“Mediamızın fəaliyyətində, hərbi mövzularla bağlı peşəkarlığın artmasında xeyli irəliləyiş var. Bu məsələyə geniş yer ayırmazdan əvvəl qeyd etməliyəm ki, Azərbaycan Mətbuat Şurasının bəyanatı yerinə düşdü. Çünki sosial mediada, xüsusən, təcrübəsi az olan Facebook istifadəçisi gənclərimiz bəzən sevincək olaraq dəqiqləşdirilməmiş məlumatları yayırlar, bəzən də erməni tərəfinin yaydığı dezinformasiyaları bilmədən tirajlayırlar.”.

Bunu Moderator.az saytına açıqlamasında Hərbi Mövzular üzrə İxtisaslaşmış Jurnalistlər Birliyinin sədri Tamxil Ziyəddinoğlu bildirib.Onun fikrincə, ümumilikdə medianın, ayrı-ayrı qələm adamlarının, QHT nümayəndələrinin bu dəfəki fəaliyyəti yüksək qiymətləndirilməlir:

Mətbuaat Şurasının vaxtında verilmiş bəyanatı bu baxımdan çox faydalı oldu. Diqqətə çatdırıldı ki, pozitiv və neqativ məzmunundan asılı olmayaraq düşmən qüvvələr ümumən Azərbaycanın milli maraqlarına uyğun olmayan, beynəlxalq imicinə ləkə gətirən xəbərləri də dövriyyəyə buraxırlar. Bütün bunlara görə Azərbaycan Mətbuat Şurası bir daha ölkəmizin bütün kütləvi informasiya vasitələrini, ayrı-ayrı jurnalistləri cəbhə xəttində baş verənlərlə bağlı məlumatların təqdimatına həssas yanaşmağa, ciddi şəkildə dəqiqləşdirmələr aparmağa çağırır. Qurum eyni zamanda əlaqədar dövlət qurumlarına hazırkı vəziyyətlə bağlı daha çevik fəaliyyət göstərməyi, cəmiyyətin informasiya tələbatını vaxtında ödəmək üçün bütün mümkün vasitələri dəyərləndirməyi tövsiyə edir. Ümumilikdə mediamızın, ayrı-ayrı qələm adamlarının, QHT nümayəndələrinin bu dəfəki fəaliyyəti yüksək qiymətləndirilməlidir. Tək-tək hallar istisna olmaqla hiss edilir ki, hər kəs vətəndaşlıq mövqeyindən çıxış edir. Bunun nəticəsində də xalqda ruh yüksəkliyi daha da artır. Müdafiə Nazirliyi mətbuat xidmətinin fəaliyyətini də təqdir etmək lazımdır. Çünki gün ərzində cəbhə xəbərlərini bir neçə dəfə yeniləyərək yanlış məlumatların yayılması üçün boşluq buraxmır. İzləyirsinizsə, bu dəfə xarici KİV-lər və digər qurumlar da Azərbaycan Müdafiə Nazirliyinin məlumatlarına istinad edirlər. Əminəm ki, bu məlumatlar dəqiq və operativ olmasa, düşmən ölkələrin kəşfiyyat xidmətləri dərhal hay-küy qopararlar. Sevindirici hallardan biri də odur ki, bu həssas məqamlarda kimsə, yanlışlıq edəndə dərhal ictimai məzəmmətlə qarşılaşır ki, bu da ümumi işimizin xeyirinədir. Bir sözlə istər operativlik baxımdan, istərsə də vətəndaşlıq mövqeyi baxımdan jurnalistlərimizi alqışlamaq olar. Son olaraq Silahlı qüvvələrimizə də, qələm dostlarımıza da uğurlar diləyirəm. Azərbaycan əsgərinin ayaq səsi, həniri üçün darıxmış torpaqlarımızda dalğalandırılan bayrağımız jurnalistlərimizi də qürurlandırır”.

Elmin Nuri