 16 rəqəmi və ya SMS-lə göndərilən birdəfəlik şifrəni tələb etmir.
Bu cür məlumatların paylaşılması, kart hesabınızda şəxsi vəsaitlərinizin həcmindən asılı olmayaraq oğurlanması ilə nəticələnə bilər”, - məlumatda vurğulanıb.
Qeyd edilib ki, şübhəli linklərə daxil olmayın, sayt ünvanının orijinal olduğuna əmin olun, “pul köçürülməsi”, “hesabınız dondurulub” və ya “kartınız bloklanıb” kimi panika yaradan mesajlara inanmayın. Əgər bu cür hallarla qarşılaşırsınızsa, dərhal 102 Zəng Mərkəzinə və banka məlumat verin.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Bütöv.az
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!