8-01-2026, 16:13
Paşinyan Vardanyanla Karapetyanı bir daha “vurdu”: Səhv etmişəm
Ermənistanın baş naziri Nikol Paşinyan qalmaqallı erməni oliqarxlar Ruben Vardanyan və Samvel Karapetyanla bağlı danışıb.
Paşinyan jurnalistlərə açıqlamasında deyib ki, Ermənistan cəmiyyətində və elə onun özündə də həmin oliqarxlar barəsində yanlış təsəvvür yaranıb: əvvəllər onların xeyriyyəçi olduqlarını düşünüblər, amma indi yox.
Paşinyan jurnalistin “niyə əvvələr onlara xeyriyyəçi kimi alqış edirdiniz, amma indi yox” sualına cavabında səhv edtiyini deyərək belə cavab verib:
"Sonradan məlum oldu ki, bütün bunlar yanlış təsəvvür imiş. İqtisadi maraq var: maraq varsa, investisiya olacaq; yoxdursa, investisiya olmayacaq", - deyə Paşinyan Vardanyanla Karapetyanın niyə Ermənistana milyonlarla dollar yatırdıqlarına aydınlıq gətirib.
O, qeyd edib ki, 1992-ci ildən 2018-ci ilə qədər Ümumerməni Fondu ilə əməkdaşlıq yolu ilə Ermənistana nə qədər pul toplandığını və yatırıldığını araşdırdıqdan sonra buna əmin olublar.
Xatırladaq ki, Ruben Vardanyan hazırda Azərbaycanda həbsdə, Semvel Karapetyan isə Ermənistanda ev dustaqlığındadır.
8-01-2026, 16:04
Məhkəmə Ədalət Verdiyevlə bağlı qərar verdi
Dövlət sirri təşkil edən məlumatları yaymaqda təqsirləndirilən hərbi ekspert Ədalət Verdiyev cəzanın çəkilməmiş hissəsindən azad olunmaq üçün Nəsimi rayon Məhkəməsinə müraciət edib.
Məhkəmənin qərarı ilə müraciət təmin edilməyib və hökm qüvvədə saxlanılıb.
Ədalət Verdiyev məhkəmənin qərarından apellyasiya şikayəti verib. Bakı Apellyasiya Məhkəməsində hakim Faiq Qəniyevin sədrliyi ilə keçirilən prosesdə şikayətin təmin edilməməsi qərara alınıb.
Xatırladaq ki, Ədalət Verdiyev 2024-cü ilin noyabr ayında saxlanılıb. O, Cinayət Məcəlləsinin 284.1 (dövlət sirrini yayma) və 308.2-ci (ağır nəticələrə səbəb olan vəzifə səlahiyyətlərindən sui-istifadə) maddələri ilə təqsirləndirilən şəxs qismində cəlb edilərək barəsində müstəntiqin vəsatəti və ibtidai araşdırmaya prosessual rəhbərliyi həyata keçirən prokurorun təqdimatı əsasında Binəqədi rayon məhkəməsinin qərarı ilə həbs qətimkan tədbiri seçilib.
Nəsimi Rayon Məhkəməsinin hökmü ilə Cinayət Məcəlləsinin 284.1-ci maddəsi ilə təqsirli bilinərək 2 il müddətə dövlət və yerli özünü idarəetmə orqanlarında rəhbər və maddi-məsul vəzifə tutmaq hüququndan məhrum edilməklə 3 il müddətə azadlıqdan məhrum etmə cəzasına məhkum edilib. Ona təyin olunmuş cəza Cinayət Məcəlləsinin 70-ci maddəsinə uyğun olaraq 1 il sınaq müddəti müəyyən edilməklə şərti hesab olunub və o, məhkəmə zalından azadlığa buraxılıb.
8-01-2026, 15:58
“Azərişıq”ın Naxçıvan idarəsinin rəisi və şöbə müdiri işdən çıxarıldı
“Azərişıq” Açıq Səhmdar Cəmiyyətinin (ASC) Naxçıvan idarəsinin rəisi və şöbə müdiri vəzifədən azad edilib.
Bununla bağlı ASC-nin sədri Vüqar Əhmədov müvafiq əmr imzalayıb. Əmrə əsasən, Naxçıvan Regional Enerji Təchizatı və Satış İdarəsinin rəisi Nemət Qasımov tutduğu vəzifədən azad olunub.
Qeyd edək ki, N. Qasımov bu vəzifəyə ötən ilin may ayında təyin olunub.
Eyni zamanda, “Azərişıq” ASC-nin Naxçıvan Regional Enerji Təchizatı və Satış İdarəsinin (RETSİ) satış şöbəsinin rəisi Emil Əkbərli də tutduğu vəzifədən azad edilib.
8-01-2026, 15:46
Regional Təhsil İdarəsində yeni təyinat
Gəncə-Daşkəsən Regional Təhsil İdarəsinin Goranboy-Naftalan rayonları üzrə təhsil sektoruna müdir təyinatı olub.
Bu barədə Regional Təhsil İdarəsindən bildirilib.
Vüsal Cəfərov 20 may 2025-ci il tarixindən Goranboy-Naftalan rayonları üzrə təhsil sektorunun müdiri vəzifəsini icra edirdi. O, 6 yanvar 2026-cı il tarixindən etibarən Goranboy-Naftalan rayonları üzrə təhsil sektorunun müdiri vəzifəsinə təyin edilib.
8-01-2026, 15:24
Media subyektləri vergidən azaddır, bəs jurnalistlər? - RƏSMİ
2023-cü ildən etibarən media subyektlərinin media fəaliyyəti üzrə əldə etdikləri gəlirlər, o cümlədən reklam gəlirləri və dövlət tərəfindən verilən maddi yardımlar vergidən azad edilib. Həmçinin bu vergi güzəştlərinin müddəti 2026-cı il yanvarın 1-dən etibarən daha 3 il uzadılıb.
Bununla yanaşı, Azərbaycanda 2019-cu ildən qüvvədə olan və özəl sektorda çalışanlar üçün tətbiq edilən gəlir vergisi üzrə güzəşt müddətinin 2026-cı il yanvarın 1-də başa çatması muzdlu işdən aylıq gəlir əldə edən fiziki şəxslərin gəlir vergisi öhdəliklərinin yeni qaydada formalaşmasına səbəb olub.
Bu dəyişikliklər media sahəsində çalışan jurnalistlər və digər əməkdaşlar arasında suallar yaradıb. Ən çox müzakirə olunan məqam isə media subyektlərinə tətbiq edilən vergi azadolmalarının media qurumlarında çalışan şəxslərin əməkhaqqı gəlirlərinə şamil olunub-olunmamasıdır.
Məsələ ilə bağlı “APA”ya İqtisadiyyat Nazirliyi yanında Dövlət Vergi Xidmətindən bildirilib ki, media subyektləri üçün nəzərdə tutulmuş vergi güzəştləri yalnız media fəaliyyəti nəticəsində əldə edilən gəlirlərə şamil olunur. Yəni, bu azadolmalar media subyektlərinin sahibkarlıq fəaliyyəti nəticəsində əldə etdikləri gəlir (mənfəət), o cümlədən reklam gəlirləri və müvafiq icra hakimiyyəti orqanının müəyyən etdiyi qurum tərəfindən verilən maddi yardımlar üçün nəzərdə tutulub.
Qurumdan vurğulanıb ki, media subyektlərində çalışan jurnalistlərin və digər əməkdaşların əməkhaqqı gəlirləri isə dəyişməz olaraq gəlir vergisinə cəlb edilir. Bu sahədə hər hansı yeni azadolma və ya güzəşt tətbiq olunmur. Media subyekti özəl sektorda fəaliyyət göstərirsə, əməkhaqqı üzrə gəlir vergisi aşağıdakı dərəcələrlə hesablanır:
• aylıq gəlirin 2500 manatadək olan hissəsindən – 3 faiz,
• 2500–8000 manat arası olan hissəsindən – 10 faiz,
• 8000 manatdan yuxarı olan hissəsindən – 14 faiz.
“Media subyektlərinə tətbiq edilən digər vergi güzəştləri — yəni VÖEN-i olan media subyektlərinin sahibkar kimi əldə etdikləri gəlirlərin (mənfəətin) və media məhsullarının təqdim edilməsinin vergidən azad edilməsi — əməkhaqqı gəlirlərinə aid deyil.
Belə ki, media məhsullarının təqdim edilməsinə tətbiq olunan ƏDV azadolması, habelə gəlir (mənfəət) vergisi üzrə güzəştlər yalnız media subyektlərinin fəaliyyəti nəticəsində formalaşan gəlirləri əhatə edir və işçilərin əməkhaqqının vergiyə cəlb olunmasına təsir göstərmir” -məlumatda qeyd edilib.
8-01-2026, 15:07
Bu müəllimlərin attestasiyası başa çatdırılacaq
Azərbaycan Respublikası Mədəniyyət Nazirliyinin Bakı şəhər, Abşeron-Xızı, Quba-Xaçmaz, Mil-Muğan, Şirvan-Salyan Regional Mədəniyyət idarələri üzrə fəaliyyət göstərən incəsənət məktəb və mərkəzlərində çalışan təxminən 4 000 müəllimin attestasiya prosesi yekunlaşdırılıb.
Bu barədə Mədəniyyət Nazirliyindən məlumat verilib.
Bildirilib ki, fevralın 10-dan etibarən Mərkəzi Aran Regional Mədəniyyət İdarəsinin tabeliyində fəaliyyət göstərən incəsənət məktəb və mərkəzlərindən başlayaraq digər regional idarələr üzrə il ərzində ümumilikdə 8 000-ə yaxın müəllimin attestasiya prosesinin mərhələli şəkildə başa çatdırılması planlaşdırılır.
Attestasiya Bakı şəhərində, Bakı Xoreoqrafiya Akademiyasında əvvəlki qaydalar əsasında həyata keçiriləcək.
Müəllimlərin bu məqsədlə ayrılmış nəqliyyat vasitəsilə Bakı şəhərinə gəliş-gedişi təmin olunacaq.
8-01-2026, 14:59
"Azərişıq"da idarə rəisi işdən çıxarıldı
"Azərişıq" ASC-nin Sumqayıt Regional Enerji Təchizatı və Satışı İdarəsinin rəisi Həbib Əzizov vəzifəsindən azad edilib.
Müvafiq qərarla onun yerinə "Azərişığ"ın Qərb Regional Enerji Təchizatı və Satışı İdarəsinin rəisi Elmar Mahmudov təyin olunub.
Qeyd edək ki, kadr dəyişikliyi ilə bağlı qərar "Azərişıq" rəhbərliyi tərəfindən verilib.
8-01-2026, 14:37
Azərbaycana hansı malları satacağımızı araşdırırıq - Paşinyan
Ermənistan və Azərbaycan potensial ticarət üçün mal siyahılarını mübadilə üçün araşdırır.
Bunu Ermənistanın Baş naziri Nikol Paşinyan hökumətin iclasından sonra keçirilən brifinqdə bildirib.
"Hazırda proseslər davam edir - Ermənistan və Azərbaycan satmaq və ya almaqda maraqlı ola biləcəkləri potensial mal siyahılarını mübadilə edir", - Paşinyan qeyd edib.
Hökumətin Azərbaycan benzinini kimin alacağını necə müəyyən etdiyinə dair şərhində Paşinyan bazarın əvvəlcədən araşdırıldığını və bu fürsəti siyasi oyuna çevirməyəcək iş adamlarına təklif verildiyini qeyd edib.
Paşinyanın sözlərinə görə, Azərbaycan neft məhsullarının ilk partiyası Ermənistana daxil olarkən bəzi erməni pərakəndə satıcılar həmin benzinini satmaqdan imtina ediblər.
Onun sözlərinə görə, bir neçə göndərişdən sonra bazarın və imkanların hər kəs üçün açıq olduğu aydın olacaq. Və istəyən hər kəs Azərbaycan benzinindən yararlana biləcək.
Bir gün əvvəl Azərbaycanın Ermənistana ikinci və daha böyük həcmdə neft məhsulları göndərəcəyi açıqlanıb.
Ötən ilin dekabr ayında Ermənistana ilk dəfə Azərbaycan benzini göndərilib - Gürcüstan vasitəsilə 1200 ton neft məhsulları daşınıb.
8-01-2026, 14:23
Paşinyan II Qaregini hədələdi - Baş nazir kimi danışıram
“Serj Sarkisyanın (Ermənistanın üçüncü prezidenti – red.) da getmək niyyəti yox idi, amma məcbur edildi. Eyni şey Ktriç Nersisyana (Bütün Ermənilərin Katolikosu II Qaregin – red.) da aiddir; o, getməyə məcbur olacaq”.
Bunu Ermənistanın Baş naziri Nikol Paşinyan jurnalistlərlə söhbətində bildirib.
"Deyirlər ki, Ktriç Nersisyanın getmək niyyəti yoxdur. Biz onun fikrini dəyişməsinə əmin olacağıq. Heç kimin getmək niyyəti yoxdur", - deyə o qeyd edib.
Paşinyan bunu heç bir qarışıqlıq olmadan və "xristian tolerantlığı və sevgisi ilə dolu" edəcəyinə əminlik verib.
“Mən həm Ermənistan Apostol Kilsəsinin davamçısı kimi, eyni zamanda həm də Ermənistanın Baş naziri kimi danışıram”, - Paşinyan deyib.
8-01-2026, 13:55
Silah alveri edənlər tutuldu
Bərdə Rayon Polis Şöbəsinin əməkaşları tərəfindən həyata keçirilən əməliyyat-axtarış tədbirləri nəticəsində qanunsuz olaraq odlu silahların əldə edilməsi və satışı ilə məşğul olan iki nəfər saxlanılıb.
DİN-in Mətbuat Xidmətinin regional qrupundan verilən məlumata görə, tədbirlərlə müəyyən edilib ki, Ağcabədi rayon sakini 25 yaşlı Sahil Kərimzadə və onunla qabaqcadan əlbir olan həmyerlisi 27 yaşlı İntiqam Rüstəmov qanunsuz odlu silahların satışını təşkil ediblər.
Qrup üzvlərindən biri, S.Kərimzadə, Bərdə rayonu ərazisində idarə etdiyi avtomobillə hərəkətdə olarkən Bərdə Rayon Polis Şöbəsinin əməkdaşları tərəfindən saxlanılıb. Avtomobilə baxış zamanı yük yerindən pul müqabilində satmaq üçün gətirdiyi 2 ədəd “Kalaşnikov” markalı avtomat, həmin silahlara aid 2 ədəd patron darağı və 60 ədəd patron aşkar olunaraq götürülüb.
Tədbirin davamı olaraq odlu silah-sursatı qanunsuz şəkildə əldə edərək saxlayan İ.Hüseynov da Xocavənd rayonu ərazisində saxlanılaraq Bərdə RPŞ-yə gətirilib.
Onlardan ümumilikdə 4 ədəd “Kalaşnikov” avtomatı, 4 patron darağı və 60 ədəd patron götürülüb.
Faktla bağlı Cinayət Məcəlləsinin müvafiq maddələri ilə cinayət işi başlanıb.
Cinayət işi üzrə istintaq tədbirləri davam etdirilir.
Sorğu
Saytımızda hansı mövzulara daha çox yer verilməsini istəyirsiniz?
Son buraxılışımız
Facebook səhifəmiz
Reklam
Hava
Valyuta
Reklam
Sayğac
Ən çox baxılanlar
Köşə
Xəbər lenti
Foto
Tanınmış telejurnalist vəfat edib
Tanınmış telejurnalist Nailə Əkbərova vəfat edib.
Bu barədə onun dostları məlumat yayıblar.
O, ağır xəstəlikdən əziyyət çəkirmiş.
Əkbərova Nailə Ənvər qızı 27 avqust 1963-cü ildə Şamaxı şəhərində anadan olub. Azərbaycan Dövlət Mədəniyyət və İncəsənət Universitetinin məzunudur. 1981-ci ildən Azərbaycan Dövlət Televiziyasında çalışmağa başlayıb. 1997-2006-cı illərdə musiqi verlişləri baş redaksiyasında baş rejissor vəzifəsində çalışıb.
2006-ci ildə “Space” telekanalında bir neçə verlişin rejissoru işləyib. 2009-cu ildən TRT telekanalının əməkdaşıdır. TRT Avaz-da yayımlanan “Qafqazlara əsən yellər” proqramının müəllifi, rejissoru və aparıcısı olub. Azərbaycanda ilk klip yaradıcılarındandır.
Allah rəhmət etsin!
Video
"Vətən Qəhrəmanları" Şəhid İlyas Nəsirov
All rights reserved ©2012 Butov.az
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!
Created by: Daraaz.net Wep Developer By DaDaSHoV
MATERİLLARDAN İSTİFADƏ EDİLƏRKĦƏN PORTALIMIZA İSTİNAD ZƏRURİDİR!!!