Çexiya prezident Miloş Zeman bu gün İrəvanda Serj Sarkisyanla keçirdiyi brifinqdə anti-Türkiyə mövqeyini ortaya qoydu. O, Çexiya parlamentinin 1915-ci ildə Osmanlı imperiyasında baş verən hadisələrin “erməni soyqırımı” kimi tanınması haqqında məsələyə baxa biləcəyini deyib. Hətta bununla bağlı deputatlara çağırış edəcəyini deyib.


Almaniya Bundestaqının qondarma “erməni soyqırımı” ilə bağlı qətnamə qəbul etməsindən sonra Çexiya prezidentinin bu açıqlaması Avropada mənfi presedent ola biləcəyi ehtimallarını artır.


Politoloq Arzu Nğıayev Publika.az-a açıqlamasında bildirib ki, Almaniya təcrübəsi presedent olmasa da, bəhanəyə çevrilə bilər.


Onun sözlərinə görə, Almaniyanın bu addımı gələcək problemlərin əsasını qoydu: “Əsas problem iki dövlət arasında olan siyasi, iqtisadi və digər münasibətlərlə bağlı olacaq. Bundan sonra miqrant problemlərinə görə münasibətlər pisləşə, hətta NATO-dakı münasibətlərə də xələl gələ bilər. Lakin artıq qətnamə qəbul edilib və ortada fakt var. Almaniya bunu demokratiya kimi izah etsə də, bu millətçilik və skeptlikdən doğur”.

Politoloq qeyd edib ki, Almaniyanın bu addımı Avropanın digər ölkələrində bəhanəyə çevrilə bilər: “Çexiya prezidentinin bu açıqlaması da artıq ilk təcrübəni ortaya qoyur”.

Butov.az xəbər verir ki, politoloq Natiq Miri Publika.az-a bildirib ki, Çexiyanın bu niyyətini açıqlaması əslində Türkiyəyə qarşı təzyiq planının tərkib hissəsidir: “Çünki Türkiyə getdikcə güclü bir dövlətə çevrilir və Qərbin ona təsir imkanları zəifləyir. Bu planın tərkib hissəsində Yaxın Şərq siyasəti də dayanır. ABŞ həm Şimali İraqda, həm də Suriyanın şimalında kürd dövləti yaratmaq istəyir. Türkiyə isə bu siyasətə ən böyük əngəldir”.

N. Miri hesab edir ki, Almaniyadan sonra xristian ölkələrinin bu qondarma soyqırımı ilə bağlı qərarlar qəbul edəcəyi gözləniləndir.

“Almaniyanın bu addımı atmasının arxasında yəhudilərə qarşı törədilən soyqırımının məsuliyyətini bölüşdürməkdir. Onlar göstərmək istəyirlər ki, nasistlər türklərin ermənilərə qarşı törətdiyi soyqırımından nümunə götürərək, yəhudiləri qırıblar. Güman ki, digər Avropa ölkələri də bu prosesi davam etdirəcək. O baxımdan bunu təhlükəli tendensiya adlandıra bilərik”, - deyə o qeyd edib.