Dezinformasiyalar Milli təhlükəsizliyimizə təhdiddir

Azərbaycan uzun illərdir ki, məcburən cəlb edildiyi münaqişə səbəbindən müharibə şəraitində yaşamağa məcburdur. Torpaqlarının böyük bir hissəsinin işğal altında qaldığı bir məmləkətin milli təhlükəsizliyinin və ordu quruculuğunun reallaşmasında dövlətin informasiya təhlükəsizliyi vacib şərtdir. Bu baxımdan mediada və sosial şəbəkədə orduyla bağlı dezinformasiyaların yayılmasında diqqətli olmaq hər bir vətəndaşın üzərinə böyük məsuliyyət qoyur.

Bakı Qızlar Universitetinin böyük zalında tələbə-gənclərin, mətbuat nümayəndələrinin, elm və KİV mütəxəssislərinin iştirakı ilə "Milli təhlükəsizliyimiz vətəndaşlıq mövqeyimizdən asılıdır" mövzusunda keçirilən konfransda da əsas müzakirə mövzusu informasiya təhlükəsizliyi ilə bağlı oldu. Azərbaycan Respublikası Prezidenti yanında Qeyri Hökumət Təşkilatlarına Dövlət Dəstəyi Şurasının maliyyələşdirdiyi "Dezinformasiyalar Milli təhlükəsizliyimizə təhdiddir" layihəsi çərçivəsində keçirilən tədbirin təçkilatçısı "Hərbi Mövzular üzrə İxtisaslaşmış Jurnalistlər" İctimai Birliyi (Hərbi Jurnalistlər Birliyi), təşkilati dəstəkçisi "Bütöv Azərbaycan" qəzeti redaksiyası idi.

Bakı Qızlar Universitetinin rektoru, professor Ağarəhim Rəhimov tədbiri açaraq bildirdi ki, bu sayaq tədbirlərin keçirilməsi olduqca gərəklidir. Çünki dövlətin ən mühüm təhlükəsizlik tərəflərindən biri informasiyaların yayılmasında dövlətçiliyə yönələ biləcək təhlükələrin qarşısının alınmasıdır. Medianın və sosial şəbəkənin olduqca geniş sferanı əhatə etdiyi bir zamanda informasiya yayıcılarının üzərinə ciddi məsuliyyət düşür. Bu sırada orduyla bağlı informasiyaların yayılması daha həssas məqamdır. "Hərbi Mövzular üzrə İxtisaslaşmış Jurnalistlər” İctimai Birliyinin belə bir tədbiri bizim universitetimizdə keçirmək istəyi kollektivimiz tərəfindən məmnuniyyətlə qarşılandı. Müasir gəncliyin dövlətçilik ruhunda böyüməsi və dövlət təhlükəsizliyinin həssas məqamları ilə bağlı bilgili olmaları ciddi şərtdir. İnanıram ki, bu günkü müzakirələr işgüzar şəraitdə keçəcək və müəllim-tələbə kollektivi də bu müzakirələrdə fəal iştirak edəcək. Konfransın işinə uğur dilyirəm.

Tədbirin aparıcısı Bakı Qızlar Universitetinin elmi işlər üzrə prorektoru, filologiya üzrə fəlsəfə doktoru İlham Məmmədli tədbirin məqsəd və məramı barədə qısa məlumat verdikdən sonra şəhidlərin xatirəsi ehtiramla yad olundu.

Hərbi Jurnalistlər Birliyinin sədri - layihə rəhbəri Tamxil Ziyəddinoğlu mövzu üzrə məruzə etdi. Qeyd olundu ki, Azərbaycan Konstitusiyası hər kəsə istədiyi məlumatı əldə etmək və yaymaq azadlığı verib. 1998-ci ildə senzura ləğv edilib. Dövlətimiz mətbuat üzərində nəzarətdən imtina edib. Media layihələrinin maliyyələşdirilməsinə 20 milyon manatdan artıq vəsait ayırıb. Ölkədə 40-a yaxın gündəlik, 200-dən artıq həftəlik və aylıq qəzet, 100-ə yaxın jurnal, 52 televiziya və radio kanalı, 30-a yaxın informasiya agentliyi, 300-dən artıq internet portalı fəaliyyət göstərir. "KİV haqqında", "Rabitə haqqında", "İnformasiya əldə etmək haqqında" qanunların qəbul edilməsi şəffaflıq yaratmaqla bərabər sərhədləri aşan informasiyaların ayaq açmasına da geniş meydan verib. Belə ki, 9,6 milyon əhalisi olan ölkədə 2 milyona yaxın sosial şəbəkə istifadəçisi var. "Az" domenində 20 min internet saytı qeydiyyatdan keçib. Bütün bunlar onu göstərir ki, Azərbaycan dövləti söz, məlumat və fikir azadlığının təmin edilməsində onlayn media və sosial şəbəkələrin yaradılmasında maraqlıdır.
Təəssüf ki, virtual informasiya məkanının genişlənməsi, milli informasiya mühitinin pozulması beynəlxalq və yerli ictimai rəyin idarə olunmasına, siyasi proseslərin yönləndirilməsinə cəhd edənlərə münbit şərait yaradır. Transmilli informasiya siyasəti sərhədlərimizi asanlıqla aşaraq ölkəmizin imicinə, milli təhlükəsizliyimizə ciddi təsir göstərir.

Xalqımız 1990-cı illərdə Dağlıq Qarabağda hərbi əməliyyatlar zamanı ayrı-ayrı "ekspertlərin", kütləvi informasiya vasitələrinin qeyri-peşəkar, qanunlara və milli maraqlara zidd, bəzi hallarda təxribatçı fəaliyyətinin acısını dadıb. O vaxt bəzən Azərbaycan silahlı birləşmələrinin əməliyyat planı əvvəlcədən qəzet səhifələrində müzakirə olunur, hərbi arsenalın həcmi, hərbi hissələrin zəif mövqeləri, düşmənlə üzbəüz yaşayış məntəqələrində əhalinin sayı dəqiqliklə təsvir edilirdi. Düşmən kəşfiyyatı mətbuatı izləməklə özünə lazım olan informasiyanı asanlıqla əldə edə bilirdi. Sərhədyanı zonalarda yaşayan əhalinin sosial problemlərini, təhlükəsizlik məsələlərini qabardaraq əhalini həmin əraziləri tərk etməyə təşviq edirdilər. Torpaqlarımızın işğal olunması da, milli təhlükəsizliyimizə cavabdeh dövlət qurumu olan MTN-nin bir müddət milli təhlükə mənbəyinə çevrilməsi də məhz qeyd olunanların təzahürüdür.

Bu layıhəni həyata keçirməkdə məqsədimiz sizlərin- tələbə gənclərimizin, sosial media istifadəçilərinin fəal köməyilə Azərbaycanın müstəqilliyi, suverenliyi, ərazi bütövlüyü, konstitusiya quruluşu və milli təhlükəsizliyi əleyhinə qəsd cəhdlərinə, o cümlədən cəmiyyətin informasiya təhlükəsizliyini təhdid edən hallara qarşı mübarizədə dövlət orqanlarına informasiya dəstəyi verməkdir. Jurnalistlərimizə, əsasən də sosial şəbəkə fəallarına, erməni qoşunları ilə təmas xəttində yaşayanlara vətəndaşlıq mövqeyi aşılamaq, onları ölkəmizin mənafeyini qorumağa, informasiya siyasətini müdafiə etməyə, cəbhə xəttindəki insidentlər haqqında təhrif olunmuş və yanlış məlumatların yayılmasının qarşısını almaq istiqamətində maarifləndirməkdir.

Azərbaycan Respublikası Prezidenti yanında Qeyri Hökumət Təşkilatlarına Dövlət Dəstəyi Şurasının maliyyə dəstəyi ilə hazırlanmış bukletlərdə sosial media istifadəçilərinə aid tövsiyyələr var. Hər birinizdən xahiş olunur ki, onları yaxınlarınızla, paylaşın. Çünki milli təhlükəsizliyimiz hər birimizin nümayiş etdirdiyi vətəndaşlıq mövqeyindən çox asılıdır.

Məruzəçi öz çıxışında şahidi olduğu hadisələrdən nümunələr çəkdi və belə halların təkrarlanmasının dövlətçiliyimizə təhlükə yaratdığını vurğuladı, gəncləri informasiya yayarkən ayıq -sayıq olmağa çağırdı.
İlham Məmmədli müasir dünyada dövlətlər arasındakı mübarizənin hərb meydanından daha çox informasiya məkanında getdiyini bildirərək torpaqları işğal altında olan bir ölkə vətəndaşlarının bu reallıqları daim diqqətdə saxlamalarını diqqətə çatdırdı. Qeyd etdi ki, Qarabağ münaqişəsini donmuş münaqişə adlandırmaq olmaz. Çünki ərazisinin işğal altında saxlanılması ilə Azərbaycan xalqı əbədiyyən barışmaz və bu müharibənin gec, ya tez baş verməsi qaçılmazdır. Yaxşı olardı ki, bədnam qonşularımız bu həqiqəti zamanında dərk edəydilər və sonda münaqişə sülh şəraitində tənzimlənəydi. Elə aprel ayının 2-5 arasında baş verən hadisələr də bunu bir daha göstərdi. Ordumuz düşmənə layiqli cavab verdi və qarşı tərəf də anladı ki, "nə müharibə, nə sülh" prosesi əbədi davam edə bilməz.
[center]
Professor Ağarəhim Rəhimov çıxışların və onlar ətrafında gedən müzakirələrin olduqca faydalı və işgüzar şəraitdə keçirilməsindən məmnunluğunu bildirərək qeyd etdi ki, bu sayaq tədbirlərin davamlı olması cəmiyyətə ancaq xeyir gətirə bilər. Çünki bu gün media və sosial şəbəkədə informasiya təhlükəsizliyi ilə bağlı bir çox incə məsələlər ciddi şəkildə pozulur. İnformasiya yayımında bir pərakəndəlik hökm sürür. Televiziyalarda bayağı verilişlər baş alıb gedir. Digər media qurumlarında da vəziyyət ürəkaçan deyil. Bunlar isə sonda informasiya siyasətimizə öz mənfi təsirini göstərir. Bu günkü tədbirin təşkili bizim hamımıza çox şey öyrətdi. Mən istəyirəm ki, tələbələrimiz, elə müəllimlərimiz də müzakirə elədiyimiz məsələləri cəmiyyətə transfer etsinlər. Bu yalnız milli mənafeyimizə və milli dövlətçiliyimizə xidmət edər.

Yazıçı-publisist Miraslan Bəkirli: “Milli təhlükəsiliyə xidmət elə milli-mənəvi dəyərlərimizə xidmətdir, balalarımıza, babalarımıza xidmətdir. Balalarımızın sabahına, sağlamlığına, təlim-tərbiyəsinə, bir vətəndaş kimi yetişməsinə xidmətdir. Babalarımızın ""ban ev" deyib qurduğu yurdlara, yatdığı torpağa-qəbir evlərinin qorunmasına xidmətdir. Bütün zamanlarda bizim torpaqlarımıza - baba əmanətlərimizə təcavüz olub, elə bu milli sərvətlərimizə təcavüzdür. Millətin "milli təhlükəsizlik" dediyimiz məfhumu elə millətin özüdü, sözüdü, dili, dini, abidələri, torpaqları, sərhədləri, sərvətləridi. Zaman-zaman sinəsi müharibələrə meydan olan məmləkətimizin bu gün təhlükəsizliyə daha çox ehtiyacı var. İşğal olunan torpaqlarımızın azadlığı və itirdiklərimizin qaytarılması üçün məhz dövlətimizin milli təhlükəsizliyinə daha çox ehtiyac var. Bu da "azərbaycanlıyam", "türkəm" deyən hər kəsin vətəndaşlıq borcudu. Bircə satqın kifayətdir ki, bir ləşkəri bada versin, yaxud bircə təxribat bəsdir ki, on illərlə yığılanlar bircə anın içində məhv olsun. Bu baxımdan bu işdə siz gələcək anaların, müəllimlərin daha çox xidməti ola bilər. Bizim vətənə hər cür xidmət, xüsusilə də milli təhlükəsizliyə vətəndaş yanğısı ilə yanaşmaq müqəddəs borcumuzdu.”

Digər çıxış edənlər, dövlətimizin müstəqilliyinin bərpasından sonra dezinformasiyaların cəmiyyətdə yaratdığı çaşqınlıq və törətdiyi ciddi fəsadlar barədə bilgilərini bölüşdülər. Universitetin müəllimi dosent Pərişan Həsənova informasiya təhlükəsizliyilə bağlı fikirlərini çatdıraraq, belə tədbirlərin respublikamızın hər yerində, əsasən də ali təhsil müəssisələrində, gənclərimizin çoxluq təşkil etdiyi sahələrdə keçirilməsini təklif etdi. Fəal müzakirələrə qoşulan tələbələr öz fikir və mülahizələrini səsləndirdilər. Respublikamızda aparılan ordu quruculuğu və aprel döyüşləri barədə suallarına cavab aldılar.
[center]


Konfransdan gəlinən ümumi qənaət belə oldu ki, bu cür tədbirlər təmiz, saf gənclərimizin ayıqlaşmasına, dövlətimizə ziyan vura biləcək informasiyaların qarşısının alınmasına təkan verəcək.

Sosial media istifadəçiləri üçün yaddaş bukleti paylandıqdan sonra tələbələr jurnalistlər və digər qonaqlarla xatirə şəkli çəkdirdilər.

P.S Hərbi Jurnalistlər Birliyinin İdarə Heyəti Bakı Qızlar Universitetinin rəhbərliyinə, tələbə-müəllim kollektivinə tədbirin yüksək səviyyədə təşkilinə və müzakirələrdə fəal iştiraklarına görə minnətdarlığını bildirir.

HJB Mətbuat Xidməti


[center]